Sertin serviter Zeova nepli kapav fer otan pou Zeova parski zot inn rant dan laz, zot ena bann problem lasante, ouswa zot ena enn andikap. Akoz sa, kitfwa zot panse ki zot pena valer pou Zeova. Ek lerla, zot demann zotmem: ‘Eski mo ankor itil pou Zeova?’ Ekrivin Psom 71 ti ena mem santiman. Li ti priye Zeova ek li ti dir: “Pa abandonn mwa kan mo lafors pe diminie.” (Ps. 71:9, 18) Mem si li ti santi li feb, sa ekrivin psom la ti sir ki si li ti servi Zeova avek fidelite, Zeova ti pou soutenir li ek gid li. Li ti konpran ki, mem si enn kikenn ena so bann limit, Zeova bien kontan kan sa dimounn-la fer so maximum pou servi Li. (Ps. 37:23-25) Si to enn kikenn ki aze, reflesi lor kouma Zeova trouv twa. Zeova kapav ed twa pou servi Li avek fidelite, mem si to pena otan lafors ki avan. (Ps. 92:12-15) Alor, olie ki to kontign pans lor seki to pa kapav fer, konsantre twa lor seki to kapav fer. w24.10 28 ¶14-16

Dan sertin sitiasion, bann Kretien ki pena matirite kapav gagn difikilte pou pran bann bon desizion. Kifer? Parski zot pa arive rezonn dapre bann prinsip Labib. Si pena enn lalwa presi dan Labib ki dir zot seki zot bizin fer, sertin kapav panse ki zot kapav fer seki zot anvi, ek lezot kapav rod enn lalwa pou swiv alor ki pena okenn lalwa. Par exanp, bann Kretien dan Korint kitfwa ti demann lapot Pol enn lalwa pou zot kone si zot kapav “manz bann manze ki finn ofer ar bann zidol.” Me olie ki li ti dir zot seki zot bizin fer, Pol ti explik zot ki sakenn ena ‘drwa pou swazir’ dapre so konsians. Li ti osi montre zot sertin prinsip Labib ki ti pou ed zot pran enn desizion avek enn konsians kler, san ki zot fer lezot tonbe. (1 Kor. 8:7-9) Pol ti montre zot kouma pou servi Labib pou zot pran zot prop desizion, olie ki zot depann lor lezot ouswa ki zot rod enn lalwa. Kan li ti fer sa, li ti ed zot pou vinn bann Kretien ki ena matirite. w24.04 5 ¶14

Dan lepok Zonas, bann Ninivit ti gagn lokazion pou repanti. Parmi bann dimounn ki pou resisite “pou enn zizman,” Zezi ti dir ki pou ena bann ki ti “pratik bann kitsoz degoutan.” (Zan 5:29) Parey kouma bann Ninivit, bann abitan Sodom ek Gomor ti fer bann move kitsoz. Alor, kitfwa ena enn lespwar osi pou bann abitan Sodom ek Gomor. Li posib ki sertin parmi zot pou resisite ek pou gagn lokazion pou aprann konn Zeova ek Zezi. Zeova touletan “fouy dan leker” ek “examinn bann panse pli profon.” Dan lavenir, kan Zeova pou deside kisann-la Li pou resisite, Li “pou donn sakenn . . . dapre seki li’nn fer.” Zeova pou ferm kan bizin, me Li pou osi montre mizerikord kan Li kapav. Alor, fode pa nou panse ki enn kikenn pa pou resisite, amwin ki nou vremem kone ki li pa pou resisite! w24.05 5-6 ¶15-16

Dan lepase, bann serviter Zeova ti gagn lafors gras-a Parol Bondie pou asim bann responsabilite bien difisil. Anou get lexanp profet Zeremi. Kan Zeova ti demann li pou prese, li ti bien trakase. Li ti dir: “Mo pa mem kone kouma pou koze, parski mo zis enn ti garson.” (Zer. 1:6) Zeremi ti mank konfians an limem. Ki kitsoz ti ed li pou gagn kouraz pou prese? Li ti gagn lafors gras-a Parol Bondie. Li ti dir: “So parol ti vinn kouma enn dife bien for, kouma enn dife bien for dan mo lezo, ek mo ti fatige tini li.” (Zer. 20:8, 9) Mem si Zeremi ti bizin pres dan enn teritwar bien difisil, mesaz ki li ti bizin prese ti donn li lafors pou fer seki Zeova ti demann li. Bann Kretien osi gagn lafors gras-a Parol Bondie. Lapot Pol ti dir so bann frer ki zot ti bizin kontign aprann plis lor Zeova. Sa ti pou ed zot pou kontign raport bann “frwi dan tou bann bon travay,” ek lerla zot ti pou “mars dan enn fason ki dign devan Zeova.”—Kol. 1:9, 10. w24.04 14-15 ¶2-4

