Bene Levi 24:1-23
24 Yehova wesamba monka na Mosesa amba:
2 “Soñanya bene Isalela bakuletele māni a impafu onkaonka mwanda wa kitōkeji, mwa kulamina binanu byake kyaba kyonso.+
3 Panja pa mpashila ya Bukamoni mu pema wa kubungakena’ko, Alone ukalongolola mwa kulamina binanu byake tamba ku kyolwa kufika ne lubanga ku meso a Yehova kyaba kyonso. I kitungo kya lonso ku nkongo yenu yonso.
4 Ukapanga binanu pa kitūlwa-binanu+ kya olo yonkayonka ku meso a Yehova kyaba kyonso.
5 “Abe ukayata bukula bupēla, ulonge nabo mikate 12 idi bwa ntonto. Mukate ne mukate ukalongwa na bipindi bibidi bya pa bipindi dikumi bya efa.*
6 Ukeitūla mu milongo ibidi, mikate isamba mu mulongo umo,+ pa meza a olo yonkayonka ku meso a Yehova.+
7 Ukatūla ensense itōka tō pa mulongo ne mulongo, kadi ikakwasha bu mikate ya kyamulambu kya kyeya*+ kyelwe na mudilo kudi Yehova.
8 Mu difuku dyonso dya Sabato, ukeipanga nyeke ku meso a Yehova.+ I kipwano kya myaka na myaka na bene Isalela.
9 Ikekala ya Alone ne bandi bana,+ kadi bakadīla’yo mu kifuko kijila,+ mwanda i kintu kijila nakampata kwadi kya mu byamulambu bya Yehova byelwe na mudilo, bu musoñanya wa myaka na myaka.”
10 Penepo mu bene Isalela mwadi mwana umo wa mwana-mukaji mwine Isalela, shandi’ko mwine Edipito,+ ebiya kwatamba lūma pa bukata bwa aye ne mwana-mulume umo mwine Isalela mu nkambi.
11 Mwanā mwana-mukaji mwine Isalela’wa waanza kutuka Dijina* ne kwidifinga.*+ Ebiya bamuselela kudi Mosesa.+ Nanshi, inandi wadi Shelomite, mwanā Dibila wa ku kisaka kya Dani.
12 Penepo bamwela mu buloko kufika ne byebasapwidilwe patōka butyibi bwa Yehova.+
13 Ebiya Yehova wanena Mosesa amba:
14 “Tambija panja pa nkambi yao wafiñañene, bonso bamwivwene bafwaninwe kumutenteka makasa pa mutwe wandi, penepa kitango kyonso kifwaninwe kumwasa mabwe.+
15 Kadi nobe ufwaninwe kulombola bene Isalela amba, ‘Shi muntu wafinge Leza wandi, ukapebwa mfuto pa bubi bwandi.
16 Nanshi yewa utuka dijina dya Yehova ufwaninwe binebine kwipaibwa.+ Binebine kitango kyonso kikamwasa mabwe. Mweni wa kibundi ukepaibwa muswelo umo onka na mwine Isalela shi watuke Dijina.
17 “‘Shi muntu wayata būmi bwa muntu,* binebine ufwaninwe kwipaibwa.+
18 Muntu ense ukupila nyema* wa nja wamwipaya ukafutyila’ye, būmi ku būmi.*
19 Shi muntu walemeka mukwabo, nankyo nandi ukalongwa byawalonga’bya.+
20 Kityumuke pa kityumuke, diso ku diso, dino ku dino, ukalemekwa monka mwaalemekañena.+
21 Muntu ukupila nyema wamwipaya ukafutyila’ye,+ ino yewa ukupila muntu wamwipaya nandi ukepaibwa.+
22 “‘Mutyibilo wa mambo umo onka ukengidijibwa komudi, ekale mweni wa kibundi nansha mwine Isalela,+ mwanda amiwa ne Yehova Leza wenu.’”
23 Penepo Mosesa wesamba na bene Isalela, nabo batambija panja pa nkambi yewa wafiñañene, bamwasa mabwe.+ E nankyo mwalongēle bene Isalela monka mobasoñaninye Mosesa kudi Yehova.
Kunshi kwa Dyani
^ Bipindi bibidi bya pa bipindi dikumi bya efa i malitele 4,4 (makwatyi 4 a byūmu). Tala Mbwejo B14.
^ Nansha’mba “bu kipindi kya kivulukilo (kyelekejo) kyakyo.”
^ Ko kunena’mba, dijina Yehova, monka mulombwela vese 15 ne 16.
^ Nansha’mba “kwidisakila bibi.”
^ Nansha’mba “wakupila muya wa muntu wafu.”
^ Nansha’mba “Kadi yewa ukupila muya wa nyema wafwa.”
^ Nansha’mba “muya ku muya.”
