Bann disip Zezi ti krwar dan Parol Bondie ek zot ti fer zot maximum pou obeir Zeova. (Zan 17:6) Selman, zot ti gagn difikilte pou konpran kifer Zezi ti mor kouma enn kriminel. Zezi ti kone ki so bann disip ti ena lafwa ek ki zot ti kontan Zeova, me li ti kone osi ki zot ti bizin led pou ki zot konpran Parol Bondie pli bien. (Lik 9:44, 45; Zan 20:9) Akoz sa, li ti ed zot pou konpran seki ti ekrir dan bann Lekritir. Anou gete kouma li ti fer sa kan li ti aparet ar sa de disip ki ti pe al Emais la. Kan Zezi ti zwenn sa de disip-la, li pa ti dir zot deswit kisann-la li ete. Olie sa, li ti poz zot bann kestion. Kifer li ti fer sa? Kitfwa li ti anvi ki zot ouver zot leker ar li ek ki zot dir li seki ti pe trakas zot. Ek se samem ki zot ti fer! Zot ti dir li ki zot ti panse ki Zezi ti pou vinn lerwa dan Izrael ek ki li ti pou liber zot ar bann Romin. (Lik 24:18-27) Zezi ti les zot dir seki ti pe trakas zot, ek apre sa, li ti servi bann Lekritir pou explik zot ki so lamor ti realiz boukou profesi. Plitar sa zour-la, Zezi ti osi zwenn bann lezot disip pou explik zot bann profesi ki ti realize.—Lik 24:33-48. w24.10 14 ¶9-10

Zezi ti dir ek ti fer tou seki so Papa ti ansegn li. Nou lorganizasion swiv lexanp Zezi azordi. Kouma? Li servi Parol Bondie, Labib, pou ansegn nou, pou gid nou, ek pou ed nou fer diferans ant seki bon ek seki pa bon. (2 Tim. 3:16, 17) Se akoz sa ki bien souvan nou lorganizasion rapel nou ki nou bizin lir Labib ek met li an pratik. Nou gagn boukou bienfe kan nou servi bann piblikasion pou etidie Labib. Kan nou fer sa, sa ed nou pou konpar bann lansegnman ki ena dan Labib ar bann instriksion ki lorganizasion donn nou. Ek kan nou trouve ki sa bann instriksion-la sorti dan Labib, sa ogmant nou konfians dan lorganizasion Zeova. (Rom. 12:2) Zezi ti pres “bon nouvel lor Rwayom Bondie.” (Lik 4:43, 44) Ek li ti osi donn so bann disip lord pou fer sa. (Lik 9:1, 2; 10:8, 9) Azordi, ninport kotsa zot reste, tou bann serviter Zeova bizin pres bon nouvel lor Rwayom Bondie. w24.04 9 ¶5-7

Dan lepase, Zeova ti servi Moiz ek Zozwe pou donn so pep bann instriksion. (Zozwe 1:17) Bann Izraelit ti gagn bann bienfe kan zot ti konsider sa bann zom-la kouma bann reprezantan Zeova. Bann santenn lane apre, kan ti etabli lasanble Kretien, se bann 12 zapot ki ti donn bann instriksion. (Zist. 8:14, 15) Plitar, ti ena bann ansien dan Zerizalem ki ti vinn ansam avek sa bann 12 zapot la. Kan bann Kretien ti swiv direksion ki sa bann zom-la ti pe done, “bann lasanble ti kontign vinn for dan lafwa ek kantite bann krwayan ti pe ogmante zour apre zour.” (Zist. 16:4, 5) Dan nou lepok, nou osi nou gagn bann bienfe kan nou obeir bann instriksion ki lorganizasion Zeova pe donn nou. w24.07 10 ¶10

Zeova ti bien kontan Lerwa David. Li ti mem dir ki David ti “enn zom ki fer [so] leker plezir.” Selman, David ti fer bann pese bien grav, par exanp li ti komet ladilter ek li ti fer touy enn dimounn. Dapre Lalwa Moiz, David ti bizin mor. (Lev. 20:10; Nonb 35:31) Me Zeova ti anvi ed David pou repanti. Alor, Li ti avoy profet Natan pou al get David, mem si David pa ti ankor montre okenn sign repantans. Natan ti servi enn lexanp pou tous leker David. Ek kan David ti konpran ki li ti kas leker Zeova, li ti repanti. (2 Sam. 12:1-14) Apre sa, li ti ekrir enn psom pou explike kouma li ti bien sagrin akoz bann pese ki li ti fer. (Ps. 51, not ki ena lao) Sa psom-la inn ed boukou dimounn ki’nn fer pese pou repanti. Eski sa pa tous nou kan nou trouve kouma avek boukou lamour Zeova inn ed bann dimounn pou repanti? w24.08 10 ¶9

