တၢ်မၤလိ ၄၄
ဖဲနဖိဒိၣ်ထီၣ်အခါ မ့ၢ်အဝဲသ့ၣ် ကမၤယဟိဝၤယွၤ အတၢ်မၤဧါ
“ယ့ၣ်ၡူးဒိၣ်ထီၣ်လၢတၢ်ကူၣ်သ့, ဒီးလၢအနီၢ်ခိ, ဒီးလၢတၢ်ဘၣ်ယွၤအသး ဒီးပှၤကညီအသးလီၤ”—လူၤကၣ် ၂:၅၂.
တၢ်သးဝံၣ် ၁၃၄ ပဖိမ့ၢ် တၢ်န့ၢ်သါလၢယွၤ
တၢ်မၤလိအံၤ အတၢ်တိာ်ပာ် *
၁. တၢ်ဆၢတဲာ် အဂ့ၤကတၢၢ်လၢ ပှၤမၤအီၤသ့န့ၣ် မ့ၢ်မနုၤလဲၣ်.
ညီနုၢ် တၢ်လၢမိၢ်ပၢ်တဖၣ် ဆၢတဲာ်ဝဲန့ၣ် ကဲဘျုး မ့တမ့ၢ် တကဲဘျုး လၢအဖိတဖၣ် အတၢ်အိၣ်မူအဂီၢ်သ့ဝဲလီၤ. ဘၣ်ဆၣ် အဝဲသ့ၣ် အတၢ်ဃုထၢမ့ၢ်ကမၣ်န့ၣ် မၤဘၣ်ဒိဝဲ အဖိအတၢ်အိၣ်မူသ့ဝဲလီၤ. ဒီးအဝဲသ့ၣ် မ့ၢ်ဃုထၢတၢ်လၢ အပှဲၤဒီး တၢ်ကူၣ်သ့န့ၣ် ကကဲထီၣ်တၢ်မၤစၢၤလၢ အဖိတဖၣ်အတၢ်အိၣ်မူ ကပှဲၤဝဲဒီး တၢ်သးခုအဂီၢ်လီၤ. တကးဒံးဘၣ် ဖိတဖၣ်စ့ၢ်ကီး ကဘၣ်မၤ တၢ်ဆၢတဲာ်လၢ အဘၣ်လီၤ. တၢ်ဆၢတဲာ်အဂ့ၤကတၢၢ် လၢပှၤမၤအီၤသ့န့ၣ် မ့ၢ်ဝဲတၢ်မၤ ယဟိဝၤယွၤ အတၢ်မၤလီၤ.—စံးထီၣ်ပတြၢၤ ၇၃:၂၈.
၂. ယ့ၣ်ၡူးဒီး အမိၢ်အပၢ်န့ၣ် မၤဝဲတၢ်ဆၢတဲာ်လၢ အဂ့ၤဒ်လဲၣ်.
၂ နီၢ်မၤရံဒီး စီၤယိၤသးန့ၣ် အဲၣ်ဒိးဝဲလၢ အဖိတဖၣ် ကမၤယဟိဝၤယွၤ အတၢ်မၤလီၤ. အဝဲသ့ၣ်အတၢ်ဆၢတဲာ်န့ၣ် ပာ်ဖျါထီၣ်ဝဲလၢ တၢ်မၤ ယဟိဝၤယွၤ အတၢ်မၤန့ၣ် မ့ၢ်တၢ်လၢ အရ့ဒိၣ်ကတၢၢ်လၢ အဝဲသ့ၣ်အတၢ်အိၣ်မူ အပူၤလီၤ. (လူၤကၣ် ၂:၄၀, ၄၁, ၅၂) ယ့ၣ်ၡူးစ့ၢ်ကီး ဆၢတဲာ်တၢ်လၢအဘၣ် အဃိ ကဲထီၣ်တၢ်မၤစၢၤလၢ အကမၤလၢပှဲၤထီၣ် ယဟိဝၤယွၤ အတၢ်တိာ်ပာ်လီၤ. (မးသဲ ၄:၁-၁၀) ယ့ၣ်ၡူး မ့ၢ်ပှၤလၢအသးဂ့ၤ, အသးတီ ဒီးအသူၣ်ဒူသးဒူလီၤ. မိၢ်ပၢ်လၢ အအဲၣ်ယဟိဝၤယွၤန့ၣ် အဲၣ်ဒိးဝဲလၢ အဖိတဖၣ် ကလီၤဂာ်ဒ် ယ့ၣ်ၡူးအသိးလီၤ.
၃. လၢတၢ်မၤလိအံၤအပူၤ ပကတဲသကိး တၢ်သံကွၢ် မနုၤလဲၣ်.
၃ လၢတၢ်မၤလိအံၤအပူၤ ပကတဲသကိး တၢ်သံကွၢ်တဖၣ်အံၤလီၤ. ဘၣ်ဃးဒီး ယ့ၣ်ၡူးန့ၣ် ယဟိဝၤယွၤ မၤတၢ်ဆၢတဲာ်ဒ်လဲၣ်. ခရံာ်ဖိမိၢ်ပၢ်တဖၣ် ကွၢ်လိဝဲနီၢ်မၤရံ ဒီးစီၤယိၤသး အတၢ်ဆၢတဲာ် ကသ့ဒ်လဲၣ်. ခရံာ်ဖိသးစၢ်တဖၣ် ကွၢ်လိမၤဒိး ယ့ၣ်ၡူး အတၢ်ဆၢတဲာ် ကသ့ဒ်လဲၣ်.
မၤလိန့ၢ်တၢ်လၢ ယဟိဝၤယွၤအအိၣ်
၄. ဘၣ်ဃးဒီး ယ့ၣ်ၡူးန့ၣ် ယဟိဝၤယွၤ မၤဝဲတၢ်ဆၢတဲာ်လၢ အဂ့ၤကတၢၢ်ဒ်လဲၣ်.
