Bann ansien, bann responsab sirkonskripsion, biro nasional, ek Komite Santral souvan donn nou bann instriksion ki ed nou pou servi Zeova. Selman, li kapav arive ki parfwa nou pa konpran kifer bann frer inn donn nou sertin instriksion. Ouswa kitfwa nou kapav ena bann dout lor bann instriksion ki zot inn donn nou. Lerla, olie ki nou konsantre nou lor sa bann instriksion-la, nou konsantre nou lor bann dimounn ki’nn donn nou sa bann instriksion-la, setadir nou bann frer ki inparfe. Kan nou viv par lafwa, nou ena konfians ki se Zeova Limem ki pe gid so lorganizasion ek ki Li konn bien nou sitiasion. Ek akoz sa, nou obeir avek enn bon latitid. (Ebre 13:17) Nou kone ki kan nou obeir, sa pou ede pou ki ena linite dan lasanble. (Efe. 4:2, 3) Mem si bann frer ki diriz nou zot inparfe, nou sir ki Zeova pou beni nou kan nou obeir zot. (1 Sam. 15:22) Ek mem si bizin sanz enn instriksion, nou ena konfians ki Zeova pou sanz li dan ler ki bizin. w25.03 23-24 ¶13-14

Nou pe viv enn lepok extraordiner! Kifer nou dir sa? Parski sak zour nou pe trouv bann profesi Labib realize. Par exanp, nou pe trouv “lerwa dinor” ek “lerwa disid” pe lager ant zot parski zot pe anvi kontrol lemond. (Dan. 11:40) Nou pe trouv bon nouvel pe prese partou dan lemond, ek bann milyon dimounn pe aksepte laverite. (Iza. 60:22; Mat. 24:14) Ek nou pe osi gagn enn kantite manze spiritiel “dan ler ki bizin.” (Mat. 24:45-47) Zeova pe kontign ed nou pou konpran pli bien bann levennman inportan ki pou arive biento. (Prov. 4:18) Nou kapav sir ki kan gran soufrans pou koumanse, nou pou deza konn tou seki nou bizin kone pou ki nou kapav res fidel ar Zeova ek kontign andire. Selman, nou bizin rekonet ki ena sertin kitsoz ki nou pa kone konsernan lavenir. w24.05 8 ¶1-2

Sa ekrivin psom la bien kler: Fode pa nou koz manti pou gat repitasion enn kikenn. Psom 15:3 rapel nou osi ki enn invite Zeova, li pa fer okenn ditor so prosin, ek li pa denigre so bann kamarad. (Ps. 15:1) Me kouma eski nou kapav denigre enn kikenn? San ki nou rann nou kont, nou kapav denigre enn kikenn kan nou dir bann kitsoz ki negatif lor li. Anou get bann lexanp: (1) enn ser inn aret servi Zeova aplintan, (2) enn koup nepli servi dan Betel, ouswa (3) enn frer nepli servi kouma ansien ouswa serviter lasanble. Akoz sa bann sanzman-la, eski li pou korek ki nou koumans pans bann move kitsoz lor sa bann frer ek ser-la, ek ki nou partaz nou lopinion ar lezot? Non. Anplis, nou pa kone kifer finn ena sa bann sanzman-la. Alor, fode pa nou bliye ki enn invite anba latant Zeova, “li pa fer okenn ditor so prosin, ek li pa denigre so bann kamarad.” w24.06 11 ¶11-13

Pou ki nou ena enn pli gran respe pou Zeova, sak fwa ki nou ena pou pran enn desizion, nou bizin reflesi ki kitsoz pou fer Zeova kontan. Kan to lir bann zistwar ki ena dan Labib, demann tomem: ‘Si mo ti dan sa sitiasion-la, ki mo ti pou fer?’ Par exanp, mazine ki to parmi bann Izraelit ek ki to pe ekout sa dis sef tribi Izraelit la ki ti espionn pei ki Zeova ti promet pou donn bann Izraelit. Zot pe dir bann Izraelit ki zot pa pou reisi rant dan Kanaan. Eski to ti pou krwar zot ek per bann zom, ouswa to lamour ek to gran respe pou Zeova ti pou pli for ki to laper? Laplipar bann Izraelit pa ti krwar Zozwe ek Kaleb, alor ki zot ti pe dir laverite. Akoz sa, zot ti perdi posibilite pou rant dan pei ki Bondie ti promet zot.—Nonb 14:10, 22, 23. w24.07 10 ¶7

