Bene Levi 17:1-16

  • Kipema, kifuko kya bitapwa (1-9)

  • Kupeleja kudya mashi (10-14)

  • Misoñanya itala banyema befwile (15, 16)

17  Yehova wanena Mosesa monka’mba:  “Wisambe na Alone ne bandi bana ne bene Isalela bonso, wibalombole amba, ‘E mwasoñenya Yehova namino amba:  “‘“Shi muntu wa mu njibo ya Isalela watape ñombe nansha mukōko mulume mwana nansha mbuji mu nkambi nansha shi watapila’ye panja pa nkambi,  pa kyaba kya kuselela’ye ku kibelo kya pema wa kubungakena’ko ne kumuleta bu kyamulambu kudi Yehova kumeso kwa kipema kya Yehova, yao muntu ukalambikwa mambo a mashi. Wamwanga mashi, yao muntu ufwaninwe kutyibwa’ko* mu bantu bandi.  I mwanda wa bene Isalela balete bitapwa kudi Yehova, ku kibelo kya pema wa kubungakena’ko, kudi kitobo, byobya byobatapila pano mu ntanda. Bafwaninwe kutapa’byo bu bitapwa bya kipwano kudi Yehova.+  Kadi kitobo ukakusa mashi ku kisōkelo kya Yehova pa kibelo kya pema wa kubungakena’ko ne kusōka māni bu luvumba luyampe* kudi Yehova.+  Nabya kebakelapo monka bitapwa ku bandemona badi bwa bambuji,*+ bobalonga nabo busekese.+ Kino’ki kikekala kitungo kya myaka na myaka komudi mu nkongo yenu yonso.”’  “Ukebalombola’mba, ‘Muntu ense wa mu njibo ya Isalela nansha mweni ushikete mu bukata mwenu ulambula kyamulambu kisōkwe nansha kitapwa  ino kuleta’kyo mpika ku kibelo kya pema wa kubungakena’ko mwanda wa kwikilambula kudi Yehova, ufwaninwe kutyibwa’ko* mu bantu bandi.+ 10  “‘Shi muntu wa mu njibo ya Isalela nansha mweni ushikete mu bukata mwenu udya mashi+ a muswelo o-onso, nkapela binebine yao muntu* udya mashi, kadi nkamutyiba’ko* mu bantu bandi. 11  Mwanda būmi* bwa ngitu budi mu mashi,+ kadi ami mwine napāna’o pa kisōkelo+ mwanda wa mupūte bubi bwenu,* ke-pantu i mashi apūtanga bubi+ kupityila ku būmi* budi’mo. 12  O mwanda nanena bene Isalela amba: “Kekwakikala muntu* nansha umo momudi wa kudya mashi, kadi kekwakikala mweni nansha umo ushikete mu bukata mwenu+ wa kudya mashi.”+ 13  “‘Shi mwine Isalela nansha mweni ushikete mu bukata mwenu wakapoya, wakwata nyema wa ntanda nansha kyoni kibwanya kudibwa, ufwaninwe kumwanga mashi+ akyo ne kupūta’o luvumbi. 14  Mwanda būmi* bwa ngitu ya muswelo o-onso i mashi ayo, mwanda mo mudi būmi.* Shi ke pano nanena bene Isalela amba: “Kemufwaninwepo kudya mashi a ngitu ya muswelo o-onso, ke-pantu būmi* bwa ngitu ya muswelo o-onso i mashi ayo. Muntu ense udya’o ukatyibwa’ko.”*+ 15  Shi muntu* wadi nyema mwifwile nansha musasamunwe na nyema wa ntanda,+ ekale mwine Isalela nansha mweni, ufwaninwe kukenda bivwalwa byandi ne koya mema, kadi ukekala wa disubi kufika ne ku kyolwa;+ kupwa ukekala wampikwa disubi. 16  Ino shi kakendele’byopo ne koya mema, nabya ukapebwa mfuto pa kilubo kyandi.’”+

Kunshi kwa Dyani

Nansha’mba “kwipaibwa.”
Nansha’mba “lutūkija mutyima; lusenga.” Kishima pa kishima i, “lutūkija.”
Kishima pa kishima i, “bambuji.”
Nansha’mba “kwipaibwa.”
Nansha’mba “muya.”
Nansha’mba “nkamwipaya.”
Nansha’mba “muya.”
Nansha’mba “bwa myuya yenu.”
Nansha’mba “muya.”
Nansha’mba “muya.”
Nansha’mba “muya.”
Nansha’mba “muya.”
Nansha’mba “muya.”
Nansha’mba “ukepaibwa.”
Nansha’mba “muya.”