၄ ယဟိဝၤယွၤ ဃုထၢထီၣ်မိၢ်ပၢ် အဂ့ၤကတၢၢ်လၢ ယ့ၣ်ၡူးအဂီၢ်လီၤ. (မးသဲ ၁:၁၈-၂၃; လူၤကၣ် ၁:၂၆-၃၈) နီၢ်မၤရံအတၢ်ကတိၤလၢ ဘၣ်တၢ်ကွဲးလီၤအီၤလၢ လံာ်စီဆှံအပူၤန့ၣ် ပာ်ဖျါထီၣ်ဝဲ အတၢ်အဲၣ်ယဟိဝၤယွၤ ဒီးအကလုၢ်ကထါ အိၣ်ထဲလဲၣ်န့ၣ်လီၤ. (လူၤကၣ် ၁:၄၆-၅၅) ဒီးစီၤယိၤသးဒိကနၣ်ဝဲ ယဟိဝၤယွၤ အတၢ်ဟံးစုနဲၣ်ကျဲန့ၣ် ပာ်ဖျါထီၣ်ဝဲလၢ အမ့ၢ်ပှၤလၢ အပျံၤယွၤဒီး အဲၣ်ဒိးမၤယွၤ အတၢ်ဘၣ်သးလီၤ.
၅-၆. ယဟိဝၤယွၤ ပျဲဝဲလၢ ယ့ၣ်ၡူးကလဲၤခီဖျိဘၣ် တၢ်မနုၤလဲၣ်.
၅ ပသ့ၣ်ညါဘၣ်လၢ ယဟိဝၤယွၤ တဃုထၢန့ၢ် ယ့ၣ်ၡူးအမိၢ်အပၢ် လၢပှၤထူးပှၤတီၤဘၣ်. ဖဲယ့ၣ်ၡူးအိၣ်ဖျဲၣ်ထီၣ် ဝံၤအလီၢ်ခံ နီၢ်မၤရံဒီး စီၤယိၤသး ဟ့ၣ်လုၢ်ထီၣ်တၢ်န့ၣ် ဖျါလၢအဝဲသ့ၣ် မ့ၢ်ပှၤဖှီၣ်ဖိယာ်ဖိလီၤ. (လူၤကၣ် ၂:၂၄) ဘၣ်သ့ၣ်သ့ၣ် စီၤယိၤသး ကအိၣ်ဝဲဒၣ်ဒီး အတၢ်မၤလီၢ်ဆံးဆံးဖိတခါလၢ အအိၣ်ဘူးဒီးအဟံၣ် လၢဝ့ၢ်နစၤရ့းလီၤ. အဝဲမၤ ပှၤစုသ့ဖိအတၢ်မၤလီၤ. အဝဲသ့ၣ် ကျိၣ်စ့တအိၣ် အါအါဘၣ် အဃိ ကဘၣ်အိၣ်မူဝဲ ယိယိဖိ မ့ၢ်လၢအဝဲသ့ၣ် အဖိကအိၣ်ဝဲနွံဂၤ မ့တမ့ၢ် ကအါန့ၢ်အန့ၣ်ဒံးလီၤ.—မးသဲ ၁၃:၅၅, ၅၆.
၆ ယဟိဝၤယွၤ ဒီသဒၢယ့ၣ်ၡူးလၢ တၢ်လီၤဘၣ်ယိၣ်တဖၣ်အပူၤ ဘၣ်ဆၣ် အတဒီသဒၢ အဖိခွါလၢ တၢ်ကီတၢ်ခဲ ခဲလၢာ်အပူၤဘၣ်. (မးသဲ ၂:၁၃-၁၅) အဒိ ယ့ၣ်ၡူးအဘူးအတံၢ်တနီၤ တနာ်န့ၢ်အီၤဘၣ်. ဖဲအနီၢ်ကစၢ် အဟံၣ်ဖိဃီဖိဒၣ်လဲာ် တတူၢ်လိာ်အီၤလၢ အမ့ၢ်ဝဲမ့းၡံအၤအခါ ယ့ၣ်ၡူးအသး ကဟးဂီၤထဲလဲၣ်န့ၣ် ထံၣ်တမှံကွၢ်တက့ၢ်. (မၢ်ကူး ၃:၂၁; ယိၤဟၣ် ၇:၅) ဖဲယ့ၣ်ၡူး အပါစီၤယိၤသးသံအခါ ယ့ၣ်ၡူးကမ့ၢ်ဝဲ ပှၤသးစၢ်ဒံးအဃိ အသးကဘၣ်ဒိဝဲဒိၣ်မးလီၤ. ခီဖျိလၢအမ့ၢ်ဝဲ ဖိဝဲၢ်ကိအဃိ ကဘၣ်ဟံးထီၣ်ဖီၣ်ထီၣ်က့ၤ အပၢ်အတၢ်မၤလီၤ. (မၢ်ကူး ၆:၃) ဖဲယ့ၣ်ၡူးဒိၣ်ထီၣ်အခါ အဝဲဘၣ်ကွၢ်ထွဲ အဟံၣ်ဖိဃီဖိလီၤ. ဒ်သိး အကလုၢ်အီၣ်လုၢ်အီ အဝဲသ့ၣ်အဂီၢ် ယ့ၣ်ၡူးကဘၣ်မၤတၢ် ဆူၣ်ဆူၣ်လီၤ. အဃိ အဝဲသ့ၣ်ညါဘၣ်ဝဲလၢ ဖဲပမၤတၢ်ဒီနံၤဝံၤအခါ ပကလီၤဘှံးလီၤတီၤ ထဲလဲၣ်န့ၣ်လီၤ.
