စံးထီၣ်ပတြၢၤ ၆၈:၁-၃၅
-
‘မ်ကစၢ်ယွၤ အဒုၣ်အဒါတဖၣ် လီၤပြံလီၤပြါ’
လၢတၢ်သူၣ်ဝံၣ်သးဆၢအခိၣ်အဂီၢ်. စီၤဒၤဝံးအထါ. တၢ်သးဝံၣ်.
၆၈ မ်ကစၢ်ယွၤ ဂဲၤဆၢထၢၣ်, မ်အဒုၣ်အဒါတဖၣ် လီၤပြံလီၤပြါဒီးမ်ပှၤလၢအသးဟ့အီၤတဖၣ် ဃ့ၢ်ထီၣ်ကွံာ်လၢ အမဲာ်ညါတက့ၢ်.+
၂ ဒ်ကလံၤ ဆီၣ်ဖျိးထီၣ်ကွံာ် မ့ၣ်အူခုၣ် အသိးန့ၣ် မ်နနီဟးထီၣ်ကွံာ် အဝဲသ့ၣ်,ဒီးဒ်ဃိး* ပှံၢ်လီၤဝဲလၢ မ့ၣ်အူအမဲာ်ညါ အသိးန့ၣ်မ်ပှၤအၢပှၤသီ ဟးဂီၤကွံာ်လၢ ကစၢ်ယွၤ အမဲာ်ညါတက့ၢ်.+
၃ မ့မ့ၢ် ပှၤတီပှၤလိၤန့ၣ် မ်အသူၣ်ခုသးခု,+မ်အဝဲသ့ၣ် သူၣ်ဖှံသးညီလၢ ကစၢ်ယွၤ အမဲာ်ညါဒီးမ်အဝဲသ့ၣ်သးခု ဒိၣ်ဒိၣ်မုၢ်မုၢ်တက့ၢ်.
၄ သးဝံၣ်ထီၣ် ကစၢ်ယွၤ, သးဝံၣ်စံးထီၣ်ပတြၢၤ အမံၤတက့ၢ်.+
သးဝံၣ်ထီၣ်တၢ်လၢ ပှၤလၢအလဲၤ ခီဂာ်တၢ်* လၢပှၢ်မုၢ်ကနၢ တဂၤအအိၣ်န့ၣ်တက့ၢ်.
အမံၤမ့ၢ် ယဟိဝၤလီၤ.+ သူၣ်ဖှံသးညီလၢ အမဲာ်ညါတက့ၢ်.
၅ ကစၢ်ယွၤလၢ အအိၣ်လၢ အတၢ်အိၣ်တၢ်ဆိးအလီၢ်စီဆှံန့ၣ်+မ့ၢ်ဝဲ ပှၤဖိၣ်ဃဲဖိအပၢ် ဒီးပှၤလၢ အဒီသဒၢ မုၣ်ကမဲတဖၣ်လီၤ.+
၆ ပှၤလၢအအိၣ်သယုၢ်ထဲတဂၤဧိၤန့ၣ် ကစၢ်ယွၤကဟ့ၣ်လီၤအီၤ ဟံၣ်လၢအကအိၣ်ဝဲအဂီၢ်လီၤ.+
ကစၢ်ယွၤ ကမၤထူၣ်ဖျဲးထီၣ် ပှၤဃိာ်ဖိတဖၣ် ဒီးကဒုးအိၣ်အဝဲသ့ၣ် ဘီၣ်ဘီၣ်ညီညီလီၤ.+
မ့မ့ၢ် ပှၤလၢအခိၣ်ကိၤန့ၣ် ကဘၣ်အိၣ်လၢ ကီၢ်လၢအဃ့ထီအပူၤလီၤ.+
၇ အိ ကစၢ်ယွၤဧၢ, ဖဲနဆှၢနပှၤဂီၢ်မုၢ်+ဒီးဖဲနလဲၤခီဂာ် မဲးမုၢ်ပျီအခါ, (စ့လၤ)
၈ ခီဖျိလၢနၤအဃိ ဟီၣ်ခိၣ်ဟူးဝးဝဲ+ဒီးမူခိၣ်စူၤလီၤဝဲလီၤ.