Boukou paran pou dakor ki se enn gran travay pou elve bann zanfan! Si to enn paran, sirman to fer boukou zefor pou ogmant lafwa to zanfan dan Zeova, ek nou felisit twa pou sa. (Det. 6:6, 7) Me amezir ki to zanfan grandi, kitfwa li pou koumans poz bann kestion lor nou bann krwayans, kouma par exanp, ‘Kifer Zeova pa anvi nou fer sertin kitsoz?’ O-koumansman, kitfwa to kapav trakase. Kifer? Parski kitfwa to panse ki li pe poz sa bann kestion-la parski li pena ase lafwa dan Bondie ek dan Labib. Me avredir, amezir ki to zanfan grandi, li normal ki li poz bann kestion, parski sa pou ed li pou ogmant so lafwa. (1 Kor. 13:11) Alor, pa bizin tro trakase. Kan to zanfan poz bann kestion lor nou krwayans, sezi sa lokazion-la pou montre li kouma li kapav reflesi an profonder lor sa bann kitsoz-la. Koumsa, sa pou ogmant so lafwa dan Bondie. w24.12 14 ¶1-2

Bann Kretien Ebre ti pou bizin ena enn gran lafwa pou ki zot kapav gagn lavi sov pandan gran persekision ki zot ti pou gagne biento dan Zide. (Ebre 10:37, 38) Zezi ti dir so bann disip ki, kan zot trouv Zerizalem antoure ar bann larme, zot bizin sove al dan bann montagn. Sa konsey-la ti konsern tou bann Kretien, mem si zot ti viv dan lavil ouswa dan lakanpagn. (Lik 21:20-24) Sa lepok-la, kan enn larme ti vinn atake, normalman bann dimounn ki ti pe viv dan lakanpagn ti pou al dan lavil parski bann miray lavil ti pou protez zot. Alor, sa pa ti lozik ki zot sove pou al dan bann montagn. Akoz sa, zot ti pou bizin ena enn gran lafwa pou obeir Zezi. Bann Kretien Ebre ti bizin osi fer konfians bann dimounn ki Zezi ti pe servi pou diriz lasanble. Bann frer ki ti pe dirize kitfwa ti donn bann instriksion presi lor kan pou sove ek kouma pou fer sa.—Ebre 13:17. w24.09 10 ¶9-10

Kan li ti lor later, Zezi ti fer exakteman seki so Papa ti demann li pou fer. (Zan 17:4) Selman, li pa ti panse ki se zis li tousel ki ti pou kapav fer travay Zeova. Zezi ti osi form lezot pou zot fer travay Zeova. Li ti donn so bann disip responsabilite pou pran swin bann mouton Zeova ek pou diriz travay predikasion ek lansegnman. Zezi pa ti ezite pou donn so bann disip bann konsey ki fran, selman li ti fer sa avek boukou lamour. Sertin parmi zot pa ti krwar ki li ti mor ek ki li ti resisite, alor li ti ed zot pou ki zot kapav konpran laverite. (Lik 24:25-27; Zan 20:27) Li ti osi dir zot ki, olie ki zot fer zot travay vinn zot priorite, se bann mouton Zeova ki ti bizin zot priorite. (Zan 21:15) Ek li ti rapel zot ki fode pa zot konpar seki zot pe fer pou Zeova ar seki lezot pe fer. (Zan 21:20-22) Li ti koriz bann fos lide ki zot ti ena konsernan Rwayom Bondie, ek li ti ed zot pou res konsantre lor travay predikasion.—Zist. 1:6-8. w24.10 15-16 ¶13-14

Lobeisans fer nou gagn lavi. Parey kouma bann Izraelit ki ti pre pou rant dan Later Promiz, nou osi nou pre pou rant dan nouvo lemond ki Zeova promet nou. (Iza. 35:1; Lik 23:43) Biento, Satan ek so bann demon pou disparet. (Rev. 20:2, 3) Pou nepli ena bann fos relizion ki fer bann dimounn al lwin ar Zeova. (Rev. 17:16) Bann gouvernman pou nepli fer dominer ar bann dimounn. (Rev. 19:19, 20) Ek pa pou ena okenn rebel dan Paradi. (Ps. 37:10, 11) Partou lor later, bann dimounn pou obeir bann lalwa Zeova ek sa pou amenn lape ek linite. Sa lepok-la, sakenn pou kontan so kamarad ek pou fer li konfians. (Iza. 11:9) Nou pe atann sa moman-la avek inpasians, pa vre! Anplis, si nou obeir Zeova, nou pou viv lor later ki pou vinn enn paradi, pa zis pou enn tigit letan, me pou leternite!—Zan 3:16. w24.11 9 ¶7

