Nou bizin fer zefor pou vinn bann Kretien ki ena matirite. Selman, nou bizin osi fer zefor pou res bann Kretien ki ena matirite. Alor, si nou’nn gagn matirite, fode zame nou panse ki nou nepli bizin amelior nou lamitie ar Zeova. (1 Kor. 10:12) Nou bizin “kontign examinn” nou-mem pou gete si nou pe kontign progrese. Dan let ki li ti ekrir bann Kolosien, lapot Pol koz lor linportans pou res bann Kretien ki ena matirite. Mem si bann Kolosien ti deza ena matirite, Pol ti dir zot ki zot bizin fer atansion ar fason panse bann dimounn sa lemond-la. (Kol. 2:6-10) Epafras, ki ti konn bien bann frer ek ser sa lasanble-la, touletan ti priye “pou ki finalman zot vinn konple,” setadir ki zot kontign ena matirite. (Kol. 4:12) Ki leson nou aprann? Pol ek Epafras toule-de ti konpran ki, si enn Kretien anvi kontign ena matirite, li bizin Zeova so led ek li bizin kontign amelior so lamitie avek Li. Pol ek Epafras ti anvi ki bann Kolosien kontign ena matirite ek ki zot res “bann adilt” lor plan spiritiel, malgre zot bann difikilte. w24.04 6-7 ¶16-17

Ena enn gran respe pou Zeova vedir ki nou telman kontan Li ki zame nou pou anvi fer enn kitsoz ki Li pa kontan. Nou anvi aprann fer diferans ant seki bon ek seki pa bon, ant seki vre ek seki fos, koumsa sa pou ed nou pou ki nou gagn Zeova so faver. (Prov. 2:3-6; Ebre 5:14) Si nou plis per bann dimounn olie ki nou ena enn gran respe pou Bondie, sa kapav fer nou al lwin ar laverite. Anou get lexanp 12 sef tribi ki ti espionn pei ki Zeova ti promet pou donn bann Izraelit. Dis parmi sa 12 espion-la ti plis per bann Kananeen ki zot ti kontan Zeova. Zot ti dir bann lezot Izraelit: “Nou pa pou kapav atak sa pep-la, parski zot pli for ki nou.” (Nonb 13:27-31) Pou bann dimounn sa lepok-la, bann Kananeen ti bien for. Me si enn kikenn ti dir ki bann Izraelit pa ti pou reisi gagn laviktwar kont zot bann lennmi, sa ti pou montre ki swa li pa konn Zeova swa li pa ti pe pans lor Zeova. w24.07 9 ¶5-6

Eski nou sir ki kan Zeova ziz bann dimounn, Li touletan fer seki drwat? Wi! Parey kouma Abraam, nou kone ki Zeova, “sa Ziz lor later antie la,” Li parfe, Li ena boukou sazes ek boukou mizerikord. Anplis, Zeova inn form so Garson ek Li’nn donn li responsabilite pou ziz tou dimounn. (Zan 5:22) Zeova ek Zezi toule-de kapav lir seki ena dan leker sak dimounn. (Mat. 9:4) Alor, kan zot pou ziz sak dimounn, zot pou touletan “fer seki drwat”! Anou bien deside pou fer Zeova konfians, ek pou ena konfians osi dan tou bann desizion ki Li pran. Zis Li tousel ki ena drwa pou ziz bann dimounn; nou, nou pena sa drwa-la! (Iza. 55:8, 9) Se pou sa rezon-la ki nou bizin les Zeova ek Zezi ziz bann dimounn. Anplis, nou kone ki nou Lerwa Zezi swiv lexanp so Papa dan enn fason parfe. Alor, li pou ziz avek lazistis ek avek mizerikord.—Iza. 11:3, 4. w24.05 7 ¶18-19

