Bene Levi 15:1-33

  • Bya disubi bisūma ku mutaka (1-33)

15  Yehova wesamba monka na ba Mosesa ne Alone amba:  “Mwisambei na bene Isalela mwibalombole amba, ‘Shi muntu udi na bimusūma ku ngitu ya bwana-bulume,* bimusūma’bya bikamusubija.+  I wa disubi mwanda wa bimusūma’bya, bikale bikisūma ku ngitu yandi ya bwana-bulume nansha shi bibajike’mo, i enka wa disubi.  “‘Butanda bonso bulāla’po yewa udi na bimusūma bukekala bwa disubi, kadi kintu kyonso kyashikata’po kikekala kya disubi.  Muntu utenga butanda bwandi ufwaninwe kukenda bivwalwa byandi, kadi ukoya mema ne kwikala wa disubi kufika ne ku kyolwa.+  Muntu ense ushikata pa kintu kyadi kishikete’po yewa udi na bimusūma ufwaninwe kukenda bivwalwa byandi, koya mema, ne kwikala wa disubi kufika ne ku kyolwa.  Ense utenga ngitu ya muntu udi na bimusūma ufwaninwe kukenda bivwalwa byandi, koya mema, ne kwikala wa disubi kufika ne ku kyolwa.  Shi yewa udi na bimusūma wapēlela muntu wampikwa disubi mata, yao muntu ufwaninwe kukenda bivwalwa byandi, koya mema, ne kwikala wa disubi kufika ne ku kyolwa.  Kishikatyilo kyonso kīkila’po yewa udi na bimusūma kikekala kya disubi. 10  Muntu ense utenga kintu kyonso kyaadi ushikete’po ukekala wa disubi kufika ne ku kyolwa, kadi muntu ense usela bino bintu ukakenda bivwalwa byandi, koya mema, ne kwikala wa disubi kufika ne ku kyolwa. 11  Shi yewa udi na bimusūma+ koilepo ku makasa mu mema ino watenga muntu, yao muntu ufwaninwe kukenda bivwalwa byandi, koya mema, ne kwikala wa disubi kufika ne ku kyolwa. 12  Kintu kya dilongo kitenga yewa udi na bimusūma kifwaninwe kulalakanibwa, kadi kintu kyonso kya mutyi kifwaninwe kukendwa na mema.+ 13  “‘Shi byobya bisūma bibaleka’byo ne muntu nandi wasubulwa’ko, nankyo ukabala mafuku asamba-abidi pa kutōkejibwa, kadi ufwaninwe kukenda bivwalwa byandi, koya mu mema a mulungu, penepa ukekala wampikwa disubi.+ 14  Mu difuku dya mwānda, ukayata tukutyikutyi tubidi nansha bibondya bya bankunda bibidi,+ waiya ku meso a Yehova ku kibelo kya pema wa kubungakena’ko ne kupa’byo kitobo. 15  Kitobo ukalambula’byo, koni kamo bu kyamulambu kya bubi kakwabo nako bu kyamulambu kisōkwe, kadi kitobo ukamupūtyila bubi ku meso a Yehova mwanda wa bimusūma. 16  “‘Ino shi muntu watambwe na mema a bwana-bulume, ufwaninwe koya ngitu yandi yonso mu mema ne kwikala wa disubi kufika ne ku kyolwa.+ 17  Ufwaninwe kukenda mu mema kivwalwa kyonso ne kiseba kyonso kidi’ko mema a bwana-bulume, kadi kikekala kya disubi kufika ne ku kyolwa. 18  “‘Shi mwana-mulume walāla na mwana-mukaji kadi watambija mema a bwana-bulume, bafwaninwe koya mema ne kwikala ba disubi kufika ne ku kyolwa.+ 19  “‘Shi mwana-mukaji udi na mashi amusūma ku ngitu yandi, ukekala mu kitatyi kya disubi dyandi dya ku mweji mafuku asamba-abidi.+ Muntu ense umutenga ukekala wa disubi kufika ne ku kyolwa.+ 20  Kintu kyonso kyalāla’po mu kitatyi kya disubi dyandi dya ku mweji kikekala kya disubi, kadi kintu kyonso kyashikata’po kikekala kya disubi.+ 21  Muntu ense utenga butanda bwandi ufwaninwe kukenda bivwalwa byandi, koya mema, ne kwikala wa disubi kufika ne ku kyolwa. 22  Muntu ense utenga kintu kyonso kyaadi ushikete’po, ufwaninwe kukenda bivwalwa byandi, koya mema, ne kwikala wa disubi kufika ne ku kyolwa. 23  Shi wadi ushikete pa butanda nansha pa kintu kikwabo, muntu utenga’ko ukekala wa disubi kufika ne ku kyolwa.+ 24  Kadi shi mwana-mulume walāla nandi ne bya disubi byandi bya ku mweji bimulamate,+ nankyo mwana-mulume’wa ukekala wa disubi mafuku asamba-abidi, kadi butanda bonso bwalāla’po bukekala bwa disubi. 25  “‘Shi mashi asūma mwana-mukaji atamba mafuku mangi+ mu kitatyi kyakendangapo ku mweji,+ nansha shi muyeye’wa ubalepa kupita kitatyi kyaendanga ku mweji, ukekala wa disubi mafuku onso oamusūma, pamo bwa mu mafuku a disubi dyandi dya ku mweji. 26  Butanda bonso bwalāla’po mu mafuku a bimusūma bukekala pamo bwa butanda bwa kitatyi kya disubi dyandi dya ku mweji,+ kadi kintu kyonso kyashikata’po kikekala kya disubi pamo bwa disubi dya kitatyi kyandi kya ku mweji. 27  Muntu ense utenga’byo ukekala wa disubi, kadi ufwaninwe kukenda bivwalwa byandi, koya mema, ne kwikala wa disubi kufika ne ku kyolwa.+ 28  “‘Inoko, shi wasubulwa ku bimusūma, ukabala mafuku asamba-abidi, kupwa ukekala wampikwa disubi.+ 29  Mu difuku dya mwānda, ukayata tukutyikutyi tubidi nansha bibondya bya bankunda bibidi,+ ukebileta kudi kitobo ku kibelo kya pema wa kubungakena’ko.+ 30  Kitobo ukalambula koni kamo bu kyamulambu kya bubi kakwabo nako bu kyamulambu kisōkwe, kadi kitobo ukamupūtyila bubi ku meso a Yehova mwanda wa bimusūma bya disubi.+ 31  “‘E namino’u momufwaninwe kusansenya bene Isalela ku disubi dyabo, kutyina’mba bakafwa mu disubi dyabo na kusubija kipema kyami, kidi umbukata mwabo.+ 32  “‘Kino’ki kyo kijila kya mwana-mulume udi na bimusūma, mwana-mulume wa disubi mwanda wa mema a bwana-bulume amutamba,+ 33  ne mwana-mukaji udi mu kitatyi kya disubi dya ku mweji,+ ne mwana-mulume ense nansha mwana-mukaji ense udi na bimusūma ku yandi ngitu,+ ne mwana-mulume ulāla na mwana-mukaji wa disubi.’”

Kunshi kwa Dyani

Kishima pa kishima i, “ngitu yandi.”