Sa profesi-la pe realize dan nou lepok. Azordi, nou bann piblikasion disponib dan plis ki 1,000 lang, ek gras-a nou sit jw.org, laplipar bann dimounn lor later pe kapav tann koz lor bon nouvel Rwayom Bondie. Selman, Zezi ti osi dir so bann disip ki zot pa ti pou “reisi al dan tou bann lavil,” setadir pres ar sak dimounn, avan ki li vini. (Mat. 10:23; 25:31-33) Sa bann parol-la vre, parski azordi ena bann milyon dimounn ki res dan bann landrwa kot nou predikasion interdi. Anplis, sak minit, plizir santenn ti-baba pe ne. Alor, mem si nou pe fer nou maximum pou pres “ar tou bann nasion, tribi, [ek] lang,” nou pa pou reisi pres bon nouvel ar sak dimounn ki ena lor later avan ki lafin vini.—Rev. 14:6. w24.05 10 ¶6-7

Kan Zezi ti koz ar lezot, li ti rekonfort zot ek ankouraz zot. Zame li pa ti koz brit ar so bann disip. (Lik 8:47, 48) Zezi, li vremem enn zoli lexanp pou bann mari Kretien! Zezi inn donn lord bann mari pou res fidel ar zot fam. Kan li ti dir sa, Zezi ti pe mazine kouma o-koumansman Zeova ti dir ki enn zom bizin “res ar so fam.” (Mat. 19:4-6) Lexpresion Grek ki’nn servi dan sa verse-la pou “res ar” vedir “kole ar lakol.” Alor, kan de dimounn marye, zot relasion bizin telman for ki se koumadir zot inn kole ansam. Ek si sa relasion kase, toule-de soufer. Kan enn mari ena sa kantite lamour-la pou so fam, sa pou pous li pou rezet pornografi. Deswit li pou “aret get bann kitsoz ki pa vo nanye.” (Ps. 119:37) Se koumadir li’nn fer enn lalians ar so lizie, parey kouma Zob, pou pa get enn lot fam ek ena enn dezir pou li.—Zob 31:1. w25.01 10 ¶12-13

Kan enn kikenn dir nou ki li pardonn nou, nou pa vremem kone ki li pe rod dir. Parkont, fason ki Zeova pardone, li bien diferan ar fason ki nou pardonn lezot. Kifer? Parski personn pa kapav pardonn parey kouma Zeova. Enn ekrivin psom ti dir: “Parski se twa [Zeova] ki donn vre pardon, akoz sa bann dimounn ena enn gran respe pou twa.” (Ps. 130:4) Wi, kan Zeova pardone, se enn “vre pardon.” Se gras-a Zeova ki nou kapav kone ki sa vedir vremem pardone. Dan sertin verse Lekritir Ebre, bann ekrivin Labib servi enn mo pou dekrir fason ki Zeova pardone. Selman, zame zot pa servi sa mo-la pou dekrir fason ki bann dimounn pardone. Kan Zeova pardonn enn kikenn, Li efas net pese sa dimounn-la. Lerla, sa dimounn-la kapav revinn pros ar Li. Nou vremem rekonesan ki Zeova pardonn nou net, ek Li mem fer sa plizir fwa! w25.02 8 ¶1-3

Nou kapav zwaye mem kan bann dimounn pa ekout nou kan nou prese. Kifer? Parski nou’nn fer seki Zeova ek Zezi inn demann nou; nou’nn “donn enn temwaniaz.” Ek mem si nou pa zwenn personn kan nou al prese, ouswa mem si bann dimounn pa aksepte nou mesaz, nou kone ki nou pe fer Zeova plezir ek sa rann nou zwaye. (Prov. 27:11) Nou bizin zwaye osi kan enn lot proklamater trouv enn kikenn dan teritwar ki interese ar nou mesaz. Enn Latour Degard ti konpar nou travay predikasion ar seki bann dimounn ti fer kan enn zanfan ti perdi. Boukou dimounn ti donn enn koudme pou rod li, ek zot ti rod li plizir plas. Ek kan ti reisi trouv zanfan-la, tou dimounn ti zwaye, pa zis dimounn ki ti reisi trouv li la. Dan mem fason, pou ki enn kikenn vinn enn disip Zezi, tou dimounn dan lasanble donn enn koudme. Ek kan enn kikenn koumans asiste bann renion, nou tou nou bizin zwaye. w24.04 18 ¶13-14