မိၢ်ပၢ်သ့ၣ်ဧၢ, သိၣ်လိနဖိဒ်သိး အဝဲသ့ၣ်ကဃုထံၣ်န့ၢ် တၢ်မၤစၢၤလၢ ယွၤအကလုၢ် ကထါ အပူၤန့ၣ်တက့ၢ် (ကွၢ်လံာ်အဆၢ ၇) *
၇. (က) ပှၤလၢအဆီဟံၣ်ဆီဃီလၢ အအဲၣ်ဒိးကဲထီၣ်မိၢ်ပၢ်န့ၣ် ကဘၣ်သံကွၢ် လီၤအသးဒ်လဲၣ်. (ခ) ကတိၤဒိ ၂:၁-၆ န့ၣ်မၤစၢၤမိၢ်ပၢ်လၢ ကသိၣ်လိအဖိဒ်လဲၣ်.
၇ နမ့မ့ၢ်ပှၤလၢ အဆီဟံၣ်ဆီဃီ ဒီးလီကီဖိန့ၣ် သံကွၢ်လီၤနသးလၢ ‘မ့ၢ်ယအိၣ်ဒီး တၢ်ဆီၣ်လီၤသး, အဲၣ်ယဟိဝၤယွၤဒီး အကလုၢ်ကထါဧါ. မ့ၢ်ယဟိဝၤယွၤ ဃုထၢယၤလၢ ယကကွၢ်ထွဲ ယဖိလၢ အလုၢ်ဒိၣ်ပှ့ၤဒိၣ် တဖၣ်အံၤဧါ.’ (စံးထီၣ်ပတြၢၤ ၁၂၇:၃, ၄) နမ့မ့ၢ် မိၢ်ပၢ်န့ၣ် သံကွၢ်လီၤနသးလၢ ‘မ့ၢ်ယသိၣ်လိ ယဖိလၢကမၤတၢ် ဆူၣ်ဆူၣ်ဧါ.’ (စံၣ်တဲၤတဲလီၤတၢ် ၃:၁၂, ၁၃) ‘ဟီၣ်ခိၣ်လၢ မုၣ်ကီၤလံၢ်ပၢဝဲအံၤ မ့ၢ်ယဒီသဒၢယဖိလၢ တၢ်လီၤဘၣ်ယိၣ်လၢ နီၢ်ခိဒီးနီၢ်သး လၢအဂ့ၤကတၢၢ်လံဧါ.’ (ကတိၤဒိ ၂၂:၃) နကဒီသဒၢ နဖိလၢ တၢ်ကီတၢ်ခဲ ခဲလၢာ်အပူၤတသ့ဘၣ်. နကမၤဒ်န့ၣ်အဂီၢ် တမ့ၢ်တၢ်လၢအညီဘၣ်. ဒ်သိးအဝဲသ့ၣ်လဲၤခီဖျိ တၢ်ကီတၢ်ခဲလၢ အတၢ်အိၣ်မူပူၤကန့ၢ်အဂီၢ် လၢတၢ်အဲၣ်တၢ်ကွံအပူၤ မၤစၢၤအဝဲသ့ၣ်ဒီး ဆဲးသိၣ်လိအဝဲသ့ၣ်လၢ အကသန့ၤအသးလၢ လံာ်စီဆှံအတၢ်ဟံးစုနဲၣ်ကျဲန့ၣ်တက့ၢ်. (ဖး ကတိၤဒိ ၂:၁-၆ တက့ၢ်.) အဒိ နဘူးနတံၢ် မ့ၢ်တမၤယဟိဝၤယွၤ အတၢ်မၤလၢၤဘၣ်န့ၣ် မၤစၢၤနဖိလၢ ကမၤလိဝဲ ကစၢ်ယွၤကလုၢ်ကထါ ဒ်သိးကသ့ၣ်ညါဝဲလၢ တၢ်သးတီဒီး ယဟိဝၤယွၤန့ၣ် မ့ၢ်တၢ်လၢအရ့ဒိၣ် ထဲလဲၣ်န့ၣ်တက့ၢ်. (စံးထီၣ်ပတြၢၤ ၃၁:၂၃) ဖဲပှၤလၢနအဲၣ်တဂၤ သံအခါ ဒုးနဲၣ်နဖိ လၢလံာ်စီဆှံအဆၢတဖၣ်လၢ ကကဲထီၣ်တၢ်မၤစၢၤ ဒ်သိးလဲၤခီဖျိဝဲ ကန့ၢ်အဂီၢ်တက့ၢ်.—၂ ကရံၣ်သူး ၁:၃, ၄; ၂ တံၤမသ့း ၃:၁၆.
မၤလိန့ၢ်တၢ်လၢ စီၤယိၤသးဒီး နီၢ်မၤရံအအိၣ်
၈. ဒ် ၅ မိၤၡ့ ၆:၆, ၇ ပာ်ဖျါထီၣ်ဝဲအသိး စီၤယိၤသးဒီး နီၢ်မၤရံန့ၣ် ဘၣ်မၤဝဲတၢ်မနုၤလဲၣ်.
၈ မ့ၢ်လၢ စီၤယိၤသးဒီး နီၢ်မၤရံ အိၣ်မူမၤထွဲဝဲ ယဟိဝၤယွၤ အတၢ်ဟံးစုနဲၣ်ကျဲအဃိ အဝဲသ့ၣ်မၤစၢၤယ့ၣ်ၡူး လၢကဒိၣ်ထီၣ်ဒ်ပှၤလၢ အအဲၣ်ယွၤဒီး မၤယွၤအတၢ်ဘၣ်သးလီၤ. (ဖး ၅ မိၤၡ့ ၆:၆, ၇ တက့ၢ်.) စီၤယိၤသးဒီး နီၢ်မၤရံန့ၣ် မ့ၢ်ပှၤလၢအအဲၣ် ယဟိဝၤယွၤနီၢ်နီၢ် ဒီးအဝဲသ့ၣ် အဖီတၢၣ်အရ့ဒိၣ်ကတၢၢ်န့ၣ် မ့ၢ်ဝဲ ကမၤစၢၤအဖိတဖၣ်လၢ ကအဲၣ်ယဟိဝၤယွၤ ဒ်အဝဲသ့ၣ်အသိးလီၤ.
၉. စီၤယိၤသးဒီးနီၢ်မၤရံ မၤဝဲတၢ်ဆၢတဲာ်လၢ အရ့ဒိၣ်ဒ်လဲၣ်.
