Bene Levi 27:1-34
27 Yehova wesamba monka na Mosesa amba:
2 “Wisambe na bene Isalela wibalombole amba, ‘Shi muntu wapika mpiko ya pa bula+ ya kulambula bulēme butungilwe muntu* kudi Yehova,
3 bulēme butungilwe mwana-mulume wa myaka 20 kutūla ne ku 60 bukekala mashekele* 50 a ndalama mungya shekele ya ku kifuko kijila.*
4 Ino shi i mwana-mukaji, bulēme butungilwe bukekala mashekele 30.
5 Shi i wa myaka 5 kutūla ku 20, bulēme butungilwe mwana-mulume bukekala mashekele 20, mwana-mukaji nandi mashekele 10.
6 Shi i wa mweji umo kutūla ku myaka itano, bulēme butungilwe mwana-mulume bukekala mashekele atano a ndalama, mwana-mukaji nandi mashekele asatu.
7 “‘Shi i wa myaka 60 ne kupita, bulēme butungilwe mwana-mulume bukekala mashekele 15, mwana-mukaji nandi mashekele 10.
8 Ino shi i mulanda bininge kabwanyapo kufuta bulēme butungilwe,+ muntu’wa ukemana ku meso a kitobo, kitobo nandi ukamutungila bulēme bwandi. Kitobo ukatunga mwendele bibwanya kusokola yewa upikile mpiko.+
9 “‘Shi mpiko mine i ya nyema mufwaninwe kulambulwa kudi Yehova, kyokya kyonso kikaletwa kudi Yehova kikekala kintu kijila.
10 Kabwanyapo kumupingakanya nansha kumushinta, muyampe na mubi nansha mubi na muyampe. Ino shi usaka kushinta nyema umo na nyema mukwabo, yewa umbajinji ne mwine ushintwa nandi bakekala bonso babidi bajila.
11 Shi i nyema wa disubi+ kabwanyapo kuletwa bu kyamulambu kudi Yehova, nabya ukemika nyema’wa ku meso a kitobo.
12 Penepo kitobo ukatunga bulēme bwandi, shi muyampe nansha mubi. Bulēme butungilwe na kitobo’bwa bo bonka.
13 Ino shi aye usaka kukūla’ye, nankyo ufwaninwe kubweja kipindi kimo kya pa bipindi bitano pa bulēme butungilwe.+
14 “‘Ino shi muntu usaka kupandula njibo yandi bu kintu kijila kudi Yehova, nabya kitobo ukatunga bulēme bwayo, ikale miyampe nansha mibi. Mungya bulēme bukatunga kitobo, lo lukekala lupoto lwayo.+
15 Ino shi yewa upandwile njibo yandi kasake kwiikūla, nabya ufwaninwe kuleta lupeto lwa bulēme butungilwe wabweja’ko ne kipindi kimo kya pa bipindi bitano byalo, ebiya nayo ikekala ke yandi.
16 “‘Shi muntu wapandula kudi Yehova kipindi kya budimi bwadi nabo, bulēme bukatungwa kukwatañana na nkunwa ya kukuna’mo: homa* umo wa mebele a buluba ukekala mashekele 50 a ndalama.
17 Shi wapandula budimi bwandi mu Mwaka wa Bwanapabo,+ bulēme butungilwe’bwa bo bonka.
18 Shi wapandula budimi bwandi Mwaka wa Bwanapabo ke mupwe, kitobo ukamupikwila lupoto kukwatañana na myaka ishele’ko pa kufika ku Mwaka wa Bwanapabo mukwabo, kadi bulēme butungilwe bukatyepejibwa’ko.+
19 Ino shi yewa wapandwile budimi usaka kwibukūla, nabya ufwaninwe kuleta lupeto lwa bulēme butungilwe wabweja’ko ne kipindi kimo kya pa bipindi bitano kyalo, ebiya nabo bukashala ke bwandi.
