ပမၤနၢၤဒုၣ်ဒါလၢ အမ့ၢ်တၢ်သံန့ၣ် ကသ့ဒ်လဲၣ်
ပမိၢ်ပပၢ် အဆိကတၢၢ်ခံဂၤလၢအမ့ၢ် နီၢ်အံၣ်အုဒီးစီၤအၤဒၣ်န့ၣ် တဒိကနၣ်ကစၢ်ယွၤကလုၢ်ဘၣ်အဃိ ပဝဲကိးဂၤဒဲးန့ၣ် ပဒိးန့ၢ်ဘၣ်တၢ်ဒဲဘးဒီးတၢ်သံ ဘၣ်ဆၣ် ကစၢ်ယွၤအတၢ်တိာ်ပာ်လၢ ပှၤဟီၣ်ခိၣ်ဖိအဂီၢ်န့ၣ် တလီၤမၢ်ဒံးဘၣ်. တၢ်ကွဲးအသးလၢလံာ်စီဆှံအပူၤန့ၣ် ပာ်ဖျါထီၣ်ဝဲလၢ ယွၤအတၢ်တိာ်ပာ် တဆီတလဲနီတဘျီဘၣ်.
-
“ပှၤတီပှၤလိၤန့ၢ်ဘၣ်သါထံဧိၤကီၢ်ဧိၤ, ဒီးအိၣ်ဝဲဆိးဝဲ လီၤစိၤလီၤထီလီၤ.”—စံးထီၣ်ပတြၢၤ ၃၇:၂၉.
-
“တၢ်သံလီၤဘျၢလံလီၤထူလီၤယိာ်လံ, ဒီးကစၢ်ယွၤ ထွါကွံာ်မဲာ်ထံလၢ ကယဲၢ်ပှၤအမဲာ်.”—ယၡါယၤ ၂၅:၈.
-
“ဒုၣ်ဒါလၢအကဘၣ်တၢ်ဟးဂီၤ လၢခံကတၢၢ်န့ၣ်, မ့ၢ်တၢ်သံလီၤ.”—၁ ကရံၣ်သူး ၁၅:၂၆.
-
“ဒီးတၢ်သံတအိၣ်လၢၤဘၣ်, ဒီးတၢ်သူၣ်အုးသးအုး တအိၣ်လၢၤဘၣ်, ဒီးတၢ်ဟီၣ်တၢ်ယၢၤတအိၣ်လၢၤဘၣ်, ဒီးတၢ်ဘှံးသူၣ်ဘှံးသးတအိၣ်လၢၤဘၣ်.”—လီၣ်ဖျါ ၂၁:၄.
ကစၢ်ယွၤ ကမၤ ‘လီၤဘျၢကွံာ်တၢ်သံ’ မ့တမ့ၢ် ကမၤဟးဂီၤကွံာ်ဝဲ ဒုၣ်ဒါလၢအမ့ၢ် တၢ်သံန့ၣ်ဒ်လဲၣ်. ဒ်လံာ်စီဆှံပာ်ဖျါထီၣ်တ့ၢ်ဝဲအသိး “ပှၤတီပှၤလိၤ . . . အိၣ်ဝဲဆိးဝဲလီၤစိၤလီၤထီလီၤ.” တကးဒံးဘၣ် တဲစ့ၢ်ကီးဝဲလၢ “ပှၤအတီလၢအမၤတၢ်ဂ့ၤ . . . တအိၣ်ဘၣ်လၢ ဟီၣ်ခိၣ်ချၢနီတဂၤဘၣ်.” (စံၣ်တဲၤတဲလီၤတၢ် ၇:၂၀) ကစၢ်ယွၤကဒုးအိၣ်မူဝဲ ပှၤတၢ်ဒဲးဘးဖိတဖၣ် လီၤထူလီၤယိာ်အဂီၢ်န့ၣ် မ့ၢ်အကပာ်တ့ၢ်ကွံာ်ဝဲ အနီၢ်ကစၢ်တၢ်သိၣ်တၢ်သီဧါ. တမ့ၢ်ဘၣ်. အတမၤဝဲဒ်န့ၢ်နီတဘျီဘၣ် ခီဖျိအမ့ၢ် “ယွၤလၢအကတိၤတၢ်ကဘျံးကဘျၣ် တသ့ဘၣ်တဂၤ” လီၤ. (တံတူး ၁:၂) မ့မ့ၢ်ဒ်န့ၣ်န့ၣ် ကစၢ်ယွၤကမၤလၢပှဲၤထီၣ် အတၢ်တိာ်ပာ်လၢ ပှၤဟီၣ်ခိၣ်ဖိအဂီၢ်ဒ်လဲၣ်.
ကစၢ်ယွၤ “ကမၤဟးဂီၤကွံာ် တၢ်သံလီၤထူလီၤယိာ်လီၤ.”—ယၡါယၤ ၂၅:၈, ခ့ခါစှီၤကျိာ်.