၉ စီၤယိၤသးဒီးနီၢ်မၤရံ ဃုထၢဝဲလၢ ကဘူၣ်ထီၣ်ဘါထီၣ် ယဟိဝၤယွၤ ဃုာ်ဒီးအဖိတဖၣ် ထီဘိလီၤ. အဝဲသ့ၣ်လဲၤထီၣ် တၢ်အိၣ်ဖှိၣ်ကိးနွံဒဲးလၢ ဘူၣ်ဘျီၣ်ပူၤလၢ နစၤရ့း ဒီးလဲၤဆူယရူၤၡလ့ၣ်ကိးနံၣ်ဒဲး ဖဲပှၤမၤဘူၣ်လဲၤကပာ် အဆၢတီၢ်လီၤ. (လူၤကၣ် ၂:၄၁; ၄:၁၆) ဖဲအဝဲသ့ၣ်လဲၤလၢ ယရူၤၡလ့ၣ်အခါ စီၤယိၤသးဒီးနီၢ်မၤရံ ကသိၣ်လိဝဲ ယ့ၣ်ၡူးဒီးအပုၢ်တဖၣ် ဘၣ်ဃးဒီး ယဟိဝၤယွၤအပှၤဂီၢ်မုၢ်, တၢ်စံၣ်စိၤတဲစိၤတဖၣ် ဒီးတၢ်လီၢ်တၢ်ကျဲလၢ အဝဲသ့ၣ်လဲၤတုၤဘၣ်ဝဲလၢ အဘၣ်တၢ်ပာ်ဖျါထီၣ်အီၤလၢ လံာ်စီဆှံအပူၤလီၤ. ဖဲစီၤယိၤသးဒီးနီၢ်မၤရံ အဖိအါထီၣ်အခါ တညီလၢအဝဲသ့ၣ် ကဆဲးဘူၣ်ထီၣ်ဘါထီၣ် ယဟိဝၤယွၤအဂီၢ် ထီဘိဘၣ်. ဘၣ်ဆၣ် မ့ၢ်လၢအဝဲသ့ၣ်မၤဝဲ ဒ်န့ၣ်အဃိ ဒိးန့ၢ်ဘၣ်ဝဲ တၢ်ဆိၣ်ဂ့ၤလီၤ. မ့ၢ်လၢအဝဲသ့ၣ်ပာ်ဆိဝဲ တၢ်ဘူၣ်ထီၣ်ဘါထီၣ် ယဟိဝၤယွၤလၢ နီၣ်ဂံၢ်တၢ အဃိ အဝဲသ့ၣ် အဟံၣ်ဖိဃီဖိ ဘူးဒိၣ်ထီၣ်ဝဲဒီး ယဟိဝၤယွၤလီၤ.
၁၀. ခရံာ်ဖိမိၢ်ပၢ်တဖၣ် မၤလိန့ၢ်တၢ်လၢ စီၤယိၤသးဒီး နီၢ်မၤရံအအိၣ်သ့ဒ်လဲၣ်.
၁၀ မိၢ်ပၢ်လၢအပျံၤယွၤန့ၣ် မၤလိန့ၢ်တၢ်လၢ စီၤယိၤသးဒီးနီၢ်မၤရံအအိၣ် ကသ့ဒ်လဲၣ်. နအဲၣ်ယဟိဝၤယွၤနီၢ်နီၢ်န့ၣ် အရ့ဒိၣ်လၢနကဘၣ် ပာ်ဖျါထီၣ်န့ၢ်နဖိ ခီဖျိ နတၢ်စံးတၢ်ကတိၤ ဒီးနတၢ်မၤလီၤ. တၢ်ဟ့ၣ်အဂ့ၤကတၢၢ်လၢ နဟ့ၣ်အဝဲသ့ၣ်သ့န့ၣ်မ့ၢ်ဝဲ မၤစၢၤအဝဲသ့ၣ် ဒ်သိး ကအဲၣ်ယဟိဝၤယွၤ အဂီၢ်လီၤ. တၢ်လၢအရ့ဒိၣ်ကတၢၢ်န့ၣ် မၤစၢၤအဝဲသ့ၣ် ဒ်သိးတၢ်မၤလိ လံာ်စီဆှံ, တၢ်ဃ့ထုကဖၣ်, တၢ်ထီၣ်တၢ်အိၣ်ဖှိၣ်ရိဖှိၣ် ဒီးတၢ်ဟးစံၣ်တဲၤတဲလီၤတၢ် ကကဲထီၣ်လုၢ်လၢ်လၢ အဝဲသ့ၣ်အဂီၢ်တက့ၢ်. (၁ တံၤမသ့း ၆:၆) တကးဒံးဘၣ် နကဘၣ်မၤလၢပှဲၤန့ၢ် နဖိအတၢ်လိၣ်ဘၣ် လၢနီၢ်ခိတခီစ့ၢ်ကီးလီၤ. (၁ တံၤမသ့း ၅:၈) ဒ်သိး နဖိကပူၤဖျဲးထီၣ်လၢ ဟီၣ်ခိၣ်လၢ မုၣ်ကီၤလံၢ်ပၢဝဲအံၤ ဒီးကနုာ်လီၤဘၣ်လၢ ဟီၣ်ခိၣ်သီအပူၤအဂီၢ်န့ၣ် အဝဲကဘၣ်သန့ၤအသးလၢ ယဟိဝၤယွၤ, တမ့ၢ်လၢ ကျိၣ်စ့ဒီး တၢ်ထူးတၢ်တီၤဘၣ်. *—ယဃ့းစက့လး ၇:၁၉; ၁ တံၤမသ့း ၄:၈.
