Kapitlu 38

X’Hemm Lest Għalija fil-​Futur?

“JIEN nibżaʼ mill-​futur, futur f’dinja karatterizzata minn theddid nukleari.” Hekk tkellem żagħżugħ Ġermaniż f’diskors lill-​iktar uffiċjal politiku għoli tan-​nazzjon tiegħu.

Forsi bl-​istess mod, il-​ħsieb tal-​biżaʼ li tmut fi splużjoni nukleari qed jiddomina l-​ħarsa tiegħek dwar il-​futur. “Għalfejn noqgħod inħabbel rasi biex inġib marki tajbin?” staqsa wieħed żagħżugħ. “Id-​dinja se tisplodi xorta waħda.” Tabilħaqq, fi stħarriġ li sar fost xi tfal taʼ l-​iskola, is-​subien semmew il-​gwerra nukleari bħala l-​akbar biżaʼ tagħhom. Il-​bniet poġġewha fit-​tieni post, u qabilha kien hemm biss il-​biżaʼ tal-​‘mewt tal-​ġenituri.’

Madankollu, splużjoni nukleari m’hijiex l-​unika sħaba sewda li tidher fuq ix-​xefaq. It-​theddida taʼ “popolazzjoni kbira wisq, eżawriment tar-​riżorsi, it-​tniġġis taʼ l-​ambjent,” u diżastri imminenti oħrajn wasslu lill-​psikologu famuż B. F. Skinner biex jikkonkludi: “L-​ispeċi tagħna issa tidher mhedda.” Iktar tard hu stqarr: “Jien pessimist ħafna. M’aħniex se nsolvu l-​problemi tagħna, żgur.”

Ladarba saħansitra osservaturi li huma taʼ skola jħarsu lejn il-​futur bi tregħid, m’hijiex ħaġa taʼ l-​iskantament li ħafna żgħażagħ juru l-​attitudni: “Nieklu u nixorbu, għax għada mmutu.” (1 Korintin 15:32) Tabilħaqq, jekk il-​futur tiegħek jistrieħ fuq l-​abbiltà taʼ xi politikanti jew xjenzati, bilfors li jidher imdallam. Għax Ġeremija 10:23 jgħid: “Triq il-​bniedem m’hijiex f’idejh, anqas min jimxi ma jistaʼ jiddirieġi l-​passi tiegħu.”

 M’hijiex biss kwistjoni taʼ li l-​bniedem m’għandux l-​abbiltà li jiggverna lilu nnifsu. Innota li ‘m’hijiex f’idejn’ il-​bniedem li jagħmel hekk​—m’għandu l-​ebda dritt li jiddetermina l-​futur taʼ l-​art. B’hekk, l-​isforzi tiegħu huma kundannati li jfallu. Minħabba f’hekk, Ġeremija talab għal intervent divin: “O Mulej, widdibni, imma bil-​ħaqq.” (Ġeremija 10:​24, KŻ) Dan ifisser li l-​Ħallieq tagħna se jiddetermina l-​futur tagħna. Imma x’se jkun dan il-​futur?

L-​Iskop t’Alla għall-​Art​—U l-​Futur Tiegħek

Ftit wara l-​ħolqien tal-​bniedem, Alla qal lill-​ewwel koppja umana: “Nisslu u oktru, u imlew l-​art, u aħkmuha; u saltnu fuq il-​ħut tal-​baħar u t-​tajr taʼ l-​ajru u l-​ħlejjaq kollha li jitkaxkru fuq l-​art.” (Ġenesi 1:28) B’hekk, il-​bniedem kien preżentat bil-​prospett li jgħix f’ġenna globali.

Madankollu, l-​ewwel koppja rribellat kontra l-​ħakma t’Alla. Bħalma qal Salamun iktar tard, “Alla għamel il-​bniedem dritt, iżda huma jfittxu tagħwiġ bla għadd.” (Koħèlet 7:29) Ġara li l-​pjanijiet umani kienu diżastrużi, billi lill-​ġenerazzjoni preżenti ħallewlha wirt taʼ miżerja u prospetti futuri tal-​biki.

Ifisser dan li Alla abbanduna l-​art biex issir globu mniġġes, radjoattiv, u forsi bla ħajja? Ma jistax ikun! Hu dak li “sawwar l-​art, għamilha u wettaqha, ma ħalaqhiex għall-​baħħ, sawwarha biex jgħammru fiha.” B’hekk, l-​iskop stabbilit tiegħu għall-​art żgur li se jitwettaq!​—Isaija 45:18; 55:​10, 11.

