Nou bizin priye pou ki maximum dimounn ekout nou mesaz ek ki sa pous zot pou koumans servi Zeova. Me ki pou ariv bann dimounn ki pa ekout nou mesaz azordi? Kitfwa sertin dimounn ki pou trouv destriksion Gran Babilonn, pou koumans ena lafwa dan Zeova, ek li posib ki Zeova pou sov zot. Akoz sa, li bien inportan ki nou fer bann dimounn kone seki pou arive biento. Pou ki bann dimounn rapel seki nou ti dir zot, fode ki depi aster-la mem nou dir zot seki pou arive biento! (Konpar ar Ezekiel 33:33.) Kitfwa zot pou rapel ki nou ti dir zot ki sa bann kitsoz-la ti pou arive, ek kitfwa sa pou motiv zot pou servi Zeova ansam ar nou, avan ki li tro tar. Parey kouma sa gardien prizon ki ti koumans ena lafwa dan Zeova apre ki “ti ena enn gran tranbleman-de-ter,” li posib ki sertin dimounn ki pa ekout nou mesaz aster-la, pou koumans ena lafwa kan zot pou trouv destriksion Gran Babilonn.—Zist. 16:25-34. w24.05 16-17 ¶9-10

Dan let ki lapot Pol ti ekrir bann Kretien Ebre, nou aprann enn lot leson inportan. Sertin parmi sa bann Kretien-la ti aret grandi lor plan spiritiel; “zot [ti] re-bizin dile ankor, olie manze solid.” (Ebre 5:12) Zot pa ti aprann ek aksepte bann nouvo kitsoz ki Zeova ti ansegn zot atraver lasanble. (Prov. 4:18) Par exanp, boukou Kretien Zwif ti ankor pe swiv Lalwa Moiz mem si zot ti nepli bizin swiv sa lalwa-la depi anviron 30 an. Sa lalwa-la ti aboli kan Zezi ti donn so lavi an sakrifis. (Tit 1:10) Ek dan let ki li ti ekrir bann Ebre, Pol ti esey fer zot aksepte sa lansegnman bien inportan la. So let ti ed zot pou konpran ki Zeova ti pran bann dispozision gras-a Zezi, pou ki zot ador Li dan enn nouvo fason ek dan enn pli bon fason. Let-la ti osi donn zot kouraz pou zot kontign prese.—Ebre 10:19-23. w24.04 6 ¶15

Depi ki Satan, Adan, ek Ev inn rebel kont Zeova, bann milyar dimounn inn mor. Me ki pou ariv tou sa bann dimounn-la? Enn ti group dimounn ki fidel ar Zeova, 144,000 an tou, pou resisite ek zot pou viv pou touletan dan lesiel. (Rev. 14:1) Ek enn gran lafoul dimounn ki kontan Zeova ek ki form parti “bann dimounn ki drwat,” pou resisite ek pou viv pou touletan lor later, si zot kontign res fidel ar Zeova pandan Regn Mil An Zezi Kris ek pandan leprev final. (Dan. 12:13; Ebre 12:1) Anplis, pandan Regn Mil An Zezi Kris, “bann dimounn ki inzis,” setadir bann ki zame pa’nn servi Zeova ek osi “bann ki’nn pratik bann kitsoz degoutan,” zot pou resisite ek zot pou gagn lokazion pou fer bann sanzman ek pou servi Zeova. (Zan 5:29; Lik 23:42, 43) Selman, parski sa bann dimounn-la ti telman move, Zeova inn deside ki Li pa pou resisit zot.—Lik 12:4, 5. w24.05 2 ¶3; 5 ¶15; 6 ¶17

Si enn kikenn anvi vinn enn invite Zeova, li bizin “dir laverite dan so leker.” (Ps. 15:2) Sa lexpresion-la pa vedir ki nou bizin zis pa koz manti. Zeova anvi ki nou onet dan tou seki nou dir ek tou seki nou fer. (Ebre 13:18) Sa li bien inportan “parski Zeova deteste enn dimounn sournwa, me Li vinn enn kamarad bien pros avek bann dimounn ki drwat.” (Prov. 3:32) Enn kikenn ki “dir laverite dan so leker,” mem kan li tousel li obeir Bondie. Li pa fer sanblan li obeir Bondie zis parski dimounn pe get li. Li pa pou azir dan enn fason malonet osi. Enn kikenn ki malonet, li kapav panse ki bann lalwa Zeova pa touletan bon. (Zak 1:5-8) Lerla, kitfwa li pou dezobeir Zeova dan sertin domenn ki li panse pa inportan pou li. Ek si li pa pey okenn konsekans pou seki li’nn fer, li kapav koumans dezobeir bann lezot lalwa Zeova. Alafin, mem si li panse ki li pe servi Zeova, an realite Zeova pa pou aksepte so ladorasion. (Ekle. 8:11) Se pou sa rezon-la ki li bien inportan ki nou onet dan tou kitsoz. w24.06 10 ¶7-8

