Bene Levi 26:1-46
26 “‘Kemufwaninwepo kwilongela baleza ba bitupu,+ kadi kemufwaninwepo kwilongela nkishi musōnge+ nansha bikomo bikola, kemufwaninwepo kutūla nkishi wa dibwe+ mu yenu ntanda mwanda wa kumufukatyila;+ mwanda amiwa ne Yehova Leza wenu.
2 Mukalama masabato ami ne kulēmeka bininge* kipandulwe kyami. Amiwa ne Yehova.
3 “‘Shi mulonde nyeke bitungo byami ne kulama mbila yami ne kwiilonda,+
4 nkemupa mvula pa kitatyi kifwaninwe,+ ntanda ikalupula byangulwa byayo,+ kadi mityi ya mu ntanda ikaleta bipa byayo.
5 Kitatyi kyenu kya kupūla kikendelela kufika ne ku mwangulo wenu wa mañanza, kadi mwangulo wa mañanza nao ukendelela kufika ne ku kitatyi kya kukuna; mukadya byakudya mwaikuta kadi mukekala na mutyima-ntenke mu ntanda yenu.+
6 Nkatūla ndoe mu ntanda’ya,+ mukalāla kwampikwa muntu wimulengeja moyo;+ nkatalula mu ntanda’ya banyema ba ntanda ba budyani, kadi kipete kya divita kekikapitepo mu yenu ntanda.
7 Mukapanga lubilo balwana nenu, nabo bakapona ku kipete ku meso enu.
8 Bantu batano mu bukata mwenu bakapanga lubilo bantu 100, kadi bantu 100 mu bukata mwenu bakapanga lubilo bantu 10 000, balwana nenu bakapona ku kipete ku meso enu.+
9 “‘Nkemutōkelwa mutyima,* nkemupa lubutulo ne kwimuvudija,+ kadi nkalama kipwano kyami nenu.+
10 Pomukekala mukidya byangulwa bikulu bya ku mwaka, bikemulomba kupwa bikulu mwa kushila’ko kyaba kya bipya.
11 Nkatūla kipema kyami mu bukata mwenu,+ kadi amiwa* nkikemwelapo.
12 Nkananga mu bukata mwenu ne kwikala Leza wenu,+ kadi banwe nenu mukekalanga bantu bami.+
13 Amiwa ne Yehova Leza wenu, mwine wemutambije mu ntanda ya Edipito amba muleke kwikala bapika babo, kadi natyumwine mikabo ya lupungu lwenu ne kwimwendeja mitwe myoloke swā.*
14 “‘Inoko, shi kemukangivwenepo nansha kulama ino mbila yonso’i,+
15 kadi shi mupele bitungo byami,+ ne shi banwe* mushikididilwe mutyibilo wami wa mambo kemuleka kulama mbila yami yonso, ne kujilula kipwano kyami,+
16 nankyo nami nkemulonga bino bintu bino’bi: nkemupa mfuto na tusua, na kikofolo kya mushinga ne kukabwa ngitu bininge, nkalengeja meso enu aleke kumona biyampe ne kushinikija būmi* bwenu. Mukakuna nkunwa yenu bya bitupu, mwanda balwana nenu bakadya’yo.+
17 Nkemupela, kadi balwana nenu bakemunekenya;+ boba bemushikilwe bakemutyampa,+ kadi mukanyema kwampikwa muntu wimupanga lubilo.+
18 “‘Shi kadi nansha nankyo kemungivwenepo, nabya nkemupa mfuto misunsa isamba-ibidi pa mwanda wa bubi bwenu.
19 Nkatyumuna mitatulo yenu mikomo ne kwalamuna madiulu enu keadi pamo bwa kyuma+ ne ntanda yenu pamo bwa mukuba.*
20 Mukapwa bukomo bwenu bitupu, mwanda ntanda yenu keikalupulapo byangulwa,+ kadi mityi ya mu ntanda nayo keikapepo bipa.
21 “‘Ino shi mwendelele kungalamukila ne kupela kungivwana, nabya nami nkemukupila bininge misunsa isamba-ibidi mwendele bubi bwenu.
22 Nkatumanga banyema ba ntanda umbukata mwenu,+ bakemwipaila benu bana+ ne kutukija banyema benu ba nja ne kutyepeja bungi bwenu, kadi mashinda enu akekala pululu.+
23 “‘Nansha shi na bino bintu’bi kemwitabijepo byonemolola+ ino musaka’nka kungalamukila,
24 nabya nami nkemwalamukilanga, kadi ami mwine nkemukupila misunsa isamba-ibidi pa mwanda wa bubi bwenu.
25 Nkemuletela kipete kya kinongo pa mwanda wa kipwano kyomwatyiba.+ Pomukebungila mu bibundi byenu, nkatuma misongo umbukata mwenu,+ kadi mukapānwa mu kuboko kwa walwana.+
26 Ponkonakanya kibīko* kyenu kya byakudya,+ bana-bakaji dikumi bakasōka mikate mu fūlu umo kete, ebiya kebabanya mikate yenu pa kipimo,+ kadi mukadya ino kwikuta mpika.+
27 “‘Nansha shi na bino’bi mukaleke kungivwana kadi musaka’nka kungalamukila,
28 po pene ponkemwalamukila,+ kadi ami mwine nkemupa mfuto misunsa isamba-ibidi pa mwanda wa bubi bwenu.