ခီဖျိလၢတၢ်ပှ့ၤက့ၤအဃိ မၤနၢၤဝဲတၢ်သံ
ဒ်သိး ကစၢ်ယဟိဝၤယွၤ ကထုးထီၣ်ကွံာ်ပှၤလၢတၢ်သံအဂီၢ်န့ၣ် လၢတၢ်အဲၣ်တၢ်ကွံအပူၤ အဝဲကတဲာ်ကတီၤန့ၢ်ပှၤ တၢ်ပှ့ၤက့ၤန့ၣ်လီၤ. တၢ်ပှ့ၤက့ၤန့ၣ် အခီပညီမ့ၢ်ဝဲ တၢ်တမံၤမံၤလၢ အလုၢ်အပှ့ၤထဲသိးတုၤသိး မ့တမ့ၢ် ဟ့ၣ်က့ၤတၢ်အပှ့ၤလၢ တၢ်တီတၢ်လိၤအပူၤ. ပှၤဟီၣ်ခိၣ်ဖိခဲလၢာ်န့ၣ် မ့ၢ်ဝဲပှၤတၢ်ဒဲဘးဖိအဃိ ကဘၣ်သံဝဲလီၤ. လံာ်စီဆှံပာ်ဖျါထီၣ်ဝဲလၢ “ပှၤကညီပှ့ၤက့ၤအဒီပုၢ်ဝဲၢ် တသ့ဘၣ် လ့ၤတက့ၤဘၣ်. ဟ့ၣ်တၢ်မၤပူၤဖျဲးအီၤလၢ ယွၤတသ့ဘၣ်. (အဂ့ၢ်ဒ်အံၤ, အသးအပှ့ၤမ့ၢ် တၢ်လုၢ်ဒိၣ်ပှ့ၤဒိၣ်, ဒီးဆိတ့ၢ်ဝဲလီၤထူလီၤယိာ်).”—စံးထီၣ်ပတြၢၤ ၄၉:၇, ၈.
ဖဲပှၤတလၢတပှဲၤဘၣ်တဂၤသံအခါ မ့ၢ်ဝဲအဟ့ၣ်က့ၤ အနီၢ်ကစၢ်တၢ်ဒဲဘးအဘူးအလဲန့ၣ်လီၤ. ဒီးဟ့ၣ်တၢ်မၤပူၤဖျဲးလၢအနီၢ်ကစၢ်အဂီၢ် ဒီးပှၤဂၤအတၢ်ဒဲဘး အဂီၢ်တသ့ဘၣ်. (ရိမ့ၤ ၆:၇) ပလိၣ်ဘၣ်ဝဲပှၤလၢ အလၢအပှဲၤဒီးအတၢ်ဒဲဘး တအိၣ်ဘၣ်တဂၤ လၢကဟ့ၣ်လုၢ်ထီၣ်အသးလၢပဂီၢ် ဒီးတမ့ၢ်လၢအနီၢ်ကစၢ် တၢ်ဒဲဘးအဂီၢ်ဘၣ်.—ဧ့ၤဘြံၤ ၁၀:၁-၄.
ဒ်န့ၣ်အသိး ယဟိဝၤယွၤရဲၣ်ကျဲၤဝဲ တၢ်ပှ့ၤက့ၤန့ၣ်လီၤ. အဃိ အဝဲဆှၢလီၤဝဲ အဖိခွါယ့ၣ်ၡူး ဆူဟီၣ်ခိၣ်ချၢ ဒ်ပှၤလၢပှၤပှဲၤဒီး အတၢ်ဒဲးဘးတအိၣ်ဘၣ် တဂၤအသိးန့ၣ်လီၤ. (၁ ပ့းတရူး ၂:၂၂) ယ့ၣ်ၡူးတဲဝဲလၢ အဟဲလီၤဒ်သိးအက “ဟ့ၣ်လီၤအသးလၢ ပှၤကညီအါဂၤအပှ့ၤလီၤ.” (မၢ်ကူး ၁၀:၄၅) အတၢ်သံန့ၣ်ကပှ့ၤက့ၤပှၤလၢ တၢ်ဒဲဘးဒီးတၢ်သံ ဒ်သိးပကအိၣ်မူဘၣ် လီၤထူလီၤယိာ်အဂီၢ်န့ၣ်လီၤ.—ယိၤဟၣ် ၃:၁၆.
