Danieli 5:1-31
5 Lyene Umwene Belishazali+ wapangiile antu yakwe aacindame aali 1,000 umutebeto ukalamba nupya wamwanga waini apa nkoleelo yao.+
2 Lino wakolike watumile aakuyasenda iviya vyakwe goldi na vyakwe siuva vino Nebukadineza isi wasenzile umwi tempele umu Yelusalemu,+ pakuti wene na antu yakwe aacindame na aci yakwe aapa mbali na aci yauze yamwelemo.
3 Lyene yaleesile iviya vyakwe goldi vino yasenzile umu ncende ya muzilo umu ng’anda yakwe Leza umu Yelusalemu, nupya umwene na antu yakwe aacindame, aci yakwe aapa mbali, na aci yakwe yauze yatandike ukumwelamo.
4 Yakolike waini nupya yalumbanyizye ya leza yakwe goldi, yakwe siuva, yakwe koopa, aacela, aavimiti na aamawe.
5 Pa nsita kwene iiya iminwe ya muntu yalolike nu kutandika ukulemba pa ciumba ci sano lya mwene icalozyanyizye ni ca kuteekapo lampi, nupya umwene walolanga kuno ikasa likulemba.
6 Lyene icinso ca mwene caluwanyile nupya uvwile sana intete, intungu zyakwe zyazakazanga+ na makokola yakwe yatandike ukupumana.
7 Umwene wapunzile kuti yaame ya kasapoola, Aina Kalideya,* na aakamanya ivya ku nkoleelo ukuomvya intanda.+ Umwene wanenyile aonsi ya mano amu Babiloni ati: “Wensi aamabelenga ivyativilembwa nu kuneena vino vikupiliula amazwikwa icakuzwala cakwe peepo ni ciyembelo cakwe goldi umu nsingo,+ nupya amaya a kateeka wakwe citatu umu wene.”+
8 Lyene aonsi ya mano yonsi yaile uku mwene, lelo yafizilwe ukubelenga ivilembo nanti ukunena umwene vino vyapiliulanga.+
9 Fwandi Umwene Belishazali uvwile sana intete ni cinso cakwe caluwanyile; nupya antu yakwe aacindame cayapezizye mano.+
10 Lino nyina wa mwene* uvwile ivyacitikiile umwene na antu yakwe aacindame, wingile umwayelile umutebeto. Nupya walanzile ati: “Mwene, uye nu umi amanda pe. Utuvwa intete nanti ukuvulunganyiziwa.
11 Kuli umuntu umwi umu wene wako uwakwata umupasi wakwe ya leza ya muzilo. Lino tata wako wali nu umi cazanyilwe ukuti umuntu wii wali umucenjele, wilukanga nupya wakweti mano aali kwati amano yakwe ya leza.+ Umwene Nebukadineza tata wako wasonsile umuntu wii ukuya umukalamba wakwe ya simapepo ya vinjelengwe, ya kasapoola, Aina Kalideya na aakamanya ivya ku nkoleelo ukuomvya intanda;+ vikwene avino tata wako wacisile mwene.
12 Pano Danieli wino umwene watemiile nu kuti Beliteshazali,+ wakweti sana umupasi, mano, nu kwiluka ivyalenganga ailula iviloto nu tucole nu kuombela pa ntazi izitale sana.+ Fwandi leka aize nupya amaiza akunene vino ivilembo vikupiliula.”
13 Lyene yatwazile Danieli uku mwene. Umwene nawe wamuzizye ati: “Uzye wewe Danieli uwaya pa yazya yano tata wasenzile ukufuma uku Yuda?+
14 Nuvwa ukuti umupasi wakwe ya leza waya pali wewe,+ wacenjela, ukailuka nupya waya sana na mano.+
15 Iyandetela antu ya mano na ya kasapoola kuti ize yabelenge ivilembo nu kunena vino vikupiliula, lelo iyafilwa ukunena vino vikupiliula.+
16 Nomba inuvwa ukuti wemo ungalondolola upiliulo+ nu kumala intazi izitale sana. Fwandi ndi cakuti wakwanisha ukubelenga ivilembo nu kuneena vino vikupiliula, umazwikwa icakuzwala cakwe peepo ni ciyembelo cakwe goldi umu nsingo, nupya umaya kateeka wakwe citatu umu wene.”+
17 Lyene Danieli wanenyile umwene ati: “Sunga ivya upe vyako nu kupeela icilambu cako kuli yauze. Lelo ivilembo vyene nimakubelengela nu kukunena vino vikupiliula.
18 We mwene, Leza wa Papelapela wapeezile Nebukadineza tata wako uwene, amaka, ucindami nu ukulu.+
19 Pa mulandu na maka yano wamupeezile antu yonsi, inko, ni mitundu yamutiinanga sana.+ Wakomanga wino akulonda nanti kumuleka ukuya nu umi, nupya wacindamikanga wino akulonda nanti ukumuzewanya.+
20 Lelo lino wizile aaya ni cilumba nu kukoma umwenzo icakuti atandika nu kucita ivintu cilumba cilumba,+ yamufumizye pa cilimba ca wene, nu ucindami wakwe waposilwe.
21 Wazinzilwe ukufuma umu yantu nu kupeelwa umwenzo wa nyama, nupya wikalanga na ya punda ya mu mpanga. Walyanga isote wa ng’ombe, nu mwili wakwe waomvile nu lumi lwa mwi yulu, kufikila lino wizile aamanya ukuti Leza wa Papelapela aali Kateeka umu wene wa yantu nupya akaupeela kuli wensi wino akulonda.+
22 “Lelo wemo Belishazali we mwanakwe utaaicefya nanti cakuti wamanya ivintu vii vyonsi.
23 Watuikuzya pa nkoleelo ya Mwene wa mwi yulu+ nu kulanda ukuti yalete iviya vya mu ng’anda yakwe.+ Nupya wemo na antu yako aacindame, aci yako aapa mbali na aci yako yauze iimumwela waini umu viya vivyo nu kulumbanya ya leza yakwe siuva, yakwe goldi, yakwe koopa, aacela, aavimiti, na aamawe, ya leza aasilola nu kuvwa icili consi nupya aatamanya nanti acimwi.+ Lelo watukaana ukucindika Leza uwakwata amaka pa umi wako+ na pali vyonsi vino ukacita.
24 Fwandi ikasa ilifuma kuli aliwe nu kulemba mazwi yaa.+
25 Nupya amazwi atiyalembwa aeya: MENE, MENE, TEKELE na PASINI.
26 “Vino mazwi yakupiliula aevi: MENE cikupiliula ukuti Leza watapenda amanda ya wene wako nu kuyafisha uku mpela.+
27 “TEKELE cikupiliula ukuti watupimwa pa vya kupimilako nu kuzanwa ukuti watuulizya.
28 “PELESI cikupiliula ukuti uwene wako iwankanikana nu kupeelwa uku Ina Medya nu ku Ina Pesha.”+
29 Lyene Belishazali walanzile ukuti yazwike Danieli icakuzwala cakwe peepo ni ciyembelo cakwe goldi umu nsingo; nupya yume imbila yati aliwe amaya kateeka wakwe citatu umu wene, nayo yacisile vivyo kwene.+
30 Uwanda kwene uuwa usiku Belishazali umwene Umwina Kalideya wakomilwe.+
31 Nupya Dalyusi+ Umwina Medya wapeezilwe uwene; wali ni myaka umupiipi na 62 lino watandike ukuteeka.