Nou vremem inpasian pou trouv tou seki pou arive dan lavenir! Avek led Zeova, kitfwa nou pou trouv boukou dimounn ankor aksepte laverite avan ki gran soufrans koumanse. Ek pandan gran soufrans, kitfwa pou ena bann dimounn ki pou kit lemond Satan ek pou koumans ador Zeova ansam ar nou. Me an-atandan, nou ena enn travay inportan pou fer; enn travay ki zame nou pa pou fer ankor. Nou ena privilez pou pres bon nouvel lor Rwayom Bondie partou lor later. Nou bizin osi dir bann dimounn seki pou arive biento. Bann dimounn bizin kone ki lafin sa lemond-la bien pre. Nou bien deside pou res aktif dan predikasion ek pou kontign prese ar tou nou leker. Nou fer sa parski nou kontan bon nouvel, nou kontan bann dimounn, me pli inportan, nou kontan Zeova ek nou kontan so nom. Ek nou bien deside pou kontign prese ziska ki Zeova dir nou, “Ase!” w24.05 19 ¶14-16

Lanwit avan so lamor, Zezi ti ansegn Pier ek bann lezot zapot enn leson bien inportan lor limilite. Sirman bann zapot ti bien etone, parski Zezi ti fer enn travay ki bann serviter abitie fer. Zezi ti tir so manto, li ti atas enn serviet otour so lerin, li ti met delo dan enn kivet ek li ti koumans lav zot lipie. (Zan 13:4, 5) Sirman sa ti pran inpe letan, parski li ti lav lipie toule 12 zapot; li ti mem lav lipie Zida, ki ti pou trayir li apre. Pourtan, avek boukou limilite, Zezi ti fer sa travay-la. Apre sa, Zezi ti explik so bann zapot kifer li ti fer sa. Li ti dir zot: “Eski zot konpran ki mo’nn fer avek zot? Zot apel mwa ‘Ansegnan’ ek ‘Segner,’ ek zot ena rezon, parski samem mo ete. Si mwa ki Segner ek Ansegnan mo’nn lav zot lipie, alor zot osi zot bizin lav lipie zot kamarad.”—Zan 13:12-14. w25.03 10 ¶9-11

Azordi, nou pe viv dan enn move lemond ek nou kapav gagn difikilte pou res pros ar Zeova. Boukou dimounn pa krwar ki Bondie existe, ek bann ki pa swiv bann prinsip Bondie, bien souvan zot dan bien. Kan nou trouv bann kitsoz koumsa, sa kapav fer nou perdi konfians an Zeova. Mem si nou kone ki Bondie existe, nou kapav koumans ena bann dout ek panse ki Li pa pou ed so bann serviter. Se seki ti ariv ekrivin Psom 73. Li ti trouve ki bann dimounn ki pa ti swiv bann lalwa Bondie ti dan bien. Ek akoz sa, li ti koumans demann limem si li vo lapenn servi Bondie. (Ps. 73:11-13) Ki kitsoz ti ed sa ekrivin psom la pou sanz so fason panse? Li ti reflesi lor seki ti pou ariv bann dimounn ki bliye Zeova. (Ps. 73:18, 19, 27) Li ti osi reflesi lor bann bienfe ki enn kikenn gagne kan li servi Bondie. Nou osi nou bizin reflesi lor tou bann benediksion ki Zeova inn donn nou. w24.06 24-25 ¶16-17

Dan lepase, sertin Izraelit ti abiz lor zot bann frer ki ti mizer. Kan zot ti pret bann-la kas, zot ti pran gro-gro lintere ar zot. Ti ena osi bann ziz ki ti pran brayb ek ki ti kondann bann inosan. Zeova bien pa kontan kan bann dimounn fer bann kitsoz koumsa! (Eze. 22:12) Detanzantan, li bon ki nou verifie seki nou panse lor larzan. To kapav demann tomem: ‘Eski souvan mo pans kas ouswa bann kitsoz ki mo kapav aste? Si mo’nn pran kas prete, eski mo tarde pou retourn dimounn-la so kas, sirtou si dimounn-la li enn kikenn ki ena kas? Kan mo ena kas, eski mo santi mwa inportan? Kan mo ena kas, eski mo trouv sa difisil pou montre mwa zenere? Si mo bann frer ek ser ena kas, eski mo panse ki zot materyalis? Eski mo fer kamarad zis ar bann ki ena kas, ek mo pa frekant bann dimounn ki mizer?’ Si nou anvi kontign ena enn bon lamitie ar Zeova, nou bizin fer an-sort ki nou pena lamour pou larzan. Koumsa, Zeova zame pa pou abandonn nou! w24.06 12-13 ¶17-18

