Bene Levi 2:1-16
-
Kyamulambu kya miseke (1-16)
2 “‘Shi muntu* kaleta kyamulambu kya miseke+ kudi Yehova, kyamulambu kyandi kifwaninwe kwikala kya bukula bupēla, kadi ukatūta’ko māni ne kwela’ko ensense itōka.+
2 Kupwa ukaselela’kyo kudi bana ba Alone, babitobo, penepa kitobo ukayata mukono umo wa bukula bupēla ne māni ne ensense itōka yakyo yonso, ukasōka’kyo bu kyamulambu kya kyeya*+ pa kisōkelo, kyamulambu kyelwe na mudilo kya luvumba luyampe* kudi Yehova.
3 Kyokya kyonso kishala ku kyamulambu kya miseke, i kya Alone ne bandi bana+ bu kintu kijila nakampata+ ku byamulambu bya Yehova byelwe na mudilo.
4 “‘Shi koleta kyamulambu kya miseke kyasōkelwe mu fūlu wa mikate, kifwaninwe kwikala kya bukula bupēla, mikate yampikwa kiyujo idi bwa ntonto myele’ko māni nansha tumikate tupapakane twampikwa kiyujo tutūte’ko māni.+
5 “‘Shi kyamulambu kyobe i kyamulambu kya miseke ya mu kininga,+ nankyo kifwaninwe kwikala kya bukula bupēla, bwampikwa kiyujo bwele’ko māni.
6 Kifwaninwe kutyumunwa bibesebibese, kadi ukatūta’ko māni.+ I kyamulambu kya miseke.
7 “‘Shi kyamulambu kyobe i kyamulambu kya miseke mikange mu mpanu, kifwaninwe kulongwa na bukula bupēla ne māni.
8 Ukaselela kyamulambu kya miseke kilongwe na bino’bi kudi Yehova, kadi kikaletwa kudi kitobo, mwine ukekiselela kubwipi na kisōkelo.
9 Kitobo ukayata’ko kyamulambu kya miseke bu kyamulambu kya kyeya,*+ ne kwikisōka pa kisōkelo bu kyamulambu kyelwe na mudilo kya luvumba luyampe* kudi Yehova.+
10 Kyokya kishala ku kyamulambu kya miseke, i kya Alone ne bandi bana bu kintu kijila nakampata kya byamulambu bya Yehova byelwe na mudilo.+
11 “‘Kyamulambu kya miseke kyoleta kudi Yehova kekifwaninwepo kwelwa kiyujo,+ mwanda kufwaninwepo kusōka mukama usosoma nansha būki bu kyamulambu kyelwe na mudilo kudi Yehova.
12 “‘Ukebileta kudi Yehova bu kyamulambu kya byangulwa bibajinji,+ ino kebifwaninwepo kuselelwa ku kisōkelo bu luvumba luyampe.*
13 “‘Kyamulambu kyonso kya miseke kyokalambula kikelwa’ko mwepo; kufwaninwepo kuleka kwela mwepo wa kipwano kya Leza obe ku kyamulambu kyobe kya miseke. Pamo ne kyamulambu kyobe kyonso, ukaleta ne mwepo.+
14 “‘Shi koleta kudi Yehova kyamulambu kya miseke kya byangulwa bibajinji byele, ukaleta miseke* mipya myoshe pa mudilo, mishupule, bu kyamulambu kya miseke kya byangulwa byobe bibajinji byele.+
15 Ukatūta’ko māni ne kwela’ko ensense itōka. I kyamulambu kya miseke.
16 Kitobo ukekisōka bu kyamulambu kya kyeya,*+ ko kunena’mba, miseke imo mishupule ne māni pamo ne ensense yakyo itōka yonso, bu kyamulambu kyelwe na mudilo kudi Yehova.
Kunshi kwa Dyani
^ Nansha’mba “muya.”
^ Nansha’mba “bu kipindi kya kivulukilo (kyelekejo) kyakyo.”
^ Nansha’mba “lutūkija mutyima; lusenga.” Kishima pa kishima i, “lutūkija.”
^ Nansha’mba “lutūkija mutyima; lusenga.” Kishima pa kishima i, “lutūkija.”
^ Nansha’mba “bu kipindi kya kivulukilo (kyelekejo) kyakyo.”
^ Nansha’mba “lutūkija mutyima; lusenga.” Kishima pa kishima i, “lutūkija.”
^ Nansha’mba “ukaleta bisansa bibishi.”
^ Nansha’mba “bu kipindi kya kivulukilo (kyelekejo) kyakyo.”
