Let pou Bann Galat 6:1-18
6 Mo bann frer, mem si enn kikenn fer enn fopa san ki li rann li kont, zot ki kalifie lor plan spiritiel, esey redres sa dimounn-la avek douser. Me fer atansion ar tomem pou ki to pa tom dan tantasion.
2 Kontign sarye fardo sakenn zot kamarad; koumsa, zot pou akonpli lalwa Lekris.
3 Parski si enn kikenn panse ki li inportan alor ki li pa nanye, li pe anbet limem.
4 Me ki sakenn examinn so prop aksion, ek lerla li pou kapav kontan par rapor ar limem, ek pa kan li konpar limem ar enn lot dimounn.
5 Parski sakenn pou sarye so prop sarz.*
6 Anplis, ki enn kikenn ki gagn lansegnman* lor parol Bondie, partaz tou bann bon kitsoz ar sa kikenn ki donn li sa lansegnman-la.*
7 Pa anbet zotmem: personn pa kapav boufonn Bondie. Parski seki enn dimounn pe seme, samem ki li pou rekolte;
8 parski sa kikenn ki pe sem pou so lekor inparfe la pou rekolte seki move* ar so lekor inparfe, me sa kikenn ki pe sem pou lespri sin la pou rekolte lavi eternel ar lespri sin.
9 Alor fode pa nou dekouraze pou fer seki bon, parski kan ler arive nou pou rekolte si nou pa fatige.*
10 Alor, tanki nou ena lokazion,* anou fer seki bon anver tou dimounn, me sirtou anver nou bann frer ek ser dan lafwa.
11 Mo’nn ekrir sa let-la avek mo prop lame, gete avek ki groser lekritir mo’nn ekrir.
12 Se tou bann ki anvi fer enn bon linpresion lor lezot* ki esey fors zot pou fer sirkonsizion, ek bann-la fer sa zis pou ki zot pa gagn persekision akoz poto soufrans* Lekris.
13 Parski mem bann ki pe fer sirkonsizion pa pe obeir Lalwa zotmem, me bann-la anvi ki zot, zot fer sirkonsizion pou ki bann-la ena enn rezon pou fer vantar akoz zot.*
14 Me ki zame mo pa fer vantar, apart konsernan poto soufrans* nou Segner Zezi Kris. Pou mwa, se gras-a li ki finn met lemond amor,* ek pou lemond finn met mwa amor.
15 Fer sirkonsizion ouswa pa fer sirkonsizion pena linportans, seki inportan se vinn enn nouvo kreasion.
16 Ek tou bann ki viv* dapre sa prinsip-la, ki lape ek mizerikord* lor zot, wi lor Izrael Bondie.
17 Apartir aster-la, ki personn pa fer mwa gagn problem, parski mo ena bann mark enn esklav Zezi lor mo lekor.
18 Mo bann frer, ki bonte extraordiner* nou Segner Zezi Kris li avek leta-d-espri ki zot pe manifeste. Amen.
Not
^ Ouswa “so prop responsabilite.”
^ Ouswa “lansegnman dan enn fason oral.”
^ Ouswa “sa lansegnman-la dan enn fason oral.”
^ Lit., “pouri.”
^ Ouswa “pa abandone.”
^ Lit., “letan fixe.”
^ Lit., “dan laser.”
^ Get Lexplikasion Bann Mo.
^ Lit., “dan zot laser.”
^ Get Lexplikasion Bann Mo.
^ Ouswa “touy lemond lor poto.”
^ Ouswa “mars an-ord.”
^ Get Lexplikasion Bann Mo.
^ Ouswa “faver ki pa merite.” Get Lexplikasion Bann Mo.