Gomer, madam profet Oze, ti kit Oze ek li ti al ar plizir zom. Me eski savedir ki Gomer pa ti kapav sanze? Zeova kapav lir dan leker bann dimounn, ek Li ti dir Oze: “Ankor enn fwa, kontan sa fam ki enn lot zom kontan la ek ki pe viv dan ladilter, parey kouma lamour ki Zeova ena pou pep Izrael, alor ki zot pe tourn zot ver lezot bondie.” (Oze 3:1; Prov. 16:2) Sa lepok-la, Gomer ti ankor pe viv dan ladilter, ki enn pese bien grav. Kanmem sa, Zeova ti dir Oze al koz ar li, pardonn li, ek rekonsilie avek li. Par sa lexanp-la, Zeova ti anvi ansegn bann Izraelit seki Li ti resanti pou zot. Mem si zot ti ankor pe fer bann pese bien grav, Li ti ankor kontan zot. Li ti kontign avoy so bann profet pou ed zot pou repanti ek pou sanz zot lavi. Sa lexanp-la montre nou ki Zeova konn leker enn kikenn, ek mem si sa dimounn-la ankor pe fer enn pese grav, Li pou esey ed li pou repanti. w24.08 10 ¶7

Bann Zwif ki ti vinn Kretien ti bizin fer bann gran sanzman, ek sa pa ti fasil. Dan lepase, bann Zwif ti pep ki Zeova ti swazir. Pandan plizir lane, Zerizalem ti enn plas ki ti bien inportan, parski se laba ki lerwa ki ti pe reprezant Zeova ti dirize. Lepep osi ti bizin al dan tanp ki trouv dan Zerizalem pou ador Zeova. Tou bann Zwif ki ti fidel ti swiv Lalwa Moiz ek bann lalwa ki bann sef relizie ti ansegn zot. Sa bann lansegnman-la ti ena enn lefe lor zot manze, lor fason ki zot konsider sirkonsizion, ek mem lor zot relasion avek bann non-Zwif. Me selman, apre lamor Zezi, Zeova ti nepli aksepte bann sakrifis ki bann Zwif ti fer dan tanp. Pou bann Zwif ki ti vinn Kretien, sa ti bien difisil parski zot ti abitie swiv Lalwa Moiz. (Ebre 10:1, 4, 10) Mem bann Kretien ki ti ena enn gran lafwa, kouma lapot Pier, ti gagn difikilte pou adapte ar sertin sa bann sanzman-la. (Zist. 10:9-14; Gal. 2:11-14) Ek akoz zot bann nouvo krwayans, bann sef relizie Zwif ti persekit bann Kretien. w24.09 9 ¶4

Kan Zeova donn so bann serviter enn travay, Li anvi ki zot fer sa dan enn fason organize. (1 Kor. 14:33) Par exanp, volonte Zeova se ki bon nouvel prese partou lor later. (Mat. 24:14) Zeova inn donn Zezi responsabilite pou diriz sa travay-la, ek Zezi inn fer an-sort ki sa travay-la bien organize. Par exanp, dan premie siek, kan ti etabli bann lasanble dan diferan landrwa, ti osi etabli bann ansien pou okip sa bann lasanble-la. (Zist. 14:23) Dan Zerizalem, ti ena enn group ansien ki ti pran bann desizion pou tou bann lasanble. Ek dan sak lasanble, bann ansien sa bann lasanble-la ti fer bann frer ek ser konn sa bann desizion-la. (Zist. 15:2; 16:4) Lerla, kan bann frer ek ser ti obeir bann instriksion ki zot ti gagne, “bann lasanble ti kontign vinn for dan lafwa ek kantite bann krwayan ti pe ogmante.”—Zist. 16:5. w24.04 8 ¶1

Le 16 Nizan, boner gramatin, enn ti group madam ti al kot tom kot ti met lekor Zezi. (Lik 24:1, 10) Mari Magdalenn ti enn parmi sa bann madam-la. Kan Mari ti ariv kot tom-la, li ti trouve ki tom-la ti vid. Alor, li ti galoupe ek li ti al dir sa Pier ek Zan. Ek kan Pier ek Zan ti galoupe pou al kot tom Zezi, Mari ti swiv zot. Kan Pier ek Zan ti trouve ki tom-la ti vid, zot ti retourn kot zot. Parkont, Mari ti res kot tom-la ek li ti koumans plore. Selman, li pa ti kone ki Zezi ti pe get li. Zezi ti trouve ki so lamor ti bien afekte Mari ek li ti anvi rekonfort li. Alor, li ti aparet ar Mari ek li ti fer enn kitsoz ki ti bien ankouraz Mari. Li ti donn Mari enn responsabilite bien inportan; li ti dir Mari al dir so bann disip ki li’nn resisite.—Zan 20:17, 18. w24.10 13 ¶7

