Bene Levi 22:1-33
22 Yehova wesamba monka na Mosesa amba:
2 “Lombola Alone ne bandi bana’mba bafwaninwe kuta mutyima muswelo obengidija* bintu bijila bya bene Isalela, kadi kebakakobakanya dijina dyami dijila+ mwanda wa bintu byobampandwila.+ Amiwa ne Yehova.
3 Wibalombole amba, ‘Mu nkongo yenu yonsololo, muntu ense wa ku lutundu lwenu ufwena ku bintu bijila byobapandwila Yehova kudi bene Isalela aye papo ukidi wa disubi, yao muntu* ukatyibwa’ko* ku meso ami.+ Amiwa ne Yehova.
4 Kekwakekala muntu nansha umo wa ku lutundu lwa Alone udi na makopo+ nansha na bimusūma+ ukadya ku bintu bijila kufika ne byaikala wampikwa disubi,+ nansha muntu utenga muntu mukwabo musubijibwe na muntu* mufwe,+ nansha muntu utambije mema a bwana-bulume,+
5 nansha muntu utenga bipangwa byenda kitānda bya disubi+ nansha utenga muntu wisubije shi na kika shi na kika kadi ubwanya kumusubija.+
6 Muntu utenga kintu kyo-kyonso pa bino ukekala wa disubi kufika ne ku kyolwa, kadi kakadipo kintu kijila nansha kimo, ino ufwaninwe koya mema.+
7 Shi dyuba dibapone, ukekala wampikwa disubi, penepa ubwanya kudya ku bintu bijila mwanda i byakudya byandi.+
8 Kadi, kafwaninwepo kudya nyema nansha umo mwifwile nansha kintu kyo-kyonso kisasamunwe na nyema wa ntanda ne kwisubija nakyo.+ Amiwa ne Yehova.
9 “‘Bafwaninwe kulama byonebasoñenye, kutyina’mba byakebapija mambo ne kwibepaija mwanda badi bebikobakanya. Amiwa ne Yehova, mwine wibapandula.
10 “‘Muntu kapelwepo lupusa* kakadipo kintu kijila.+ Mweni wa kitobo nansha muntu wa kaji kakadipo kintu kijila.
11 Ino shi kitobo wapote muntu* na lupeto lwandi, yao muntu ubwanya kudya’ko. Bapika babutwilwe mu yandi njibo babwanya nabo kudya ku byakudya byandi.+
12 Shi mwanā kitobo mwana-mukaji wasongwe na muntu ke kitobopo,* mwana’wa kabwanyapo kudya ku kyabuntu kya bintu bijila.
13 Ino shi mwanā kitobo’wa wafwilwa mulume nansha kulubulwa ne kadipo na lutundu, wajokela ku njibo ya shandi enka na pa busongwakaji bwandi, ubwanya kudya ku byakudya bya shandi,+ inoko muntu kapelwepo lupusa* kabwanyapo kudya’ko.
14 “‘Shi muntu wetupe wadi kintu kijila, ufwaninwe kupa kitobo kyamulambu kijila wabweja’ko ne kipindi kimo kya pa bipindi bitano kya bulēme bwakyo.+
15 Nabya kebakakobakanyapo bintu bijila bya bene Isalela byobalambula kudi Yehova+
16 ne kulengeja bapebwe mfuto mwanda wa mambo abo a kudya bintu byabo bijila; mwanda amiwa ne Yehova, mwine wibapandula.’”
17 Yehova wesamba monka na Mosesa amba:
18 “Wisambe na Alone ne bandi bana ne bene Isalela bonso wibalombole amba, ‘Shi mwine Isalela nansha mweni ushikatanga mu Isalela waleta kyamulambu kisōkwe+ kudi Yehova mwanda wa kufikidija mpiko yandi nansha kuleta kyamulambu kya kwilanga,+
19 ufwaninwe kuleta nyema mulume wampikwa bulema+ wa mu luombe, mikōko milume myana, nansha bambuji pa kusaka’mba amone kwitabijibwa.
20 Kemufwaninwepo kuleta kintu kidi na kabulema,+ mwanda kekikemukwashapo mumone kwitabijibwa.
21 “‘Shi muntu waleta kitapwa kya kipwano+ kudi Yehova mwanda wa kufikidija mpiko nansha bu kyamulambu kya kwilanga, kifwaninwe kwikala kya nyema wampikwa bulema mu bañombe nansha mu mikōko, pa kusaka’mba amone kwitabijibwa. Nyema’wa kafwaninwepo kwikala na kabulema nansha kamo.
22 Kyamulambu kekifwaninwepo kwikala kisabike meso, kityumuke mukupa, kya kilonda, kya kipusu, kya kitāto nansha kya kikwese; kemufwaninwepo kuleta nansha kimo pa bino’bi kudi Yehova nansha kulambula kyamulambu kidi namino pa kisōkelo kudi Yehova.
23 Mubwanya kuleta ñombe nansha mukōko udi na kidyoma kilampe bininge nansha kīpi bininge bu kyamulambu kya kwilanga, ino kekiketabijibwapo bu kyamulambu kya mpiko.
24 Kemufwaninwepo kuleta kudi Yehova nyema wa miningi myoneke nansha misonsakane nansha mutungule, kadi kemufwaninwepo kulambula banyema badi namino mu yenu ntanda.
25 Kadi kemufwaninwepo kuleta nansha kimo pa bino’bi kya ku kuboko kwa mweni bu byakudya bya Leza wenu, mwanda i byoneke kadi bidi na kabulema. Kebikemwitabijibwapo na Leza.’”
26 Yehova wesamba monka na Mosesa amba:
27 “Shi ñombe nansha mukōko nansha mbuji wabutulwa, ukekala na inandi mafuku asamba-abidi,+ ino kushilwila mu difuku dya mwānda uketabijibwa na Leza bu kyamulambu, kyamulambu kyelwe na mudilo kudi Yehova.
28 Ekale ñombe nansha mukōko, kemufwaninwepo kwiutapa difuku dimo ne kandi kana.+
29 “Shi kemwela kitapwa kya kufwija’ko kudi Yehova,+ mufwaninwe kwikyela mwanda wa mumone kwitabijibwa.
30 Kifwaninwe kudibwa’nka mu difuku’dya. Kemufwaninwepo kushiya’ko bimo kufika ne lubanga.+ Amiwa ne Yehova.
31 “Mufwaninwe kulama mbila yami ne kulonda’yo.+ Amiwa ne Yehova.
32 Kemufwaninwepo kukobakanya dijina dyami dijila,+ kadi mfwaninwe kupandulwa mu bukata mwa bene Isalela.+ Amiwa ne Yehova, mwine wimupandula,+
33 mwine wemulupwile mu ntanda ya Edipito mwanda wa kwilombola bu Leza komudi.+ Amiwa ne Yehova.”
Kunshi kwa Dyani
^ Kishima pa kishima i, “bafwaninwe kwisansanya na.”
^ Nansha’mba “muya.”
^ Nansha’mba “ukepaibwa.”
^ Nansha’mba “muya.”
^ Kishima pa kishima i, “Mweni,” ko kunena’mba, muntu ke wa mu kisakapo kya Alone.
^ Nansha’mba “muya.”
^ Nansha’mba “wasongwe na mweni.”
^ Kishima pa kishima i, “mweni,” ko kunena’mba, muntu ke wa mu kisakapo kya Alone.
