Maysa nga arkos a bato a klase ti agata (maysa a kita ti kalsedonia). Daytoy ket maysa nga onix a buklen ti dua wenno nasursurok pay a palunapin ti maragatas a puraw a kalsedonia ken aganninaw a nalabaga a sardo. Ngem no dadduma, nabalitokan wenno kayumanggi ti sabali pay a palunapin. Ti nalabaga a palunapin nga aganninaw iti puraw a palunapin ket agparang kadagiti Griego a kasla maris ti kuko, a nalabit daytoy ti makagapu nga inawaganda dayta iti Griego a sao nga oʹnyx (kaipapananna ti “kuko ti ramay”). Masarakan ti sardonika iti nadumaduma a lugar, a pakairamanan ti Palestina ken Arabia.

 Naminsan a nadakamat daytoy a bato iti Biblia, iti Apocalipsis 21:2, 19, 20, a sadiay maikalima ti sardonika kadagiti pamuon a bato “ti nasantuan a siudad, ti Baro a Jerusalem.”