Moiz ti enn profet, enn ziz, enn sef, ek enn istorien. Li ti liber bann Izraelit ki ti bann esklav dan Lezip, ek li ti trouv boukou mirak ki Zeova ti fer. Zeova ti servi li pou ekrir sink premie liv Labib, Psom 90, ek kitfwa Psom 91 osi. Li ti osi fer Moiz ekrir liv Zob. Zis avan so lamor, kan li ti ena 120 an, Moiz ti rasanble tou bann Izraelit pou rapel zot tou bann kitsoz ki zot ti trouv Zeova fer pou zot. Boukou lane avan, sertin Izraelit ti trouv bann mirak ki Zeova ti fer ek zot ti trouve kouma Li ti pini bann Ezipsien. (Ex. 7:4) Zot ti trouv Zeova ouver Lamer Rouz pou ki zot traverse. Ek apre, zot ti trouv Zeova detrir larme Faraon. (Ex. 14:29-31) Dan dezer, zot ti trouve kouma Zeova ti protez zot ek pran zot swin. (Det. 8:3, 4) Me kan bann Izraelit ti pre pou rant dan Later Promiz, Moiz ti profit sa dernie lokazion-la pou ankouraz zot. w24.11 8-9 ¶3-4

Seki Zezi ti dir ar so bann zapot pandan Repa Lesegner ti konsern zis enn ti group dimounn, alor ki seki li ti dir ar sa lafoul ki ti dan Galile la, ti konsern boukou dimounn. Lane 32 Nou Lepok, kan Zezi ti dan Galile, laplipar bann dimounn ki ti ekout li koze ti zis anvi gagn manze ar li. Selman, Zezi ti anvi fer zot konpran ki ena enn kitsoz ki pli inportan ki manze. Sa kitsoz-la ti kapav fer zot gagn lavi pou touletan. Zezi ti dir zot osi ki bann mor pou kapav resisite dan dernie zour ek ki zot pou kapav viv pou touletan. Dan sa ler-la, Zezi pa ti pe koz lor benediksion ki zis enn ti group dimounn ti pou gagne, parey kouma li ti fer pandan Repa Lesegner. Okontrer, dan Galile, Zezi ti pe koz lor enn benediksion ki tou dimounn ti kapav gagne. w24.12 11 ¶10-11

Zeova deteste bann dimounn violan, me Li sirtou deteste bann mari ki bat zot fam. (Ps. 11:5; Mal. 2:16) Si enn mari pa tret so fam bien, sa pou gat so lamitie ar Zeova. Zeova kitfwa pa pou mem ekout so lapriyer. (1 Pier 3:7) Sertin mari koz ar koler ek zot dir zot fam bann kitsoz ki bien bles zot. Me Zeova deteste ‘koler, laraz, kriye, ek insilt.’ (Efe. 4:31, 32) Kan enn mari koz brit ar so fam, li gat so lamitie ar so fam ek li gat so lamitie ar Zeova osi. (Zak 1:26) Li parey osi kan enn mari get bann zimaz porno. Sa gat so lamitie ar Zeova ek sa montre ki li pena respe pou so fam. Zeova anvi ki bann mari res fidel ar zot fam. Enn mari ki fidel zame pa pou fer enn kitsoz imoral ar enn lot fam; li pa pou mem pans pou fer sa. Zezi ti dir ki si enn zom get enn lot “fam ziska ena enn dezir pou li,” se koumadir li’nn fini komet ladilter ar li “dan so leker.”—Mat. 5:28, 29. w25.01 9 ¶6-8

Labib dir ki Zeova konsider so bann serviter kouma bann dimounn ki drwat. Se koumadir nou lardwaz inn prop devan Zeova; Li’nn efas nou det. Me eski sa li kont bann prinsip Zeova? Non. Kifer? Parski nou pa merite ki Zeova konsider nou kouma bann dimounn ki drwat akoz nou fer pese, ek Zeova deteste pese. Selman, parski nou ena lafwa dan bann dispozision ki Li’nn pran ek dan sakrifis Zezi, Zeova dispoze pou pardonn nou bann pese, setadir pou kennsel nou det. (Rom. 3:24) Ki bienfe nou gagne parski Zeova konsider nou kouma bann dimounn ki drwat? Labib dir ki Zeova inn swazir sertin pou al dirize dan lesiel ansam ar Zezi ek ki Li konsider zot kouma So bann zanfan. (Tit 3:7; 1 Zan 3:1) Zeova inn pardonn zot bann pese. Se koumadir zame zot pa’nn fer okenn pese, ek gras-a sa zot kapav servi dan Rwayom Bondie. (Rom. 8:1, 2, 30) Bann ki ena lesperans pou viv lor later, Zeova konsider zot kouma so bann kamarad, ek Li’nn pardonn zot bann pese.—Zak 2:21-23. w25.02 5 ¶17-18

