“Asemiyo Nyingi Ong’ere”

“Asemiyo nyingi ong’ere ne jo ma ne imiya e piny. . . . Asemiyo ging’eyo nyingi kendo abiro miyo nyingi omed ng’ere.”​—JOHANA 17:6, 26.

Tiend Wechego: Yesu nomiyo ji ong’eyo nying Nyasaye kuom tiyo kod nyingno e tije mar lendo. Ka ne Yesu somo ndiko, ma en gima nojatimoga, nyaka bed ni noluongo nying Nyasaye e ndikogo. (Luka 4:16-21) Nopuonjo jolupne mondo olem kama: “Wuonwa, nyingi mondo obed maler.”​—Luka 11:2.

Kaka Jokristo ma Kinde Mokwongo Nonyiso ni Giluwo Puonjno: Jaote Petro nowacho ne jodongo ma ne ni Jerusalem ni Nyasaye nosekawo ogendni mamoko mondo obed “jo ma iluongo gi nyinge.” (Tich Joote 15:14) Joote kaachiel kod jomamoko noyalo ne ji ni “ng’ato ka ng’ato ma luongo nying Jehova ibiro resi.” (Tich Joote 2:21; Jo-Rumi 10:13) Bende, ne gitiyo gi nying Nyasaye e buge ma ne gindiko. Buk moro miluongo ni The Tosefta moting’o chike Jo-Yahudi ma notiek ndiko e higni mag 300, wuoyo e wi buge ma Jokristo machon nondiko ma joma ne kwedogi nowang’o. Bugno wacho kama: “Ne ok gireso buge mag Joland-Injili kod mag jo minim [tiende ni, ma ni paro ni gin Jo-Yahudi ma Jokristo] e mach. To ne giweyo bugego mowang’ kuonde ma ne gintiere . . . kaachiel gi buge ma noting’o nying Nyasaye.”

Gin Jomage ma Luwo Puonjno e Kindegi? Muma mar Revised Standard Version, mogo gi riwruok mar kanise mag Jokristo (National Council of the Churches of Christ) e piny Amerka nowacho kama: “Jo-Yahudi noweyo tiyo gi nying Nyasaye ma ne ipogego gi nyiseche mamoko kata ka pok Jokristo ma kinde mokwongo nochako betie, kendo ok en gima owinjore mondo Jokristo ma kindegi bende oti gi nyingno.” Kuom mano, ne giwilo nyingno gi nying Nyasaye mar telo ma en “RUOTH.” Machiegnini, kanisa mar Vatican nowacho ne bisobegi niya: “Nying Nyasaye mindiko gi nyukta mag tetragrammaton ma gin YHWH * ok onego otigo kata luong e wendegi kod lamo maggi.”

Gin jomage ma tiyo gi nying Nyasaye kendo konyo ji ng’eyo nyingno? Kinde ma Sergey ma wuok e piny Kyrgyzstan ne en rawera, noneno vidio moro ma niluongoe Nyasaye ni Jehova. Ne ok owinjo kiluongo nyingno kendo kuom higni apar. Bang’e ka Sergey nodar modhi e piny Amerka, Joneno mag Jehova moko ariyo nolime e ode kendo ne ginyise nying Nyasaye e Muma. Sergey ne mor ahinya yudo joma ne tiyo gi nying Jehova. Gimiwuoro en ni buk mar Webster’s Third New International Dictionary wacho kama e kare mileroe “Jehova Nyasaye”: “En Nyasaye achiel kende ma Joneno mag Jehova lamo.”