Zadok ti res fidel ar Zeova mem si Gran Pret Abiatar ti swazir pou soutenir Adoniya, David so garson, ki ti pe fer tou pou vinn lerwa. David ti kone ki li kapav touletan fer konfians Zadok. Kan Adoniya so plan pa’nn marse, David ti swazir Zadok, Natan, ek Benaya pou fer Salomon vinn lerwa. (1 Ler. 1:32-34) Sirman Zadok ti bien ankouraze par lexanp bann lezot serviter Zeova kouma Natan, ki ti fidel ar Zeova ek ki ti soutenir Lerwa David. Ek kan Salomon ti vinn lerwa, li “ti fer Zadok vinn pret dan plas Abiatar.”(1 Ler. 2:35)Kouma to kapav imit kouraz ki Zadok ti ena? Si enn kikenn ki to kontan swazir pou kit Zeova, montre Zeova ki to’nn swazir pou res fidel ar Li. (Zozwe 24:15) To kapav sir ki Zeova pou donn twa lafors ek kouraz pou to res fidel ar Li. Priye Zeova ek frekant bann kamarad ki fidel ar Zeova. To fidelite anver Zeova ena valer pou Li, ek to kapav sir ki Li pou rekonpans twa.—2 Sam. 22:26. w24.07 6-7 ¶16-17

Psom 15:2 dir ki enn kamarad Bondie se “enn dimounn ki touletan azir ar fidelite” ek “ki fer seki drwat.” Mo “azir” ek “fer” montre ki ena bann aksion ki nou bizin kontign fer. Me eski vremem nou kapav “azir ar fidelite”? Wi, nou kapav. Mem si nou inparfe, Zeova pou trouv nou kouma enn kikenn ki “azir ar fidelite” si nou kontign fer nou maximum pou obeir Li. Kan enn kikenn donn so lavi Zeova ek pran batem, se zis koumansman so lamitie ar Zeova. Dan lepase, mem si nasion Izrael ti pep Bondie, sa pa vedir ki tou bann Izraelit ti bann invite Zeova. Zeova ti dir ki sertin parmi zot pa ti “dan laverite ek lazistis.” (Iza. 48:1.) Si enn Izraelit ti anvi vinn enn invite Zeova, li ti bizin aprann konn bann lalwa Zeova ek met zot an pratik. Li parey pou nou azordi. Si nou anvi vinn kamarad Zeova ek gagn so faver, li pa ase ki nou zis pran batem ek asiste bann renion. Nou bizin kontign “fer seki drwat.” w24.06 9 ¶4, 6

Dan ki fason Zeova montre so zenerozite? Anou get de-trwa lexanp. Zeova donn nou bann kitsoz materyel. Kitfwa nou pena bann gran-gran kitsoz, me gras-a Zeova, nou ena seki nou bizin. Par exanp, gras-a Zeova, nou ena manze, linz, ek enn plas pou reste. (Ps. 4:8; Mat. 6:31-33; 1 Tim. 6:6-8) Eski Zeova donn nou sa bann kitsoz-la zis parski Li oblize? Non! Anou reflesi lor bann parol ki Zezi ti dir dan Matie 6:25, 26. Kan li koz lor bann zwazo, Zezi dir: “Zot pa plant bann lagrin, ni rekolte, ni ramas lagrin dan stor.” Me selman, remarke seki li dir apre: “Zot Papa ki dan lesiel nouri sa bann zwazo-la.” Apre sa, Zezi dir: “Eski zot pena plis valer ki bann zwazo?” Ki sa aprann nou? Si Zeova pran swin bann zanimo, nou kapav sir ki Li pou donn nou seki nou bizin! Parey kouma enn papa ki pran swin so fami, Zeova donn so fami seki zot bizin parski Li kontan zot.—Ps. 145:16; Mat. 6:32. w24.09 26-27 ¶4-6

Se lespri sin ki etabli bann frer kouma serviter lasanble, ek sa bann frer-la fer bann travay bien inportan pou ed bann ansien. Me kanmem sa, zot bizin bann zom ki spiritiel, ki kontan Zeova ek ki swiv so bann prinsip. Zot bizin osi ena enn gran lamour pou zot bann frer ek ser. (Mat. 22:37-39) Kouma enn frer kapav devlop dezir pou vinn enn serviter lasanble? Labib koz lor bann kondision ki enn frer bizin ranpli pou ki li kapav vinn enn serviter lasanble. (1 Tim. 3:8-10, 12) Si to anvi vinn enn serviter lasanble, etidie sa bann kondision-la ek fer zefor pou met zot an pratik. Me pou koumanse, to bizin demann tomem ki kitsoz motiv twa pou vinn enn serviter lasanble. w24.11 14-15 ¶4-5