Anou get enn sitiasion kot lapot Pier pa ti ena mem fason panse ki Zeova. Zezi ti dir so bann zapot ki li ti bizin al Zerizalem, ek ki laba bann sef relizie ti pou aret li, ti pou tortir li ek ti pou touy li. (Mat. 16:21) Pier ti kone ki Zezi ti Lemesi ek ki li ti pou sap pep Bondie. Alor, li ti trouv sa difisil pou krwar ki Zeova ti pou les Zezi mor. (Mat. 16:16) Akoz sa, Pier ti amenn Zezi dan enn kwin, ek li ti dir li: “To bizin bon ar tomem, Segner; zame sa pa pou ariv twa.” (Mat. 16:22) Dan sa sitiasion-la, Pier pa ti ena mem fason panse ki Zeova, ek akoz sa, Zezi pa ti dakor ar li. Zezi ti kone ki, pou li fer volonte Zeova, li ti pou bizin soufer ek mor. Se akoz sa ki li pa ti aksepte konsey ki Pier ti donn li, mem si Pier ti pe esey ed li. Sa zour-la, Pier ti aprann ki li bizin fer zefor pou pans parey kouma Zeova. Se enn leson bien inportan ki nou osi nou bizin aprann. w25.03 9 ¶5-6

Eski to leker fermal parski enn kikenn ki to fer konfians, inn desevwar twa ouswa inn trayir twa? Mem si bann dimounn tret twa dan enn move fason, to Papa Zeova Li, Li kontan twa. Si enn kikenn inn trayir twa, bann parol ki David dir dan nou text pou azordi kapav rekonfort twa. Konsernan “bann ki dekouraze,” enn liv dir ki zot kapav santi zot kouma bann lamone zete. Kouma Zeova ed sa bann dimounn-la? Zeova “pre” ar nou; Li koumadir enn paran ki’nn pran so zanfan ki pe plore dan so lebra ek ki pe rekonfort li. Kan nou soufer parski enn kikenn inn trayir nou ouswa inn abandonn nou, Zeova konpran nou soufrans ek Li “pre” pou ed nou. Li anvi rekonfort nou ek soulaz nou. Anplis, kan nou reflesi lor bann kitsoz ki Li’nn promet nou, sa kapav ed nou pou andir ninport ki difikilte ki nou gagne azordi.—Iza. 65:17. w24.12 23 ¶13-14

Ansien, to kapav sir ki Zeova trouv tou bann travay ki to fer ek sa ena boukou valer pou Li. Mem si bann ansien bien okipe ar bann vizit pastoral, ar lansegnman, ek ar predikasion, boukou ansien soutenir bann proze konstriksion ek zot al ede kan ena bann katastrof. Ena lezot ki servi dan bann Komite Led Medikal ouswa dan bann Group Vizit Malad. Bann ansien kone ki lasanble li pou Zeova. Zot fer zot travay ar tou zot leker, ek zot sir ki Zeova pou rekonpans zot pou sa. (Kol. 3:23, 24) Pa tou dimounn ki kapav vinn ansien. Selman, nou tou nou kapav donn kitsoz Zeova. Nou Bondie bien kontan kan Li trouv nou fer tou seki nou kapav pou servi Li. Li apresie bann kontribision ki nou fer pou travay predikasion, mem si nou pa kapav donn boukou. Li bien kontan osi kan nou pardonn bann ki ofans nou. To kapav sir ki seki to pe fer ena boukou valer pou Li. Li bien kontan twa ek Li pou rekonpans twa pou sa.—Lik 21:1-4. w24.06 23 ¶12-13