တၢ်သံန့ၣ် ကလီၤမၢ်ကွံာ်အခါဖဲလဲၣ်
မုၢ်မဆါတနံၤအံၤ ဝံအတၢ်စံးပာ် ဟဲလၢထီၣ်ပှဲၤထီၣ်ဝဲ ခီဖျိလၢပအိၣ်မူဘၣ်လၢ “မုၢ်နံၤအခံကတၢၢ်တဖၣ်အပူၤ” ဒီးပထံၣ်ဘၣ် “အဆၢကတီၢ်လၢ အကီအခဲ” အဃိဟီၣ်ခိၣ်အံၤပှဲၤဝဲဒီး တၢ်အၢတၢ်သီတဖၣ်န့ၣ်လီၤ. (၂ တံၤမသ့း ၃:၁) ဒီးဆၢကတီၢ်ကဘၣ်လၢ “မုၢ်စံၣ်ညီၣ်အနံၤ, ဒီးပှၤတယူးယီၣ်ဘၣ်ယွၤဘၣ် ကတုၤတၢ်ဟးဂီၤအကတီၢ်န့ၣ်လီၤ.” (၂ ပ့းတရူး ၃:၃, ၇) ဒီးပှၤလၢအအဲၣ်ကစၢ်ယွၤတဖၣ်န့ၣ် ကပူၤဖျဲးထီၣ်လၢ တၢ်စံၣ်ညီၣ်အမုၢ်နံၤ ဒီးကဒိးန့ၢ်ဘၣ်တၢ်ဆိၣ်ဂ့ၤလၢအမ့ၢ် “တၢ်မူအထူအယိာ်” န့ၣ်လီၤ.—မးသဲ ၂၅:၄၆.
ပှၤလၢအကကွဲၢ်တဖၣ် ဖဲအဝဲသ့ၣ်သမူထီၣ်က့ၤအခါ ကဒိးန့ၢ်ဘၣ်ဝဲ တၢ်မူလီၤထူလီၤယိာ်န့ၣ်လီၤ. ဖဲယ့ၣ်ၡူးလဲၤလၢ ဝ့ၢ်နၤအံၣ်အခါန့ၣ် အဝဲမၤသမူထီၣ်ဝဲပှၤသံန့ၣ်လီၤ. ပှၤမုၣ်ကမဲလၢ အဖိခွါအိၣ်ထဲတဂၤဧိၤန့ၣ်သံဝဲဒီး ယ့ၣ်ၡူး “သးကညီၤအီၤ” ဒီးမၤသမူထီၣ်က့ၤ ဖိသၣ်ပိာ်ခွါတဂၤန့ၣ်လီၤ. (လူၤကၣ် ၇:၁၁-၁၅) တၢ်မၢဖိပီလူးတဲစ့ၢ်ကီးဝဲလၢ “ယအိၣ်ဒီးတၢ်မုၢ်လၢ် ဘၣ်ဃးဒီးယွၤလၢအ . . . အၢၣ်လီၤအီလီၤ, လၢပှၤသံအ တီမ့ၢ်ဂ့ၤ, တတီဘၣ်မ့ၢ်ဂ့ၤ, ကဂဲၤဆၢထၢၣ်က့ၤလီၤ.” တၢ်မုၢ်လၢ်လၢ ပနာ်အီၤသ့အံၤ ပာ်ဖျါထီၣ်လၢ ကစၢ်ယွၤအဲၣ်ပှၤဟီၣ်ခိၣ်ဖိ သပှၢ်ကတၢၢ်န့ၣ်လီၤ.—မၤတၢ်၂၄:၁၅.
ပှၤအကကွဲၢ်လၢအကထိတဖၣ် အိၣ်ခိးကွၢ်လၢ်ဝဲလၢ ကအိၣ်မူဘၣ်လီၤထူလီၤယိာ်န့ၣ်လီၤ. လံာ်စီဆှံတဲဝဲလၢ “ပှၤတီပှၤလိၤန့ၢ်ဘၣ်သါထံဧိၤကီၢ်ဧိၤ, ဒီးအိၣ်ဝဲဆိးဝဲ လီၤစိၤလီၤထီလီၤ.” (စံးထီၣ်ပတြၢၤ ၃၇:၂၉) ဒီးပူၤကွံာ်အနံၣ် ၂,၀၀၀ ဃၣ်ဃၣ်န့ၣ် တၢ်မၢဖိပီလူး ကွဲးတ့ၢ်ဝဲလၢ “တၢ်သံဧၢ, နစုကဝဲၤအိၣ်ဖဲလဲၣ်. ပျုၤပူဧၢ, နတၢ်မၤနၢၤမၤဃၣ်အိၣ်ဖဲလဲၣ်” န့ၣ် ကဟဲလၢထီၣ်ပှဲၤထီၣ်ဝဲလၢ ပှၤသံသ့ၣ်တဖၣ်အဂီၢ် ဒီးဖဲန့ၣ်အဆၢကတီၢ် အဝဲသ့ၣ်ကဒိးန့ၢ်ဘၣ်တၢ်သူၣ်ခုသးခု ဒီးကသူၣ်မံသးမံဝဲ သပှၢ်ကတၢၢ်န့ၣ်လီၤ. (၁ ကရံၣ်သူး ၁၅:၅၅) ဒီးပှၤဟီၣ်ခိၣ်ဖိတဖၣ် ကမၤနၢၤဝဲ ဒုၣ်ဒါလၢအမ့ၢ်တၢ်သံန့ၣ်လီၤ.