Sertin dimounn dir ki zot inn lir Labib plizir fwa. Me eski vremem zot krwar seki Labib dir? Eski zot inn met li an pratik ek les li inflians zot lavi? Malerezman, souvan repons-la li non! Me pou bann serviter Zeova, li bien diferan! Anplis, nou fer boukou zefor pou met so bann konsey an pratik dan nou lavi. Li pa touletan fasil pou lir Labib ek pou met an pratik seki ena ladan. Parfwa, nou gagn difikilte pou trouv letan pou lir Labib, ouswa nou kapav ena tandans pou lir li vit-vit ek nou pa pran letan pou reflesi lor seki nou’nn lir. Parfwa, nou kapav osi santi nou dekouraze parski nou ena boukou sanzman pou fer. Me ninport ki difikilte nou gagne, nou kapav sirmont sa. Nou pou kapav fer sa gras-a led Zeova. Alor, olie ki nou vinn enn dimounn ki bliye seki li’nn tande, anou bien deside pou aksepte led Zeova, ek vinn enn dimounn ki met an pratik Parol Bondie. Nou kapav sir ki plis nou lir Labib ek met li an pratik, plis nou pou vinn bann dimounn ki ere.—Zak 1:25. w24.09 7 ¶15-16

Kan nou gagn enn maler, sa fer nou bien soufer. Me Zeova servi so lespri sin pou rekonfort nou. Si twa osi to ena enn gran sagrin dan to leker akoz enn leprev ki to’nn gagne, devid to leker ar Zeova. To kapav koz avek Li kantite fwa to anvi. (Ps. 86:3; 88:1) Demann Li so lespri sin regilierman. To kapav sir ki Li pou touletan ekout to lapriyer. Eski to santi twa abat net akoz enn leprev ki to’nn gagne? Lespri sin kapav donn twa lafors pou to kontign servi Zeova avek fidelite. (Efe. 3:16) Apre ki to’nn demann Zeova so lespri sin, ki to bizin fer? Fer bann kitsoz ki pou fer twa gagn plis lespri sin Bondie. Par exanp, asiste bann renion ek sorti predikasion. Lir to Labib toulezour; sa pou ed twa pou konpran fason panse Zeova. (Fil. 4:8, 9) Kan to lir Labib, reflesi lor lexanp bann personaz Biblik ki’nn gagn bann leprev ek lor kouma Zeova inn ed zot pou andire. w24.10 9 ¶12-14

Parey kouma Zeova ek Zezi, nou kontan bann dimounn. (Prov. 8:31) Nou ena boukou konpasion pou bann dimounn ki ‘pa konn Bondie ek ki pena lesperans.’ (Efe. 2:12) Zot pe nwaye ar zot bann problem, ek nou, nou ena enn zile sovtaz ki kapav sov zot. Sa zile-la se bon nouvel lor Rwayom Bondie. Parski nou kontan zot ek nou ena konpasion pou zot, nou anvi fer nou maximum pou pres bon nouvel ar zot. Bon nouvel lor Rwayom Bondie kapav donn zot enn lespwar, fer zot ena enn pli bon lavi depi aster-la mem, ek sa donn zot posibilite pou gagn “vre lavi,” setadir pou viv pou touletan dan lemond nouvo. (1 Tim. 6:19) Nou lamour pou bann dimounn motiv nou osi pou averti zot ki lafin sa move lemond-la bien pre. (Eze. 33:7, 8) Nou bizin dir zot seki pou arive pandan gran soufrans, setadir ki fos relizion pou detrir, ek ki apre sa, move lemond Satan osi pou detrir pandan lager Armagedon.—Rev. 16:14, 16; 17:16, 17; 19:11, 19, 20. w24.05 16 ¶8-9

Lapot Pol ti ankouraz bann Kretien pou “les Bondie montre so koler.” Nou les Zeova montre so koler kan nou les Li amenn lazistis dan moman ek dan fason ki Li Li deside. Enn frer ki apel John ek ki ti pas par bann linzistis, dir: “Mo ti bizin kontrol mo koler pou ki mo pa fer enn move kitsoz. Me sa pa ti fasil! Romin 12:19 ti ed mwa pou ena pasians ek pou fer Zeova konfians.” Kan nou esey regle enn problem par nou-mem, nou kapav strese ek dekouraze. Me ki lavantaz nou ena kan nou les Zeova regle enn problem? Nou pa pou strese ek nou pa pou dekouraze. Anplis, Zeova anvi ed nou. Se koumadir Li pe dir nou: ‘Les sa problem-la pou mwa; se mwa ki pou regle sa.’ Si nou ena lafwa dan promes ki Zeova inn fer, setadir ki se Li ki “pou regle kont,” nou pa pou kontign res ankoler parski nou kone ki Zeova pou fer seki bizin. w24.11 6 ¶14-15

