Nalatak a siudad iti Pamfilia a probinsia ti Roma. Maikunkuna a ti rebrebba ti kadaanan a Perga ket asideg iti moderno a purok ti Murtana, agarup 13 km (8 mi) manipud makin-abagatan a kosta ti Asia Menor ken agarup 8 km (5 mi) iti laud ti Karayan Cestrus (Aksu). Agparang nga idi un-unana, madaliasat daytoy a karayan agingga iti Perga iti amianan, sigun iti Griego a geograpo a ni Strabo. (Geography, 14, IV, 2) Nupay kasta, agparang a ti kabangibang nga Atalia iti kosta ti Pamfilia ti nagserbi a sasangladan ti Perga, nga idi agangay napatpateg pay ngem iti Perga.​—Idiligyo ti Ara 14:24-26.

 Ditoy a siudad ti immayan ni apostol Pablo ken dagiti kakaduana bayat ti nasapa a paset ti umuna a panagbaniagana kas misionero. (Ara 13:13) Iti arinunos dayta, inwaragawagda ti “sao idiay Perga,” ngem saan nga ammo no adda asinoman kadagiti umili ti nangawat iti Nakristianuan a pammati.​—Ara 14:24, 25.