Bann serviter Zeova bien kontan bann verite ki ena dan Labib. Samem baz nou lafwa. (Rom. 10:17) Nou sir ki se Zeova ki’nn etabli lasanble Kretien kouma “enn kolonn ek enn soutien pou laverite.” (1 Tim. 3:15) Satan pou bien kontan si nou perdi konfians dan Labib ouswa dan direksion ki lorganizasion Zeova pe donn nou. (Efe. 4:14) Biento, Lediab pou fann bann fos linformasion pou anbet tou bann gouvernman pou ki zot opoz zot ar Zeova. (Rev. 16:13, 14) Ek anplis, nou kapav atann ki Satan pou fer ankor plis zefor pou anbet bann serviter Zeova. (Rev. 12:9) Akoz sa, li bien inportan ki nou antrenn nou pou fer diferans ant seki vre ek seki fos, ek pou obeir laverite. (Rom. 6:17; 1 Pier 1:22) Sa li bien inportan, parski sa pou ed nou pou sirviv pandan gran soufrans. w24.07 8 ¶1-3

Kan Zeova ti donn bann Izraelit so bann lalwa, zot ti promet ki zot ti pou obeir sa bann lalwa-la. Lerla, Zeova ti dir zot ki si zot obeir so bann lalwa, Li ti pou protez zot ek beni zot. Parkont, si zot ti dezobeir so lalwa, ouswa si zot ti ador bann lezot bondie, Li ti pou nepli protez zot, ek sa ti pou fer zot soufer. Selman, sa pa vedir ki Zeova ti pou abandonn zot net. Zot ti pou ankor kapav “retourn ar Zeova [zot] Bondie ek ekout li.” (Det. 30:1-3, 17-20) Savedir ki zot ti pou ankor kapav repanti. Ek si zot ti fer sa, Zeova ti pou revinn pros ar zot ek Li ti pou rekoumans beni zot. Malerezman, bann Izraelit plizir fwa ti rebel kont Zeova. Zot ti ador bann lezot bondie ek zot ti osi fer bann lezot kitsoz bien degoutan. Akoz sa, zot ti bien soufer. Kanmem sa, Zeova pa ti abandonn so pep. Plizir fwa, Li ti avoy bann profet pou ankouraz zot pou repanti ek pou rekoumans servi Li avek tou zot leker.—2 Ler. 17:13, 14. w24.08 9 ¶4-5

Apre ki Zezi inn mor lane 33 Nou Lepok, bann Kretien Ebre ki ti res Zerizalem ek Zide ti konn bann sitiasion bien difisil. Deswit apre ki lasanble Kretien ti forme, zot ti gagn enn gran persekision. Anviron 20 an apre, bann Kretien ti gagn bann gro problem ekonomik, kitfwa akoz lafaminn ki ti ena avan. (Zist. 11:27-30) Me ver lane 61 Nou Lepok, bann Kretien ti konn enn peryod lape. Selman, zot pa ti kone ki dan lavenir zot ti pou gagn plis persekision ankor! Pandan sa peryod lape la, Zeova ti fer lapot Pol ekrir enn let. Bann konsey ki ena dan sa let-la ti pou ed bann Kretien pou zot prepar zot pou bann kitsoz ki ti pou arive biento. w24.09 8 ¶1-2