Pou nou protez nou-mem pou ki nou pa tom dan tantasion, nou bizin fer zefor pou ena bann bon dezir. Si nou aprann pou “ena laenn pou seki move, ek kontan seki bon,” nou pou bien deside pou fer seki bon. (Amos 5:15) Ek kan nou ena bann bon dezir, sa pou ed nou pou lit kont bann tantasion. Nou bizin res bien okipe dan bann laktivite ki pou fer nou lamitie avek Zeova vinn for. Kan nou al renion ek nou prese, nou dezir pou fer Zeova plezir vinn pli for. (Mat. 28:19, 20; Ebre 10:24, 25) Nou bizin osi lir, etidie, ek reflesi lor Parol Bondie. Sa pou ed nou pou plis kontan bann bon kitsoz, ek pou ena plis laenn pou seki move. (Zozwe 1:8; Ps. 1:2, 3; 119:97) Rapel seki Zezi ti dir so bann disip: “Kontign priye, pou ki zot pa tom dan tantasion.” (Mat. 26:41) Alor kan nou priye Zeova, sa donn Li lokazion pou ed nou, ek nou pou plis anvi kontign fer Li plezir.—Zak 4:8. w24.07 17 ¶14-16

Bann ki donn formasion bizin imit fason ki Zeova partaz so sazes. Pa bliye ki Zeova donn sazes avek zenerozite. Dan mem fason, nou osi nou partaz nou konesans ek nou lexperyans avek bann ki pe aprann. Fode pa nou gard seki nou kone pou nou-mem, parski nou per tansion lezot ranplas nou. Fode pa osi ki nou dir: ‘Personn pa’nn form mwa! Les li aprann par limem.’ Fode zame ki enn serviter Zeova pans koumsa! Okontrer, nou kontan partaz tou seki nou kone, ek fer tou seki nou kapav pou form lezot. (1 Tes. 2:8) Lerla, sa pou rann nou zwaye parski “an-retour, [zot] pou bien kalifie pou ansegn lezot.” (2 Tim. 2:1, 2) Si avek zenerozite tou dimounn partaz so sazes, tou dimounn pou gagn plis sazes ek pou plis zwaye. w24.09 29 ¶12-13

Si to panse ki to pena ase kapasite, fode pa to dekouraze. Nou sir ki to ena bann kalite ki bien itil pou to servi to bann frer ek ser. Alor, reflesi lor seki Pol ti dir dan 1 Korintien 12:12-30 ek apre sa, priye Zeova. Demann Li pou ed twa pou trouve kouma sa bann parol-la konsern twa. Dan sa bann verse-la, Pol montre ki parey kouma tou bann lezot serviter Zeova, twa osi to ena valer ek to itil dan lasanble. Fer to maximum pou servi Zeova ek pou ed to bann frer ek ser. Lerla, kan bann ansien pou trouv bann progre ki to pe fer, to kapav sir ki zot pou donn twa bann responsabilite ki to kapav fer. (Rom. 12:4-8) Tou bann Kretien bizin vinn pros ar Zeova, zot bizin kontan pou ed lezot, ek zot bizin viv dan enn fason ki fer Zeova plezir. Alor, kitfwa to deza pe ranpli sa bann kondision-la. w24.11 17 ¶12-13

Ann ti bien sagrin ek li ti bien plore akoz bann difikilte ki li ti gagne. So misie ti ena enn lot madam ki ti apel Penina, ek Penina ti deteste Ann. Anplis, Ann pa ti kapav gagn zanfan, alor ki Penina ti ena boukou zanfan. (1 Sam. 1:1, 2) Akoz sa, Penina ti kontign manz lavi Ann. Ann ti telman sagrin ki “li ti plore ek li pa ti manze.” Labib dir ki li ti vinn “amer” dan so leker. (1 Sam. 1:6, 7, 10) Ki kitsoz Ann ti fer pou ki li gagn rekonfor? Li ti al tabernak pou ador Zeova. Laba, li ti sipliy Zeova ek li ti dir: “Pran kont soufrans to esklav ek rapel mwa.” (1 Sam. 1:11) Zeova ti konpran Ann so lapenn ek Li ti ekout so lapriyer. Apre sa, Zeova ti beni li ek li ti gagn bann zanfan.—1 Sam. 1:19, 20; 2:21. w24.12 21 ¶5-7