20 Ino shi kakūdilepo budimi ne budimi’bwa ke bupotolojibwe ku muntu mukwabo, kebubwanyapo kukūlwa kadi monka.
21 Shi budimi’bwa bubalubulwa mu Mwaka wa Bwanapabo, bukekala ke kintu kijila kudi Yehova, bu budimi bupēnwe kwadi. Bukekala ke ntanda ya babitobo.+
22 “‘Shi muntu wapandula kudi Yehova budimi bwapotele ino ke ntandapo yandi ya bupyani,+
23 kitobo ukamupikwila bungi bwa lupeto kufika ne ku Mwaka wa Bwanapabo, kadi ukamupa bulēme butungilwe mu dine difuku’dya.+ I kintu kijila kudi Yehova.
24 Mu Mwaka wa Bwanapabo, budimi bukajokela kudi yewa wamupotolweje’bo, kudi mwinē ntanda’ya.+
25 “‘Bulēme bonso bukatungwa mwendele shekele ya ku kifuko kijila. Shekele imo ikekala mangela* 20.
26 “‘Inoko, kekwakekala nansha umo upandula kilala-ndá kya mu banyema, mwanda i kibutulwe bu kilala-ndá kya Yehova.+ Ekale ñombe nansha mukōko, i wa Yehova kala.+
27 Shi i kya mu banyema ba disubi ne wikikūla mungya bulēme butungilwe, ukabweja’ko ne kipindi kimo kya pa bipindi bitano.+ Ino shi kekikūdilwepo, kikapotolojibwa mungya bulēme butungilwe.
28 “‘Ino kekukekalapo kintu nansha kimo kitūdīlwe mingilo ikola kipāna muntu na mutyima tō* kudi Yehova kya mu bintu byandi kikapotolojibwa nansha kukūlwa, ekale mu bantu nansha mu banyema nansha ku budimi bwadi nabo. Kintu kyonso kitūdīlwe mingilo ikola i kintu kijila nakampata kudi Yehova.+
29 Ne kadi, i kutupu muntu muponejibwe* nansha umo utūdilwe konakanibwa ubwanya kukūlwa.+ Binebine ukafikijibwa ku lufu.+
30 “‘Kipindi kyonso kya pa bipindi dikumi*+ bya mu ntanda’ya, bikale byangulwa bya budimi nansha bipa bya mityi, i bya Yehova. I kintu kijila kudi Yehova.
31 Shi muntu kasake kukūla kyandi kintu kyo-kyonso kya pa bipindi dikumi, ukabweja’ko kipindi kimo kya pa bipindi bitano.
32 Kadi nyema ense wa mu banyema dikumi ba mu bañombe ne mikōko, kintu kyonso kipita munshi mwa mukombo wa mukumbi, nyema* wa dikumi ukekala ke kintu kijila kudi Yehova.
33 Kafwaninwepo kumubandaula shi i muyampe’ni shi i mubi, nansha kumushinta kwine. Ino shi kasake kumushinta, ne umbajinji ne washinta nandi mwine bakekala ke kintu kijila.+ Kekibwanyapo kukūlwa.’”
34 Ino’i yo mbila yobapele Mosesa kudi Yehova ku Lūlu lwa Shinai pa mwanda wa bene Isalela.+
Kunshi kwa Dyani
^ Nansha’mba “muya.”
^ Shekele imo i mangalame 11,4. Tala Mbwejo B14.
^ Nansha’mba “na shekele ijila.”
^ Homa umo i malitele 220 (makwatyi 200 a byūmu). Tala Mbwejo B14.
^ Ngela imo i mangalame 0,57. Tala Mbwejo B14.
^ Nansha’mba “kitūdilwe konakanibwa.”
^ Nansha’mba “mupānwe.”
^ Nansha’mba “Kya dikumi kyonso.”
^ Nansha’mba “mutwe.”