ဒီးခီဖျိလၢနၤ, အံၣ်စရ့လး အကစၢ်ယွၤအဃိ ကစၢၢ်စံၤနါအံၤ ဟူးဝးဝဲလီၤ.+
၉ အိ ကစၢ်ယွၤဧၢ, နဒုးစူၤလီၤမူခိၣ်ထံ အါအါဂီၢ်ဂီၢ်,နပှၤဂီၢ်မုၢ်* လၢအလီၤဘှံးလီၤတီၤန့ၣ် နမၤဆူၣ်ထီၣ်က့ၤ အဝဲသ့ၣ် အဂံၢ်အဘါလီၤ.
၁၀ လၢညါန့ၣ် အဝဲသ့ၣ် အိၣ်ဝဲလၢ နဒဲကဝီၤပူၤလီၤ.+
အိ ကစၢ်ယွၤဧၢ, နအိၣ်ဒီး တၢ်ဂ့ၤတၢ်ဝါအဃိ နကတဲာ်ကတီၤန့ၢ်တၢ်လၢ ပှၤဖှီၣ်ဖိယာ်ဖိ အဂီၢ်လီၤ.
၁၁ ယဟိဝၤယွၤ ဟ့ၣ်လီၤတၢ်ကလုၢ်,*ပိာ်မုၣ်လၢ အစံၣ်တဲၤတဲလီၤ တၢ်သးခုကစီၣ်န့ၣ်* မ့ၢ်ဝဲသုးမုၢ်ဖးဒိၣ်တဖုလီၤ.+
၁၂ သုးမုၢ်အစီၤပၤတဖၣ် ဃ့ၢ်ကွံာ်ဝဲ,+ အဝဲသ့ၣ် ဃ့ၢ်ကွံာ်ဝဲ သပှၢ်တၢၢ်လီၤ.
ပိာ်မုၣ်လၢ အအိၣ်တ့ၢ်လၢ ဟံၣ်ပူၤန့ၣ် န့ၢ်ဘၣ်တၢ်လၢ ပှၤဂုာ်န့ၢ်ဝဲ တနီၤလီၤ.+
၁၃ သုပှၤပိာ်ခွါတဖၣ် မံနီၤလၢ ဒဲကဝီၤ အမ့ၣ်အူပူၣ်တဖၣ် အကပိာ်ကပၤ သနာ်က့ဖဲန့ၣ် သုကအိၣ်ဒီး ထိၣ်လွံၢ်လၢ အဒံးဆ့တဖၣ် မ့ၢ်ဝဲစ့ညၣ်ဒီးအဒံး လၢအမ့ၢ် ထူလၢအဂ့ၤလီၤ.
၁၄ ဖဲသ့တၢ်လၢာ်ကစၢ် မၤလီၤပြံလီၤပြါ စီၤပၤတဖၣ်လၢ ကီၢ်ပူၤအခါ+မူခိၣ်ဖီလီၤဝဲလၢ ကစၢၢ်စးလမိၣ်အလိၤလီၤ.*
၁၅ ဘၤၡၣ်အကစၢၢ်န့ၣ်+ မ့ၢ်ကစၢၢ်လၢ ကစၢ်ယွၤတ့လီၤဝဲဒီးဘၤၡၣ်အကစၢၢ်န့ၣ် ထီဝဲဒိၣ်မးလီၤ.