Gras-a laranson, nou aprann ki Zezi gagn traka bann dimounn, sirtou so bann disip. (Zan 13:1) Kan Zezi ti koumans so servis pou Zeova, li ti kone ki li ti pou bizin fer bann kitsoz ki bien difisil. Par exanp, li ti kone ki li ti pou bizin donn so lavi, ek ki li ti pou bien soufer avan ki li mor. Kanmem sa, Zezi ti fer tou sa bann kitsoz difisil la, pa zis parski Zeova ti demann li fer sa, me sirtou parski li ti kontan bann dimounn. Zezi ti montre ki li ti vremem kontan bann dimounn kan li ti pres avek zot, li ti ansegn zot, ek li ti ed zot. Zour so lamor, li ti mem pran letan pou lav lipie so bann zapot, pou ansegn zot, pou ankouraz zot, ek pou rekonfort zot. (Zan 13:12-15) Kan li ti lor poto ek ki li ti pe bien soufer, Zezi ti donn lespwar enn kriminel ki ti akote ar li. Li ti dir kriminel-la ki li pou dan Paradi. Zezi ti osi montre ki li gagn traka so mama, parski li ti dir Zan okip so mama. (Lik 23:42, 43; Zan 19:26, 27) Zezi inn montre ki li vremem kontan bann dimounn, pa zis parski li’nn donn so lavi pou zot, me osi parski li ti tret zot avek amour ek bonte. w25.01 23 ¶11

Labib servi enn lexanp pou montre nou ki gras-a vre pardon, nou gagn liberte. Akoz nou inparfe, Labib dir ki nou bann “esklav pese.” Me gras-a pardon Zeova, nou’nn ‘libere ar nou bann pese.’ (Rom. 6:17, 18; Rev. 1:5) Wi, kan nou kone ki Zeova inn pardonn nou, nou ere parey kouma enn esklav ki’nn gagn so liberte. Gras-a sakrifis Zezi, Zeova inn geri nou. (1 Pier 2:24) Kan nou fer pese, nou gat nou lamitie ar Zeova. Me gras-a laranson, Zeova kapav pardonn nou ek nou kapav revinn pros ar Li. Kan enn kikenn ki ena enn maladi grav reisi geri, li bien kontan, pa vre! Dan mem fason, nou osi nou kontan kan Zeova pardonn nou, parski gras-a sa nou kapav revinn pros avek Li ek regagn so faver. w25.02 11 ¶16; 13 ¶17

Dan lexanp bann talan, Zezi koz lor trwa esklav: De ki ti fidel anver zot met ek enn ki pa ti fidel anver li. (Mat. 25:14-30) Sa de esklav ki fidel la se bann Kretien ki ena lesperans pou al dan lesiel ek ki fidel. Zot “partaz lazwa [zot] met,” Zezi, kan zot gagn zot rekonpans pou al dan lesiel, setadir “premie rezireksion.” (Mat. 25:21, 23; Rev. 20:5b) Parkont, lexanp sa esklav pares la se enn lavertisman pou bann Kretien ki ena lesperans pou al dan lesiel. Kifer nou dir sa? Zot bizin kontign travay bien dir. Dan lexanp bann talan, parey kouma dan lexanp bann dis vierz, Zezi pa pe rod dir ki bann Kretien ki ena lesperans pou al dan lesiel, pou vinn pares. Non. Li ti pe explike seki ti pou ariv zot si zot nepli fer travay ki li’nn donn zot avek tou zot leker. Si sa arive, zot pa pou kapav “res parmi bann ki Bondie finn apele ek finn swazir,” ek zot pa pou kapav rant dan Rwayom Bondie. w24.09 23 ¶10, 12-13

Nou tou nou anvi gagn enn travay ki permet nou gagn seki nou bizin, pou ki nou kapav pran nou fami swin. (Ekle. 7:12; 1 Tim. 5:8) Kan nou pe swazir enn travay, li normal ki nou pou gete ki kantite kas nou pou gagne. Selman, si se zis lor sa ki nou pran nou desizion, sa pou montre ki nou pa pe viv par lafwa. Si nou viv par lafwa, nou pou reflesi osi lor lefe ki sa travay-la pou ena lor nou lamitie avek Zeova. Nou kapav demann nou-mem: ‘Eski sa travay-la pou fer mwa fer bann kitsoz ki Zeova deteste?’ (Prov. 6:16-19) ‘Eski sa travay-la pou fer mwa rat mo bann renion ek pas mwins letan pou prese ek pou etidie Labib? Eski mo pou pas mwins letan ar mo fami akoz sa travay-la?’ Si to reponn wi pou sa bann kestion-la, li pou pli bon ki to pa aksepte travay-la, mem si li difisil pou to gagn enn travay dan to pei. Kan nou viv par lafwa, nou pran bann desizion ki montre ki nou sir ki Zeova pou pran nou swin ek ki Li pou donn nou seki nou bizin.—Mat. 6:33; Ebre 13:5. w25.03 21 ¶5-6

