မးသဲ ၄:၁-၂၅
၄ ဝံၤဒီးသးစီဆှံ ဆှၢထီၣ်ယ့ၣ်ၡူးလၢ ပှၢ်မုၢ်ကနၢ ဒီးမုၣ်ကီၤလံၢ်+ လ့ပစီအီၤဖဲန့ၣ်လီၤ.+
၂ ယ့ၣ်ၡူးဒုၣ်တၢ်အီၣ် အနံၤ ၄၀ ဒီးအနၤ ၄၀ ဝံၤအလီၢ်ခံ အဝဲအဲၣ်ဒိးအီၣ်တၢ်လီၤ.
၃ ဒီးမုၣ်ကီၤလံၢ်+ ဟဲလၢအအိၣ် ဒီးတဲအီၤလၢ “နမ့မ့ၢ် ကစၢ်ယွၤအဖိခွါန့ၣ် မၢလၢၢ်တဖၣ်အံၤ ကဲထီၣ်ကိၣ်သၢၤ.”
၄ ဘၣ်ဆၣ် ယ့ၣ်ၡူး တဲဆၢက့ၤအီၤလၢ “တၢ်ကွဲးအသးအိၣ်ဝဲလၢ ‘ပှၤဟီၣ်ခိၣ်ဖိ တမူဝဲထဲလၢ ကိၣ်အဃိဘၣ်. မ့မ့ၢ် မူဝဲလၢကယဲၢ် တၢ်ကတိၤလၢ အဟဲထီၣ်လၢ ယဟိဝၤယွၤ* အထးခိၣ်လီၤ.’”+
၅ ဝံၤဒီးမုၣ်ကီၤလံၢ် လဲၤကိးအီၤလၢ ဝ့ၢ်စီဆှံအပူၤ+ ဒီးပာ်ထီၣ်အီၤလၢ တၢ်လုၢ်ဟံၣ်အခိၣ်စိၣ်*+
၆ ဒီးတဲအီၤလၢ “နမ့မ့ၢ် ကစၢ်ယွၤအဖိခွါန့ၣ် ဖုလီၤသၢၤ. တၢ်ကွဲးအသးအိၣ်ဝဲလၢ ‘အဝဲကမၤလိာ် အမူခိၣ်ကလူးတဖၣ်လၢ ကဟဲမၤစၢၤနၤ’ ဒီး ‘အဝဲသ့ၣ် ကစိာ်နၤလၢအစု ဒ်သိး နခီၣ်သုတဘၣ်ထံးဒီး လၢၢ်တဂ့ၤအဂီၢ်လီၤ.’”+
၇ ယ့ၣ်ၡူး တဲဆၢက့ၤအီၤလၢ “တၢ်ကွဲးအသး အိၣ်စ့ၢ်ကီးဝဲလၢ ‘နတဘၣ်မၤကွၢ် နကစၢ်ယဟိဝၤယွၤတဂ့ၤ.’”+
၈ ဒီးမုၣ်ကီၤလံၢ် လဲၤကိးအီၤလၢ ကစၢၢ်ဖးထီတဖျၢၣ်အလိၤ ဒီးဒုးနဲၣ်အီၤလၢ ဘီမုၢ်ခဲလၢာ်လၢ အအိၣ်လၢ ဟီၣ်ခိၣ်ချၢ ဒီးဘီမုၢ်တဖၣ် အလၤအကပီၤခဲလၢာ်လီၤ.+
၉ ဒီးအဝဲတဲယ့ၣ်ၡူးလၢ “နမ့ၢ်ထိၣ်လီၤပှီၤနသး ဒီးဘါထီၣ်ယၤ ထဲတဘျီန့ၣ် ယကဟ့ၣ်လီၤနၤ တၢ်သ့ၣ်တဖၣ်န့ၣ် ခဲလၢာ်လီၤ.”