Lexanp ki Salomon servi montre nou seki kapav ariv enn serviter Zeova. Par exanp, enn serviter Zeova kapav fer enn pese grav ek panse ki sa inn arive “deswit” ouswa “enn kout koumsa.” Me selman, kan li reflesi lor seki’nn arive, kitfwa li pou trouve ki li ti deza pran bann move desizion avan ki li fer sa pese grav la. Kitfwa li’nn fer kamarad ar bann dimounn ki pa kontan Zeova. Ouswa kitfwa li’nn swazir bann divertisman, al lor bann sit Internet, ouswa al dan bann plas ki pa bon pou enn Kretien. Kitfwa li’nn mem aret priye, lir Labib, al renion, ek prese. Parey kouma sa zenn zom dan Proverb la, sa serviter Zeova la inn fer enn pese grav parski avan li’nn pran bann move desizion. Ki leson nou aprann? Nou bizin pa zis evit fer pese me nou bizin evit tou ti kitsoz ki kapav fer nou fer pese. Se seki Salomon ti explike kan li ti rakont zistwar sa zenn zom-la ek sa fam ki ena enn move lavi la.—Mat. 5:29, 30. w24.07 16 ¶10-11

Ki ete sa trezor-la? Se nou predikasion, ki kapav sov lavi bann dimounn. (2 Kor. 4:1) Ki ete sa bann resipian later la? Se bann serviter Zeova ki pe pres bon nouvel. Dan lepok lapot Pol, bann marsan ti servi bann resipian later pou sarye bann kitsoz ki ena valer, kouma manze, divin, ouswa kas. Dan mem fason, Zeova inn donn bann resipian later, setadir so bann serviter, responsabilite pou pres enn mesaz ki ena boukou valer. Ek avek led Zeova, nou kapav gagn lafors ki nou bizin pou pres sa mesaz-la. Parfwa, nou kapav per ki bann dimounn pa ekout nou, ouswa ki zot opoz ar nou dan predikasion. Kouma nou kapav sirmont sa laper-la? Reflesi lor lapriyer ki bann zapot ti fer kan bann dimounn ti donn zot lord pou aret prese. Olie ki zot ti gagn per, zot ti demann Zeova pou ed zot kontign koze avek boukou kouraz. Ek Zeova ti reponn zot lapriyer deswit! (Zist. 4:18, 29, 31) Alor, si parfwa to per reaksion bann dimounn kan to prese, priye Zeova. Demann Li pou ogmant to lamour pou to prosin pou ki to pa per kan to pres ar zot. w24.04 16 ¶8-9

Nou lamour pou Zeova motiv nou pou sanktifie so nom. Ek sa pous nou pou dir bann dimounn ki seki Satan inn dir lor Zeova li fos. (Zen. 3:1-5; Zob 2:4; Zan 8:44) Kan nou prese, nou dir tou bann dimounn ki ekout nou kisann-la Zeova ete ek ki kalite Bondie Li ete. Nou anvi dir tou dimounn ki so pli gran kalite se lamour, ki Limem meyer Dirizan ki ena, ek ki so Rwayom biento pou tir tou soufrans ek pou amenn lape. Lerla, tou dimounn pou ere. (Ps. 37:10, 11, 29; 1 Zan 4:8) Kan nou dir bann dimounn sa bann kitsoz-la, nou sanktifie nom Zeova, ek sa rann nou ere parski se samem ki bann Temwin Zeova sipoze fer. w24.05 18 ¶12

Frer, montre ki to ena “lospitalite” kan to fer bann bon kitsoz pou lezot, mem pou bann dimounn ki pa kamarad ar twa. (1 Pier 4:9) Enn diksioner dir ki enn kikenn ki ena lospitalite, li zanti mem anver bann dimounn ki li pa kone ek li kontan pou invit zot kot li. Alor, demann tomem, ‘Eski mo enn kikenn ki kontan akeyir ek invit lezot?’ (Ebre 13:2, 16) Enn kikenn ki ena lospitalite, li pa get figir ek li montre bonte anver tou dimounn. Par exanp, li pou montre lospitalite anver bann ki mizer, anver bann frer ki vinn fer bann diskour dan so lasanble, ek osi anver bann ki fer boukou zefor pou ankouraz lezot, kouma par exanp bann responsab sirkonskripsion.—Zen. 18:2-8; Prov. 3:27; Zist. 16:15; Rom. 12:13. w24.11 21 ¶6

Dan lexanp bann vierz, Zezi koz lor dis vierz ki’nn sorti pou al zwenn lemarye. (Mat. 25:1-4) Toule dis vierz ti anvi akonpagn lemarye dan resepsion maryaz. Me Zezi dir ki sink parmi sa bann vierz-la ti “ena sazes” ek ki sink lezot la ti “bet.” Sa sink vierz ki ena sazes la ti prepar zot bien pou atann lemarye, mem si arive li vinn bien tar. Zot ti amenn zot bann lalanp delwil ar zot pou ekler zot aswar, ek zot ti amenn delwil anplis ar zot tansion lemarye tarde. Zot ti prepar zot pou ki zot lalanp kontign res alime. (Mat. 25:6-10) Kan lemarye ti arive, bann vierz ki ena sazes ti al ar li dan resepsion maryaz. Dan mem fason, bann frer Zezi ki’nn prepar zot bien, setadir ki’nn kontign veye ek ki’nn res fidel ziska ki Zezi arive, zot pou gagn zot rekonpans kan zot pou zwenn li dan so Rwayom ki dan lesiel.—Rev. 7:1-3. w24.09 21 ¶6

