စံးထီၣ်ပတြၢၤ ၈၈:၁-၁၈
လၢတၢ်သူၣ်ဝံၣ်သးဆၢအခိၣ်အဂီၢ်. ပှၤကဘၣ်သးဝံၣ်န့ၢ်လိာ်သး ယၢ်ခီယၢ်ခီ ဒ်မဟါလၤ* အသီၣ်အိၣ်ဝဲအသိး. ပှၤအ့စရၤဃးဖိ စီၤဟ့မၣ်+ အမၣ်စခ့.* စီၤကိၤရးအဖိခွါ အထါသးဝံၣ်.+
၈၈ အိ ယတၢ်အုၣ်က့ၤခီၣ်က့ၤကစၢ် ယဟိဝၤယွၤဧၢ,+လၢမုၢ်ဆါခီန့ၣ် ယကိးပသူထီၣ်လၢနအိၣ်ဒီးလၢမုၢ်နၤခီန့ၣ် ယကိးပသူထီၣ်စ့ၢ်ကီးလၢ နမဲာ်ညါလီၤ.+
၂ မ်ယတၢ်ထုကဖၣ် ဟူထီၣ်တုၤလၢနအိၣ်+ဒီးဒိးနနၢ်လၢ* ယတၢ်ကိးပသူထီၣ်လၢ တၢ်မၤစၢၤအဂီၢ်တက့ၢ်.+
၃ ယတၢ်အိၣ်မူပှဲၤဒီး တၢ်ကီတၢ်ခဲ+ဒီးယသးသမူ အိၣ်လၢတၢ်သွၣ်ခိၣ်* အခိၣ်ထိးလီၤ.+
၄ ယဘၣ်တၢ်ဂံၢ်ဃုာ်ယၤဒီး ပှၤတဖၣ်လၢအလဲၤလီၤလၢ တၢ်ပူၤ* န့ၣ်အကျါလံ.+
ဒီးယကဲထီၣ် ပှၤလၢ အမၤတၢ်တဘၣ် နီတမံၤလၢၤဘၣ်.+
၅ နပာ်တ့ၢ်ယၤလၢ ပှၤသံတဖၣ်အကျါလီၤ.
ယလီၤဂာ် ဒ်သိးဒီး ပှၤသံလၢ အမံနီၤလၢ တၢ်သွၣ်ခိၣ်အပူၤလၢနတသ့ၣ်နီၣ်ထီၣ်အီၤလၢၤဘၣ်ဒီးလၢအတအိၣ်လၢ နတၢ်အံးထွဲကွၢ်ထွဲ အဖီလာ်လၢၤဘၣ်.
၆ နပာ်လီၤယၤလၢ တၢ်ပူၤယိာ်ဖးဒိၣ် အခံဒးဒီးလၢတၢ်ခံးကျါလီၤ.
၇ နတၢ်သးဒိၣ်လၢ အအိၣ်လၢယလိၤန့ၣ် ဃၢဒိၣ်မး.+
ဒီးခီဖျိလၢ နလပီတဖၣ်လၢ အဟဲဘၣ်ထံးယၤအဃိ ယဘူးကလီၤဘျၢလံ. (စ့လၤ)
၈ နနီထီၣ်ကွံာ် ယတံၤသကိးတဖၣ် ဖးယံၤဒီးယၤ,+နဒုးကဲထီၣ်ယၤလၢ တၢ်လၢအလီၤသးဘၣ်အၢလၢ အဝဲသ့ၣ်အဂီၢ်ဒီးယကတာ်လံ ဒီးယပူၤဖျဲးထီၣ်တသ့ဘၣ်.
၉ ခီဖျိလၢ ယဘၣ်နးဘၣ်ဖှီၣ်အဃိ ယမဲာ်ချံ ကဒုလီၤလံ.+
အိ ယဟိဝၤယွၤဧၢ, ယကိးထီၣ်နၤ ဒီတနံၤကျၢၤ+ဒီးယဃ့ထုကဖၣ်လၢ နအိၣ်လီၤ.
၁၀ ပှၤလၢအသံန့ၣ် ထံၣ်ဘၣ် နတၢ်လီၤလိၢ်လီၤလး ကသ့ဧါ.