Li bien inportan ki nou vinn bann dimounn ki ‘dir laverite dan nou leker’. Nou konpran sa gras-a lexanp Natanael. Kan Filip ti amenn so kamarad Natanael ar Zezi, enn kitsoz extraordiner ti arive. Mem si Zezi zame pa ti zwenn Natanael avan, li ti dir: “Ala enn vre Izraelit dan ki pena okenn lipokrizi.” (Zan 1:47) Zezi ti remarke ki Natanael ti vremem onet. Mem si Natanael ti inparfe parey kouma nou, Zezi ti trouve ki li vremem sinser ek ki li pa ipokrit, ek Zezi ti felisit li pou sa. Laplipar bann kondision ki nou bizin ranpli pou fer Zeova plezir ek ki trouv dan Psom 15, koz lor fason ki nou bizin tret lezot. Psom 15:3 dir ki enn invite dan latant Zeova, “so lalang pa koz manti pou gat repitasion personn, li pa fer okenn ditor so prosin, ek li pa denigre so bann kamarad.” Si nou fer palab lor lezot, nou gat zot repitasion, ouswa nou denigre zot, sa pou bles zot.—Zak 1:26. w24.06 10 ¶7, 9; 11 ¶10

Si to prepar twa bien avan to al prese, to pou pli alez pou koz ar bann dimounn. Zezi ti prepar so bann disip avan ki li ti avoy zot dan predikasion. (Lik 10:1-11) Ek parski zot ti met an pratik seki Zezi ti ansegn zot, zot ti reisi fer travay ki Zezi ti donn zot ek sa ti rann zot zwaye. Kouma to kapav prepar twa pou predikasion? Reflesi kouma to kapav partaz bann verite ki ena dan Labib dan enn fason efikas ek dan to prop mo. Reflesi osi lor de-trwa obzeksion ki to abitie gagne dan teritwar ek gete kouma to kapav sirmont zot. Ek kan to koumans koz ar bann dimounn, fer enn sourir, res amikal, ek pa strese. w24.04 15-16 ¶6-7

Rezon prinsipal kifer nou pres bon nouvel se parski nou kontan Zeova ek nou kontan so nom ki sin. Kan nou prese, se enn fason ki nou loue nou Bondie ki nou bien kontan. Avek tou nou leker, nou dakor ar bann kreatir spiritiel ki ti dir: “To dign, Zeova nou Bondie, pou gagn laglwar, loner ek pwisans.” Nou donn Zeova ‘laglwar ek loner’ kan nou montre bann dimounn ki se Li ki’nn “kree tou kitsoz” ek ki se gras-a Li ki nou existe. Ek nou donn Zeova nou pwisans kan nou servi nou letan, nou lafors, ek nou bann kitsoz materyel pou fer nou maximum dan predikasion dapre nou sitiasion. (Mat. 6:33; Lik 13:24; Kol. 3:23) Parski nou kontan Zeova, nou fer bann dimounn konn so nom, ek nou fer zot kone osi ki kalite Bondie Li ete. w24.05 17 ¶11

Gras-a Zeova, depi aster-la mem nou santi nou anpe ek nou ere, ek dan lavenir Li pou donn nou lavi pou touletan. Nou kapav sir ki Zeova pou rekonpans nou parski Li anvi fer li ek Li ena kapasite pou fer li. Akoz sa, nou kontign fer nou maximum pou servi Li, parey kouma so bann serviter dan lepase. Se seki Timote ti fer. (Ebre 6:10-12) Timote ti sir ki Zeova ti pou rekonpans li, ek sa ti motiv li pou travay dir dan lasanble. (1 Tim. 4:10) Ki li ti fer? Lapot Pol ti ankouraz li pou vinn enn pli bon ansegnan dan predikasion ek dan lasanble. Timote ti bizin osi donn enn bon lexanp so bann frer ek ser, ki zot zenn ouswa vie. Li ti osi gagn bann responsabilite ki bien difisil. Par exanp, parfwa li ti bizin donn bann konsey ki fran, me avek amour. (1 Tim. 4:11-16; 2 Tim. 4:1-5) Timote ti sir ki Zeova ti pou rekonpans li.—Rom. 2:6, 7. w24.06 22-23 ¶10-11

Zeova souvan ti servi so bann profet pou averti ek pou koriz so pep. Par exanp, Li ti servi Zeremi pou dir zot: “A Izrael, twa ki’nn vir to ledo ar mwa, retourne. . . . Mo pa pou ankoler ar twa, parski mo fidel. . . . Mo pa pou gard twa dan leker touletan. Zis aksepte ki to koupab, parski to’nn rebel kont Zeova.” (Zer. 3:12, 13) Li ti servi profet Zoel pou dir zot: “Retourn ar mwa ar tou zot leker.” (Zoel 2:12, 13) Li ti fer profet Izai dir: “Pirifie zot; tir devan mo lizie zot move fason azir; aret fer seki pa bon.” (Iza. 1:16-19) Ek Li ti servi profet Ezekiel pou demann zot: “Eski mo kontan kan enn move dimounn mor? . . . Eski mo pa prefere ki li sanz so kondwit ek ki li kontign viv? Mo pa anvi ki personn mor. . . . Alor, retourne ek zot pou viv.” (Eze. 18:23, 32) Zeova bien kontan kan bann dimounn repanti parski Li anvi ki zot viv pou touletan. w24.08 9 ¶5-6