Kan nou reflesi kouma travay predikasion pe ed boukou dimounn dan lemond antie, sa ankouraz nou pou kontign prese. Par exanp, toule lane, bann milyon dimounn asiste Komemorasion Lamor Zezi ek etidie Labib avek nou. Ena osi bann milye dimounn ki pran batem ek ki koumans prese ansam avek nou. Avredir, nou pa kone komie dimounn ankor pou aksepte nou mesaz, me nou kone ki Zeova pe rasanble enn gran lafoul ki biento pou “travers gran soufrans.” (Rev. 7:9, 14) Zeova, Limem “Proprieter karo,” ek Li sir ki boukou dimounn pou kontign aksepte bon nouvel. Se akoz sa ki nou bizin kontign prese. (Lik 10:2) Bann vre disip Zezi finn touletan montre enn gran dezir pou pres bon nouvel. Kan bann dimounn ti trouv bann zapot prese ar kouraz ek avek tou zot leker, boukou dimounn “ti konpran ki sa [bann-la] ti avek Zezi.” (Zist. 4:13) Nou osi, nou anvi pres bon nouvel ar kouraz ek avek tou nou leker. Koumsa, bann dimounn pou trouve ki nou ena enn gran dezir pou prese parey kouma Zezi. w25.03 18 ¶15; 19 ¶17-18

Labib montre ki Zeova remark bann dimounn ki kitfwa pena valer pou lezot. Par exanp, Zeova ti avoy profet Samiel kot Zese pou ki li swazir enn parmi so bann garson pou vinn prosin lerwa Izrael. Zese ti apel set parmi so wit garson pou vinn zwenn Samiel, me li pa ti apel so pli zenn garson, setadir David. Selman, se David ki Zeova ti swazir. (1 Sam. 16:6, 7, 10-12) Zeova ti trouve kisann-la David ti ete vremem. Li ti kone ki sa zenn zom-la ti vremem kontan Li. Reflesi kouma Zeova inn deza montre twa ki Li interese ar twa. Par exanp, Li donn twa bann konsey ki to bizin pou to fer fas ar ninport ki sitiasion. (Ps. 32:8) Sa montre ki Li konn twa bien ek ki Li kone seki to bizin. (Ps. 139:1) Alor, si to met an pratik konsey ki Zeova donn twa ek ki to trouve kouma sa vremem ed twa, to pou sir ki Zeova vremem interese ar twa. (1 Kro. 28:9; Zist. 17:26, 27) Zeova trouv tou bann zefor ki to fer pou servi Li ek obeir Li. Li trouv osi tou to bann zoli kalite ek Li anvi vinn to Kamarad.—Zer. 17:10. w24.10 25-26 ¶7-9

Nou sir ki to kontan Zeova ek ki to anvi servi to bann frer ek ser. Ki kitsoz kapav ed twa pou ena dezir pou vinn enn serviter lasanble? Reflesi lor lazwa ki to pou gagne kan to pou servi to bann frer ek ser. Zezi ti dir: “Ena plis lazwa kan done ki kan resevwar.” (Zist. 20:35) Zezi ti swiv sa prinsip-la, ek sa ti rann li zwaye. Anou get enn sitiasion ki ena dan Mark 6:31-34. Enn fwa, Zezi ek so bann zapot ti bien fatige, ek zot ti al dan enn landrwa trankil pou ki zot kapav repoze. Selman, enn lafoul dimounn ti ariv laba avan zot, ek zot ti anvi ki Zezi ansegn zot. Zezi ti kapav refize, parski li ek bann zapot “pa ti mem gagn letan pou manze.” Li ti kapav osi zis ansegn zot de-trwa kitsoz ek apre fer zot retourn kot zot. Selman, lamour ti motiv Zezi pou “ansegn zot” ziska bien tar.—Mark 6:35. w24.11 16 ¶9-10