Kan nou pe soufer, Zeova montre nou so lamour atraver nou bann frer ek ser. Zot kapav rekonfort nou kan zot pran letan pou ekout nou ek kan zot konpran nou santiman. Parfwa, mem si zot pa dir nanye, zot prezans mem li ase. Zot kapav osi partaz bann verse Labib ankourazan avek nou, ouswa priye Zeova ansam avek nou. (Rom. 15:4) Parfwa, enn frer ouswa enn ser kapav rapel nou kouma Zeova trouv nou sitiasion, ek sa kapav ed nou pou kontign andire. Nou bann frer ek ser kapav osi ed nou dan enn fason pratik. Par exanp, zot kapav kwi enn manze pou nou. Si nou anvi ki nou bann frer ek ser soutenir nou, parfwa nou bizin demann zot zot led. (Prov. 17:17) Kitfwa zot pa kone seki nou resanti ouswa seki nou bizin. (Prov. 14:10) Alor, pa ezite pou partaz to santiman avek enn kamarad ki ena matirite. Fer li kone kouma li kapav ed twa. To kapav osi ouver to leker ar enn-de ansien avek ki to santi twa alez. Sertin ser inn gagn rekonfor kan zot inn koz ar bann lezot ser ki ena matirite. w24.10 10 ¶15-16

Boukou dimounn fer bien atansion ar seki zot manze ek zot fer lexersis regilierman. Zot fer sa pou ki zot res an bonn sante, pou ki zot viv inpe pli lontan. Selman, mem si zot fer tousala, zot kone ki zot pou vinn vie ek ki zot pou mor. Kitfwa zot panse ki li inposib ki zot viv pou touletan. Selman, Zezi ti dir ki bann dimounn kapav gagn “lavi pou touletan.” Nou trouv sa dan Zan 3:16 ek 5:24. Enn fwa, Zezi ti fer enn mirak ar sink dipin ek de pwason, ek li ti nouri enn lafoul dimounn. Sa ti enn kitsoz extraordiner! Selman, seki li ti dir so landemin ti pli extraordiner ankor. Sa lafoul dimounn la ti swiv Zezi ziska Kafarnaom, ki pre ar lakot Galile, ek laba, Zezi ti dir zot ki li pou resisit bann mor ek ki zot pou kapav viv pou touletan. (Zan 6:39, 40) Bann parol Zezi montre ki boukou dimounn ki’nn mor, pou kapav resisite, ek ki twa ansam avek bann dimounn ki to kontan, zot pou kapav viv pou touletan! w24.12 8 ¶1-2

Enn rapor l’Organisation mondiale de la santé (OMS) dir ki boukou mari bat zot fam ouswa maltret zot fam. Devan dimounn, kitfwa zot montre ki zot ena respe pou zot fam, me lakaz kot zot, zot bien maltret li. Kifer sertin mari tret zot fam dan enn move fason? Kitfwa zot papa ti violan, ek akoz sa zot panse ki li normal ki zot maltret zot fam. Ena ki maltret zot fam parski laplipar zom dan zot kiltir fer sa. Zot panse ki zot bizin montre zot fam ki zotmem “bos” dan lakaz. Ena lezot ki pa’nn aprann kontrol zot bann lemosion, kouma par exanp lakoler. Sertin zom inn telman get pornografi ki zot ena enn move fason panse lor bann fam ek lor sex. Anplis, boukou exper dir ki depi pandemi COVID-19, bann mari inn vinn pli violan anver zot fam. Selman, tousala se pa bann rezon pou ki bann mari tret zot fam dan enn move fason. w25.01 8 ¶2-3

Zezi ti explike ki komannman pli inportan se: “To bizin kontan Zeova to Bondie avek tou to leker, avek tou to lavi, avek tou to lafors ek avek tou to lespri.” (Lik 10:27) Savedir ki nou bizin kontan Zeova avek tou seki nou ena ek avek tou seki nou ete. Sa konsern nou bann dezir, nou bann lemosion, nou lafors, ek osi nou fason panse. Biensir, nou pa kapav konpran net Zeova so fason panse. Me enn kitsoz ki kapav ed nou pou konpran Zeova so fason panse, se kan nou etidie “fason panse Kris,” parski Zezi pans parey kouma Zeova.—1 Kor. 2:16. w25.03 8 ¶1

Zezi ti enn zom parfe; so lavi ti ena mem valer ki lavi Adan, avan ki Adan fer pese. (1 Kor. 15:45) Alor, parski li’nn mor pou nou, Zezi inn kapav pey pri ki ti bizin, pou ki nou kapav gagn tou seki Adan ti perdi. (Rom. 5:19) Se koumsa ki Zezi inn vinn “dernie Adan.” Alor, ti nepli bizin ki enn lot dimounn parfe donn so lavi pou ki nou regagn seki Adan ti perdi. Kifer? Parski Zezi inn mor “enn fwa pou tou.” (Ebre 7:27; 10:12) Alor, gras-a ki kitsoz nou kapav ena enn bon lamitie ar Zeova? Premierman, Zeova inn pran bann dispozision pou ki nou kapav vinn so kamarad. Ek deziemman, Zezi inn pey pri ki ti bizin, setadir li’nn donn so lavi parfe, pou ki nou kapav gagn pardon nou bann pese.—Ebre 9:14. w25.02 5 ¶12-13