Zeova donn tou so bann serviter zot manze spiritiel, Li gid zot, ek Li protez zot. Enn kitsoz ki montre ki Zeova pa fer preferans, se ki Li fer an-sort ki bann dimounn lor later antie kapav lir Labib. O-koumansman, Labib ti ekrir zis dan trwa lang: Ebre, Arameen, ek Grek. Me eski savedir ki bann ki kapav lir sa trwa lang-la, zot ena enn pli bon lamitie ar Zeova konpare ar bann ki pa kapav lir sa bann lang-la? Non. (Mat. 11:25) Zeova pa invit zis bann dimounn ki ena ledikasion, ouswa bann ki konn lir Ebre, Arameen, ek Grek, pou vinn so kamarad. Okontrer, Li anvi ki tou bann dimounn lor later gagn so sazes. Akoz sa, Li’nn fer tradir Labib dan plizir milye lang. Koumsa, ninport kisann-la kapav gagn bann bienfe ar bann lansegnman ki ena dan Labib, ek zot kapav vinn so kamarad.—2 Tim. 3:16, 17. w24.06 6-7 ¶13-15

Parey kouma Zezi ti predir, destriksion Zerizalem ti pou arive biento. Bann Kretien ti bizin servi sa letan ki reste la, pou zot prepar zot, pou zot ogmant zot lafwa ek zot landirans. (Ebre 10:25; 12:1, 2) Biento, “pou ena enn gran soufrans kouma zame pa finn ena avan,” ek sa pou bien pli pir ki seki bann Kretien Ebre ti gagne. (Mat. 24:21; Rev. 16:14, 16) Alor, anou get de-trwa konsey ki Zeova ti donn sa bann Kretien-la. Sa bann konsey-la kapav ed nou osi azordi. Lapot Pol ti ankouraz so bann frer ek ser pou etidie ek pou reflesi lor Parol Bondie. (Ebre 5:14–6:1) Pol ti servi bann Lekritir Ebre pou explik zot kifer fason ki bann Kretien ador Zeova, li boukou pli siperyer ki fason ki bann Zwif ador Li. Pol ti kone ki, si bann Kretien ti ogmant zot konesans lor laverite ek ki zot konpran li pli bien, sa ti pou permet zot rekonet bann fos lansegnman ek pou rezet sa. w24.09 8 ¶2-3; 10 ¶6

Bann disip Zezi ti bien bizin lankourazman. Kifer? Parski sertin parmi zot ti kit zot lakaz, zot fami, ek zot travay pou swiv Zezi aplintan. (Mat. 19:27) Ena lezot ki ti gagn maltrete parski zot ti vinn so disip. (Zan 9:22) Zot ti fer sa bann sakrifis-la parski zot ti sir ki Zezi li Lemesi. (Mat. 16:16) Me aster-la ki Zezi inn mor, zot ti perdi lespwar, zot ti tris, ek zot ti bien dekouraze. Zezi ti konpran santiman so bann disip. Li ti kone ki bann-la ti tris ek dekouraze, pa parski zot ti mank lafwa, me parski so lamor ti bien afekte zot. Se akoz sa ki, premie zour mem ki li ti resisite, li ti ankouraz so bann kamarad. Par exanp, kan Mari Magdalenn ti pe plore lor so tom, li ti aparet ar li. (Zan 20:11, 16) Li ti osi aparet ar sa de disip ki ti pe kit vilaz Emais la. Li ti aparet ar lapot Pier osi. w24.10 13 ¶5-6

