KADAGIDI tiempo ti Biblia, ti Megiddo ket nakapatpateg iti isuamin, yantangay nagsayaat a lugar ti ayanna ken mawanawananna dagiti kangrunaan a ruta ti komersio ken militar. Ti ginget a tanap iti sakaananna ti nakaaramidan ti adu a panagpipinnarmek. Gapuna, maitutop a ti um-umayen a “gubat ti naindaklan nga aldaw ti Dios a Mannakabalin-amin” ket awagan ti libro ti Apocalipsis iti Har–Magedon (manipud Heb., kaipapananna ti “Bantay ti Megiddo”). Nupay kasta, saan nga idiay literal a Megiddo ti pakaaramidanto daytoy a gubat. Mairamanto iti dayta ti “ar-ari iti intero a mapagnaedan a daga.” (Apo 16:14, 16) Iti dayta a gundaway, awanto ti agballigi a natauan nga agturay. Ti Pagarian ti Dios ti mangabakto kadakuada amin, ket alangonenna ni Jehova a Dios, ti Mannakabalin-amin, kas Soberano iti Uniberso.