၁၀ ဒီးယ့ၣ်ၡူး တဲဘၣ်အီၤလၢ “မုၣ်ကီၤလံၢ်ဧၢ,* ဟးထီၣ်ကွံာ်. တၢ်ကွဲးအသးအိၣ်ဝဲလၢ ‘နကဘၣ် ဘူၣ်ထီၣ်ဘါထီၣ် နကစၢ်ယဟိဝၤယွၤ+ ဒီးနကဘၣ်မၤထဲ အတၢ်လီၤ.’”+
၁၁ ဝံၤဒီးမုၣ်ကီၤလံၢ် ဟးထီၣ်ကွံာ်ဝဲလၢ အအိၣ်လီၤ.+ ဒီးမူခိၣ်ကလူးတဖၣ် ဟဲလၢအအိၣ် ဒီးမၤစၢၤအီၤလီၤ.+
၁၂ ဖဲယ့ၣ်ၡူး နၢ်ဟူလၢ ပှၤဖီၣ်စီၤယိၤဟၣ်အခါ+ အဝဲလဲၤလၢ ကၤလံၤလါလီၤ.+
၁၃ တကးဒံးဘၣ် ဖဲယ့ၣ်ၡူး ဟးထီၣ်လၢ ဝ့ၢ်နစၤရ့း ဝံၤအလီၢ်ခံ အဝဲလဲၤအိၣ်ဝဲလၢ ဝ့ၢ်ကပ့းရနီၣ်+ လၢအအိၣ်ဘူးဒီး ပီၣ်လဲၣ်နံၤလၢ စဘူလိၣ် ဒီးနးသၤလံ အဟီၣ်ကဝီၤအပူၤ
၁၄ ဒ်သိးကမၤလၢပှဲၤ ဝံယၡါယၤ အတၢ်ကတိၤ အဂီၢ်လီၤ.
၁၅ ဝံယၡါယၤ တဲဝဲလၢ “စဘူလိၣ် ဒီးနးသၤလံအတၢ်လီၢ်တၢ်ကျဲလၢ အအိၣ်ဘူးဒီး ကျဲလၢအလဲၤဆူပီၣ်လဲၣ် ဒီးလၢယၢ်ဒ့ၣ် အမုၢ်နုာ်တခီ ဒီးကၤလံၤလါလၢ ပှၤကလုာ်တဖၣ် အိၣ်ဝဲလၢအပူၤသ့ၣ်ဧၢ,
၁၆ ပှၤလၢအဆ့ၣ်နီၤလၢ တၢ်ခံးကျါန့ၣ် ထံၣ်ဘၣ်ဝဲ တၢ်ကပီၤဖးဒိၣ်လံ ဒီးပှၤလၢအဆ့ၣ်နီၤလၢ တၢ်သံအကဒုဖီလာ်န့ၣ် တၢ်ကပီၤ+ ဆဲးလီၤဘၣ် အဝဲသ့ၣ်လံ.”+
၁၇ စးထီၣ်ဖဲန့ၣ် အဆၢကတီၢ် ယ့ၣ်ၡူးစံၣ်တဲၤတဲလီၤတၢ် ဒီးတဲဝဲလၢ “မူခိၣ်အဘီအမုၢ် ဟဲဘူးထီၣ်လံအဃိ ပီၢ်ယၢ်လီၤက့ၤသုသးတက့ၢ်.”+
၁၈ ဖဲယ့ၣ်ၡူးဟးလၢ ကၤလံၤလါ အပီၣ်လဲၣ်နံၤအခါ အထံၣ်ဝဲ ပှၤဒီပုၢ်ဝဲၢ်ခွါခံဂၤလီၤ. အဝဲသ့ၣ် အမံၤမ့ၢ် စီၤၡံမိၣ်လၢ ဘၣ်တၢ်ကိးအီၤလၢ စီၤပ့းတရူး+ ဒီးအဒီပုၢ်ဝဲၢ်ခွါ စီၤအၣ်ဒရ့းလီၤ. အဝဲသ့ၣ် မ့ၢ်ပှၤမၤညၣ်ဖိအဃိ+ အဝဲသ့ၣ် ကွံာ်လီၤစၤလၢ ပီၣ်လဲၣ်ပူၤလီၤ.