Paran, ed to zanfan pou ki li kapav explik lezot kifer li krwar dan enn Kreater. Kitfwa to kapav get ansam avek li seri lartik « Les jeunes s’interrogent—Création ou évolution ? » ki ena lor jw.org. Lerla, to kapav ed li pou swazir enn explikasion ki li ti pou kontan servi pou explik lezot kifer li krwar dan enn Kreater. Ek si enn kikenn anvi koz lor sa size-la, ankouraz li pou donn enn explikasion ki sinp, me ki lozik. Par exanp, enn so bann kamarad kapav dir li: “Mo krwar zis dan seki mo trouve, ek Bondie zame mo pa’nn trouv Li.” Si sa arive, li kapav dir so kamarad: “Fer koumadir to pe marse dan enn lafore ek to ariv kot enn pwi. Eski to pou dir ki sa pwi-la inn aparet enn kout koumsa? Non. Sirman to pou panse ki bizin ena enn kikenn ki’nn fouy sa pwi-la, pa vre! Dan mem fason, eski to pa panse ki bizin ena enn Kikenn ki’nn kree nou planet ek lavi ki ena lor la?” w24.12 18 ¶16

Nou tou nou bizin bann konsey pou pran bann bon desizion. Nou kapav gagn boukou parmi sa bann konsey-la ar bann ansien ek bann Kretien ki ena lexperyans. Si zot pli vie ki nou, fode pa nou panse ki zot bann konsey nepli itil pou nou azordi. Zeova anvi ki nou aprann ar bann frer ek ser aze. Zot inn viv pli lontan ki nou, zot konpran lavi pli bien ki nou, ek zot ena sazes. Dan lepase, Zeova ti servi bann serviter fidel ki aze pou ankouraz ek pou gid so pep. Ena lexanp Moiz, David, ek lapot Zan. Zot ti viv dan diferan lepok, ek zot sitiasion ti bien diferan. Kan zot ti pre pou mor, zot ti donn bann zenn bann bon konsey. Toule trwa ti montre bien linportans pou obeir Bondie. Ki nou zenn ouswa vie, nou kapav gagn bann bienfe kan nou swiv zot bann konsey.—Rom. 15:4; 2 Tim. 3:16. w24.11 8 ¶1-2

Depi lepok Noe, Zeova inn defann bann dimounn manz disan. (Zen. 9:3, 4) Apre sa, Li ti donn mem lalwa bann Izraelit. Li ti dir zot ki si enn kikenn manz disan, “pou bizin touy li.” (Lev. 7:27) Zezi ti ankouraz bann Zwif pou obeir tou bann lalwa ki Bondie ti donn zot. (Mat. 5:17-19) Alor, zame li pa ti pou dir zot manz so laser ek bwar disan ki ena dan so lavenn. Zezi ti pe koz dan enn fason sinbolik, parey kouma li ti fer kan li ti koz ar enn Samaritenn. Li ti dir sa Samaritenn-la: ‘Sa delo ki mo pou done la . . . pou donn lavi pou touletan.’ (Zan 4:7, 14) Zezi pa ti pe dir sa Samaritenn-la ki li ti bizin bwar enn delo ki sorti dan enn pwi spesial pou ki li gagn lavi pou touletan. Alor, dan mem fason, Zezi pa ti pe dir sa lafoul dimounn la ki zot ti bizin manz so laser ek bwar disan ki ena dan so lavenn, pou ki zot kapav viv pou touletan. w24.12 9 ¶4-6

Bann mari Kretien bizin fer bien atansion ki zot pa les fason panse sa lemond-la inflians fason ki zot konsider bann fam. Kifer? Parski bien souvan, seki enn dimounn li panse, se samem ki li pou fer. Lapot Pol ti dir bann Kretien lavil Rom ki fode pa zot “rant dan moul sa lemond-la.” (Rom. 12:1, 2) Kan Pol ti dir zot sa bann parol-la, sa ti fer plizir lane depi ki sa lasanble-la ti existe. Selman, li ti dir zot sa parski kitfwa sertin parmi zot ti ankor pe les zot inflianse par bann koutim ek fason panse sa lemond-la. Se akoz sa ki li ti ankouraz zot pou sanz zot fason panse ek zot konportman. Sa konsey-la konsern nou osi azordi. Malerezman, sertin mari Kretien inn les zot inflianse par fason panse sa lemond-la ek zot inn mem maltret zot fam. w25.01 9 ¶4