မ့ၢ်လၢ ခရံာ်ဖိမိၢ်ပၢ်တဖၣ် မၤစၢၤအဖိလၢ ကအဲၣ် ယဟိဝၤယွၤ အဃိ လီၤသးခုဒိၣ်မး (ကွၢ်လံာ်အဆၢ ၁၁) *
၁၁. (က) တၢ်ဟ့ၣ်ကူၣ်ဖဲ ၁ တံၤမသ့း ၆:၁၇-၁၉ န့ၣ် မၤစၢၤဝဲမိၢ်ပၢ်တဖၣ်လၢ ကလုၢ်ဒိၣ်ထီၣ်အဖိ လၢတၢ်ကူၣ်သ့အပူၤဒ်လဲၣ်. (ခ) နဟံၣ်ဖိဃီဖိ ကြၢးပာ်လီၤ ဖီတၢၣ်မနုၤတဖၣ်လဲၣ် ဒီးကဒိးန့ၢ်ဘၣ် တၢ်ဆိၣ်ဂ့ၤ မနုၤလဲၣ်. (ကွၢ်တၢ်လွံၢ်နၢၣ် “ မ့ၢ်နပာ်လီၤဖီတၢၣ် မနုၤတဖၣ်လဲၣ်” တက့ၢ်.)
၁၁ ပထံၣ်ဘၣ်လၢ ခရံာ်ဖိမိၢ်ပၢ်တဖၣ် မၤစၢၤအဖိလၢ ကဘူးထီၣ်ဒီး ယဟိဝၤယွၤအဃိ ပသးခုဒိၣ်မးလီၤ. အဝဲသ့ၣ်ဘူၣ်ထီၣ်ဘါထီၣ် ယဟိဝၤယွၤဒ်သိးသိး ထီဘိလီၤ. အဝဲသ့ၣ်လဲၤထီၣ် တၢ်အိၣ်ဖှိၣ်ရိဖှိၣ် ဒီးတၢ်အိၣ်ဖှိၣ်ဖးဒိၣ်တဖၣ် ဒ်သိးသိးလီၤ. ဒီးအဝဲသ့ၣ်လဲၤစံၣ်တဲၤတဲလီၤတၢ် ဒ်သိးသိးလီၤ. ဟံၣ်ဖိဃီဖိတနီၤန့ၣ် လဲၤစံၣ်တဲၤတဲလီၤတၢ်လၢ တၢ်လီၢ်လၢ ပှၤလဲၤတတုၤကြီကြီဘၣ်. မ့မ့ၢ်လၢအဂၤတနီၤ လဲၤဟးလၢ ဘ့ၤသ့လး ဒီးအဝဲသ့ၣ်မၤစၢၤတၢ်လၢ တၢ်ကရၢကရိ အတၢ်သူၣ်ထီၣ်ဘှီထီၣ်တဖၣ်လီၤ. ဒ်သိးအဝဲသ့ၣ် ကမၤဝဲဒ်န့ၣ်အဂီၢ် ကဘၣ်ထုးထီၣ်ဝဲ အနီၢ်ကစၢ်ကျိၣ်စ့ ဒီးအဝဲသ့ၣ် ထံၣ်ဘၣ်ဒီး တၢ်ကီတၢ်ခဲ စ့ၢ်ကီးလီၤ. ဘၣ်ဆၣ် တၢ်လၢအဝဲသ့ၣ်မၤဝဲတဖၣ်န့ၣ် ယဟိဝၤယွၤ ဆိၣ်ဂ့ၤအဝဲသ့ၣ်လီၤ. (ဖး ၁ တံၤမသ့း ၆:၁၇-၁၉ တက့ၢ်.) ဖိသၣ်လၢအဒိၣ်ထီၣ်ဘၣ်လၢ ဟံၣ်ဖိဃီဖိ ဒ်န့ၣ်တဖၣ်အကျါန့ၣ် ခီဖျိလၢအမၤဝဲဒ်အံၤအဃိ အဝဲသ့ၣ်မ့ၢ်သးပှၢ်ထီၣ်ဝဲ သနာ်က့ ဆဲးမၤဝဲတၢ်မၤတဖၣ်အံၤ ဒီးအသးခုဝဲလီၤ. *—ကတိၤဒိ ၁၀:၂၂.
မၤလိန့ၢ်တၢ်လၢ ယ့ၣ်ၡူးအအိၣ်
၁၂. ဖဲယ့ၣ်ၡူး ဒိၣ်ထီၣ်အခါ အဘၣ်မၤဝဲတၢ်မနုၤလဲၣ်.
၁၂ ယ့ၣ်ၡူးအပၢ်လၢ မူခိၣ်န့ၣ် မၤဝဲတၢ်ဆၢတဲာ် လၢအဘၣ်ထီဘိ ဒီးအမိၢ်အပၢ်လၢ ဟီၣ်ခိၣ်ချၢစ့ၢ်ကီး မၤတၢ်ဆၢတဲာ်လၢ တၢ်ကူၣ်သ့အပူၤလီၤ. ဘၣ်ဆၣ် ဖဲယ့ၣ်ၡူးဒိၣ်ထီၣ်အခါ အကဘၣ်မၤ တၢ်ဆၢတဲာ်လၢ အနီၢ်ကစၢ်လီၤ. (ကလၤတံ ၆:၅) ဒ်ပဝဲဒၣ်အသိး ယ့ၣ်ၡူးစ့ၢ်ကီး အိၣ်ဒီးတၢ်သဘျ့လီၤ. အဝဲမ့ၢ်ဃုထၢဝဲလၢ ကအဲၣ်လီၤ အနီၢ်ကစၢ်အသးဒီး တမၤယွၤအတၢ်ဘၣ်သးဘၣ်န့ၣ် သ့ဝဲစ့ၢ်ကီးလီၤ. လၢတၢ်န့ၣ်အလီၢ် အဝဲဃုထၢဝဲလၢ ကအိၣ်ဒီးတၢ်ရ့လိာ်သး ဒီးယဟိဝၤယွၤ လၢအဂ့ၤလီၤ. (ယိၤဟၣ် ၈:၂၉) ယ့ၣ်ၡူးအဒိအတဲာ်န့ၣ် မၤစၢၤပှၤသးစၢ်လၢ မုၢ်မဆါတနံၤအံၤဒ်လဲၣ်.
