Joma jokinda gin joma ok oluoro tich. Kar mano, gimor tiyo matek mondo giyud kaka de gikonyre kendo konyo jomamoko kata ka tich ma gitimo en tich ma ji ok ohero.

Waduto wan gi ting’ mathoth, bed ni wahero kata ok wahero. Kata obedo ni wadak e piny ma thoth ji ok ohero tiyo matek, bedo jakinda nyalo konyi ahinya.​—Eklesiastes 3:13.

“Asefwenyo ni ka atiyo matek, awinjo ka amor kendo chunya okuwe. Bedo gi chuny mokuwe kamano osekonya mondo abed ng’ama ohero tich. Ka in ng’ama ohero tiyo matek, mano biro miyo ibed gi nying maber bende.”​—Reyon.

PUONJ MA MUMA CHIWO: “Tiyo gi kinda e ma kelo ohala.”​—Ngeche 14:23.

Bed gi paro mowinjore kuom kawo okenge ma luwogi.

Bed mamor sama itimo gik moko e yo maber. Bed ni itiyo tije mag dala, itimo homework, kata tij andika, ket chunyi e tich mitimono. Ka iseng’eyo timo tich moro e yo maber, many yore mamoko minyalo medo berogo tijno, kuom ranyisi, time piyo-piyo kata time e yo mong’ith moloyo. Kaka imedo bedo molony e tich moro, e kaka tijno biro medo mori.

PUONJ MA MUMA CHIWO: “Be iseneno ng’at molony e tije? Obiro chung’ e nyim ruodhi; ok nochung’ e nyim ji ajia.”​—Ngeche 22:29.

Par ber ma bedo jakinda kelo. Chiegni ni e gik moko duto mitimo, ka itimogi maber, ikonyo jomamoko bende. Kuom ranyisi, ka in jakinda e timo tije mag dala, ibiro miyo joodu tich mayot.

PUONJ MA MUMA CHIWO: “Chiwo kelo mor mang’eny moloyo kawo.”​—Tich Joote 20:35.

Tim tich momiyi mimed gi sanja e wiye. Kar timo mana gima okwayi ni itim, tem timo gik momedore moloyo kata ma owachni ni itim. Timo kamano ma ok ochuni nyiso ni inyalo chiko ngimani.​—Mathayo 5:41.

PUONJ MA MUMA CHIWO: “Gima ber mibiro timo kik bed ma ochunigo, to ma in e ma iyiero timo.”​—Filemon 14.

Bed gi tong’. Ng’at ma jakinda ok en ng’at ma jasamuoyo e tich, to mano be ok nyis ni obiro tiyo atiya ma ok oyue. En gi tong’ kendo omor tiyo sama mano dwarore, to iyeno bende en gi kinde ma oyueyoe.

PUONJ MA MUMA CHIWO: “Yueyo matin ber moloyo tich matek manono ma chal mana gi lawo yamo.”​—Eklesiastes 4:6.