Kan nou gagn bann difikilte, fode pa nou bliye enn kitsoz bien inportan: Satan pretann ki kan nou gagn bann difikilte, nou pou abandonn Zeova. Alor, nou kapav montre ki nou kontan Zeova par fason ki nou azir kan nou gagn bann difikilte. (Zob 1:10, 11; Prov. 27:11) Kan nou res fidel ar Zeova malgre nou bann difikilte, sa montre ki nou kontan Li ek ki Satan enn manter. Eski to pe gagn bann problem finans, to pe gagn persekision ar gouvernman, bann dimounn pa ekout twa kan to prese, ouswa to pe gagn bann lezot difikilte? Si to pe pas par sa bann sitasion-la, pa bliye ki sa donn twa lokazion pou fer leker Zeova kontan. Pa bliye osi ki Zeova zame pa pou les twa gagn enn difikilte ki to pa kapav siporte. To kapav sir ki Li pou donn twa lafors pou andire. w24.06 22 ¶9

Eski to kone ki sitiasion kapav tant twa plis? Li danzere si nou pa pran kont nou bann febles, ouswa si nou panse ki nou tro for ek zame nou pa pou fer pese. (1 Zan 1:8) Me rapel, Pol ti dir ki mem bann “ki kalifie lor plan spiritiel” kapav gagn bann tantasion si zot pa res lor zot gard. (Gal. 6:1) Alor, li bien inportan ki nou onet anver nou-mem ek rekonet ki febles kapav fer nou tonbe pli fasilman. (2 Kor. 13:5) Apre ki nou’nn kone ki kitsoz kapav fer nou tom dan tantasion pli fasilman, ki nou bizin fer? Fer plis zefor pou ki to kapav lit kont sa bann tantasion-la! Anou pran enn lexanp. Dan lepok Biblik, plas ki ti pli fasil pou bann lennmi atak enn lavil, se so bann laport. Akoz samem ti ena boukou solda kot sa bann laport-la pou protez lavil. Dan mem fason, nou bizin fer plis zefor ek plis atansion ar bann febles ki kapav fer nou tom dan tantasion pli fasilman.—1 Kor. 9:27. w24.07 15 ¶5-7

Parmi “bann bon travay” ki mansione dan nou text pou azordi, ena predikasion bon nouvel lor Rwayom Bondie. Alor, kan nou lir Parol Bondie ek nou reflesi lor la, sa ogmant nou lafwa dan Zeova ek sa ed nou pou konpran kifer li inportan ki nou kontign pres bon nouvel. Si to anvi gagn plis bienfe ar Parol Bondie, fode pa to taye-raze kan to lir to Labib, kan to etidie, ouswa kan to reflesi lor seki to’nn aprann. Okontrer, to bizin pran to letan! Si to lir enn verse ki to pa tro konpran, pa fer koumadir to’nn konpran li. Okontrer, servi Index des publications des Témoins de Jéhovah ouswa Liv Resers pou Bann Temwin Zeova pou esey konpran verse-la. Si to pran to letan kan to etidie, to pou ena plis konfians dan bann verite ki ena dan Labib. (1 Tes. 5:21) Ek plis to sir ki Labib dir laverite, plis to pou anvi partaz seki to’nn aprann ar lezot. w24.04 15 ¶4-5

David ti dir ki Zeova “bon ek [Li] pre pou pardone.” (Ps. 86:5) Profet Mishe ti dir: “Kisann-la ki enn Bondie kouma twa, ki pardonn bann erer ek pese?” (Mish. 7:18) Ek Izai ti dir: “Fode ki dimounn ki fer seki pa bon kit so move semin, ek enn move dimounn sanz so fason panse. Ki li retourn ver Zeova, ki pou ena pitie pou li, ki li retourn ver nou Bondie parski So pardon bien gran.” (Iza. 55:7) Pou ki lasanble Korint imit Zeova, zot ti bizin pardonn sa zom-la, akeyir li bien dan lasanble, ek montre li ki zot kontan li. Pol ti dir ki si zot pardonn sa zom-la, zot ti pou montre ki zot “obeir dan tou kitsoz.” Mem si sa ti fer zis de-trwa mwa ki ti tir sa zom-la dan lasanble, li ti repanti. Alor, li pa ti neseser ki bann ansien atann ankor pou ki zot reintegre li. w24.08 17-18 ¶12-13