၁၆ ကစၢၢ်လၢ အထီဝဲဒိၣ်မးဧၢ, ဘၣ်မနုၤအဃိ နကွၢ်တၢ်လၢ တၢ်သးက့ၣ်အပူၤဆူကစၢၢ်လၢ ကစၢ်ယွၤဃုထၢဝဲလၢ အတၢ်အိၣ်တၢ်ဆိးအလီၢ်န့ၣ်လဲၣ်.+
မ့ၢ်လံ, ယဟိဝၤယွၤ ကအိၣ်ဝဲဖဲန့ၣ် လီၤထူလီၤယိာ်လီၤ.+
၁၇ ကစၢ်ယွၤ အလ့ၣ်ကဟၣ်သုးတဖၣ် အိၣ်ဝဲ အကထိတဖၣ် အကထိလီၤ.+
ယဟိဝၤယွၤ ဟးထီၣ်လၢ ကစၢၢ်စံၤနါ ဒီးလဲၤနုာ်လီၤလၢ တၢ်စီဆှံအလီၢ်လီၤ.+
၁၈ အိ ယဟိဝၤယွၤဧၢ, နလဲၤထီၣ်လၢ တၢ်လီၢ်ထီၣ်ထီလီၤ.+
နဖီၣ်န့ၢ် ပှၤတနီၤဒီးပှၤပိာ်ခွါတဖၣ်အံၤ ကဲထီၣ်ဝဲ တၢ်ဟ့ၣ်တဖၣ်လီၤ.+
လၢအဝဲသ့ၣ်အကျါန့ၣ် ပၣ်ဃုာ်စ့ၢ်ကီးဒီး ပှၤလၢအခိၣ်ကိၤတနီၤ+ ဒီးနအိၣ်ဘၣ်လၢ အဝဲသ့ၣ် အကျါလီၤ.
၁၉ ကစၢ်ယွၤလၢ အမ့ၢ်အတီ ယဟိဝၤယွၤ လၢအမ့ၢ် ပှၤလၢအယိးန့ၢ် ပတၢ်ဝံတၢ်ယိး ကိးနံၤဒဲး,+ဒီးပတၢ်အုၣ်က့ၤခီၣ်က့ၤကစၢ်န့ၣ် မ်အဘၣ်တၢ်စံးထီၣ်ပတြၢၤအီၤတက့ၢ်. (စ့လၤ)
၂၀ ယွၤလၢအမ့ၢ်အတီတဂၤန့ၣ် မ့ၢ်ကစၢ်ယွၤလၢ အအုၣ်က့ၤခီၣ်က့ၤတၢ် လၢပဂီၢ်လီၤ.+
ဒီးတၢ်ပၢကစၢ် ယဟိဝၤယွၤန့ၣ် မၤပူၤဖျဲးပှၤလၢ တၢ်သံလီၤ.+
၂၁ မ့ၢ်လံ, ကစၢ်ယွၤ ကမၤသဘှံး အဒုၣ်အဒါတဖၣ် အခိၣ်သၣ်ဃံ,ပှၤတဂၤဂ့ၤ တဂၤဂ့ၤလၢ အဆဲးမၤတၢ်ဒဲးဘးန့ၣ် ကစၢ်ယွၤ ကမၤသဘှံး အခိၣ်လီၤ.+
၂၂ ယဟိဝၤယွၤ တဲဝဲဒ်အံၤ, “ယကလဲၤကိးန့ၢ် အဝဲသ့ၣ်လၢ ဘၤၡၣ်ကစၢၢ်ကလိကျါ+ဒီးယကထုးထီၣ်က့ၤ အဝဲသ့ၣ်လၢ ပီၣ်လဲၣ်ယိာ်ပူၤ
၂၃ ဒ်သိး သုကယီၢ်လီၤဘၣ်သုခီၣ်လၢ သုဒုၣ်သုဒါအသွံၣ်အကျါ+ဒီးသုထွံၣ်တဖၣ် ကလ့ၣ်ဘၣ် သုဒုၣ်သုဒါတဖၣ် အသွံၣ်အဂီၢ်လီၤ.”
၂၄ အိ ကစၢ်ယွၤဧၢ, ပှၤထံၣ်ဘၣ် နတၢ်မၤနၢၤအမူးတဖၣ်လီၤ.
