Bene Levi 1:1-17
-
Kyamulambu kisōkwe (1-17)
1 Ebiya Yehova waita Mosesa kaesambe nandi ku pema wa kubungakena’ko+ amba:
2 “Wisambe na bene Isalela* wibasapwile amba, ‘Shi muntu mu bukata mwenu usaka kuleta kyamulambu kudi Yehova kya banyema ba nja, mufwaninwe kuleta kyamulambu kyenu kya mu bañombe nansha kya mu mikōko.+
3 “‘Shi kyamulambu kyandi i kyamulambu kisōkwe kya mu bañombe, nabya ufwaninwe kuleta nyema mulume wampikwa bulema.+ Ufwaninwe kuleta’kyo na mutyima tō+ ku meso a Yehova pa kibelo kya pema wa kubungakena’ko.
4 Ukatenteka dikasa dyandi pa mutwe wa kyamulambu kisōkwe, kadi kikamwitabijibwa mwanda wa kupūta bubi bwandi.
5 “‘Penepa ñombe mwana’wa ukatapwa ku meso a Yehova, kadi bana ba Alone, babitobo,+ bakaleta mashi ne kukusa’o ku mitamba yonso ya kisōkelo+ kidi pa kibelo kya pema wa kubungakena’ko.
6 Kyamulambu kisōkwe kikebulwa kiseba ne kusaibwa bisesobiseso.+
7 Bana ba Alone, babitobo bakabanza mudilo pa kisōkelo+ ne kupanga nkuni pa mudilo.
8 Kadi bana ba Alone, babitobo, bakapanga biseso bya kyamulambu+ ne mutwe ne māni* pa nkuni idi pa mudilo wa pa kisōkelo.
9 Milá ne maulu akyo bikakendwa na mema, kadi kitobo ukebisōka byonso pa kisōkelo bu kyamulambu kisōkwe, kyamulambu kyelwe na mudilo kya luvumba luyampe* kudi Yehova.+
10 “‘Shi kyamulambu kyandi kya kyamulambu kisōkwe i kya mu luombe,+ kya mu mikōko milume myana nansha bambuji bana, ufwaninwe kuleta mulume wampikwa bulema.+
11 Ufwaninwe kutapibwa ku meso a Yehova ku mutamba wa kungala kwa kisōkelo, kadi bana ba Alone, babitobo bakakusa mashi andi ku mitamba yonso ya kisōkelo.+
12 Ukamusaya bisesobiseso, kitobo ukebipanga pamo ne mutwe ne māni* pa nkuni idi pa mudilo wa pa kisōkelo.
13 Ukakenda milá ne maulu na mema, kadi kitobo ukaleta kyonso ne kwikisōka pa kisōkelo. I kyamulambu kisōkwe, kyamulambu kyelwe na mudilo kya luvumba luyampe* kudi Yehova.
14 “‘Inoko, shi kalambula toni bu kyamulambu kisōkwe kudi Yehova, nabya ukaleta kyamulambu kyandi kya mu tukutyikutyi nansha mu bibondya bya bankunda.+
15 Kitobo ukekaleta ku kisōkelo ne kwikaketa mutwe, kupwa ukekasōka pa kisōkelo, ino mashi ako akasūmijibwa ku lubavu lwa kisōkelo.
16 Ukatalula kidīlo kyako ne masala, kupwa ukela’byo kubwipi na kisōkelo, dya kutunduka, pa kifuko kya buto.*+
17 Ukekalala mu mapapa ako pampikwa kwikabanya pabidi. Kupwa kitobo ukekasōka pa kisōkelo pangala pa nkuni idi pa mudilo. I kyamulambu kisōkwe, kyamulambu kyelwe na mudilo kya luvumba luyampe* kudi Yehova.
Kunshi kwa Dyani
^ Kishima pa kishima i, “bana ba Isalela”
^ Nansha’mba “māni alamete ku mfyo.”
^ Nansha’mba “lutūkija mutyima; lusenga.” Kishima pa kishima i, “lutūkija.”
^ Nansha’mba “māni alamete ku mfyo.”
^ Nansha’mba “lutūkija mutyima; lusenga.” Kishima pa kishima i, “lutūkija.”
^ Nansha’mba “buto bwa māni,” ko kunena’mba, buto busūmine’ko māni a bitapwa.
^ Nansha’mba “lutūkija mutyima; lusenga.” Kishima pa kishima i, “lutūkija.”