Nou pe viv enn lepok kot pou ena bann gran sanzman! Biento, Zezi pou ziz tou dimounn. Kouma nou konn sa? Nou konn sa parski Zezi ti donn so bann disip enn “sign” ki ti pou anons so prezans ek “peryod lafin sa lemond-la.” (Mat. 24:3) Nou trouv sa dan Matie sapit 24 ek 25, Mark sapit 13, ek Lik sapit 21. Zezi inn servi trwa lexanp pou averti nou, pou ki nou kapav prepar nou pou sa lepok zizman-la. Sa bann lexanp-la se lexanp bann mouton ek bann kabri, lexanp bann vierz ki ena sazes ek bann vierz ki bet, ek lexanp bann talan. Sa bann lexanp-la montre ki Zezi pou ziz sak dimounn dapre so bann aksion. w24.09 20 ¶1-2

Anou reflesi lor nou lexanp parfe, Zezi Kris. Se lamour pou so Papa ek pou bann dimounn ki ti motiv li dan tou seki li ti fer. Sa lamour-la ti motiv li pou travay bien dir ek pou mem fer bann travay ki lezot ti refiz fer. (Mat. 20:28; Zan 13:5, 14, 15) Frer, si se lamour ki motiv twa pou vinn enn serviter lasanble, Zeova pou beni twa ek Li pou ed twa pou realiz to lobzektif. (1 Pier 5:5) Dan lemond, bien souvan se bann dimounn ki atir latansion lor zotmem ki gagn laglwar. Me bann serviter Zeova pa koumsa! Si parey kouma Zezi se lamour ki motiv enn frer pou servi lezot, li pa pou dominn lor zot ek li pa pou anvi ki lezot trouv li kouma enn kikenn ki inportan. Si enn kikenn ki ena lanbision gagn bann responsabilite dan lasanble, kitfwa li pou refiz fer bann ti travay ki sinp, ouswa fer bann lezot kitsoz pou pran swin bann ti mouton Zeova. Kitfwa li pou panse ki sa bann travay-la tro fay pou li.—Zan 10:12. w24.11 15 ¶6-7

Partou dan lemond, nou bizin plis frer pou servi dan bann lasanble.(Efe. 4:8) Si to enn frer ki batize, eski to kapav ‘ede’? (Prov. 3:27) Eski to kapav ranpli bann kondision ki bizin pou vinn enn serviter lasanble? Si to deza enn serviter lasanble, eski to ena dezir pou servi to bann frer ek ser kouma ansien? Eski to kapav fer bann sanzman dan to lavi pou to ranpli form Lekol pou Bann Evanzelizater Rwayom Bondie? Gras-a formasion ki to pou gagne dan sa lekol-la, Zezi pou kapav servi twa pli bien. Si to panse ki to pa kapav fer sa bann kitsoz-la, priye Zeova. Demann Li so lespri sin pou ki to kapav asim bien tou responsabilite ki to gagne. (Lik 11:13) Bann zom ki Zezi inn etabli pou okip lasanble, zot pe travay bien dir. Sa se enn prev ki Zezi pe diriz nou pandan bann dernie zour. (Mat. 28:20) Nou bien rekonesan ki nou ena enn Lerwa kouma Zezi, pa vre! Li bien kontan nou, li zenere, li kone seki nou bizin, ek li donn nou bann zom ki pran nou swin. w24.10 23 ¶16-17

Ki pou ariv tou bann move kitsoz ki pe fer bann serviter Zeova soufer azordi? Labib dir ki biento “nou pou vremem bliye tou bann maler ki nou finn gagne.” (Iza. 65:16) Zeova pou fer tou sa bann move kitsoz-la disparet, ek nou pa pou mem rapel sa bann kitsoz-la. Azordi, bann sitiasion ki ena dan sa lemond-la kapav bien stres nou. Selman, kan nou asiste nou bann renion, nou santi nou pli kalm ek nou mwin strese. Kifer nou dir sa? Parski kan nou zwenn nou bann frer ek ser, ek ki nou tou nou montre bann kalite kouma lamour, lazwa, lape, zantiyes, ek douser, nou santi nou pli kalm. (Gal. 5:22, 23) Nou bien kontan ki nou form parti enn gran fami bann frer ek ser, pa vre! Bann ki kontign res dan paradi spiritiel pou kapav trouv promes Zeova konsernan “enn nouvo lesiel ek enn nouvo later” realize. w24.04 22 ¶9-10