သးစၢ်သ့ၣ်ဧၢ, ဟးဆှဲး နမိၢ်ပၢ်တၢ်ဟံးစုနဲၣ်ကျဲ နီတဘျီတဂ့ၤ (ကွၢ်လံာ်အဆၢ ၁၃) *
၁၃. ဖဲယ့ၣ်ၡူးသးစၢ်အခါ အဝဲမၤတၢ်ဆၢတဲာ်လၢ အရ့ဒိၣ်မနုၤလဲၣ်.
၁၃ ဖဲယ့ၣ်ၡူးအသးစၢ်အခါ အဝဲဒိကနၣ်ဝဲ အမိၢ်အပၢ်အကလုၢ်လီၤ. အဝဲသးအိၣ်ဒိကနၣ် အမိၢ်အပၢ်အတၢ်ဟံးစုနဲၣ်ကျဲထီဘိ ဒီးတဆိကမိၣ်လီၤအသးလၢ အသ့ၣ်ညါတၢ်အါန့ၢ်အဝဲသ့ၣ်ဘၣ်. လၢတၢ်န့ၣ်အလီၢ် “ပာ်အသးလၢအဖီလာ်လီၤ.” (လူၤကၣ် ၂:၅၁) ဒ်ယ့ၣ်ၡူးမ့ၢ် ဖိဝဲၢ်ကိတဂၤအသိး အဝဲကဘၣ်မၤလၢပှဲၤ အမူဒါလၢ အဂ့ၤကတၢၢ်လီၤ. အဝဲကဂုာ်ကျဲးစၢၤမၤလိ ပှၤစုသ့ဖိတၢ်မၤလၢ အပၢ်စီၤယိၤသးအအိၣ် ဒ်သိးအဝဲလုၢ်အီၣ်လုၢ်အီ အဟံၣ်ဖိဃီဖိ ကန့ၢ်အဂီၢ်လီၤ.
၁၄. ယ့ၣ်ၡူးမ့ၢ်ပှၤလၢ အအဲၣ်ကစၢ်ယွၤ အကလုၢ်ကထါန့ၣ် ပသ့ၣ်ညါဘၣ်ဒ်လဲၣ်.
၁၄ ဘၣ်သ့ၣ်သ့ၣ် ယ့ၣ်ၡူးအမိၢ်အပၢ် ကတဲဘၣ်အီၤ ဘၣ်ဃးဒီးတၢ်လီၤလးလၢ မၤအသးဖဲ အဝဲအိၣ်ဖျဲၣ်ထီၣ်အခါ ဒီးယွၤအကလူးတဖၣ် ဟဲစိာ်တၢ်ကစီၣ်ဘၣ်ဃးဒီး အဂ့ၢ်လီၤ. (လူၤကၣ် ၂:၈-၁၉, ၂၅-၃၈) ယ့ၣ်ၡူးတသးမံဒီး တၢ်လၢအနၢ်ဟူဘၣ်ဝဲတဖၣ်ဘၣ် လၢတၢ်န့ၣ်အလီၢ် အဝဲဃုသ့ၣ်ညါ လံာ်စီဆှံလၢအနီၢ်ကစၢ်လီၤ. ယ့ၣ်ၡူးမ့ၢ်ပှၤလၢ အအဲၣ်ကစၢ်ယွၤ အကလုၢ်ကထါန့ၣ် ပသ့ၣ်ညါဘၣ်ဒ်လဲၣ်. ဖဲအမ့ၢ်ဖိသၣ်အခါ “အတၢ်ကူၣ်သ့, ဒီးအတၢ်စံးဆၢ” တဖၣ်န့ၣ် သရၣ်လၢ ယရူၤၡလ့ၣ်သ့ၣ်တဖၣ် “ပာ်အသးကမၢကမၣ်ခဲလၢာ်လီၤ.” (လူၤကၣ် ၂:၄၆, ၄၇) ဒီးဖဲယ့ၣ်ၡူးအိၣ် ၁၂ နံၣ်အခါ အဝဲပာ်ဖျါထီၣ်လၢ ယဟိဝၤယွၤမ့ၢ်အပၢ်လီၤ.—လူၤကၣ် ၂:၄၂, ၄၃, ၄၉.
၁၅. ယ့ၣ်ၡူး မၤယဟိဝၤယွၤအတၢ်ဘၣ်သးန့ၣ် အပာ်ဖျါထီၣ်ဝဲဒ်လဲၣ်.
၁၅ ဖဲယ့ၣ်ၡူးသ့ၣ်ညါထီၣ် ယဟိဝၤယွၤ အတၢ်ဘၣ်သးအခါ အဝဲဃုထၢလၢ ကမၤယဟိဝၤယွၤ အတၢ်မၤလီၤ. (ယိၤဟၣ် ၆:၃၈) ယ့ၣ်ၡူးသ့ၣ်ညါဝဲလၢ ပှၤအါဂၤကသးဟ့အီၤ အဃိ တၢ်သ့ၣ်တဖၣ်အံၤ ကမၤကိၢ်မၤဂီၤအီၤလီၤ. အသ့ၣ်ညါဝဲ သနာ်က့ အဝဲဆဲးဒိကနၣ် ယဟိဝၤယွၤကလုၢ်လီၤ. ယ့ၣ်ၡူးဒိးဘျၢထံ ဖဲ ခ.န ၂၉ ဒီးတၢ်လၢ အရ့ဒိၣ်ကတၢၢ် လၢအဂီၢ်န့ၣ် မ့ၢ်ဝဲ ကမၤယဟိဝၤယွၤ အတၢ်ဘၣ်သးလီၤ. (ဧ့ၤဘြံၤ ၁၀:၅-၇) ယ့ၣ်ၡူးမ့ၢ်ဘၣ်သံလၢ သ့ၣ်တၢၣ်လိၤ ဒၣ်လဲာ် အဝဲသးဆူၣ်လၢ ကဆဲးမၤလၢပှဲၤ အပၢ်အတၢ်ဘၣ်သးဒံးလီၤ.—ယိၤဟၣ် ၁၉:၃၀.