Nou bizin fer atansion pou pa les bann kitsoz materyel vinn kitsoz ki pli inportan dan nou lavi. Nou kapav aprann plis lor la, kan nou get seki lapot Pol ti dir bann Kretien dan premie siek. Li ti koz lor move lexanp bann Izraelit, sirtou seki zot ti fer kan zot ti pre ar Montagn Sinai. Pol ti averti bann Kretien, ek li ti dir zot: “Pa dezir bann move kitsoz, parey kouma [bann Izraelit] inn fer.” (1 Kor. 10:6, 7, 11) Zeova ti fer enn mirak pou ki bann Izraelit gagn manze. Me parski zot ti anvi gagn plis manze, sa manze ki Zeova ti donn zot la ti vinn enn “move kitsoz” pou zot. (Nonb 11:4-6, 31-34) Ek kan zot ti ador sa vo an-or la, bann Izraelit ti montre ki zot ti plis interese ar manze, bwar, ek profit lavi, olie ki zot obeir Zeova. (Ex. 32:4-6) Pol ti servi sa lexanp-la pou averti bann Kretien so lepok, parski zot ti pe viv lepok kot Zerizalem ek so tanp ti pou detrir. Azordi, nou pe viv lepok lafin. Alor, li bien inportan ki nou ekout bien lavertisman lapot Pol. w24.12 6 ¶13

Zeova Li enn “Bondie ere,” ek Li anvi ki nou osi nou ere. (1 Tim. 1:11) Anplis, Li’nn donn nou boukou kado ki kapav ed nou pou ena enn zoli lavi. (Zak 1:17) Enn parmi sa bann kado-la se maryaz. Kan enn zom ek enn fam marye, zot fer promes pou kontan ek pou respekte zot kamarad. Kan enn mari ek so fam bien kontan zot kamarad, toule-de pou ere. Malerezman, boukou koup azordi bliye sa promes ki zot inn fer zour zot maryaz la. Ek akoz sa, zot malere. Kouma Zeova anvi ki bann mari tret zot fam? Bann mari bizin donn loner zot fam. Se enn lord ki Zeova inn donn zot. Kan nou donn loner enn kikenn, savedir ki nou tret li avek respe. Enn mari ki donn loner so fam, li tret li avek zantiyes ek amour.—1 Pier 3:7. w25.01 8 ¶1-2; 9 ¶4-5

Let ki Pol ti ekrir bann Ebre ti vremem prepar bann Kretien dan premie siek pou fer fas ar bann sitiasion difisil ki zot ti pou gagne. Pol ti ankouraz so bann frer pou etidie Parol Bondie ek pou konpran li pli bien. Si zot ti fer sa, sa ti pou ed zot pou rekonet ek pou rezet bann lansegnman ki ti kapav diminie zot lafwa. Li ti ankouraz zot pou ogmant zot lafwa, pou ki zot pa tarde pou swiv bann instriksion ki zot gagne ar Zezi ek ar bann ki diriz lasanble. Li ti ed zot pou trouv bann bienfe ki zot gagne kan zot andire; zot ti bizin konsider zot bann leprev kouma enn formasion ki zot Papa ti pe donn zot. Nou osi, nou bizin swiv sa bann konsey Biblik la. Lerla, nou pou kapav andire avek fidelite ziska lafin.—Ebre 3:14. w24.09 12 ¶17; 13 ¶19

Labib dir ki Zeova inn deside ki bizin pey enn ranson, setadir pey enn pri pou ki Li kapav pardonn nou bann pese ek ki nou revinn so kamarad. Ki pri ti bizin peye pou ki bann dimounn kapav regagn seki Adan ti perdi? Adan ek Ev ti perdi zot lavi parfe ek posibilite pou viv pou touletan. Laranson ti bizin ena mem valer ki seki Adan ti perdi. (1 Tim. 2:6) Alor, pou pey sa ranson-la, ti bizin enn zom ki ranpli sa bann kondision-la: Li ti pou bizin (1) parfe, (2) ena posibilite pou viv pou touletan lor later, ek (3) dispoze pou donn so lavi an sakrifis pou nou. Anou get trwa rezon kifer Zezi inn kapav pey laranson. (1) Li ti parfe; “li pa ti komet okenn pese.” (1 Pier 2:22) (2) Akoz li ti parfe, li ti kapav viv pou touletan lor later. (3) Li ti dispoze pou donn so lavi pou nou.—Ebre 10:9. w25.02 4-5 ¶11-12

