Bene Levi 11:1-47
-
Banyema bampikwa disubi ne ba disubi (1-47)
11 Penepo Yehova wanena ba Mosesa ne Alone amba:
2 “Sapwilai bene Isalela amba, ‘Bino’bi byo bipangwa byūmi bya pa ntanda* byomukokeja kudya:+
3 Nyema ense wa mikono milale kadi miladidile pabidi kadi utyikula ukokeja kudibwa.
4 “‘Inoko kemufwaninwepo kudya bano banyema batyikula nansha ba mikono milale: ngamedia, utyikulanga ino kadipo na mikono milale. I wa disubi komudi.+
5 Ne dama,+ mwanda utyikulanga ino kadipo na mikono milale. I wa disubi komudi.
6 Ne kalulu, mwanda katyikulanga ino kekadipo na mikono milale. I ka disubi komudi.
7 Ne ngulube,+ mwanda udi na mikono milale kadi miladidile pabidi ino katyikulangapo. I wa disubi komudi.
8 Kemufwaninwepo kudya ku mwita wabo nansha kutenga umbidi wabo mufwe. I ba disubi komudi.+
9 “‘Bino’bi e byomukokeja kudya mu bintu byonso bya mu mema: Kintu kyonso kya mu mema kidi na nsānga* ne mapalu, kikale kya mu majiba nansha mu minonga, mukokeja kudya’kyo.+
10 Ino kintu kyonso kidi mu majiba ne mu minonga kyampikwa nsānga* nansha mapalu, mu bipangwa byonso byenda kitānda ne mu bipangwa* bikwabo byonso byūmi bidi mu mema, i kintu kya mukenye komudi.
11 Bine, bikekala bya mukenye komudi, kadi kemufwaninwepo kudya mwita wabyo,+ mufwaninwe kukwatwa mukenye imbidi yabyo mifwe.
12 Kintu kyonso kidi mu mema kyampikwa nsānga* ne mapalu i kya mukenye komudi.
13 “‘Bino’bi byo bipangwa bitumbuka byomukakwatwa mukenye; kebifwaninwepo kudibwa, mwanda i bya mukenye: mukebo,+ nkolenko, dikubi difīta,+
14 nshiku ne tulela twa miswelo yonso,
15 binkombe bya miswelo yonso,
16 ne dikolongo, ne kitungu, ne lupupila, ne miswelo yonso ya tubemba,
17 ne katungutungu, ne musofi, ne katungu-nsengo,
18 kalālejiba, ne diomba, ne dikubi,
19 kakumbi, ne nkongwe ya miswelo yonso, ne kapungulu, ne mudima.
20 Bipangwa byonso byenda kitānda bya maulu aná i kintu kya mukenye komudi.
21 “‘Mu bīshi byonso bya masala byenda na maulu aná, mubwanya kudya’mo enka byobya bidi na maninga a kusoboka nao pa nshi.
22 Mubwanya kudya’mo: njie ya miswelo palapala, ne njie mikwabo idibwa,+ bañenze, ne batēte.
23 Bīshi bikwabo byonso bya masala bidi na maulu aná i kintu kya mukenye komudi.
24 Mubwanya kwisubija na bino’bi. Muntu ense utenga imbidi yabyo mifwe ukekala wa disubi kufika ne ku kyolwa.+
25 Muntu ense usela imbidi yabyo mifwe ufwaninwe kukenda bivwalwa byandi;+ ukekala wa disubi kufika ne ku kyolwa.
26 “‘Nyema ense wa mikono milale ino keiladidilepo pabidi kadi katyikulangapo i wa disubi komudi. Muntu ense utenga’ko ukekala wa disubi.+
27 Kipangwa kyonso kyūmi kyendela mu makufi mu bipangwa byenda na maulu aná i kya disubi komudi. Muntu ense utenga imbidi yabyo mifwe ukekala wa disubi kufika ne ku kyolwa.
28 Yewa usela imbidi yabyo mifwe ufwaninwe kukenda bivwalwa byandi,+ kadi ukekala wa disubi kufika ne ku kyolwa.+ I ba disubi komudi.
29 “‘Bino’bi byo bipangwa byenda kitānda pano pa ntanda bya disubi komudi: mfuko, mpuku,+ ne minsolo ya miswelo yonso,
30 kilōko, mbulu, munsolo wa lui, nsumba, ne lunkusunkwe.