ပှၤထံၣ်ဘၣ် ယကစၢ်ယွၤ လၢအမ့ၢ် ယစီၤပၤ အတၢ်မၤနၢၤအမူးတဖၣ် ဖဲအလဲၤနုာ်လီၤလၢ တၢ်စီဆှံအလီၢ်လီၤ.+
၂၅ ပှၤသးဝံၣ်တၢ်ဖိတဖၣ် ဟးဝဲလၢတၢ်မဲာ်ညါ, ပှၤဒ့တၢ်ဖိတဖၣ် ဒ့ဝဲသီတူၢ် လၢတၢ်လီၢ်ခံ+ဒီးပိာ်မုၣ်သးစၢ်တဖၣ် ဟးလၢတၢ်ခၢၣ်သးဒီး ဒိသီၣ်ဝဲတၢ်ခြ့ခြ့လီၤ.+
၂၆ စံးထီၣ်ပတြၢၤ ကစၢ်ယွၤ လၢတၢ်အိၣ်ဖှိၣ်ဖးဒိၣ်အပူၤဒီးပှၤလၢ အမူဝဲခီဖျိ ကစၢ် လၢအမ့ၢ် စီၤအံၣ်စရ့လး အဂံၢ်ခီၣ်ထံးတဂၤ, သုဝဲသ့ၣ်ဧၢ, စံးထီၣ်ပတြၢၤ ယဟိဝၤယွၤတက့ၢ်.+
၂၇ ဘံၣ်ယၤမံၣ်အဒူၣ်+ လၢအမ့ၢ် အဆံးကတၢၢ်တဒူၣ် အိၣ်ဝဲဖဲန့ၣ် ဒီးမၤနၢၤမၤဃၣ်* ပှၤဂီၢ်မုၢ်တဖၣ်လီၤ.
ယူဒၤ အပဒိၣ်ဖးဒိၣ်တဖၣ် အိၣ်ဝဲစ့ၢ်ကီးဒီး အပှၤဂီၢ်မုၢ်လၢ အသီၣ်အသဲဒိၣ်မးဒီးစဘူလိၣ်ဒီး နးသၤလံ အပဒိၣ်ဖးဒိၣ်တဖၣ် အိၣ်ဝဲဖဲန့ၣ် စ့ၢ်ကီးလီၤ.
၂၈ သုကစၢ်ယွၤ မၤလိာ်ဝဲလၢ သုကန့ၢ်ဘၣ် တၢ်ဂံၢ်တၢ်ဘါလီၤ.
အိ ကစၢ်ယွၤလၢ အမၤတ့ၢ်တၢ်လၢပဂီၢ်တဂၤဧၢ, ပာ်ဖျါထီၣ် နတၢ်ဂံၢ်တၢ်ဘါတက့ၢ်.+
၂၉ စီၤပၤတဖၣ် ကဟဲစိာ်န့ၢ်နၤတၢ်ဟ့ၣ်တဖၣ်+ဒ်သိးကမၤလၤကပီၤ နတၢ်လုၢ်ဟံၣ် လၢဝ့ၢ်ယရူၤၡလ့ၣ်န့ၣ်လီၤ.+
၃၀ ဒူဆၣ်ဖိကီၢ်ဖိအမံၤလၢ အအိၣ်လၢ တပိၢ်တဖၣ်အကျါဒီးပှၤတဒူၣ်လၢ အလီၤဂာ်ဒ် ကျီၢ်ဖါဒီးအဖိတဖၣ်+တုၤလၢ ပှၤဂီၢ်မုၢ်တဖၣ် ထိၣ်လီၤပှီၤအသး ဒီးဟဲစိာ် စ့ညၣ်တဖၣ် န့ၣ်တက့ၢ်.
ဘၣ်ဆၣ် ပှၤလၢအဒုးတၢ်မုာ်န့ၣ် အဝဲ မၤလီၤပြံလီၤပြါဝဲလီၤ.