To kapav sir ki Zeova kontan twa ek Li anvi ki to form parti dan so fami. Li kontan twa mem si pou linstan to pe bizin fer fas ar bann sitiasion difisil ki pe anpes twa pran batem. Dan premie siek, Zezi ti dir so bann disip: “Si zot ena lafwa groser enn lagrin moutard, zot pou dir sa montagn-la, ‘Sorti la al laba,’ ek li pou ale, ek nanye pa pou inposib pou zot.” (Mat. 17:20) Sa ti fer zis de-trwa lane ki sa bann disip-la ti pe swiv Zezi, alor zot lafwa ti bizin kontign grandi. Me kanmem sa, Zezi ti dir zot ki si zot ti ena ase lafwa, Zeova ti pou ed zot pou sirmont bann difikilte ki ti koumadir bann montagn. To kapav sir ki Zeova pou fer parey pou twa! Si ena enn kitsoz dan to lavi ki pe anpes twa pran batem, azir deswit ek fer bann sanzman ki bizin. Donn to lavi Zeova ek pran batem. Samem meyer desizion ki to kapav pran! w25.03 7 ¶18-20

Nou pou kapav sirmont nou bann difikilte si nou rapel ki nou Bondie Li vivan ek ki Li pre pou ed nou. Pou nou ogmant nou konfians dan Zeova, nou bizin reflesi lor seki Li’nn fer dan lepase. (Iza. 37:17, 33-37) Nou kapav osi al lor nou sit jw.org ek gete kouma Zeova inn soutenir nou bann frer ek ser dan nou lepok. Nou kapav osi reflesi kouma Zeova inn ed nou personelman. Kitfwa nou panse ki Zeova pa’nn fer bann kitsoz extraordiner pou ed nou. Selman, Li’nn fer boukou kitsoz pou ed nou. Par exanp, Li’nn atir nou ver Li pou ki nou kapav vinn so kamarad. (Zan 6:44) Alor, demann Zeova pou ed twa pou rapel bann moman kot Li’nn reponn to bann lapriyer, kot Li’nn donn twa exakteman seki to ti bizin dan ler ki bizin, ek kot Li’nn pran twa swin dan bann moman difisil. Kan to reflesi lor tou seki Li’nn fer pou twa, to pou ena plis konfians ki Li pou kontign ed twa dan lavenir. w24.06 21 ¶8

Kitfwa nou bien deside pou pa fer nanye ki pou fer Zeova so leker fermal. Me akoz nou inparfe ek san ki nou realize, nou kapav fer bann kitsoz ki pa fer Zeova plezir. (Rom. 7:21-23) San ki nou atann, nou kapav gagn bann tantasion pou fer seki pa bon. Alor, pou nou kapav res fidel ar Zeova ek so Garson, nou bizin swiv konsey ki Zezi ti donn nou pou kontign veye pou ki nou pa tom dan tantasion. Nou tou nou gagn tantasion pou fer pese, ek kitfwa nou tou nou ena bann febles ki kapav fer nou tom dan tantasion. Par exanp, enn dimounn kitfwa pe lite pou pa komet limoralite sexiel. Ena lezot ki pe bizin kontign lite pou pa les zot tante pou fer bann kitsoz inpir, kouma mastirbasion ouswa get pornografi. Ek ena ki pe bizin lite pou pa ankoler vit, pou pa vinn gran-nwar, ouswa per pou fer seki bon parski zot per seki dimounn pou dir. w24.07 14 ¶3; 15 ¶5

Sey mazine seki kapav arive si bann ansien pa les enn kikenn ki’nn vremem repanti revinn dan lasanble, ouswa apre ki li’nn retourne, bann frer ek ser pa montre ki zot kontan li? Lapot Pol dir ki sa dimounn-la kapav tom dan enn “gran tristes,” ek si sa arive, li kapav panse ki zame li pa pou kapav rekoumans servi Zeova. Li ti kapav mem panse ki Zeova zame pa pou pardonn li, ek ki akoz sa, li pa neseser ki li fer zefor pou sanze. Ki kitsoz ankor kapav arive si bann frer ek ser pa pardonn sa dimounn-la? Sa pou met zot lamitie ar Zeova an danze. Kifer? Parski zot pa pou imit Zeova, ki pardonn bann dimounn ki repanti. Olie sa, zot pou resanble Satan, ki kriel ek ki pena mizerikord. Zot pou koumadir bann zouti dan lame Satan pou touy sa dimounn-la lor plan spiritiel.—2 Kor. 2:10, 11; Efe. 4:27. w24.08 17 ¶7, 10-11

