Bene Levi 5:1-19

  • Bubi bumobumo ne byamulambu bilombelwe (1-6)

    • Kusapula bubi bwa bakwabo (1)

  • Byamulambu bya kuleta balanda (7-13)

  • Kyamulambu kya mambo pa mwanda wa kujilula kwampikwa kusaka (14-19)

5  “‘Shi muntu* walonga bubi mwanda waivwana bela lubila lwa kukimba bukamoni,*+ ino aye i kamoni wamwene nansha kwikivwana ino kusapula mpika, nabya ukapebwa mfuto pa kilubo kyandi.  “‘Nansha shi muntu* watenga kintu kampanda kya disubi, ikale ngitu mifwe ya nyema wa ntanda wa disubi, nyema wa nja wa disubi, nansha bipangwa bya disubi byenda kitānda,+ nabya i wa disubi kadi wapi mambo nansha shi kayukilepo.  Nansha shi muntu watenga bya disubi bya muntu kwampikwa kuyuka+—kintu kampanda kya disubi kibwanya kumusubija—kupwa wayuka’o, nabya wapi mambo.  “‘Nansha shi muntu* watyipe bukidibukidi kulonga kintu kampanda—kikale kiyampe nansha kibi, shi kika shi kika—ino kadipo uyukile, kupwa wajingulula’mba watyipanga bukidibukidi, nabya wapi mambo.*+  “‘Shi wapi mambo mu kintu kimo pa bino’bi, nankyo ufwaninwe kukesapula+ i muswelo’ka waalonga bubi.  Kadi ukaselela Yehova kyamulambu kya mambo mwanda wa bubi bwalongele,+ ko kunena’mba, nyema mukaji wa mu luombe, kana ka mukōko kakaji nansha mbuji mukaji mwana, wa kyamulambu kya bubi. Penepa kitobo ukamupūtyila bubi bwandi.  “‘Ino shi kabwanyapo kusokola mukōko, nabya ukaselela Yehova tukutyikutyi tubidi nansha bibondya bya bankunda bibidi+ bu kyamulambu kya mambo mwanda wa bubi, kimo kya kyamulambu kya bubi, kikwabo nakyo kya kyamulambu kisōkwe.+  Ukaselela’byo kudi kitobo, mwine ukaleta bidi kimo bu kyamulambu kya bubi, ukekiketa mutwe dya kumeso kwa nshingo, kwampikwa kutalwididila’o.  Ukakusa mashi amo a kyamulambu kya bubi ku mutamba umo wa kisōkelo, ino mashi makwabo akashala’ko akasūmijibwa pa kitako kya kisōkelo.+ I kyamulambu kya bubi. 10  Ukalambula kikwabo nakyo bu kyamulambu kisōkwe enka mulongelwanga nyeke;+ kadi kitobo ukamupūtyila bubi bwalongele, nabo bukamulekelwa.+ 11  “‘Ino shi kabwanyapo kusokola tukutyikutyi tubidi nansha bibondya bya bankunda bibidi, nankyo ufwaninwe kusela bu kyamulambu kyandi mwanda wa bubi bwandi, kipindi kimo kya pa bipindi dikumi bya efa*+ wa bukula bupēla bu kyamulambu kya bubi. Kafwaninwepo kubweja’po māni nansha kwela’po ensense itōka, mwanda i kyamulambu kya bubi. 12  Ukaselela’bo kitobo, kitobo nandi ukayata’mo mukono umo bu kyamulambu kya kyeya* ne kwibusōka pa kisōkelo pangala pa byamulambu bya Yehova byelwe na mudilo. I kyamulambu kya bubi. 13  Kitobo ukamupūtyila bubi bwandi bwalongele, bubi bonso pa buno’bu, nabo bukamulekelwa.+ Byobya bikashala ku kyamulambu bikekala bya kitobo,+ pamo’nka bwa kyamulambu kya miseke.’”+ 14  Yehova wanena Mosesa monka’mba: 15  “Shi muntu* wabulwe kikōkeji, wajilula bintu bijila bya Yehova+ kwampikwa kusaka, nankyo ukaselela Yehova mukōko mulume wampikwa bulema mu luombe bu kyamulambu kya mambo;+ bulēme bwakyo mu mashekele* a ndalama i bupimwe mungya shekele ya ku kifuko kijila.*+ 16  Kadi ukafuta mfutwa mwanda wa kujilula kwaajilula kifuko kijila, ukabweja’ko ne kipindi kimo kya pa bipindi bitano kya bulēme bwakyo.+ Ukapa’kyo kitobo, amba kitobo amupūtyile bubi+ na mukōko wa kyamulambu kya mambo, ao nao akamulekelwa.+ 17  “Shi muntu* walonga bubi, walonga kintu kimo mu bintu bisoñenye Yehova amba kebifwaninwepo kulongwa, nansha shi kayukilepo, wapi mambo kadi ukapebwa mfuto pa kilubo kyandi.+ 18  Ukaselela kudi kitobo mukōko mulume wampikwa bulema mu luombe mungya bulēme butungilwe, mwanda wa kyamulambu kya mambo.+ Ebiya kitobo ukamupūtyila bubi mwanda wa kilubo kyalongele kwampikwa kusaka ne kuyuka mpika, nakyo kikamulekelwa. 19  I kyamulambu kya mambo. Bine i mupye mambo pa kulubila Yehova.”

Kunshi kwa Dyani

Kishima pa kishima i, “diwi dya mafingo (mutyipo).” Kepabulwe i lubila lwa kilongwa kibi mubadilwa ne kunena bya kufinga yewa ulongele bibi nansha kamoni mwanda wakomenwa kuleta bukamoni.
Nansha’mba “muya.”
Nansha’mba “muya.”
Nansha’mba “muya.”
Bimweka’mba i mwanda kafikidijepo mpiko yandi.
Kipindi kimo kya pa bipindi dikumi bya efa i malitele 2,2 (makwatyi 2 a byūmu). Tala Mbwejo B14.
Nansha’mba “bu kipindi kya kivulukilo (kyelekejo) kyakyo.”
Nansha’mba “muya.”
Nansha’mba “na shekele ijila.”
Shekele imo i mangalame 11,4. Tala Mbwejo B14.
Nansha’mba “muya.”