၁၆. ဖိသၣ်တဖၣ်န့ၣ် ဟံးန့ၢ်တၢ်မၤလိလၢ ယ့ၣ်ၡူးအအိၣ် ကသ့ဒ်လဲၣ်.
၁၆ ဒိကနၣ် နမိၢ်နပၢ် အကလုၢ်တက့ၢ်. ဒ်စီၤယိၤသးဒီးနီၢ်မၤရံအသိး နမိၢ်နပၢ်တမ့ၢ်ပှၤလၢ အလၢအပှဲၤဘၣ်. ဘၣ်ဆၣ်သနာ်က့ ယဟိဝၤယွၤ ဟ့ၣ်လီၤအဝဲသ့ၣ်မူဒါလၢ ကဒီသဒၢ, ကသိၣ်လိ ဒီးဟံးစုနဲၣ်ကျဲနၤလီၤ. နမ့ၢ်ပာ်လုၢ်ပာ်ပှ့ၤ အတၢ်ဟ့ၣ်ကူၣ် ဒီးပာ်ကဲအဝဲသ့ၣ် တၢ်န့ၢ်စိန့ၢ်ကမီၤန့ၣ် “နကဘီၣ်ထီၣ်ညီထီၣ်” လီၤ.—အ့းဖ့းစူး ၆:၁-၄.
၁၇. ဒ် ယိၤၡူ ၂၄:၁၅ ပာ်ဖျါထီၣ်ဝဲအသိး သးစၢ်တဖၣ် ကဘၣ်ဆၢတဲာ်လီၤသးလၢ ကမၤတၢ်မနုၤလဲၣ်.
၁၇ ဆၢတဲာ်လၢ နကမၤ မတဂၤအတၢ်မၤလဲၣ်. နကဘၣ်ဃုသ့ၣ်ညါဒီး ဒုးနာ်န့ၢ်လီၤ နနီၢ်ကစၢ်အသးလၢ ဘၣ်ဃးဒီး ယဟိဝၤယွၤ မ့ၢ်မတဂၤလဲၣ်, အတၢ်တိာ်ပာ်အိၣ်ဒ်လဲၣ် ဒီးအတၢ်ဘၣ်သး ဘၣ်ထွဲဒီးနတၢ်အိၣ်မူဒ်လဲၣ်န့ၣ်လီၤ. (ရိမ့ၤ ၁၂:၂) တၢ်ဆၢတဲာ် အရ့ဒိၣ်ကတၢၢ်လၢ နတၢ်အိၣ်မူအပူၤန့ၣ် မ့ၢ်ဝဲတၢ်မၤ ယဟိဝၤယွၤတၢ်ဘၣ်သးလီၤ. (ဖး ယိၤၡူ ၂၄:၁၅ တက့ၢ်; စံၣ်တဲၤတဲလီၤတၢ် ၁၂:၁) နမ့ၢ်မၤထွဲ တၢ်ဖးလံာ်စီဆှံဒီး တၢ်မၤလိလံာ်စီဆှံ အတၢ်ရဲၣ်တၢ်ကျဲၤ ထီဘိန့ၣ် နတၢ်အဲၣ် ယဟိဝၤယွၤ ကဆဲးဒိၣ်ထီၣ်ဒီး နတၢ်နာ်န့ၢ်အီၤ ကဂၢၢ်ကျၢၤထီၣ်ဝဲလီၤ.
၁၈. သးစၢ်တဖၣ် ဘၣ်မၤတၢ်ဃုထၢ မနုၤလဲၣ် ဒီးကဒိးန့ၢ်ဘၣ်အဘျုးဒ်လဲၣ်.
၁၈ လၢနတၢ်အိၣ်မူအပူၤ ပာ်ဆိယဟိဝၤယွၤ အတၢ်ဘၣ်သး လၢနီၣ်ဂံၢ်တၢတက့ၢ်. ဟီၣ်ခိၣ်လၢမုၣ်ကီၤလံၢ်ပၢဝဲအံၤ တဲဝဲလၢ နမ့ၢ်သူနတၢ်သ့တၢ်ဘၣ်လၢ နနီကစၢ်အဘျုးအဂီၢ်န့ၣ် နကသးခုလီၤ. ဘၣ်ဆၣ် နသ့ၣ်ညါလၢ နမ့ၢ်လူၤဟီၣ်ခိၣ် အတၢ်ထူးတၢ်တီၤန့ၣ် ကဒုးအိၣ်ထီၣ်န “တၢ်ကိၢ်တၢ်ဂီၤ အါမံၤလီၤ.” (၁ တံၤမသ့း ၆:၉, ၁၀) ဘၣ်ဆၣ် နမ့ၢ်ဒိကနၣ် ကစၢ်ယွၤအကလုၢ်ဒီး မၤအတၢ်ဘၣ်သးန့ၣ် နတၢ်အိၣ်မူ ကဘီၣ်ထီၣ်ညီထီၣ်ဒီး နကမၤတၢ်ခဲလၢာ်လၢ “တၢ်ကူၣ်သ့” အပူၤလီၤ.—ယိၤၡူ ၁:၈.
ဃုထၢလၢ နကမၤတၢ်မနုၤလဲၣ်
၁၉. မိၢ်ပၢ်တဖၣ် ကဘၣ်သ့ၣ်ညါ တၢ်မနုၤလဲၣ်.