ဒီးပှၤလၢအသံန့ၣ် ဆၢထၢၣ် စံးထီၣ်ပတြၢၤနၤ ကသ့ဧါ.+ (စ့လၤ)
၁၁ နတၢ်အဲၣ်လၢအတီန့ၣ် မ့ၢ်ပှၤကတဲဖျါထီၣ်အီၤလၢ တၢ်သွၣ်ခိၣ်အပူၤဧါ.
ဒီးနတၢ်သးတီန့ၣ် မ့ၢ်ပှၤကတဲဖျါထီၣ်အီၤလၢ တၢ်ဟးဂီၤအလီၢ်န့ၣ်ဧါ.
၁၂ လၢတၢ်ခံးသူအပူၤန့ၣ် ပှၤသ့ၣ်ညါ နတၢ်လီၤလိၢ်လီၤလးတဖၣ် ကသ့ဧါ.+
ဒီးလၢပှၤလၢ အဘၣ်တၢ်သးပ့ၤနီၣ်ကွံာ်အီၤတဖၣ် အကီၢ်ပူၤန့ၣ် ပှၤသ့ၣ်ညါ နတၢ်တီတၢ်လိၤကသ့ဧါ.
၁၃ အိ ယဟိဝၤယွၤဧၢ, ယကိးပသူထီၣ်ဒံးလၢနအိၣ် လၢတၢ်မၤစၢၤအဂီၢ်+ဒီးကိးဂီၤဒဲးန့ၣ် ယတၢ်ထုကဖၣ် ဟူထီၣ်တုၤလၢနအိၣ်လီၤ.+
၁၄ အိ ယဟိဝၤယွၤဧၢ, ဘၣ်မနုၤအဃိ နပာ်တ့ၢ်ကွံာ်ယၤလဲၣ်.+
ဘၣ်မနုၤအဃိနဃၣ်ကွံာ်နမဲာ်လၢ ယအိၣ်လဲၣ်.+
၁၅ ယဘၣ်နးဘၣ်ဖှီၣ် စးထီၣ်လၢ ယသးစၢ်တုၤခဲအံၤအဃိ ယဘူးကသံ တဘျုးဘျီညါ.+
ခီဖျိလၢ နပျဲတူၢ်ယၤ တၢ်ကီတၢ်ခဲလၢ အနးဒိၣ်မးအဃိ ယလီၤဘှံးလီၤတီၤလၢာ်လံ.
၁၆ နတၢ်သးဒိၣ်လၢ အကဲၤထီၣ်န့ၣ် ယတူၢ်တကဲလၢၤဘၣ်.+
တၢ်လၢနမၤန့ၣ် အမၤပျံၤယၤတုၤလၢ ယဘူးကသံညါ.
၁၇ တၢ်လီၤပျံၤလီၤဖုးတဖၣ်အံၤန့ၣ် အိၣ်ဝးတရံးယၤ ဒ်ထံလုၢ်ဘၢတၢ်အသိး ဒီတနံၤညါဒီးကဝီၤဃာ်ယၤ ကိးကပၤဒဲးလီၤ.*
၁၈ နနီထီၣ်ကွံာ် ယသကိး ဒီးပှၤလၢယအဲၣ်တဖၣ် ဖးယံၤဒီးယၤ+ဒီးတၢ်ခံးသူ ကဲထီၣ်က့ၤဝဲ ယသကိးလံ.
တၢ်ဂ့ၢ်အဘျဲၣ်တဖၣ်
^ ကွၢ် တၢ်ကတိၤအခီပညီ.
^ ကွၢ် တၢ်ကတိၤအခီပညီ.
^ မ့ၢ်စ့ၢ်ကီး “သကူးလီၤသးလၢ ကဒိကနၣ်.”
^ လၢဧ့ၤဘြံၤကျိာ် မ့ၢ်ဝဲ “ၡံအိ(လ်).” ကွၢ် တၢ်ကတိၤအခီပညီ.
^ မ့ၢ်စ့ၢ်ကီး “တၢ်သွၣ်ခိၣ်.”
^ ဘၣ်သ့ၣ်သ့ၣ် ကမ့ၢ် “တဘျီဃီ.”