Mem si frekantasion se enn moman ki bien zwaye, se enn kitsoz ki bien serye. Kifer? Parski kan de dimounn frekante, zot fer sa parski zot ena lintansion pou marye. Zour zot maryaz, zot promet Zeova ki zot pou kontan ek respekte zot kamarad toutlong zot lavi. Enn promes, se enn kitsoz ki bien serye. Akoz sa, nou bizin reflesi bien avan ki nou fer li. Kan de dimounn frekante, zot aprann konn zot kamarad pli bien pou ki zot kapav pran enn bon desizion, setadir swa zot marye, ouswa zot aret frekante. Si zot desid pou aret frekante, sa pa vedir ki zot frekantasion pa’nn pas bien. Okontrer, sa inn ed zot pou pran enn bon desizion. Li bien inportan ki bann selibater konpran kifer de dimounn frekante. Zot frekante pou kone si zot pou marye ouswa non. Alor, si to pena lintansion pou marye, fode pa to koumans frekante. w24.05 26-27 ¶3-4

Parfwa, enn zenn kapav gagn difikilte pou defann so bann krwayans. Par exanp, li kapav per ouswa gagn onte pou explike kifer li pa krwar dan teori levolision. Kifer? Parski so profeser kitfwa dir ki levolision, li pa enn teori, me se enn kitsoz ki’nn vremem arive. Alor, si to enn paran, kouma to kapav ed to zanfan pou krwar ki seki Labib dir li exakt? Rasir to zanfan ki fode pa li onte parski li krwar dan enn Kreater. Boukou siantis panse ki lavi pa’nn aparet par azar, ouswa enn kout koumsa. Zot dir ki bizin ena enn Kikenn ki intelizan ki’nn kree tou seki ena dan lanatir. Akoz sa, zot pa krwar dan teori levolision. Enn kitsoz ki kapav ed to zanfan pou ogmant so lafwa ek pou ena plis konfians an limem, se kan li demann bann frer ek ser ki kitsoz inn konvink zot pou krwar dan enn Kreater. w24.12 18 ¶14-15

Zezi ti sir ki ti pou ena bann dimounn ki ti pou ekout mesaz bon nouvel. Sa ti ed li pou res pozitif ek pou kontign prese. Par exanp, ver lafin lane 30 Nou Lepok, li ti trouve ki boukou dimounn ti anvi ekout mesaz bon nouvel, ek li ti konpar zot ar enn karo ki’nn pare pou rekolt. (Zan 4:35) Apepre enn an apre, li ti dir so bann disip: “Rekolt-la gran.” (Mat. 9:37, 38) Ek enn lot fwa ankor, li ti dir: “Rekolt-la gran . . . Sipliy Proprieter karo pou avoy bann travayer pou ramas rekolt.” (Lik 10:2) Zezi ti sir ki ti pou ena bann dimounn ki ti pou aksepte bon nouvel, ek kan zot ti fer sa, sa ti rann li zwaye. Zezi ti ed so bann disip pou kontign ena enn gran dezir pou prese, kan li ti rapel zot ki zot ti pou gagn bann bon rezilta. w25.03 18-19 ¶15-16

Zeova Li enn fortres; Li protez nou. Kan ena enn gro tornad, enn kikenn kapav kasiet kot enn gran ros; sa ros-la pou protez li. Dan mem fason, Zeova protez nou kan nou gagn bann gro difikilte. Li protez nou kont ninport ki kitsoz ki kapav gat nou lamitie avek Li, ek Li rasir nou ki mem si nou pe soufer azordi, sa pa pou dire pou touletan. Li promet nou ki dan lavenir, Li pou tir tou bann kitsoz ki fer nou trakase ek ki fer nou soufer. (Eze. 34:25, 26) Kouma nou kapav fer Zeova vinn nou Fortres? Enn fason nou fer sa se kan nou priye Li. Kan nou priye Li, Li donn nou “lape Bondie” ki kapav protez nou leker ek nou lespri. (Fil. 4:6, 7) Zeova pou touletan la pou ed nou. Nou kapav fer Li konfians parski “Zeova Limem sa gran Ros pou touletan la.” (Iza. 26:3, 4) Li pou touletan tini so bann promes, ekout nou bann lapriyer, ek soutenir nou kan nou bizin. Nou kapav osi kont lor Li parski Li fidel anver so bann serviter. (2 Sam. 22:26) Zame Li pa pou bliye seki nou fer, ek Li pou touletan rekonpans nou.—Ebre 6:10; 11:6. w24.06 27 ¶4-6

