Danieli 10:1-21
10 Mu mwaka wakwe citatu uwa kuteeka kwakwe Sailasi+ umwene wa ku Pesha, Leza wasokolwelile Danieli uwamwanga nu kuti Beliteshazali+ icintu cimwi, nupya mazwi yayo yaali acumi, yalandanga pa ulwi ukalamba. Danieli uvwikishe upiliulo wa mazwi yano uvwile nupya wamanyile upiliulo wa vintu vino waweni.
2 Mu manda yaaya, ne Danieli nalilanga+ pa milungu itatu ipuma.
3 Ntaatazile indyepo ivyakulya ivisuma, ntaatazile indyepo inyama nanti ukumwa waini nupya ntaatazile mpakalepo mafuta pa milungu yonsi itatu.
4 Pa wanda uwalenga 24 mu mwezi uwa kutandikilako, ala indi umu mbali ya luzi ulukalamba, kuli kuti uluzi lwa Tigilisi,*+
5 natumpwile amanso nu kulola umonsi azwite icakuzwala ica nsalu isuma,+ nupya wazwite nu musipi wakwe goldi ya ku Ufazi umu musana.
6 Umwili wakwe wayengesanga wi we lyakwe kilisoliti,+ pa manso walolekanga wa kumyantula kwa nkuwa, manso yakwe yalolekanga wa vimbilimbili vya moto, makasa yakwe ni ngazo zyakwe vyali iviyengese wakwe koopa,+ nupya iciunda ici zwi lyakwe cuvwikanga wa ciunda ca mazwi ya yantu aingi.
7 Ne Danieli, nene naweni sile icilolwa; aonsi yano nali nayo yataaciweni,+ lelo yuvwile sana intete nupya yutwike nu kuyafisama.
8 Lyene nashazile nenga, nupya lino naweni icilolwa cii icikalamba, natembosile ni cinso cane caluwanyile nupya maka yonsi yasizile.+
9 Lyene umonsi wiyo watandike ukulanda nani; lelo lino nuvwile sile akuvwanga, nakaswile ala imfupama pansi.+
10 Lyene nuvwile ikasa lyakwe umwi lyandema,+ nupya lyansunkanyizye pakuti nzyuke nu kufukama alino nimilile.
11 Lyene wanenyile ati:
“We Danieli wemuno watemwikwa sana,+ ika mano uku mazwi yano inakunena. Imilila, pano intumwa kuli wewe.”
Lino wanenyile amazwi yaa, nimiliile ala nkuzakaza.
12 Lyene wanenyile ati: “We Danieli, utuvwa intete.+ Mazwi yako yuvwisile ukufuma pa wanda uno watandike ukulondesha ukumanya pa vintu vii nu kuicefya pa nkoleelo yakwe Leza wako, nupya iiniza pa mulandu na mazwi yako.
13 Lelo cilolo+ wa mwene uwa ku Pesha wancilikile pa manda 21. Lyene Mikaeli,+ wenga pali ya cilolo yakalamba wizile angazwa; nupya natwalilile ukuya kuuku kwene umupiipi na ya mwene ya ku Pesha.
14 Iiniza umu kukunena ivilacitikila antu yako umu manda ya kushalikizya+ pa mulandu wakuti icilolwa cii cikulozya uku manda aakwiza.”+
15 Lino wanenyile amazwi yaa, nafupime nupya nizile inja ciulu.
16 Lyene umwi uwalolekanga wa muntu wizile andema pa milomo,+ nupya nayuzile akanwa nu kunena uwimilile umupiipi nani inti: “Musambazi wane, nkuzakaza pa mulandu ni cilolwa nupya ntakweti amaka.+
17 Ntakweti amaka nupya cikumposha ukufuuta ningo,+ uzye lyene ne muomvi wako ningalanda uli naawe musambazi?”+
18 Uwalolekanga wa muntu wandemile nupya kwene nu kunkomya.+
19 Lyene walanzile ati: “Utuvwa intete,+ wemuno watemwikwa sana.+ Uye nu mutende.+ Komeleka, komeleka.” Lino acili akulanda nani, nizile inja na maka nupya nalanzile inti: “Musambazi wane landa, pano wankomya.”
20 Lyene walanzile ati: “Uzye watumanya umulandu uno iinizila kuli wewe? Paa lyene namaswilila umu kulwa na cilolo uwa ku Pesha.+ Nga napita, cilolo uwa ku Gilisi aliza.
21 Lelo nimakunena ivintu ivyalembwa umu mabuku ya cumi. Kusi ali wensi aakuntungilila sana umu vintu vii, suka sile Mikaeli+ cilolo wako.+
Mafutunoti
^ Mu Ciebele: “Hidekeli.”