Azordi, nou bann ansien travay bien dir. Par exanp, zot “fer travay enn predikater.” (2 Tim. 4:5) Zot organiz bann teritwar, zot bien aktif dan predikasion, ek zot montre nou kouma pou prese ek ansegne dan enn fason ki efikas. Zot osi servi kouma bann ziz, ek kan zot fer sa, zot montre mizerikord ek zot pa get de lizie. Par exanp, kan enn Kretien fer enn pese grav, bann ansien ed li pou regagn enn bon lamitie ar Zeova. Me anmemtan, zot veye pou ki lasanble kontign res prop. (1 Kor. 5:12, 13; Gal. 6:1) Me travay pli inportan ki bann ansien fer azordi, se ki zot servi kouma bann berze. (1 Pier 5:1-3) Zot prepar bien zot bann diskour Biblik, zot fer zefor pou konn tou dimounn dan lasanble, ek zot fer bann vizit pastoral. Sertin ansien ede lor konstriksion ouswa mintenans bann Lasal Renion, ouswa pou organiz bann lasanble. Ena lezot ki servi dan Komite Led Medikal, ouswa dan Group Vizit Malad. Ek ena lezot ankor ki ena bann lezot responsabilite. Nou bann ansien travay bien dir pou nou, pa vre! w24.10 20 ¶9

Labib dir ki nou’nn libere gras-a laranson. Lapot Pier ti dir: “Kris limem inn donn so lavi pou nou, pou liber nou ar tou sort kalite move kitsoz.” (Tit 2:14a) Laranson inn liber nou ar de kitsoz ki fer nou bien soufer: pese ek lamor. (Rom. 5:21) Nou bien rekonesan anver Zeova ek Zezi, parski gras-a sakrifis Zezi nou kapav gagn boukou bienfe. w25.02 5 ¶15-16

Anou gete seki nou kapav aprann ar lexanp enn zenn zom ki trouv dan Proverb sapit 7. Li ti komet limoralite sexiel avek enn fam ki ti ena enn move lavi. Verse 22 dir nou ki “deswit” sa zenn zom-la ti swiv li. Me kouma bann verse avan montre, sa zenn zom-la ti deza pran bann move desizion avan, ek dousman-dousman sa inn fer li fer pese. Ki kitsoz sa zenn zom-la ti fer avan ki li fer sa pese bien grav la? Pou koumanse, aswar li “ti pe pas dan sime kot fam [imoral]-la reste.” Apre sa, li ti al dan direksion lakaz sa fam-la. (Prov. 7:8, 9) Lerla, kan li ti trouv fam-la, li pa ti sanz semin. Okontrer, li ti les fam-la anbras li ek ekout fam-la rakonte kouma li ti ofer enn sakrifis lape. Fam-la ti fer sa pou fer li krwar ki li enn bon dimounn. (Prov. 7:13, 14, 21) Si sa zenn zom-la pa ti pran bann move desizion, sa ti pou protez limem pou pa tom dan tantasion ek fer enn pese. w24.07 16 ¶8-9; 19 ¶19

Zeova pa aksepte ki enn kikenn ki fer enn pese grav ek ki pa repanti, res dan lasanble. Sertin kapav panse ki, parski Zeova ena mizerikord, Li kapav les enn kikenn ki pa repanti res dan lasanble. Me se pa koumsa ki Zeova montre mizerikord. Li vre ki Zeova ena mizerikord, me sa pa vedir ki Li aksepte bann move konportman. So bann prinsip konsernan lebien ek lemal zame sanze. (Zid 4) Si Zeova ti les enn kikenn ki pa repanti res dan lasanble, sa pa ti pou an-akor ar so mizerikord parski sa dimounn-la ti pou kapav fer boukou ditor dan lasanble. (Prov. 13:20; 1 Kor. 15:33) Selman, Zeova pa anvi ki personn detrir. Li anvi sov bann dimounn, tanki sa posib, ek Li montre mizerikord anver bann dimounn ki sanz zot konportman ek ki anvi revinn so kamarad. (Eze. 33:11; 2 Pier 3:9) Se pou sa rezon-la ki, kan sa zom dan lasanble Korint la ti repanti ek ki li ti sanz so konportman, Zeova ti servi lapot Pol pou dir lasanble-la pardonn li ek reaksepte li dan lasanble. w24.08 17 ¶7; 18-19 ¶14-15