Nou bizin touletan fer zefor pou trouv nou bann frer ek ser parey kouma Zeova trouv zot. Pou nou fer sa, nou bizin res konsantre lor zot bann zoli kalite, pa lor zot bann defo. Anplis, biento zot pou nepli ena sa bann defo-la! Si nou ena lamour, nou pou kapav regle ninport ki ti biz-biz ki nou ena avek lezot. Kan nou ena bann zoli kalite, nou paradi spiritiel vinn pli atiran, ek li atir bann dimounn ki apresie sa bann zoli kalite-la. Akoz sa, nou bizin ena rekonesans pou sa paradi ki Zeova inn kree pou nou la. Pou ki nou santi nou bien, nou pa strese, nou ere, ek nou santi nou an sekirite, nou bizin kontign res dan nou paradi spiritiel ek fode zame nou kit li. Satan pou esey fer tou seki li kapav pou ki nou pa res dan sa paradi-la. (1 Pier 5:8; Rev. 12:9) Me fode pa nou les li fer sa! Okontrer, nou bizin fer tou seki nou kapav pou ki nou paradi spiritiel li res enn plas kot ena lape, ki zoli, ek ki sin. w24.04 24-25 ¶18-19

Paran, to kapav ed to zanfan pou ena dezir pou servi Zeova. Montre to zanfan ki seki pli inportan pou twa, se fer bann kitsoz ki pou ed twa res pros ar Zeova, kouma etidie Labib, asiste bann renion, ek prese. Si to pa fer sa, to bann zanfan kapav panse ki zot bizin servi Zeova zis akoz twa to pe servi Zeova. Ek lerla, zot kapav panse ki ador Zeova li pa enn kitsoz inportan, ek zot kapav mem aret servi Li net. Me eski pena okenn lespwar pou enn kikenn ki’nn aret servi Zeova? Non, okontrer li kapav repanti ek rekoumans servi Zeova. Pou li kapav fer sa, li bizin ena limilite ek aksepte led bann ansien. (Zak 5:14) Li vo lapenn ki li revinn kamarad ar Zeova! w24.07 25 ¶18-19

Kouma zot kapav kontign ena enn konportman ki fer Zeova plezir? Plis zot pou kontan zot kamarad, plis zot pou santi zot atire ar zot kamarad. Ki kitsoz kapav ed zot pou kontign ena enn bon konportman? Fode pa ki zot ena bann konversasion imoral, fode pa ki zot bwar boukou, ek fode pa ki zot retrouv zot tousel. (Efe. 5:3) Kifer? Parski sa bann kitsoz-la kapav fer zot ena bann dezir ek bann sansasion ki pa bizin, ek sa kapav fer zot osi perdi kontrol. Akoz sa, li bon ki souvan zot koz lor seki zot bizin fer pou respekte zot kamarad ek pou swiv bann prinsip Zeova. (Prov. 22:3) Amezir ki zot lamour vinn pli for, zot kapav deside pou montre lafeksion anver zot kamarad. Selman, zot bizin fixe bann limit lor fason ki zot montre sa lafeksion-la. Kifer? Parski si sa fer zot ena bann dezir ek bann sansasion ki pa bizin, zot riske pran bann move desizion. (Kantik S. 1:2; 2:6) Anplis, kan nou montre nou lafeksion pou nou kamarad, bien vit nou kapav perdi kontrol ek fer bann kitsoz ki pa fer Zeova plezir. (Prov. 6:27) Akoz sa, kan zot koumans frekante, li bon ki zot reflesi lor bann prinsip Labib ek ki zot fixe bann limit lor fason ki zot pou montre zot lafeksion.—1 Tes. 4:3-7. w24.05 29 ¶10-11