Imma meta​—u kif? Aqra Luqa kapitlu 21 għalik innifsek. Hemmhekk Ġesù bassar proprju l-​istess problemi li laqtu lill-​umanità matul dan is-​seklu: gwerer  internazzjonali, terremoti, mard, skarsezzi t’ikel, kriminalità mifruxa. Dalwaqt ferm, il-​kliem taʼ Ġesù se jitwettaq: “Meta jibda jseħħ dan kollu, qawwu qalbkom u erfgħu raskom, għax il-​fidwa tagħkom hi fil-​qrib. . . . Meta taraw dan jiġri, kunu afu li s-​Saltna taʼ Alla hi fil-​qrib.”​—Luqa 21:​10, 11, 28, 31.

Dik is-​Saltna hija l-​muftieħ għall-​futur tiegħek. Fi kliem sempliċi, hija gvern, il-​mezz t’Alla biex jaħkem l-​art. Dak il-​gvern tas-​Saltna se jieħu bil-​forza l-​kontroll taʼ l-​art minn idejn il-​bnedmin. (Danjel 2:44) “Dawk [infushom] li qegħdin jeqirdu d-​dinja” se jiffaċċjaw ir-​rovina minn idejn Alla, hekk kif hu jsalva l-​art​—u l-​umanità—​mit-tbiċċir taʼ l-​abbuż uman.​—Apokalissi 11:18; Koħèlet 1:4.

Billi tkun fis-​sigurtà taħt it-​tmexxija tas-​Saltna t’Alla, l-​art bil-​mod il-​mod se ssir ġenna globali. (Luqa 23:43) B’hekk se jkun hemm mill-​ġdid bilanċ ekoloġiku perfett. Oħroġ il-​għaġeb, se jkun hemm ukoll armonija bejn il-​bniedem u l-​bhima. (Isaija 11:​6-9) Il-​gwerer u l-​armi tal-​gwerra se jisparixxu. (Salm 46:​9, 10 [46:​8, 9, NW]) Il-​kriminalità, il-​ġuħ, in-​nuqqas taʼ djar, il-​mard​—saħansitra l-​mewt infisha—​se jiġu  eliminati kollha. L-​abitanti taʼ l-​art “bi sliem kotran jitgħaxxqu.”​—Salm 37:​10, 11; 72:16; Isaija 65:​21, 22; Apokalissi 21:​3, 4.

‘Ittestja’ l-​Wegħdi t’Alla

Ħajja taʼ dejjem f’ġenna​—dak jistaʼ jkun il-​futur tiegħek! Imma filwaqt li l-​idea tistaʼ tidher attraenti, forsi qed issibha diffiċli li twarrab it-​twemmin li n-​nies tajbin kollha jmorru s-​sema, jew għandek xi dubji dwar il-​Bibbja nfisha. Xi żgħażagħ fost ix-​Xhieda taʼ Jehovah wkoll sabu li kienu fil-​periklu minħabba li l-​fidi tagħhom ma kinitx soda. Per eżempju, Michelle trabbiet minn ġenituri li huma Xhieda. Kienet taċċetta li l-​Bibbja kienet vera bħalma kienet taċċetta li n-​nhar isegwi l-​lejl. Iżda, darba waħda ntebħet b’xi ħaġa​—ma kinitx taf għala kienet temminha l-​Bibbja. “Naħseb li emmintha sa dakinhar għax ommi u missieri kienu jemmnuha,” qalet hi.

“Mingħajr il-​fidi ma jistax ikun li wieħed jogħġob lil Alla,” tgħid il-​Bibbja. (Lhud 11:6) Madankollu, il-​fidi m’hijiex xi ħaġa li jkollok għax ommok u missierek ikunu jipposseduha. Jekk il-​futur tiegħek irid ikun żgur, trid tibni fidi bbażata fuq evidenza solida​—“pedament tal-​ħwejjeġ li għandna nittamaw.” (Lhud 11:1) Bħalma tpoġġiha l-​Bibbja, trid ‘tipprova kollox,’ jew bħalma tesprimiha l-​parafrażi f’The Living Bible, “ittestja kulma jintqal biex tkun żgur li hu veru.”​—1 Tessalonikin 5:21.