Paran, ankouraz to zanfan pou rod bann lokazion pou partaz bann verite ki ena dan Labib. (Rom. 10:10) To kapav konpar bann zefor ki li pe fer pou koz lor so lafwa, ar bann zefor ki enn kikenn fer pou aprann zwe enn linstriman lamizik. O-koumansman, li pou aprann zwe bann lamizik ki sinp. Me avek letan, li pou zwe pli bien. Dan mem fason, o-koumansman, enn zenn kapav servi enn prezantasion ki sinp pou koz lor so lafwa. Par exanp, enn zenn kapav dir so kamarad: “Eski to ti kone ki bann inzenier ek bann siantis bien souvan kopie lor bann kitsoz ki zot trouve dan lanatir? Les mo montre twa enn video bien interesan ki koz lor la.” Kan li fini montre enn video ki ena dan seri video Eski Inn Kree Sa Ouswa Non?, li kapav dir so kamarad: “Kisann-la ki merit plis loner? Eski se sa siantis ki’nn kopie lor lanatir la, ouswa sa Kikenn ki’nn kree sa bann kitsoz-la?” Gras-a sa prezantasion bien sinp la, kitfwa so kamarad pou anvi aprann konn plis lor Zeova. w24.12 19 ¶17-18

Pou ki nou kapav libere ar pese ek lamor, Zeova inn avoy Zezi lor later pou ki li donn so lavi kouma enn ranson. Kouma sakrifis enn sel zom parfe kapav liber bann milyon dimounn ar pese ek lamor? Lapot Pol ti explik sa, kan li ti dir: “Parey kouma par dezobeisans enn sel zom [Adan], boukou dimounn inn vinn bann dimounn ki fer pese, dan mem fason par lobeisans enn sel dimounn [Zezi], boukou dimounn pou vinn bann dimounn drwat.” (Rom. 5:19; 1 Tim. 2:6) Sa verse-la montre nou ki tou dimounn fer pese ek zot mor parski enn zom parfe inn dezobeir Bondie. Alor, pou ki nou kapav libere ar pese ek lamor, ti bizin ki enn zom parfe obeir Bondie. Eski Zeova pa ti kapav zis les bann desandan Adan ki obeisan, viv pou touletan? Bann dimounn inparfe ti kapav trouv sa kouma enn bon solision. Selman, sa li pa an-akor avek lazistis Zeova. Parski Zeova Li enn Bondie lazistis, Li pa kapav ferm so lizie ar dezobeisans Adan ek bann konsekans ki finn ena akoz sa. w25.01 20-21 ¶3-4

Kan lapot Pol ti pre pou mor, li ti reflesi lor fason ki li ti viv so lavi, ek sa ti rann li ere. Akoz sa, li ti kapav dir: “Mo’nn galoup lekours-la ziska lafin, mo’nn gard lafwa dan Bondie.” (2 Tim. 4:6-8) Meyer desizion ki Pol ti pran dan so lavi, se ki li ti servi Zeova, ek li ti sir ki sa ti fer Zeova plezir. Nou osi nou anvi pran bann bon desizion ek nou anvi gagn faver Bondie. Kouma nou kapav fer sa? Kan Pol ti koz lor limem ek lor bann lezot Kretien ki fidel, li ti dir: “Nou viv par lafwa, ek pa par seki lizie trouve.” Kan enn kikenn mars par lafwa, li pran bann desizion ki montre ki li ena konfians dan Zeova. So bann aksion montre ki li sir ki, kan li swiv bann konsey ki ena dan Labib, li pou gagn bann bienfe.—Ps. 119:66; Ebre 11:6. w25.03 20 ¶1-2

Avek led lespri sin Zeova, boukou dimounn ki avan ti violan, agresif, ek malonet, inn fer bann sanzman dan zot lavi. (Iza. 65:25) Zot inn fer zefor pou rezet sa bann vilin defo-la. (Efe. 4:22-24) Li vre ki bann serviter Zeova zot ankor inparfe ek zot pou kontign fer bann erer. Selman, gras-a Zeova, “tou sort kalite dimounn” pe reisi viv ansam dan lamour ek lape. (Tit 2:11) Sa kalite mirak-la, se zis nou Bondie Zeova ki kapav fer sa! (Iza. 55:10, 11) Nou paradi spiritiel, li vremem existe azordi! Dan sa paradi-la, ena enn gran fami bann frer ek ser ki pe ador Zeova dan linite. Ek parski nou form parti dan sa fami-la, nou santi nou anpe ek an sekirite, mem si nou pe viv dan enn lemond ki bien violan. (Ps. 72:7) Sa bann rezon-la bizin motiv nou pou ed lezot osi pou vinn dan sa paradi spiritiel-la. Kouma nou kapav fer sa? Nou fer sa kan nou ed zot pou aprann konn nou Gran Bondie Zeova.—Mat. 28:19, 20. w24.04 23 ¶13, 15