၃၁ ပှၤလၢအအိၣ်လၢ ကီၢ်အဲၤကူပတူးန့ၣ် ကဟဲစိာ် တၢ်ဖိတၢ်လံၤတဖၣ်လၢ ပှၤတ့အီၤလၢတိၢ်ဘီ,+ပှၤလၢအအိၣ်လၢ ကီၢ်ကူၤၡးန့ၣ်* ကကရီ ဟဲဟ့ၣ်ကစၢ်ယွၤ တၢ်ဟ့ၣ်တဖၣ်လီၤ.
၃၂ အိ ဟီၣ်ခိၣ်အဘီမုၢ်သ့ၣ်ဧၢ, သးဝံၣ်ထီၣ် ကစၢ်ယွၤ+ဒီးသးဝံၣ်စံးထီၣ်ပတြၢၤ ယဟိဝၤယွၤတက့ၢ်. (စ့လၤ)
၃၃ သးဝံၣ်စံးထီၣ်ပတြၢၤ ပှၤတဂၤလၢ အဒိးမူခိၣ်လၢ အအိၣ်လၢပျၢၤလံၤလံၤတက့ၢ်.+
ကနၣ်မီၤ, အကလုၢ် သီၣ်ထီၣ်ဝဲဖးဒိၣ် ဒ်လီသီၣ်အသိးလီၤ.
၃၄ အၢၣ်လီၤတူၢ်လိာ်လၢ ကစၢ်ယွၤအိၣ်ဒီး တၢ်ဂံၢ်တၢ်ဘါတက့ၢ်.+
ကစၢ်ယွၤအတၢ်ပၢလၢ အလီၤကဟုကညီၢ် အိၣ်ဝဲလၢ ပှၤအံၣ်စရ့လးဖိအဖီခိၣ်လီၤ.
ဒီးအတၢ်ဂံၢ်တၢ်ဘါ အိၣ်ဖျါထီၣ်လၢ မူခိၣ်လီၤ.
၃၅ ကစၢ်ယွၤလၢ အအိၣ်လၢ အတၢ်လီၢ်စီဆှံလၢ အလီၤကဟုကညီၢ်န့ၣ်+ ပှၤဟီၣ်ခိၣ်ဖိ ကြၢးပျံၤ ဒီးယူးယီၣ်ပာ်ကဲအီၤလီၤ.
အဝဲမ့ၢ် အံၣ်စရ့လး အကစၢ်ယွၤဒီးအဟ့ၣ်လီၤ အပှၤဂီၢ်မုၢ်လၢ တၢ်ဂံၢ်တၢ်ဘါလီၤ.+
စံးထီၣ်ပတြၢၤ ကစၢ်ယွၤတက့ၢ်.
တၢ်ဂ့ၢ်အဘျဲၣ်တဖၣ်
^ ဖျါလၢအဲၣ်ဒိးတဲဝဲ တၢ်အသံးအကာ်လၢအပှံၢ်လီၤညီလၢ ကနဲဒုးအိၣ်ထီၣ်ဝဲ.
^ ဘၣ်သ့ၣ်သ့ၣ် ကမ့ၢ် “ဒိးဝဲတၢ်အၢၣ်တဖၣ်.”
^ အခီပညီလိၤလိၤ “တၢ်န့ၢ်သါ.”
^ မ့ၢ်ဝဲ တၢ်ကလုၢ်လီၤလၢ ပှၤကလဲၤဒုးတၢ်အဂီၢ်.
^ မ့ၢ်ဝဲ တၢ်ကစီၣ် ဘၣ်ဃးဒီးတၢ်မၤနၢၤ.
^ မ့ၢ်စ့ၢ်ကီး “လီၤဂာ်ဒ် မူခိၣ်ဖီလီၤလၢ စးလမိၣ်အလိၤလီၤ.”
^ မ့ၢ်စ့ၢ်ကီး “ပၢဝဲ.”
^ မ့ၢ်စ့ၢ်ကီး “ကီၢ်အဲၤသံအီးပး.”