29 Penepo mukadya mwita wa benu bana bana-balume, kadi mukadya mwita wa benu bana bana-bakaji.+
30 Nkatukija fututu mitenta yenu ikola,+ kadi nkatyumuna bisōkelo byenu bya ensense ne kutentakanya imbidi yenu mifwe pa imbidi mifwe ya bilezaleza byenu bya mukenye,*+ kadi ami* nkemuvundamina bya mukenye.+
31 Nkapāna bibundi byenu ku kipete+ kadi nkasala bipandulwe byenu, nkikalulepo luvumba luyampe* lwa bitapwa byenu.
32 Ami mwine nkasala ntanda yenu,+ kadi balwana nenu bakekala’mo bakeitala byakanwa pululu.+
33 Kadi nkemupalakanya umbukata mwa mizo,+ nkemusomwena kipete;+ ntanda yenu ikasalwa,+ bibundi byenu nabyo bikonakanibwa fututu.
34 “‘Mu kine kitatyi’kya ntanda ikafuta masabato ayo mu mafuku onso oilele mu masala, papo banwe mwikele mu ntanda ya balwana nenu. Mu kine kitatyi’kya ntanda ikakōkolokwa,* ikatūja masabato ayo.+
35 Mafuku onso oilele mu masala ikakōkolokwa, mwanda keyadipo ikōkolokwa mu masabato enu pomwadi mwikele’mo.
36 “‘Ino boba bakapanda’ko,+ nkayuja mityima yabo na kutyumukwa mutyima mu ntanda ya balwana nabo; lunwa lwa dyani dijina na luvula lukebanyemeja, kadi bakanyema lubilo pamo bwa muntu unyema kipete wapona pampikwa ne umupanga mwine.+
37 Bakakukala abo bene na bene pamo bwa boba banyema kipete, kwampikwa ne wibapanga mwine. Kemukabwanyapo kukomena balwana nenu.+
38 Mukafwanga umbukata mwa mizo,+ kadi ntanda ya balwana nenu ikemukubija.
39 Boba bakashala momudi’mo, bakashala kubolela mu matanda a balwana+ nenu pa mwanda wa kilubo kyenu. Bine, bakabolanga pa mwanda wa bilubo bya bashabo.+
40 Penepo bakesapula kilubo kyabo pamo ne kilubo+ ne kubulwa kikōkeji kwa bashabo, kadi baketabija’mba badi beendeja pampikwa kikōkeji pa kungalamukila.+
41 Penepo ami nami nebalamukila+ nebatwala mu ntanda ya balwana nabo.+
“‘Padi e paketyepeja mutyima wabo wa kubulwa kutwela kwisao,*+ nabya bakafutyila kilubo kyabo.
42 Kadi nkavuluka kipwano kyami na Yakoba,+ ne kipwano kyami na Izake,+ nkavuluka kipwano kyami na Abalahama,+ kadi nkavuluka ntanda’ya.
43 Pobadi bashile ntanda’ya, yadi itūja masabato+ ayo ne kulāla mu masala kwampikwa abo, kadi bafutyile mwanda wa kilubo kyabo, ke-pantu bapelele mutyibilo wami wa mambo kadi abo* bashikididilwe bitungo byami.+
44 Ino nansha bino byonso’bi, pobadi mu ntanda ya balwana nabo, nkikebalekelelapo+ lonso nansha dimo nansha kwibafundula kufika ne ku kwibakubija, kwine kukajilula kipwano+ kyami nabo, mwanda amiwa ne Yehova Leza wabo.
45 Pa mwanda wa abo, nkavulukanga kipwano na bankambo+ wabo bonatambije mu ntanda ya Edipito ku meso a mizo,+ mwanda wa kwilombola bu Leza wabo. Amiwa ne Yehova.
46 Mine ino’i yo misoñanya ne mutyibilo wa mambo ne bijila byatūdile Yehova pa bukata bwandi ne bene Isalela ku Lūlu lwa Shinai kupityila kudi Mosesa.+
Kunshi kwa Dyani
^ Nansha’mba “kwimana na kalēmo.” Kishima pa kishima i, “kwakamwa.”
^ Kishima pa kishima i, “nkalamukila komudi.”
^ Nansha’mba “mūya wami.”
^ Kishima pa kishima i, “mwenda molokele.”
^ Nansha’mba “myuya yenu.”
^ Nansha’mba “muya.”
^ Ko kunena’mba, ntanda ikōma mwanda wa kubulwa mvula.
^ Kishima pa kishima i, “mukombo.” Pakwabo kifunkila pa mikombo yadi ingidijibwa pa kubīka mikate.
^ Kishima kya Kihebelu kibwanya kukwatañana na kishima “tuvwi” kadi i kingidijibwe mu muneneno wa kafutululo.
^ Nansha’mba “muya wami.”
^ Nansha’mba “lutūkija mutyima; lusenga.” Kishima pa kishima i, “lutūkija.”
^ Nansha’mba “ikalama sabato.”
^ Nansha’mba “mūmu.”
^ Nansha’mba “myuya yabo.”