၁၉ မိၢ်ပၢ်သ့ၣ်ဧၢ, ဒ်သိးနဖိကမၤ ယဟိဝၤယွၤတၢ်မၤအဂီၢ် မၤစၢၤအဝဲသ့ၣ်လၢ အဂ့ၤကတၢၢ်တက့ၢ်. သန့ၤနသးလၢ ယဟိဝၤယွၤ ဒ်သိးအကမၤစၢၤနၤလၢ နကဆၢတဲာ်တၢ် လၢအပှဲၤဒီး တၢ်ကူၣ်သ့အဂီၢ်လီၤ. (ကတိၤဒိ ၃:၅, ၆) နကဘၣ်သ့ၣ်ညါလၢ တၢ်လၢနမၤန့ၣ် နဖိတဖၣ် ကကွၢ်လိဝဲ အါန့ၢ်ဒံး တၢ်လၢနတဲအီၤလီၤ. အဃိ မၤတၢ်ဆၢတဲာ်လၢ ကကဲထီၣ် တၢ်မၤစၢၤလၢ နဖိအဂီၢ် ဒ်သိးအဝဲသ့ၣ် ကဒိးန့ၢ်ဘၣ် ယဟိဝၤယွၤ အတၢ်ဘၣ်သးတက့ၢ်.
၂၀. သးစၢ်တဖၣ် မ့ၢ်ဃုထၢဝဲလၢ ကမၤယဟိဝၤယွၤအတၢ်မၤန့ၣ် ကဒိးန့ၢ်ဘၣ် တၢ်ဆိၣ်ဂ့ၤမနုၤလဲၣ်.
၂၀ သးစၢ်သ့ၣ်ဧၢ, သုမိၢ်ပၢ်ကမၤစၢၤသုလၢ သုကဃုထၢတၢ်လၢ တၢ်ကူၣ်သ့အပူၤလီၤ. ဘၣ်ဆၣ် နကဘၣ်မၤ တၢ်ဆၢတဲာ်လၢ အမၤသးခု ယဟိဝၤယွၤအသးလီၤ. အဃိ ကွၢ်လိမၤဒိ ယ့ၣ်ၡူး ဒီးဃုထၢလၢ နကမၤနပၢ်လၢ မူခိၣ်အတၢ်မၤတက့ၢ်. နမ့ၢ်မၤဒ်န့ၣ်န့ၣ် ခဲအံၤ နတၢ်အိၣ်မူ ကပှဲၤဝဲဒီး တၢ်ဆိၣ်ဂ့ၤဒီး တၢ်သးခုလီၤ. (၁ တံၤမသ့း ၄:၁၆) ဒီးခါဆူညါ နကဒိးန့ၢ်ဘၣ် တၢ်အိၣ်မူလၢ အပှဲၤဝဲဒီး တၢ်သးခုနီၢ်နီၢ်လီၤ.
တၢ်သးဝံၣ် ၁၃၃ ဖဲနသးစၢ်အခါ ဘူၣ်ထီၣ်ဘါထီၣ်ယဟိဝၤယွၤ
^ လံာ်အဆၢ. 5 ခရံာ်ဖိမိၢ်ပၢ်တဖၣ် အဲၣ်ဒိးဝဲလၢ အဖိကသးခု ဒီးဖဲအဝဲသ့ၣ်ဒိၣ်ထီၣ်အခါ ကမၤယဟိဝၤယွၤ အတၢ်မၤလီၤ. မိၢ်ပၢ်တဖၣ် မၤစၢၤအဖိ လၢကမၤယဟိဝၤယွၤ အတၢ်မၤကသ့ဒ်လဲၣ်. ခရံာ်ဖိသးစၢ်တဖၣ် အတၢ်အိၣ်မူကပှဲၤဒီး တၢ်သးခုအဂီၢ် ကဘၣ်မၤတၢ်ဆၢတဲာ်ဒ်လဲၣ်. လၢတၢ်မၤလိအံၤအပူၤ ပကတဲသကိး တၢ်သံကွၢ်တဖၣ်အံၤ အတၢ်စံးဆၢလီၤ.
^ လံာ်အဆၢ. 11 ကွၢ်တၢ်လွံၢ်နၢၣ် “I Couldn’t Imagine Having Better Parents” လၢ Awake!, October 2011, p. 20, ဒီးတၢ်ဂ့ၢ်လၢအမ့ၢ် “A Special Letter to Their Parents” လၢ Awake!, March 8, 1999, p. 25 တက့ၢ်.
^ လံာ်အဆၢ. 66 တၢ်တဲဖျါထီၣ်တၢ်ဂီၤ အခီပညီ– ဒ်သိးယ့ၣ်ၡူး ကအဲၣ်ယဟိဝၤယွၤ နီၢ်နီၢ်အဂီၢ် နီၢ်မၤရံ ကဘၣ်သိၣ်လိအီၤလီၤ. မုၢ်မဆါတနံၤအံၤ မိၢ်တဖၣ် သိၣ်လိအဖိလၢ ကအဲၣ်ယဟိဝၤယွၤလီၤ.
^ လံာ်အဆၢ. 68 တၢ်တဲဖျါထီၣ်တၢ်ဂီၤ အခီပညီ– တၢ်ဘူၣ်ထီၣ်ဘါထီၣ် တၢ်လၢဘူၣ်ဘျီၣ်ပူၤ ဃုာ်ဒီးဟံၣ်ဖိဃီဖိန့ၣ် စီၤယိၤသး ပာ်လုၢ်ပာ်ပှ့ၤဝဲဒိၣ်မးလီၤ. မုၢ်မဆါတနံၤအံၤ ပၢ်တဖၣ် ပာ်လုၢ်ပာ်ပှ့ၤဝဲ တၢ်ထီၣ်တၢ်အိၣ်ဖှိၣ်ရိဖှိၣ် ဃုာ်ဒီးအဟံၣ်ဖိဃီဖိလီၤ.
^ လံာ်အဆၢ. 70 တၢ်တဲဖျါထီၣ်တၢ်ဂီၤ အခီပညီ– ယ့ၣ်ၡူးမၤလိန့ၢ် ပှၤစုသ့တၢ်မၤလၢ အပၢ်အအိၣ်လီၤ. မုၢ်မဆါတနံၤအံၤ သးစၢ်တဖၣ် မၤလိန့ၢ်တၢ်သ့တၢ်ဘၣ် လၢအပၢ်အအိၣ်လီၤ.
