Maysa a ramit iti panagsurat babaen iti tinta wenno umasping a pluido. No dagiti nagkauna a tattao agsuratda idi iti pila, allid, wenno nalukneng a metal agaramatda iti pagyurit (kitaenyo ti PAGYURIT), ngem ti panagsurat naaramid met iti pergamino wenno papiro babaen iti pluma ken tinta. (3Jn 13; 2Jn 12) Ti Griego a sao a naipatarus a “pluma” (kaʹla·mos) tumukoy iti maysa a runo wenno unas ken mabalin a literal nga ipatarus a “pagsurat a runo.” Kadagiti kadaanan nga Egipcio, ti runo a pluma naaramid nga addaan iti leppap a sukog-paet nga ulo a naiwa wenno nagisgis tapno makapagpaay a kasla brutsa. Mabalin a napamagaan ken napatangken dagiti runo babaen ti panangisuksok kadagita iti bumbunton ti ibleng iti sumagmamano a bulan, kas iti kaugalian iti nabiit pay a tawtawen. Dagiti Griego ken Romano nagar-aramatda kadagiti runo a pluma a natirad ken nagisgis, kas iti naaramid kadagiti dutdot a pluma idi agangay ken kas naaramid uray kadagiti nabiit pay a tiempo kadagiti pagikur-it ti pluma.