Nou anvi ki lezot trouv nou kouma enn kikenn lor ki zot kapav konte, sirtou dan bann moman difisil. (Prov. 17:17) Kouma nou kapav vinn sa kalite dimounn-la? Nou bizin fer zefor pou imit Zeova so bann kalite toulezour. Par exanp nou fer sa, kan nou tini nou bann promes ek kan nou fer tou seki nou kapav pou nou aler. Kan bann ansien montre ki kapav kont lor zot, lasanble gagn bann bienfe. Par exanp, kan bann frer ek ser kone ki bann ansien pre pou ed zot ek ki zot kapav telefonn bann-la ninport kan zot bizin led, sa vremem rasir zot. Zot santi ki bann ansien vremem kontan zot. Kan bann ansien servi Labib ek bann piblikasion pou donn bann konsey, olie ki zot donn zot prop lopinion, bann frer ek ser ena plis konfians an zot. Ek kan enn ansien konn gard bann kitsoz konfidansiel ek ki li tini so bann promes, bann frer ek ser pou fer li plis konfians. w24.06 29-30 ¶14-15

Nou kone ki Zeova pa pou tir tou bann problem ki nou gagne azordi. Selman, nou kapav sir ki Li pou touletan soutenir nou. (Ps. 41:3) Gras-a so lespri sin, Li kapav donn nou lafors ek sazes pou andir nou sitiasion, ek pou gard nou kalm. (Prov. 18:14; Fil. 4:13) Li osi promet nou ki dan lavenir, maladi pou nepli existe, ek sa vremem rekonfort nou. (Iza. 33:24) Kan nou pe pas par bann sitiasion difisil, seki Zeova dir nou dan Labib kapav rekonfort nou ek ed nou pou res kalm. (Rom. 15:4) Kan enn ser ki res dan Lwes Lafrik ti aprann ki li ti ena enn kanser, li ti bien plore. Li ti dir: “Enn verse ki ti bien rekonfort mwa, se Izai 26:3. . . . Sa verse-la rasir mwa ki Zeova kapav ed nou pou res kalm, ek ki Li kapav ed nou pou andir ninport ki problem.” Eski to’nn deza pas par enn sitiasion bien difisil ek to’nn panse ki to pa ti ena okenn solision? Dan sa ler-la, ki verse inn rekonfort twa? w24.12 24 ¶17-18

Bann ansien bizin fer zot maximum pou imit Zeova. Zot bizin montre ki zot vremem kontan ki sa mouton ki’nn perdi-la “inn retourn lakaz.” (Lik 15:22-24, 32) Kan enn kikenn retourn ar Zeova, ena boukou lazwa dan lesiel, ek ena boukou lazwa lor later osi! (Lik 15:7) Zeova pa les bann dimounn ki pa’le repanti, res dan lasanble. Selman, Li pa vir so ledo ar zot. Li anvi ki zot retourne. Ek kan zot repanti, Oze 14:4 montre seki Li resanti pou zot. Sa verse-la dir: “Mo pou geri zot infidelite. Mo pou kontan zot parski mo anvi, parski mo nepli ankoler.” Kan bann ansien kone seki Zeova resanti kan enn kikenn repanti, sa ankouraz zot pou rod tou ti sign ki montre ki enn dimounn pe koumans repanti. Anplis, sa verse-la montre bann ki’nn abandonn Zeova ki Li ankor kontan zot ek ki Li anvi ki zot retourne. w24.08 28 ¶8-9

Parfwa, bann dimounn pa touletan remersie nou pou seki nou fer pou zot. Parfwa, kan nou donn nou letan, nou lenerzi, ouswa nou bann kitsoz materyel pou ed lezot, nou kapav ena linpresion ki zot pa kas latet ar seki nou’nn fer pou zot. Si sa arive, ki nou kapav fer pou ki nou pa perdi nou lazwa ek ki nou pa dekouraze? Lazwa ki nou gagne kan nou done, pa depann lor fason ki bann dimounn reazir. (Zist. 20:35) Nou kapav kontign gagn lazwa kan nou done, mem si parfwa lezot pa rekonesan anver nou. Ki kitsoz kapav ed nou pou fer sa? Kan to donn lezot, to pe imit Zeova. Li donn tou dimounn bann bon kitsoz, mem si sertin pa rekonesan anver Li. (Mat. 5:43-48) Li promet ki, si nou osi nou done “san atann kitsoz an-retour,” nou “pou gagn enn gran rekonpans.” (Lik 6:35) Alor, fode pa to dekouraze si bann dimounn pa touletan dir twa mersi. Rapel ki Zeova pou touletan rekonpans twa pou tou bann bon kitsoz ki to’nn fer pou lezot. Li rekonpans bann “dimounn ki donn avek lazwa.”—Prov. 19:17; 2 Kor. 9:7. w24.09 29 ¶14-16