၁၉ ဒီးယ့ၣ်ၡူးတဲ အဝဲသ့ၣ်လၢ “ဟဲပိာ်ယခံတက့ၢ်. ဒီးယကမၢသုဃုပှၤကညီ ဒ်သုဃုန့ၢ်ညၣ်အသိးလီၤ.”+
၂၀ အဃိ အဝဲသ့ၣ် ပာ်တ့ၢ်ကွံာ်အစၤ တဘျီဃီ ဒီးပိာ်ထီၣ်အခံလီၤ.+
၂၁ အဝဲလဲၤကဒီးဆူညါ ဒီးထံၣ်ဝဲ စီၤစ့းဘ့းဒဲ ဒီးအဖိခွါခံဂၤလၢ အမံၤမ့ၢ် စီၤယၤကိာ် ဒီးစီၤယိၤဟၣ်န့ၣ်+ အိၣ်လၢချံပူၤ ဒီးဆးထီၣ်ဝဲ အစၤလီၤ.* ဒီးယ့ၣ်ၡူး ကိးအဝဲသ့ၣ်လၢ ကပိာ်အခံလီၤ.+
၂၂ အဝဲသ့ၣ်ပာ်တ့ၢ်ကွံာ် အပၢ်ဒီးအချံ ဒီးပိာ်ထီၣ်ဝဲ ယ့ၣ်ၡူးအခံ တဘျီဃီလီၤ.
၂၃ ယ့ၣ်ၡူးဟးဝဲလၢ ကၤလံၤလါဒီတဘ့ၣ်ညါ+ ဒီးသိၣ်လိတၢ်လၢ ဘူၣ်ဘျီၣ်တဖၣ်အပူၤ+ ဒီးစံၣ်တဲၤတဲလီၤ ဘီမုၢ်တၢ်သးခုကစီၣ် ဒီးမၤဘျါဝဲ ပှၤဆူးပှၤဆါ အကလုာ်ကလုာ်လီၤ.+
၂၄ အဃိ ယ့ၣ်ၡူးအဂ့ၢ် ဟူထီၣ်ဝဲလၢ စူၤရံဒီကီၢ်ညါလီၤ. ဒီးပှၤဟဲကိး ကယဲၢ်ပှၤလၢ အအိၣ်ဒီးတၢ်ဆါ အကလုာ်ကလုာ် ဒီးပှၤလၢ အတူၢ်ဘၣ် တၢ်ဆါနးမးတဖၣ်,+ ပှၤလၢတၢ်ဝံတၢ်နါ အိၣ်လၢအလိၤ,+ ပှၤလၢ ဘၣ်ထိးပျုၢ်တၢ်ဆါ+ ဒီးပှၤလၢ အစုလီၤဘျ့ခီၣ်လီၤဘျ့တဖၣ် ဆူယ့ၣ်ၡူးအအိၣ်လီၤ. ဒီးယ့ၣ်ၡူးမၤဘျါက့ၤ အဝဲသ့ၣ်လီၤ.
၂၅ အဃိ ပှၤဂီၢ်မုၢ်တဖၣ်လၢ ကၤလံၤလါ, ဒ့းကၤပလံၣ်, ယရူၤၡလ့ၣ်, ယူဒၤ ဒီးယၢ်ဒ့ၣ် ဝၢ်ဘးခီန့ၣ် ပိာ်ထီၣ်အခံလီၤ.
တၢ်ဂ့ၢ်အဘျဲၣ်တဖၣ်
^ ကွၢ် တၢ်ဂ့ၢ်ဘၣ်ထွဲလိာ်သး က၅.
^ မ့ၢ်စ့ၢ်ကီး “တၢ်လီၢ်လၢ အထီကတၢၢ်.”
^ အခီပညီလိၤလိၤ “စၤတၣ်.” မံၤအံၤ အခီပညီမ့ၢ်ဝဲ “ပှၤလၢအထီဒါတၢ်.”
^ မ့ၢ်စ့ၢ်ကီး “ပှာ်.”