Dan lexanp bann mouton ek bann kabri, Zezi montre ki li pou ziz bann dimounn dapre fason ki zot inn reazir ek soutien ki zot inn donn ‘so bann frer.’ (Mat. 25:31-46) Sa zizman-la pou arive pandan “gran soufrans,” zis avan Armagedon. (Mat. 24:21) Lerla, parey kouma enn berze separ bann mouton ek bann kabri, Zezi pou separ bann ki’nn soutenir so bann frer ar bann ki pa’nn fer li. Labib dir ki Zeova inn etabli Zezi kouma ziz, ek ki Zezi pou ziz avek lazistis. (Iza. 11:3, 4) Li get bien seki bann dimounn fer, seki zot panse, ek seki zot dir, ek osi kouma zot azir anver so bann frer. (Mat. 12:36, 37) Zezi pou kone kisann-la inn soutenir so bann frer ek travay ki zot pe fer. Enn parmi bann kitsoz pli inportan ki enn kikenn kapav fer pou li soutenir bann frer Zezi, se partisip dan laktivite predikasion. w24.09 20-21 ¶3-4

Kan nou ena bann dout, li bon ki nou rod bann repons dan Labib. Par exanp, fer koumadir enn zenn pa sir ki Zeova interese ar li. Eski li bizin res koumsa mem ek kontign panse ki Zeova pa interese ar li? Non. Okontrer, li bizin “verifie tou kitsoz,” setadir li bizin etidie Labib pou kone seki Zeova panse lor li. Kan nou lir Labib, se koumadir nou pe “tann” Zeova koz avek nou. Selman, pou ki nou kone seki Zeova panse lor bann dout ki nou ena, nou bizin fer plis ki zis lir Labib. Nou bizin rod ek etidie bann verse ki pou ed nou pou gagn bann repons pou nou bann kestion. Pou nou fer sa, nou kapav fer bann resers dan nou bann piblikasion. (Prov. 2:3-6) Nou bizin osi priye Zeova pou ki Li gid nou dan nou bann resers ek ed nou pou trouve seki Li panse lor bann dout ki nou ena. Nou kapav osi rod bann prinsip Labib ek bann lezot linformasion ki kapav ed nou dan nou sitiasion. w24.10 25 ¶4-5

Zeova pa pou beni zefor enn kikenn ki ena lorgey ek ki ena lanbision. (1 Kor. 10:24, 33; 13:4) Ena fwa, mem bann bon kamarad Zezi ti anvi gagn bann privilez, selman zot pa ti ena bann bon lintansion. Anou get lexanp de zapot Zezi, Zak ek Zan. Enn fwa, zot ti demann Zezi pou donn zot enn plas inportan dan so Rwayom. Selman, Zezi pa ti felisit zot pou sa. Kifer? Parski zot ti ena lanbision. Apre sa, Zezi ti dir so 12 zapot: “Si kikenn anvi vinn gran parmi zot, li bizin vinn zot serviter, ek si kikenn anvi vinn premie parmi zot, li bizin vinn esklav zot tou.” (Mark 10:35-37, 43, 44) Kan enn frer ki vinn enn serviter lasanble ena bann bon lintansion, setadir servi lezot, li enn vre benediksion pou so lasanble.—1 Tes. 2:8. w24.11 15-16 ¶7-8

Kan nou ena enn desizion pou pran, lamour pou motiv nou pou “rod lintere lezot” ek pou ena modesti. (1 Kor. 10:23, 24, 32; 1 Tim. 2:9, 10) Lerla, sa pou pous nou pou pran enn desizion ki pou montre nou lamour ek nou respe pou lezot. Si to ena enn desizion inportan pou pran, reflesi lor seki to bizin fer pou to reisi met li an pratik. Se seki Zezi inn ansegn nou pou fer. Zezi ti dir ki si enn kikenn ‘anvi aranz enn latour, li bizin kalkile komie sa pou koute.’ (Lik 14:28) Alor, kan to ena enn desizion inportan pou pran, reflesi ki kantite letan, larzan, ek zefor to pou bizin pou ki to reisi asim desizion ki to’nn pran. Pou sertin desizion, kouma par exanp bann desizion ki konsern lafami, li bon ki to koz ar sak manb to fami pou ki sakenn kapav kone seki li pou bizin fer. Kifer sa li inportan? Sa kapav ed twa pou trouve si to ena bann sanzman pou fer, ouswa si to bizin pran enn lot desizion. Ek kan to inplik to fami, ekout bien bann lide ki zot ena, koumsa zot pou plis anvi ed twa pou asim desizion ki to’nn pran. w25.01 18-19 ¶14-15