Zezi inn donn sertin zom responsabilite pou ed lasanble dan enn lot fason. Dan premie siek, li ti fer bann ansien dan Zerizalem avoy Pol, Barnabas, ek bann lezot frer vizit bann lasanble. (Zist. 11:22) Kifer? Pou fer mem travay ki bann serviter lasanble ek bann ansien, setadir pou ankouraz lasanble. (Zist. 15:40, 41) Toule semenn, bann responsab sirkonskripsion bizin vizit bann lasanble. Pou fer sa, sertin kitfwa bizin mem vwayaz plizir santenn kilomet. Sak semenn, zot bizin fer plizir diskour, fer bann vizit pastoral, fer renion pionie, renion ansien ek bann renion predikasion. Zot bizin osi organiz bann lasanble sirkonskripsion ek rezional, ek prepar bann diskour ki zot gagne pou sa bann lasanble-la. Zot organiz osi bann renion spesial avek bann pionie ki ena dan sirkonskripsion, ek zot osi servi kouma instrikter pou lekol pionie. Anplis bann lezot responsabilite ki zot ena, parfwa zot bizin osi fer bann kitsoz irzan ki biro nasional demann zot pou fer. w24.10 21 ¶12-13

Dan nou text pou azordi, nou trouv seki Zeova ti dir profet Zeremi. Lapot Pol ti servi mem lexpresion kan li ti dir ki Zeova “pou nepli rapel zot bann pese.” (Ebre 8:12) Me ki sa lexpresion-la vedir? Dan Labib, lexpresion “rapel” pa touletan vedir pans enn kitsoz ki’nn arive. Avredir, sa kapav osi vedir fer enn kitsoz. Par exanp, kan enn bandi ti demann Zezi pou ‘rapel li kan li vini dan so Rwayom,’ li pa ti pe dir Zezi zis pans li. (Lik 23:42, 43) Avredir, li ti anvi ki Zezi fer enn kitsoz pou li. Ek dan so repons, Zezi ti fer li konpran ki li ti pou resisit li. Dan mem fason, kan Zeova dir ki Li nepli rapel nou bann pese, savedir ki Li’nn pardonn nou, ek ki dan lavenir, Li pa pou pini nou pou sa bann pese-la. w25.02 11 ¶14-15

Vre lintelizans se aprann konn bann kalite Zeova, so proze, seki Li kontan ek seki Li deteste. Alor, demann tomem, ‘Dapre seki mo kone lor Zeova, eski mo desizion pou fer Li plezir?’ (Efe. 5:17) Pou nou fer Zeova plezir, parfwa nou pou bizin desevwar bann dimounn ki pros ar nou. Par exanp, bann paran ki bien kontan zot zanfan, kapav met presion lor zot tifi pou marye ar enn zom ki ena boukou kas, ouswa ki kapav pey enn dot, mem si sa dimounn-la li pa stab lor plan spiritiel. Kitfwa zot fer sa parski zot pa anvi ki zot tifi pas mizer. Selman, eski sa frer-la pou kapav pran swin zot tifi lor plan spiritiel? Ki Zeova panse lor la? Nou kapav trouv seki Zeova panse lor la dan Matie 6:33. Dan sa verse-la, Labib ankouraz bann Kretien pou “kontign met Rwayom Bondie . . . an premie” dan zot lavi. Alor, mem si nou bien kontan nou bann paran ek ki nou ena boukou respe pou nou bann fami, seki bizin pli inportan pou nou se fer Zeova plezir. w25.01 17 ¶9-10

Azordi, boukou dimounn opoz zot ar mesaz ki nou prese. Se akoz sa ki nou bizin led Zeova pou kontign pres bon nouvel ar bann dimounn. (Rev. 12:17) Kifer to kapav sir ki Zeova pou soutenir twa? Anou get lapriyer ki Zezi ti fer dan Zan sapit 17. Dan sa lapriyer-la, Zezi ti demann Zeova pou vey lor so bann zapot, ek Zeova ti reponn so lapriyer. Kouma nou konn sa? Dan liv Zistwar Bann Zapot, nou trouve kouma Li’nn ed bann zapot Zezi pou kontign prese malgre bann persekision. Dan so lapriyer, Zezi ti osi demann Zeova pou vey lor tou bann ki ti pou ena lafwa dan seki so bann zapot ti pou ansegne, ek twa osi to form parti ladan. Zeova pe kontign reponn sa lapriyer ki Zezi ti fer la; Li pou ed twa parey kouma Li ti ed bann zapot Zezi. (Zan 17:11, 15, 20) Plis lafin pe koste, plis nou pou gagn difikilte pou pres bon nouvel. Selman, Zezi inn rasir nou ki nou pou kontign gagn led ki nou bizin pou res aktif dan predikasion.—Lik 21:12-15. w25.03 17-18 ¶13-14