31 Bino bipangwa byenda kitānda i bya disubi komudi.+ Muntu ense utenga imbidi yabyo mifwe ukekala wa disubi kufika ne ku kyolwa.+
32 “‘Kintu kyonso kyobiponena’po shi bibafu kikekala kya disubi, kikale kipungwa kya mityi, kivwalwa, kiseba, nansha kipēta kya sāka. Kipungwa kyonso kingidijibwa kifwaninwe kutumpwa mu mema, kadi kikekala kya disubi kufika ne ku kyolwa; kupwa kikekala kyampikwa disubi.
33 Shi bibaponena mu kintu kya dilongo, mukalala’kyo, kadi kintu kyonso kyadi’mo kikekala kya disubi.+
34 Byakudya byonso bitengwa na mema a mu kino kipungwa bikekala bya disubi, kadi bitomibwa byonso bidi mu kino kipungwa bikekala bya disubi.
35 Kintu kyonso kiponenwa na imbidi yabyo mifwe kikekala kya disubi. Ekale fūlu wa mikate nansha mafia, akalalwa bibesebibese. I bya disubi, kadi bikekala nyeke bya disubi komudi.
36 Poso enka nsulo ne kyumbu kya kubīka’mo mema byo bikashala nyeke byampikwa disubi, ino muntu ense utenga imbidi yabyo mifwe ukekala wa disubi.
37 Shi imbidi yabyo mifwe ibaponena pa nkunwa ya kukuna, nabya i yampikwa disubi.
38 Ino shi mema abaelwa ku nkunwa ne kipindi kya imbidi yabyo mifwe kibaponena’po, nabya nkunwa i ya disubi komudi.
39 “‘Ino shi nyema omudyanga wefwila, muntu ense utenga umbidi wandi mufwe ukekala wa disubi kufika ne ku kyolwa.+
40 Muntu ense udya umbidi wandi mufwe ukakenda bivwalwa byandi, kadi ukekala wa disubi kufika ne ku kyolwa.+ Muntu ense usela umbidi wandi mufwe ukakenda bivwalwa byandi, kadi ukekala wa disubi kufika ne ku kyolwa.
41 Bipangwa byonso byenda kitānda bya pano pa ntanda i kintu kya mukenye.+ Kebifwaninwepo kudibwa.
42 Kemufwaninwepo kudya kipangwa kyonso kībulula mu difu, kipangwa kyonso kyenda na maulu aná, nansha bipangwa bya pa ntanda byenda kitānda bya maulu mangimangi, mwanda i kintu kya mukenye.+
43 Kemwakelongai banwe* bene kemudi ba mukenye na bipangwa byo-byonso byenda kitānda, kadi kemwakesubijai nabyo kemudi bantu ba disubi.+
44 Ke-pantu amiwa ne Yehova Leza wenu,+ kadi mufwaninwe kwipandula ne kwikala bajila,+ mwanda amiwa ne ujila.+ Nanshi kemufwaninwepo kwisubija banwe* bene na bipangwa byo-byonso byenda kitānda pano pa ntanda.
45 Ke-pantu amiwa ne Yehova, wemulupwile mu ntanda ya Edipito mwanda wa kwilombola bu Leza komudi,+ kadi mufwaninwe kwikala bajila,+ mwanda amiwa ne ujila.+
46 “‘Kino’ki kyo kijila kitala banyema, bipangwa bitumbuka, ne bipangwa* byonso byūmi binanga mu mema, kitala ne bipangwa* byonso byenda kitānda pano pa ntanda,
47 mwanda wa kushiañanya kya disubi ne kyampikwa disubi, bipangwa byūmi bikokeja kudibwa ne byobya kebikokejapo kudibwa.’”+
Kunshi kwa Dyani
^ Nansha’mba “banyema ba pa ntanda.”
^ Ibwanya kufunkila ne pa mapeshi, ne nsānga ya mu kyadi.
^ Ibwanya kufunkila ne pa mapeshi, ne nsānga ya mu kyadi.
^ Nansha’mba “myuya.”
^ Ibwanya kufunkila ne pa mapeshi, ne nsānga ya mu kyadi.
^ Nansha’mba “myuya yenu.”
^ Nansha’mba “myuya yenu.”
^ Nansha’mba “myuya.”
^ Nansha’mba “myuya.”