Izai dir ki nou bizin “kontan ek res dan lazwa” dan paradi spiritiel, parski se Zeova ki’nn kree sa paradi-la. (Iza. 65:18, 19) Lemond Satan pa ansegn bann dimounn laverite lor Bondie. Alor, li normal ki Zeova pe servi nou pou ed zot pou sorti dan sa move lemond-la ek pou rant dan nou zoli paradi spiritiel. Dan sa paradi-la, nou pe gagn boukou benediksion ar Zeova, ek sa bizin motiv nou pou ed lezot pou konn plis lor sa bann benediksion-la. (Zer. 31:12) Nou zwaye ek nou rekonesan osi pou zoli lesperans ki nou ena pou lavenir. Labib dir ki nou pou “ranz bann lakaz ek [nou] pou res ladan, [nou] pou plant bann karo rezin ek [nou] pou manz zot bann frwi.” Nou “pa pou rinte pou nanye,” parski nou pou bann dimounn “ki Zeova inn beni.” Zeova promet nou ki nou lavi pou ena enn sans ek ki nou pou ena enn zoli lavi. Li kone seki nou bizin, ek Li pou ‘satisfer nou dezir.’—Iza. 65:20-24; Ps. 145:16. w24.04 22-23 ¶11-12

Nou fer Zeova vinn nou Ros kan nou ena foul konfians an Li ek kan nou kont lor Li. Nou kone ki kan nou obeir Li, mem dan bann moman bien difisil, nou pou gagn bann bienfe. (Iza. 48:17, 18) Ek sak fwa ki nou trouve kouma Zeova ed nou, sa fer nou ena plis konfians an Li. Lerla, ninport ki difikilte nou gagne, nou sir ki se zis Zeova ki kapav ed nou pou andire. Parey kouma enn montagn ki pa sanze, Zeova so personalite ek so proze zame pa sanze. (Mal. 3:6) Kan Adan ek Ev ti rebel kont Zeova, Li pa ti sanz so proze pou bann dimounn. Lapot Pol ti dir ki Zeova “pa kapav renie limem.” (2 Tim. 2:13) Sa vedir ki ninport ki kitsoz ki arive, ouswa ninport ki kitsoz lezot fer, Zeova zame pa sanz so bann kalite, so proze, ek so bann prinsip. Ek parski Zeova zame pa sanze, nou kone ki Li pou ed nou kan nou gagn bann difikilte ek Li pou tini so bann promes konsernan lavenir.—Ps. 62:6, 7. w24.06 27 ¶7-8

Si to pe frekante, ki kitsoz kapav ed twa pou deside si to pou marye ouswa non? Zot bizin aprann konn zot kamarad bien. Avan ki to koumans frekante, sirman to ti konn sertin kitsoz lor sa dimounn-la. Me aster-la ki to pe koumans frekante, to pou gagn lokazion pou konn li pli bien; pou kone “seki [li] ete andan dan [so] leker.” To pou konn so personalite, so fason panse, ek si li ena enn bon lamitie ar Zeova. Avek letan, to pou kapav reponn sa bann kestion-la: ‘Eski li pou enn bon konzwin pou mwa?’ (Prov. 31:26, 27, 30; Efe. 5:33; 1 Tim. 5:8) ‘Eski nou donn nou kamarad latansion ek lamour ki sakenn bizin? Eski nou pou kapav viv ansam malgre nou bann defo?’ (Rom. 3:23) Amezir ki zot aprann konn zot kamarad pli bien, pa bliye sa: Seki pli inportan, se pa ki zot ena boukou pwin komin, me se ki zot reisi adapte ar zot kamarad ek pas lor zot bann defo. w24.05 27 ¶5