Bann serviter Bondie “kriye dan lazwa” parski zot leker ranpli ar rekonesans pou Zeova. Bann lansegnman ek bann promes bien ankourazan ki ena dan Labib, ek zoli lesperans ki nou gagne gras-a laranson, fer nou ‘leker kontan.’ Anplis, kan nou koz lor sa bann kitsoz-la, sa rann nou ere! (Ps. 34:8; 133:1-3) Lamour ek linite se de kalite bien inportan ki ena dan nou paradi spiritiel. Labib dir ki lamour se “enn lien ki ini bann dimounn ansam.” (Kol. 3:14) Lamour ek linite ki ena dan pep Zeova azordi, se enn avangou nou lavi dan lemond nouvo. Dan lemond nouvo, pou ena boukou plis lamour ek linite ant bann serviter Zeova. Se gras-a nou paradi spiritiel ki enn kikenn kapav vremem ere ek zwaye. Dan lemond Satan, bann dimounn kapav pans bann move kitsoz lor bann Temwin Zeova. Selman, devan lizie Zeova, nou ena enn zoli nom ek enn bon repitasion, parey kouma nou bann frer ek ser dan lemond antie.—Iza. 65:15. w24.04 21 ¶7-8

Kouma nou kapav ankouraz ek ed bann Kretien selibater ki anvi marye? Enn fason nou fer sa, se kan nou fer bien atansion ar seki nou dir zot. (Efe. 4:29) To kapav demann tomem: ‘Eski mo abitie pran plezir ar bann selibater ki anvi marye? Kan mo trouv enn frer selibater pe koz ar enn ser selibater, eski deswit mo panse ki zot interese ar zot kamarad?’ (1 Tim. 5:13) Nou bizin osi pa fer bann selibater santi ki zot mank kitsoz dan zot lavi parski zot pa marye. Alor, olie ki nou dir bann kitsoz dekourazan, li pli bon ki nou rod bann lokazion pou felisit bann selibater. Si to trouve ki enn frer selibater al bien ar enn ser selibater, kouma to bizin azir? Labib ankouraz nou pou pran kont santiman lezot. (Rom. 15:2) Boukou selibater pa kontan ki nou fer agwa pou zot, ek nou bizin respekte zot santiman. (2 Tes. 3:11) Ena lezot ki kapav apresie ki nou ed zot. Selman, fode pa nou fer sa san zot permision.—Prov. 3:27. w24.05 24-25 ¶14-15

San ki nou atann, nou kapav gagn bann difikilte ki sanz nou lavi net. Dan sa bann moman-la, nou bien kontan ki nou kapav kont lor Zeova, pa vre! Kan nou trouv so lame dan nou lavi, sa vremem rasir nou ki “Zeova li vivan!” (Ps. 18:46) Me apre ki David ti dir ki “Zeova li vivan,” li ti konpar Zeova ar enn kitsoz ki pena lavi. Li ti dir ki Zeova Li ‘so Gran Ros.’ Ki li ti pe rod dir? Labib konpar Zeova ar enn “ros” pou fer nou konpran sertin kalite ki Li ena. Kan bann serviter Zeova ti donn Li laglwar pou so bann zoli kalite, plizir fwa zot ti dekrir Li kouma enn ros. Premie fwa ki Labib dir ki Zeova Li enn “Ros” se dan Deteronom 32:4. Dan enn lapriyer ki Ann ti fer, li ti dir ki “Bondie kouma enn gran ros ek pena personn kouma Li.” (1 Sam. 2:2) Abakouk ti dir ki Zeova enn “Gran Ros.” (Abak. 1:12) Ekrivin Psom 73 ti dir ki Bondie “Li enn ros ki soutenir [so] leker.” (Ps. 73:26) Zeova osi ti konpar Limem ar enn ros.—Iza. 44:8. w24.06 26 ¶1, 3

