Kal idhi e weche manie iye

Kal idhi kama ochanie weche mantie

Dwoko Penjo mag Muma

Dwoko Penjo mag Muma

Ang’o momiyo onego walem?

Jehova Nyasaye dwaro ni wabed thuolo mar nyise gik ma chandowa kendo wawuo kode nyading’eny kaka wadwaro. (Luka 18:1-7) Owinjowa nikech odewowa. Ka Wuonwa me polo e ma oyienwa ni wawuo kode e lamo, be nitie gima onego otamwa wuoyo kode?—Som Jo Filipi 4:6.

Lamo ok en mana kwayo Nyasaye gik ma wadwaro. Kar mano, lamo miyo wasudo machiegni gi Nyasaye. (Zaburi 8:3, 4) Kaka wamedo wuoyo gi Nyasaye pile ka wanyise kaka wawinjo, e kaka osiep me kindwa kode bende medore.—Som Jakobo 4:8.

Onego walem e yo mane?

Sama walemo, Nyasaye ok dwa ni wati gi weche mag nyisruok kata nwoyone lamo ma wamako e wiwa. Bende, onge yo moro makende ma nyaka wabedgo sama walemo mondo eka Nyasaye owinjwa. Gima Jehova dwaro en ni walem kowuok e chunywa. (Mathayo 6:7) Kuom ranyisi, e kinde Jo-Israel, Hanna ne olemo kuom wach moro ma ne chande ahinya. To bang’e, ka ne kuyo ma ne en-go orumo, ne ogoyo ne Nyasaye erokamano kowuok e chunye.—Som 1 Samuel 1:10, 12, 13, 26, 27; 2:1.

To mano doko thuolo makende ma Nyasaye osemiyowa mar lamo! Wanyalo chopo ir Jachuechwa gi wach moro amora ma chando pachwa. Bende, wanyalo pake kendo goyone erokamano kuom gik ma otimonwa. Omiyo, ber mondo wati gi thuolo makendeno e yo maber.—Som Zaburi 145:14-16.