Lerwa David ti fer bann pese bien grav. Me kan profet Natan ti dir li seki Zeova resanti konsernan so pese, avek limilite David ti repanti. (Ps. 51:3, 4, 17, not ki ena lao) Lerwa Ezekias osi ti fer pese kont Zeova. (2 Kro. 32:25) Me parey kouma David, Ezekias ti vremem repanti. (2 Kro. 32:26) Ek alafin, kouma Zeova ti trouv Ezekias? Li ti trouv li kouma enn lerwa ki ti fidel, ki “ti kontign fer seki drwat.” (2 Ler. 18:3) Ki nou aprann avek sa bann lexanp-la? Nou bizin repanti ek fer zefor pou pa refer bann mem erer. Ki nou pou fer si bann ansien konsey nou lor enn erer ki paret pa tro grav pou nou? Fode pa nou panse ki Zeova pa kontan nou ouswa ki bann ansien ena kitsoz kont nou. Mem bann bon lerwa Izrael ti bizin gagn bann konsey, ek parfwa ti bizin disiplinn zot. (Ebre 12:6) Kan nou gagn disiplinn, nou bizin (1) ena limilite ek aksepte sa disiplinn-la, (2) fer bann sanzman ki bizin, ek (3) kontign servi Zeova avek tou nou leker. Si nou vremem repanti, Zeova pou pardonn nou.—2 Kor. 7:9, 11. w24.07 21 ¶8; 22 ¶9, 11

Kan plizir fwa bann ansien inn esey ed enn kikenn pou repanti ek ki li pa’le repanti, pou bizin tir li dan lasanble. (2 Ler. 17:12-15) Par so bann aksion, li’nn montre ki li nepli anvi obeir bann komannman Zeova. (Det. 30:19, 20). Lerla, bizin fer enn lanons dan lasanble pou dir ki li nepli enn Temwin Zeova. Bann ansien pa fer sa lanons-la pou fer li gagn onte. Zot fer sa pou ki bann frer ek ser kapav swiv lord pou “aret frekant” sa dimounn-la, ek ‘mem pa manz avek’ li. (1 Kor. 5:9-11) Ena enn bon rezon kifer Zeova inn donn sa lord-la. Lapot Pol ti dir: “Enn tigit levin fer lapat-la antie monte.” (1 Kor. 5:6) Si enn kikenn ki kontign fer pese ek ki pa’le repanti, res dan lasanble, lezot kapav panse ki li pa neseser ki zot obeir bann komannman Zeova.—Prov. 13:20; 1 Kor. 15:33. w24.08 26-27 ¶3-4

Kitfwa nou pa kapav donn lezot lafors ouswa lenerzi, selman nou kapav servi nou lafors pou ed zot. Par exanp, nou kapav ed bann Kretien ki aze ouswa ki malad kan nou fer zot komision ouswa zot louvraz lakaz. Ouswa, si nou sitiasion permet nou, nou kapav port nou volonter pou ede kan ena netwayaz ouswa mintenans Lasal Renion. Kan nou servi nou lafors dan sa bann fason-la, sa ed nou bann frer ek ser. To bann parol osi kapav donn lezot lafors. Eski to konn enn kikenn ki pou santi li bien si to dir li ki to vremem apresie seki li fer? Eski to konn enn kikenn ki bizin rekonfor? Alor, pran linisiativ pou al koz ar sa dimounn-la. To kapav vizit li, telefonn li, ouswa mem avoy li enn kart, enn e-mail, ouswa enn mesaz. Li pa neseser ki to dir bann gran-gran kitsoz. Si to dir de-trwa parol bien sinp avek tou to leker, sa kapav ankouraz to frer ouswa to ser ek ed li pou kontign res fidel ar Zeova.—Prov. 12:25; Efe. 4:29. w24.09 28 ¶8-10

Si sa fer inpe letan ki to pe servi kouma serviter lasanble, sirman to’nn ranpli sertin kondision pou ki to kapav servi kouma ansien. Me eski to ena dezir pou servi kouma ansien, pou ki to kapav fer plis pou to bann frer ek ser? Ki bann responsabilite enn ansien ena? Li bizin bien aktif dan predikasion, li bizin okip ek ansegn bann frer ek ser, ek par so bann parol ek so bann aksion, li bizin ranforsi zot lafwa dan Zeova. Se akoz sa ki Labib dir ki bann ansien ki travay dir, zot kouma “bann don.” (Efe. 4:8) Ki to bizin fer pou ki to kapav servi kouma ansien? Dan lemond, kan enn kikenn al rod enn travay, sirman patron-la get kapasite dimounn-la pou kone si li pou kapav fer travay-la. Me pou to vinn enn ansien, li bien diferan. Pou to vinn enn ansien, sa pa depann zis lor bann kapasite ki to ena pou prese ek ansegne. To bizin ranpli bann kondision ki ena dan 1 Timote 3:1-7 ek Tit 1:5-9. w24.11 20 ¶1-3