Maysa a Romano nga opisial ti buyot wenno senturion iti bunggoy ni Augusto nga adda iti sidong ti panangaywanna ni Pablo idi nagdaliasat nga agturong idiay Roma. (Ara 27:1; kitaenyo ti AUGUSTO, BUNGGOY NI; OPISIAL TI BUYOT.) Manipud panangrugi ti panaglayag, nalawag nga imbilang ni Julio a saan a gagangay a balud ni Pablo isu nga impakitaanna iti kinamanangngaasi, kas koma iti panangpalubosna kenkuana a sumanglad tapno sumarungkar iti gagayyemna idiay Sidon. Nupay kasta, idi imbaga ni Pablo a napeggad no agtuloyda nga aglayag, ti naiduma a kapanunotan ti piloto ken ti makinkukua iti barko ti inimdengan ni Julio. Idi agangay, linapdan dagiti soldado ni Julio ti panagtalaw dagiti lumalayag, kas panangtungpalda iti sasao ni Pablo: “Malaksid no dagitoy a lallaki agtalinaedda iti barangay, saankayo a maisalakan.” Idi narba ti barko, inispal ni Julio ti biag ni Pablo babaen ti saanna a panangipalubos a dagiti soldado papatayenda dagiti balud.​—Ara 27:1-44.