Nou bizin fer atansion ar bann kitsoz ki nou gete, ouswa seki nou fer pandan nou letan lib. Nou bizin osi fer atansion pou swazir bien nou bann kamarad, pou ki zot pa fer nou krwar ki kas, se samem ki pli inportan dan lavi. Si nou trouve ki nou lamour pou Zeova pe diminie, fode pa nou tarde pou sanz nou fason panse ek azir pou ki sa bann kitsoz-la pa fer nou perdi nou lamour pou Zeova. (Mat. 5:29, 30) Fode pa nou ena enn leker partaze. Nou kapav anbet nou-mem ek krwar ki si nou res okipe dan servis Zeova, alor bann move linflians pa pou afekte nou. Anou pran enn lexanp: Fer koumadir pe fer bien so. Pou soulaz twa kont saler, to desid pou bwar plis delo. Me ki pou arive si to res dan soley toutlong lazourne olie ki to al rod enn plas lonbraz pou kasiet? Saler soley pou fer twa gagn plis swaf ankor. Ki leson nou aprann? Li pa ase ki nou zis fer bann bon kitsoz ki pou fer nou vinn pros ar Zeova. Parey kouma nou pa pou res tro lontan dan soley kan pe fer bien so, nou bizin protez nou kont ninport ki kitsoz ki ena dan sa lemond-la ki kapav fer nou lamour pou Zeova diminie.—Efe. 2:2. w24.07 21 ¶6-7

Sirman nou’nn deza reflesi lor bann soufrans ki Zezi ti andire kan bann solda Romin ti koulout li lor enn poto. Selman, nou pa kapav konpran net kantite ki li’nn soufer, kantite ki li’nn santi li imilie, ek kantite linzistis ki li’nn bizin andire. Zezi pa ti les linzistis gagn laviktwar lor li, mem si li ti soufer. Olie ki li ti demann so Papa pou pini sa bann solda-la, li ti priye ek li ti dir: “Papa, pardonn zot, parski zot pa kone ki zot pe fer.” (Lik 23:34) Kan nou priye pou bann ki tret nou dan enn move fason, sa kapav ed nou pou res kalm ek pou pa res ankoler, ek sa kapav osi ed nou pou trouv zot dan enn lot fason. Tanki nou pou viv dan sa move lemond-la, nou pou kontign fer fas ar bann linzistis. Ek sak fwa ki nou fer fas ar linzistis, fode zame ki nou aret priye Zeova pou demann Li so led. Nou bizin osi imit fason ki Zezi ti azir kan lezot ti tret li dan enn move fason, ek nou bizin kontign swiv bann konsey ki ena dan Labib. Si nou fer tousala, nou kapav sir ki Zeova pou beni nou.—1 Pier 3:8, 9. w24.11 6 ¶16; 7 ¶17, 19

Zeova pa aksepte bann move konportman; Li deteste pese. (Ps. 5:4-6) Li anvi ki nou obeir bann komannman ki ena dan Labib. Selman, Li kone ki nou inparfe ek ki nou pa kapav obeir Li dan enn fason parfe. (Ps. 130:3, 4) Kanmem sa, Li pa toler ‘bann zom ki pena okenn respe pou Li ek ki servi bonte extraordiner Bondie kouma enn pretext pou ena enn kondwit devergonde.’ (Zid 4) Se akoz sa ki Labib koz lor “destriksion bann dimounn ki pena okenn respe pou Bondie” kan pou ena lager Armagedon. (2 Pier 3:7; Rev. 16:16). Selman, Zeova pa anvi ki personn detrir. Labib dir ki Zeova “anvi ki tou dimounn repanti.” (2 Pier 3:9) Bann ansien imit Zeova kan avek pasians zot ed enn kikenn pou sanze ek pou revinn pros ar Li. w24.08 26 ¶1-2

