Manipud Kadagiti Agbasbasa

Panagregget a Mangsaranay Maysa a surat daytoy a mangipakaammo kadakayo iti kasta unay a panangapresiarko iti artikulo a “Pannakaiparangarang ti Ayat​—Panangsaranay a Naunday ken Narigat.” (Nobiembre 22, 2002) Idi nangrugi ti layus idiay Houston, Texas, idi Hunio 2002, nayospital ni manongko ta naawanan iti puot gapu iti pannakaatake ti pusona. Dandani interamente a nadadael ti balayna gapu iti layus. Ngem tinarimaan dayta dagiti Kristiano a kakabsattayo uray no awanan pay la idi iti puot ni manongko. Linikkiatda ti nabasa nga alpombra ken ti plaster a diding sada dinis-impekta ti balayna. Gapu iti tulongda, nabaelak a binantayan ni manongko idiay ospital. Idi agangay, nagsubli met laengen ti puotna. Pulos a di mayebkas iti ababa laeng a surat ti ayat ken panagyamanko ken ni Jehova ken iti nagsayaat nga organisasionna.

P. H., Estados Unidos

Kayatko ti agyaman gapu iti nakaskasdaaw a pribilehio a makitimpuyog iti kasta a nadungngo ken naayat a panagkakabsat. Makaparagsak a maammuan no kasano nga impaay dagiti boluntario ti tiempo ken sanikuada a timmulong kadagiti nalayus. Pudno a maysa dayta a panangipakita iti Nakristianuan nga ayat.

A. M., New Zealand

Narelihiosuan a Wayawaya Adda nangted kaniak iti kopia ti Hunio 22, 2002, a ruar ti Agriingkayo! nga addaan iti artikulo a “Napanuynoy a Pagarian iti Di Napanuynoy a Panawen.” Gapu ta ammona a mamatiak a maymaysa ti Dios, pagarupna nga interesadoak iti dayta. Husto isuna. Nagkolehioak idiay Estados Unidos ket naam-ammok a mismo ni Dr. Earl Morse Wilbur (a nadakamat iti artikulo). Tinabunuak met ti adu a lekteur maipapan iti pakasaritaan dagiti manamati a maymaysa ti Dios. Ngem diak maitured ti mangaramid iti nalawag nga artikulo a kas iti artikuloyo!

M. M., Czech Republic

Peggad a Maltotan Iti maysa a benneg ti “Manipud Kadagiti Agbasbasa” a Nobiembre 22, 2002, naklaatak a nangbasa iti subalit para iti maysa nga agbasbasa a nagsurat maipapan kadagiti hotdog a mabalin a pakaltotan dagiti ubbing. Mabalin met a maltotan dagiti ubbing kadagiti carrot!

A. R., Estados Unidos

Kastoy ti sungbat ti “Agriingkayo!”: Agyamankami kadagitoy a komento daytoy nga agbasbasa. Kastoy ti kinuna ti maysa a pagiwarnak maipapan iti panangaywan kadagiti ubbing: “Nupay naammuanen a maltotan dagiti ubbing kadagiti naiwa-iwa a mansanas, saan a naluto a naiwa a carrot, biskuit ken popcorn, ti uppat a taraon a pakatayan ti kaaduan ket dagiti hotdog, bukbukel, natangken a kendi ken ubas.” Nupay kasta, mamakdaar dagiti agay-aywan iti salun-at a ti pannangan kadagiti naiwa a carrot ket talaga a napeggad kadagiti maladaga nga awan pay makatawenda.

Panagimprenta iti Biblia Pagyamanan iti artikulo a “Maysa a Pagkamangan Para iti Panagimprenta ti Biblia.” (Setiembre 8, 2002) Naglaka itan a makaalakami iti Biblia iti bukodmi a lenguahe isu a mabalin a malipatanmi dagiti sakripisio nga inaramid dagiti tattao tapno magun-odan ti Biblia iti mismo a lenguaheda. Ti panagbasak iti daytoy nga artikulo ti nangpauneg iti panangapresiarko iti naayat a nailangitan nga Amatayo ken ti pannakaseknanna a mangidanon iti Biblia kadagiti amin a nasingpet ti panagpuspusoda a tattao.

E. S., Brazil

Postpartum Depression Nasken nga agsuratak kadakayo gapu iti artikulo a “Nagballigiak a Nakidangadang iti Postpartum Depression.” (Hulio 22, 2002) Karkarna met ti nariknak kalpasan nga impasngayko ti anakko. Nariknak ti amin a nadeskribir iti artikuloyo. Mabainak idi a mangipakaammo iti dayta iti sabsabali. Nagamkak pay di la ket ta di maawatan ni lakayko. Isu a nagsagabaak a bukbukodko, ta diak ammo no ania ti diperensiak. Anian a yamanko ken Jehova ken kadakayo gapu iti daytoy a tulong! Nupay mabalin a pasaray agtultuloy a mapasarak ti depression, nalaklakanton nga ibturak dayta.

F. L., Belarus