3. Yie Mondo Jomoko Okonyi

Kaka Inyalo Winjo Tiend Weche Manie Muma

Kane jal moro miluongo ni Edward John Eyre odhi e wuoth mabor kendo matek e thim mar Nullarbor Plain, ne oromo gi Jo-Aborigin ma nodak kanyo mi ne gipuonje kaka onyalo yudo pi ei kwoyo koda e yien miluongo ni eucalyptus. Nikech noyie mondo opuonje gi joma nong’eyo pinyno maber, Eyre noreso ngimane.

MANA kaka ranyisini konyowa neno, mondo ng’ato otim gimoro ma kore tek, kinde mang’eny dwarore ni oyud kony kuom ng’ato molony e wachno. Kamano bende e kaka en sama idwaro somo Muma.

Yesu nong’eyo ni ne dhi dwarore mondo jolupne oyud kony mar winjo tiend weche manie Muma. Nitie chieng’ moro ma “noyawo chunygi, mondo ging’e tiend weche manie Ndiko.” (Luka 24:45) Yesu nong’eyo ni ne dhi dwarore mondo joma somo Muma oyud kony mar winjo tiend puonj manie Ndiko.

Kony ne Dhi Yudore Kuom Jomage?

Yesu nochiko jolupne madier mondo ochiw konyno. Kapok nodhi e polo, Yesu nochikogi kama: “Dhiuru utim ogendini duto jopuonjrena, . . . kupuonjogi rito weche duto ma nachikou.” (Mathayo 28:19, 20) Tich maduong’ mar Jokristo en puonjo ji, to mano oriwo koda lero ne ng’ato kaka onyalo tiyo gi puonj manie Muma e ngimane pile ka pile. Jokristo madier konyo jomoko mondo owinj tiend weche manie Muma.

Kinde matin bang’ Yesu chiwo chikno ne jolupne, gimoro ma jaber notimore. Muma nyisowa ni nitie Ja-Ethiopia moro ma ne somo weche moko ma Isaya janabi nokoro. Noyudo kamoro ma ne tekne winjo. Kaluwore gi weche mondik ei Muma, ndiko ma ne choche wacho kama: “Nosembe kaka rombo midhi yang’o; kendo kaka nyarombo ling’ nyim jabusne, kamano ne ok oting’o dhoge. E sandne buche nowit oko. Ng’ano ma nohul tieng’ne?  Nikech ngimane ogol oko e piny.”​—Tich Joote 8:​32, 33; Isaiah 53:​7, 8.

Jalno nopenjo Filipo, Jakristo molony ma ne ong’eyo maber weche manie Ndiko kama: “Kiyie, apenji, janabi oluwo wachni kuom ng’a? Kuome owuon, koso kuom ng’ato moro?” (Tich Joote 8:​34) Mano noyudo ka Ja-Ethiopiano osedhi lemo Jerusalem, kendo nyalo bedo ni nosekwayo e lamo mondo oyud kony. Nenore ni, ne osomo gi chuny moyangore ka en gi gombo mar ng’eyo tiend wechego. To ema podi ne ok onyal winjo tiend wechego. Konyiso bolruok, nokwayo kony kuom Filipo. Weche ma Filipo ne oleronego ne omore ahinya, mi ong’ado owuon bedo Jakristo.​—Tich Joote 8:​35-​39.

Joneno mag Jehova dhi nyime gi tich ma Filipo koda Jokristo mokwongo ne tiyo. E pinje mokalo 235, Joneno chiwore mar konyo ji winjo tiend weche ma Muma puonjo kuom adier. Gitimo kamano ka gitiyo gi thuond weche mochan maber ei buge mawuoyo kuom  Ndiko. Yo ma gitiyo godono oriwo koda nono gima Muma wacho e wi thuon wach moro. *​—Ne sanduk mawacho ni “Dwoko Mowinjore mag Penjo Moa e Muma.”

“Nayudo Dwoko mag Penjona Duto”

Steven, Valvanera, kod Jo-Anne, mowuo kuomgi e sula motelo, nochako puonjruok Muma gi Joneno mag Jehova. Steven wacho kama: “Nawuoro ni kuom poro puonj mopogore opogore mayudore e Ndiko, pile dwoko ne yudore mana kanyo, ei Muma.” Omedo wacho kama: “Kapok ne achako puonjruok Muma gi Joneno mag Jehova, onge ng’ama ne oyudo osenyisa timo kamano. Ne amor ahinya ng’eyo ni Muma ok en mana buk moting’o weche ma ji twakie to ok giyud dwoko mag wechego, kendo ni ok oting’o paro mopogore opogore maok winjre e wi adiera mar Nyasaye kod Muma.”

Valvanera bende nigi paro ma kamano. Owacho kama: ‘Gik moko duto ma ne apuonjora gi Joneno ne winjore maler. Ne afwenyo ni ok ochuno ni nyaka ayie ayiea gi gik moko mana nikech Kanisa owacho, to nayudo ni onego atim kamano nikech puonj duto ilero e yo mawinjore ei Muma.’ Jo-Anne wacho kama: “Bedo ni penjona duto ne odwoki kitiyo gi Muma ne omiya mor mogundho kendo nomiyo achiwo luoro ne Wuon Muma nikech nong’eyo chon penjo moro amora ma ji nyalo bedogo, mi nomiyo oket dwoko mowinjore ei Muma.”

Be ing’eyo achiel kuom Janeno mag Jehova? Donge inyalo penje mondo onyisi kaka chenro mar puonjruok Muma itimo? To kapo ni ok ing’eyo achiel kuom Joneno mag Jehova, inyalo ndiko kitiyo gi adres moket e ite mar 2 ei gasedni. Kokalo kuom roho maler mar Nyasaye, bedo gi chuny moikore rwako puonj, koda kony michiwonwa kokalo kuom ng’at machielo molony e puonjo Muma, Wach Nyasaye ok bi bedo gima tekni winjo. Inyalo winjo tiend weche manie Muma!

[Weche moler piny]

[Sanduk/Picha manie ite mar 8]

Dwoko Mowinjore mag Penjo Moa e Muma

Moko kuom thuond weche ma Joneno mag Jehova tiyogo e puonjruok Muma gi ji:

• Ang’o momiyo Nyasaye nochweyo piny?

• Jo motho ni kanye?

• Be wadak e “ndalo mag giko”?

• Ang’o momiyo Nyasaye oweyo chandruok mondo obedie?

• Kaka inyalo miyo ngima mar joodi obed mamor?

[Picha manie ite mar 7]

Mondo iwinj tiend Muma . . . kwa Nyasaye omiyi roho mare, some kiikori rwako puonj manie iye, kendo iyie mondo jomoko okonyi