Parey kouma Zeova, nou osi nou kapav donn lezot bann kitsoz materyel parski nou kontan zot. Par exanp, eski to konn enn frer ouswa enn ser ki bizin manze ouswa linz? Zeova kapav servi twa pou donn li enn kitsoz ki pou ed li. Bann serviter Zeova abitie montre zenerozite kan ena bann katastrof. Par exanp, pandan pandemi COVID-19, bann frer ek ser ti ed bann ki ti bizin led. Zot ti donn manze, linz, ek bann lezot kitsoz. Boukou ti osi fer bann kontribision pou soutenir bann laktivite ki nou fer dan lemond antie. Sa bann kontribision-la ti ed bann frer ek ser ki ti fer fas ar bann katastrof. Nou bann frer ek ser ki bien zenere, ti met an pratik bann parol ki ena dan Ebre 13:16, ki dir: “Pa bliye fer dibien ek partaz seki zot ena avek lezot, parski se bann sakrifis koumsa ki Bondie bien kontan.” w24.09 27 ¶6-7

Fer koumadir to pe rod enn travay pou to kapav pran swin to fami. To reisi trouv de travay, selman to bizin fer enn swa. To’nn gagn tou bann ransegnman ki bizin, kouma par exanp, kouma travay-la ete, ki ler li koumanse, ki ler li fini, ki kantite letan to pou pran pou al travay, ek bann lezot ransegnman ankor. Ek dapre bann prinsip Labib, toule-de travay korek. Selman, kitfwa to plis kontan enn ladan, parski to kontan fer sa travay-la ouswa parski li pey pli bien. Me ena bann lezot kitsoz lor ki to bizin reflesi avan ki to pran to desizion. Par exanp, to kapav demann tomem, ‘Eski mo pou reisi gagn tou mo bann renion ar sa travay-la? Eski mo pou ena ase letan pou okip mo fami bien, ek pou ki mo pran zot swin lor plan spiritiel?’ Bann kestion koumsa kapav ed twa pou res konsantre lor “bann kitsoz ki pli inportan,” setadir lor to servis pou Zeova ek lor to fami. Sa bann kitsoz-la pli inportan ki gagn boukou kas. Kan to reflesi lor bann kestion koumsa, to pou kapav pran bann desizion ki pou fer Zeova plezir ek ki Li pou beni. w25.01 17-18 ¶11-13

Mem si lezot inn tret twa dan enn move fason, to kapav sir ki Zeova kontan twa ek ki to ena valer pou Li. Alor, si to panse ki to pena valer, rapel ki Zeova inn trouv bann zoli kalite ki to ena, ek ki Li’nn atir twa ver Li, pou ki to kapav vinn pros ar Li. (Zan 6:44) Zeova bien kontan twa. Akoz sa, Li touletan pre pou ed twa. Nou kapav konpran santiman ki Zeova ena pou nou gras-a lexanp Zezi. Kan Zezi ti lor later, li ti bien zanti anver bann dimounn ki ti panse zot pena valer akoz fason ki lezot ti tret zot. (Mat. 9:9-12) Par exanp, kan enn madam ki ti ena enn maladi bien grav ti tous linz Zezi dan lespwar ki li geri, Zezi ti rekonfort li ek ti felisit li pou so lafwa. (Mark 5:25-34) Zezi imit bann kalite so Papa dan enn fason parfe. (Zan 14:9) Akoz sa, to kapav sir ki to ena valer pou Zeova ek ki Li trouv to bann zoli kalite, kouma par exanp to lafwa ek to lamour pou Li. w24.10 7 ¶4-5

Dan so lavi, David ti bizin andir bann sitiasion difisil ki ti fer li bien plore. Boukou dimounn ti deteste li, ek mem sertin parmi so bann kamarad ek so fami ti trayir li ek ti fer li ditor. (1 Sam. 19:10, 11; 2 Sam. 15:10-14, 30) Dan enn moman bien difisil dan so lavi, David ti dir: “Mo’nn fatige plengne; Mo lili tranpe parski toutlong lanwit mo plore; Mo fotey mouye akoz mo bann larm.” (Ps. 6:6) Malgre bann difikilte ki li ti gagne, David ti sir ki Zeova ti kontan li. Li ti dir: “Zeova pou tande kan mo plore.” (Ps. 6:8) Kan nou lir nou text pou azordi, nou konpran ki Zeova bien kontan nou ek ki nou bann santiman ena valer pou Li. Pou David, sa ti koumadir Zeova ti pe ramas so bann larm dan enn boutey, ouswa ti pe ekrir zot dan enn liv. David ti sir ki Zeova ti trouv so lapenn ek ki Li pa ti bliye li. Li ti sir ki so Papa Zeova ti trouv so bann problem ek ti konn lefe ki sa ti ena lor li. w24.12 22 ¶11-12