Bann lerwa Izrael ki ti fidel ar Zeova ti servi Li avek tou zot leker. Konsernan Zozias, Labib dir: “Avan, pa ti ena okenn lerwa kouma li, ki ti revinn ver Zeova avek tou so leker.” (2 Ler. 23:25) Ek ki nou kapav dir konsernan Salomon ki ti fer seki move dan so vie zour? Labib dir: “So leker pa ti antie pou Zeova.” (1 Ler. 11:4) Abiya ti enn lot lerwa ki pa ti fidel ar Zeova. Labib dir: “Li pa ti servi Zeova avek tou so leker.” (1 Ler. 15:3) Labib servi mo “leker” pou dekrir seki enn dimounn ete vremem andan. Li inplik nou bann dezir, nou bann panse, nou personalite, nou latitid, nou bann kapasite, nou bann lintansion ek nou bann lobzektif. Ki savedir servi Zeova avek tou nou leker? Enn kikenn ki servi Zeova avek tou so leker, li pa ador Bondie zis akoz li bizin fer sa. Okontrer, li fer sa parski li bien kontan Zeova, ek li ena enn gran respe pou Li. Anplis, li kontign fer sa toutlong so lavi. w24.07 21 ¶4-5

Zeova servi enn lexanp pou montre kouma Li efas nou bann pese. Li dir: “Mo pou efas to bann erer koumadir zot inn kasiet deryer enn niaz ek to bann pese koumadir zot inn kasiet deryer enn gro niaz.” (Iza. 44:22) Kan Zeova pardone, se koumadir Li pe servi enn gro niaz pou kasiet nou bann pese, pou ki nepli kapav trouv zot ditou. Ki nou aprann ar sa bann lexanp-la? Kan Zeova pardonn nou bann pese, fode pa nou kontign santi nou koupab pou seki nou’nn fer. Gras-a sakrifis Zezi, Zeova inn kennsel nou det net. Nepli ena okenn tras sa bann det-la! Se koumsa ki Zeova pardonn nou kan nou repanti. Se samem vre pardon! Kan Zeova pardonn nou, nou revinn so kamarad ek sa ed nou pou nou nepli santi nou koupab pou bann move kitsoz ki nou’nn fer dan lepase. w25.02 10-11 ¶11-14

Zeova anvi ki bann ansien protez lasanble kont tou bann ki pa’le swiv so bann lalwa. (1 Kor. 5:7) Selman, zot bizin osi esey fer tou seki zot kapav pou ed enn kikenn ki’nn fer enn pese pou repanti. Akoz sa, kan bann ansien pe ed enn kikenn pou repanti, zot bizin res pozitif ek gard lespwar ki li kapav sanze. Zot fer sa parski zot anvi imit Zeova ki “ranpli ar lafeksion ek tandres, ek ena mizerikord.” (Zak 5:11) Lapot Zan enn bon lexanp dan sa domenn-la, parski li ti tret so bann frer ek ser avek boukou lamour. Li ti dir: “Mo bann ti zanfan, mo pe ekrir zot sa bann kitsoz-la pou ki zot pa fer enn pese. Me si enn kikenn fer enn pese, nou ena enn avoka kot nou Papa: Zezi Kris, enn kikenn ki drwat.” (1 Zan 2:1, not) Malerezman, li kapav arive ki enn kikenn pa’le repanti. Lerla, pou bizin tir li dan lasanble. w24.08 25 ¶19-20

Kitfwa to ena tandans pou konpar seki to pe fer ar seki lezot pe fer. Selman, fode pa to fer sa! Kifer? Parski Zeova pa konpar nou ar lezot. (Gal. 6:4) Par exanp, Mari ti donn Zezi enn delwil parfime ki kout bien ser. (Zan 12:3-5) Me enn pov vev ti donn zis de tipti pies ki ti ena bien tigit valer. (Lik 21:1-4) Eski Zezi ti konpar sa de madam-la? Non. Okontrer, li ti trouv toule-de kouma bann madam ki ena boukou lafwa. Zezi imit so Papa dan enn fason parfe. Alor, to kapav sir ki Zeova trouv tou seki to pe fer pou Li, mem si twa to panse ki seki to pe fer bien tigit. Li trouve ki to ena lafwa dan Li ek ki to bien kontan Li. Parfwa, li kapav arive ki nou ena bann dout. Selman, Labib kapav ed nou pou sirmont sa bann dout-la. Lerla, to pou nepli trakase ouswa dekouraze. Rapel ki Zeova konn twa personelman ek ki Li vremem interese ar twa. Li apresie tou bann zefor ki to fer pou met Li an premie dan to lavi, ek Li promet twa ki Li pou rekonpans twa. Wi, to kapav sir ki Zeova kontan tou so bann serviter ki fidel ek ki zot ena boukou valer pou Li. w24.10 25 ¶3; 29 ¶17-18