Zezi kontan Zeova avek tou so lespri. Kan li ti lor later, li ti kone seki Zeova ti anvi li fer, ek li ti bien deside pou azir an-akor ar So volonte, mem si li ti kone ki li ti pou soufer akoz sa. Zezi ti vremem anvi fer volonte so Papa, akoz sa li pa ti les nanye vinn pli inportan pou li. Pier ek bann lezot zapot ti gagn privilez pou pas boukou letan avek Zezi ek pou aprann pou ena mem fason panse ki li. Kan Pier ti ekrir so premie let, li ti ankouraz bann Kretien pou “prepar zot pou ena mem leta-d-espri” ki Zezi. (1 Pier 4:1) Kan Pier ti dir bann Kretien “prepar zot,” li ti servi enn lexpresion ki ti dekrir kouma bann solda bizin prepar zot bann zarm pou zot al lager. Alor, si bann Kretien ena mem fason panse ki Zezi, zot pou bien ekipe pou lit kont zot dezir pou fer pese ek pou lit kont lemond Satan.—2 Kor. 10:3-5; Efe. 6:12. w25.03 8 ¶1-3

Kan to pe frekant ar enn kikenn, ki kitsoz to bizin kone lor li? Avan ki to bann santiman pou li vinn pli for, to bizin koz ar li lor bann kitsoz ki inportan, kouma so bann lobzektif ek so bann proze pou lavenir. Kouma to kapav aprann konn li pli bien? To kapav fer sa kan to koz fran, to poz li bann kestion, ek to ekoute kan li reponn. (Zak 1:19) Pou zot gagn lokazion pou koze, zot kapav fer bann kitsoz ansam, kouma par exanp, zot manze ansam, zot promne ansam, ek zot prese ansam. To pou aprann konn li pli bien osi kan to pas letan ar so bann kamarad ek so fami. Zot kapav osi fer bann kitsoz ar bann lezot dimounn, koumsa to pou trouve kouma li azir ar lezot ek osi kouma li reazir dan diferan sitiasion. w24.05 27-28 ¶6-7

Biento nou pou gagn bann leprev ek nou pou bizin kont lor Zeova plis ki avan. Kan nou lir bann zistwar ki ena dan Labib ek biografi nou bann frer ek ser, nou pou trouve kouma Zeova inn soutenir zot ek inn vinn enn Ros pou zot. Pran letan pou reflesi bien lor zot lexanp. Kan to fer sa, sa pou ed twa pou fer Zeova vinn to Ros, ek to pou plis kapav ankouraz to bann frer ek ser. Zezi ti donn Simon enn lot nom; li ti apel li Sefas (Pier) ki vedir “Enn Bout Ros.” (Zan 1:42) Zezi ti fer sa pou montre ki Pier ti pou rekonfort so bann frer ek ser ek fortifie zot lafwa. Li vre ki Labib dekrir bann ansien kouma “lonbraz enn gro ros” pou montre kouma zot protez lasanble. (Iza. 32:2) Selman, kan nou tou nou fer zefor pou imit bann kalite Zeova, nou tou nou pou kapav ankouraz nou kamarad. w24.06 28 ¶10-11

Bann lerwa Izrael ki ti fidel ar Zeova ti ador Li dan bon fason ek zot ti ankouraz lepep pou fer parey. Laplipar bann lerwa ki pa ti fidel ti ador bann fos bondie ek ti ankouraz lezot pou fer parey. (1 Ler. 21:25, 26; 2 Kro. 12:1) Kifer pou Zeova, fason ki bann dimounn ador Li, se enn kitsoz bien inportan? Parski, kan bann dimounn ador bann fos bondie, sa fer zot fer bann lezot pese ek maltret lezot. Akoz sa, bann lerwa ti ena responsabilite pou ed lepep ador Zeova dan bon fason. (Oze 4:1, 2) Anplis, bann lerwa Izrael ek bann Izraelit ti enn pep ki Zeova ti swazir pou Li. Alor, kan zot pa ti fidel ar Zeova ek zot ti ador bann fos bondie, Labib dir ki se koumadir zot ti komet ladilter. (Zer. 3:8, 9) Kan enn kikenn komet ladilter, li kas leker so konzwin. Dan mem fason, si enn kikenn ki’nn donn so lavi Zeova koumans ador bann fos bondie, li fer Zeova so leker fermal.—Det. 4:23, 24. w24.07 22-23 ¶12-15