[mabalin a, Dagiti Runo].

 Maysa kadagiti disso a nadakamat a tumukoy iti lugar a sadiay a nagsao ni Moises kadagiti Israelita idi maika-40 a tawen ti panagallaallada idiay let-ang. (De 1:1, Rbi8 ftn) Imbes a “Suf,” naaramat ti “Nalabaga a Baybay” iti Griego a Septuagint (Bagster) ken iti Latin a Vulgate, nalabit gapu ta naipagarup a naikkat ti Hebreo a sao a yam (kaipapananna ti “baybay”), a nabati ti Suph kas pangababaan ti yam-suphʹ (Nalabaga a Baybay). No ti kasasaad, ti matuktukoy ket isu ti maysa a paset dayta a baybay a naawagan Gulpo ti ʽAqaba. Nupay kasta, no tarusan a literal, kuna ti Hebreo a Masoretiko a teksto a nagsao ni Moises iti Israel “iti desierto a tantanap iti sanguanan ti Suf.” Ket innayon pay ti De 1 bersikulo 5 nga adda daytoy “idiay rehion ti Jordan iti daga ti Moab.” Gapuna, nupay saan nga ammo ti eksakto nga ayanna, agparang a ti Suf ket maysa a lugar iti daya ti Jordan. Nupay saan a sigurado, naikuna nga isu dayta ti Khirbet Sufa, agarup 6 km (3.5 mi) iti abagatan nga abagatan-a-daya ti Madaba.