Malango 3:1-29
3 “Lyene twapisile umu nzila iyaya ku Bashani. Nupya Ogi umwene wa ku Bashani wizile na antu yakwe yonsi uku kulwa naswe pa Edilei.+
2 Nupya Yeova wanenyile ati, ‘Utamutiina,* pano namamupeela umu minwe yako pamwi na antu yakwe yonsi ni mpanga yakwe, nupya umacita kuli aliwe wakwe vino wacisile kuli Sihoni umwene wa Ina Amoli uwikalanga umu Heshiboni.’
3 Fwandi Yeova Leza witu wapeezile umwene Ogi uwa ku Bashani pamwi na antu yakwe yonsi umu minwe itu, nupya twayakomile icakuti kusi nanti awenga uwapuswike.
4 Lyene twaposile imisumba yakwe yonsi. Kutaali musumba nanti a onga uno tutaaposile pa misumba yonsi 60, kuli kuti incende yonsi iya Aligobu ino Ogi umwene wa ku Bashani+ wateekanga.
5 Misumba yii yonsi yakweti malinga atali, impongolo ni mifiikilo, alino ni misumba iingi iyaula malinga.
6 Lelo tononyile+ vyonsi vii wakwe vino twacisile uku mwene Sihoni uwa ku Heshiboni, tononyile imisumba yonsi ukwikako na aonsi, anaci kumwi na ana.+
7 Nupya twaposile iviteekwa vyonsi ni vyuma ivya mu misumba.
8 “Pa nsita kwene iiya twaposile impanga yakwe ya mwene yaili Aina Amoli+ aikalanga umu ncende iya Yodani, ukufuma uku Mukonko wa Alinoni ukufika uku Mwamba wa Helimoni+
9 (umwamba uno Aina Sidoni yamanga yakuti Silioni, nupya uno Aina Amoli yamanga yakuti Senili),
10 misumba yonsi iyaya mu mpanga itambalale, impanga yonsi iya Gilyadi, ni mpanga yonsi iya Bashani kufika nu ku Saleka nu ku Edilei,+ kuli kuti misumba yonsi ino Ogi umwene wa ku Bashani wateekanga.
11 Pano Ogi umwene wa ku Bashani u washazile sile pa Ina Lefaimu. Imbokosi yakwe yapanzilwe ni cela,* nupya nalikwene icili yaya ku Laba mu mpanga iya Ina Amoni. Mu utali yali mamita 4, mu wipi namo yali mupiipi na mamita yaili kulingana ni cipimo icaomviwe.
12 Pa nsita iiya twaposile impanga yii, kutandikila uku Aloeli+ incende iyayela umupiipi nu Mukonko wa Alinoni alino na afu wa ncende ya myamba iya Gilyadi, nupya napeezile Aina Lubeni na Ina Gadi+ imisumba iiyo.
13 Nupya impanga ya Gilyadi iyashazile ni mpanga yonsi iya Bashani ino umwene Ogi wateekanga naipeezile kuli afu wa mutundu wakwe Manase.+ Incende yonsi iya Aligobu iyali umu Bashani yamanyikwe ukuti i ya Ina Lefaimu.
14 “Jaili+ mwana Manase waposile incende yonsi iya Aligobu+ kufika nu ku mupaka uwa Ina Geshuli na Ina Maakati,+ nupya watemiile imizi iiyo iya mu Bashani ukuti Havoti-jaili,*+ nupya na ndakai kwene ali vino yakayama.
15 Nupya napeezile impanga ya Gilyadi kuli Makili.+
16 Nupya Aina Lubeni na Ina Gadi+ nayapeezile impanga ukufuma uku Gilyadi ukufika uku Mukonko wa Alinoni, pakasi ka mukonko ali mupaka ukufika nu ku Yaboki, kuli kuti umukonko uwapakana ni mpanga iya Ina Amoni,
17 ni ncende iya Alaba ni ya Yodani alino ni ncende iya ku mupaka ukufuma ku Kineleti kufika kuli yemba wa Alaba, kuli kuti Yemba wa Musilya,* uwayela uku ncende isuluke iya Pisiga lwa ku ufumondaka.+
18 “Lyene namunenyile inti: ‘Yeova Leza winu watamupeela impanga yii pakuti iye iinu. Aonsi inu yonsi aamaka yalatola ivyanzo, nupya yalakoleelela aina inu, kuli kuti Aina Izlaeli.+
19 Suka sile ya mama inu na ana inu aalatwalilila ukwikala mu misumba ino imupeela, kumwi ni viteekwa vinu (namanya ukuti mwakwata iviteekwa ivingi sana),
20 kufikila lino Yeova alalenga aina inu ukupuuza, wakwe vino watacita kuli mwemwe, suka nayo kwene yace yakwate impanga ino Yeova Leza winu alayapeela ku mbalama ya Luzi Lwa Yodani. Lyene mulawela cila muntu pa ncende yakwe ino imupeela.’+
21 “Pa nsita iiya nanenyile Yoswa+ inti: ‘Watuilolela vino Yeova Leza winu watacita kuli ya mwene yaa yaili. Vikwene avino Yeova alacita uku yantu na ya mwene yao yonsi yano mulazana.+
22 Mutalinzile ukuyatiina, pano Yeova Leza winu aakumulwilako.’+
23 “Pa nsita iiya napapaasile kuli Yeova inti,
24 ‘We Yeova Mwene wa Papelapela, watutandika ukulanga umuomvi wako ukulu wako na maka yako,+ uzye a leza ci umwi yulu nanti pano nsi, aangacita ivintu vii ivya maka wakwe wewe?+
25 Si leka impite nu kuyalola impanga isuma ili uku mbalama ya Luzi Lwa Yodani, impanga isuma iya myamba alino na Lebanoni.’+
26 Lelo walanga Yeova acili watansokela sana pa mulandu winu,+ nupya atuvwile kuli nene. Yeova wanenyile ati, ‘Walanda vyavula! Utaca uswilizye nupya ukunena pa mulandu uu.
27 Yanga pa mwamba uwa Pisiga+ ukalole impanga, ulole uku uwondaka, ku katutu, ku kaeya nu ku ufumondaka, pano utalalamba uluzi luu lwa Yodani.+
28 Sonta Yoswa+ ukuya intunguluzi, umukomelezye nupya umukomye, pano aaliwe alatungulula+ antu yaa, nupya aliwe alalenga ukuti yakingile umu mpanga ino umalola.’
29 Vii vyonsi vyacitike lino twikalanga umu mukonko uwalozyanya nu musumba uwa Beti-peoli.+