Agħti Prova Lilek Innifsek li l-​Bibbja Hija Vera

L-​ewwel jistaʼ jkollok bżonn tittestja jekk il-​Bibbja hijiex verament “[i]mnebbħa minn Alla.” (2 Timotju 3:16) Kif tistaʼ tagħmlu dan? Sewwa, Alla li Jistaʼ Kollox biss jistaʼ mingħajr dubju ‘mill-​bidu jgħarraf it-​tmiem.’ (Isaija 43:9; 46:10) U hu jagħmel hekk darba wara l-​oħra fil-​Bibbja. Aqra l-​profeziji dokumentati f’Luqa 19:​41-44 u 21:​20, 21 rigward il-​waqgħa taʼ Ġerusalemm.  Jew il-​profeziji f’Isaija 44:​27, 28 u 45:1-4 rigward il-​waqgħa taʼ Babilonja. L-​istorja sekulari tagħti prova taʼ kemm il-​Bibbja bassret dawn il-​ġrajjiet mingħajr żbalji! “Wara li eżaminajt xi wħud mill-​profeziji tagħha,” qalet Janine, li għandha 14-il sena, “bqajt sempliċement mistagħġba meta rajt kif kienet kapaċi tbassar dak kollu.”

L-eżattezza storika, l-​onestà, in-​nuqqas taʼ kontradizzjoni tal-​Bibbja, u l-​fatt li din ma ddurx mal-​lewża huma raġunijiet oħrajn biex tpoġġi fidi fil-​Bibbja. a Imma kif taf li l-​mod kif ix-​Xhieda taʼ Jehovah jifhmu l-​Bibbja huwa korrett? L-​abitanti taʼ Berija tal-​qedem m’aċċettawx l-​ispjegazzjoni taʼ l-​appostlu Pawlu dwar il-​Bibbja mingħajr ma tkixxfu fuqha. Minflok, huma ‘kuljum kienu jqallbu l-​Iskrittura biex jaraw jekk dak li semgħu kienx minnu.’​—Atti 17:11.

Inħeġġu lilek ukoll biex tagħmel studju profond tat-​tagħlim tal-​Bibbja. Il-​pubblikazzjoni Il-​Bibbja X’Tgħallem Verament? (pubblikata mix-​Xhieda taʼ Ġeħova) tesprimi  dan it-​tagħlim b’mod ċar. Jekk il-​ġenituri tiegħek huma Xhieda taʼ Jehovah, bla dubju se jkunu jistgħu jgħinuk fi kwalunkwe mistoqsija li jkollok. “Kun onest mal-​ġenituri tiegħek jekk ikollok xi problemi f’dan ir-​rigward,” tissuġġerixxi mara żagħżugħa jisimha Janel. “Staqsi xi mistoqsijiet jekk issibha diffiċli li temmen xi ħaġa.” (Proverbji 15:22) Bla dubju, maż-​żmien int se tibda tapprezza li Jehovah tassew bierek lix-​Xhieda tiegħu b’fehma meraviljuża taʼ veritajiet Bibliċi!

Jgħid żagħżugħ jismu Prentice: “Xi kultant inħossni dipress minħabba l-​kundizzjoni tad-​dinja. Infittex xi skritturi bħal Apokalissi 21:​4, u dan jagħtini xi ħaġa għal xiex nittama.” Iva, żgur li fidi solida fil-​wegħdi t’Alla se teffettwa l-​ħarsa tiegħek. Tibda tħares lejn il-​futur b’antiċipazzjoni ferħana, mhux bi swied taʼ qalb. Il-​ħajja preżenti tiegħek ma ssirx battalja bla skop, imma mezz taʼ kif ‘taħżen għalik innifsek teżor sabiħ għal li ġej, biex bih tikseb il-​ħajja, il-​ħajja vera.’​—1 Timotju 6:19.

Imma hemm xi ħaġa iktar li trid tagħmel biex tikseb dik “il-​ħajja vera” milli sempliċement titgħallem u tibda temmen fit-​tagħlim tal-​Bibbja?

[Nota taʼ taħt]

Mistoqsijiet għal Diskussjoni

◻ Liema biżaʼ għandhom iż-​żgħażagħ inkwantu għall-​futur tagħhom?

◻ X’kien l-​iskop oriġinali t’Alla għall-​art? Għala nistgħu nkunu fiduċjużi li l-​iskop t’Alla ma nbidilx?

◻ Liema rwol għandha s-​Saltna t’Alla f’li twettaq l-​iskop t’Alla għall-​art?

◻ Għala huwa neċessarju li tittestja kemm it-​tagħlim tal-​Bibbja huwa veru, u kif tistaʼ tagħmel dan?

◻ Kif tistaʼ tagħti prova lilek innifsek li l-​Bibbja hija mnebbħa minn Alla?

[Kumment f’paġna 306]

“Jien pessimist ħafna. M’aħniex se nsolvu l-​problemi tagħna, żgur.” ​—Il-​psikologu B. F. Skinner

[Stampa f’paġna 307]

Il-​Ħallieq taʼ l-​art mhux se jippermetti lill-​bniedem li jirrovina l-​pjaneta tagħna

[Stampa f’paġna 309]

Ikkonvinċejt ruħek dwar kemm il-​Bibbja hija vera?