1. Maysa kadagiti 12 nga annak ni Ismael nga anak ni Abraham iti kamalalana a ni Agar.​—Ge 25:12-15; 1Cr 1:28-30.

  2. Simmuno nga ari ti Edom kalpasan ti ipapatay ni Husam. “Ni Hadad nga anak ni Bedad, a nangparukma kadagiti Midianita idiay tay-ak ti Moab,” nalabit nagturay manipud siudad ti Avit.​—Ge 36: 31, 35, 36; 1Cr 1:46, 47.

  3. Sabali pay nga ari ti Edom; asawa ni Mehetabel. Ni Hadad ti nangsuno ken Baal-hanan iti trono, ket “ti nagan ti siudadna Pau.” (1Cr 1:43, 50, 51) Isu naawagan Hadar iti Genesis 36:39, a mabalin a gapu iti biddut ti eskriba, yantangay agkaarngi unay dagiti Hebreo a letra a katupag ti “r” (ר) ken “d” (ד).

  4. Kameng ti Edomita a naarian a pamilia ken maysa a mangrirriribuk iti Israel bayat ti panagturay ni Solomon. Idi ubing pay laeng, ni Hadad (kaduana ti sumagmamano nga adipen ni amana) ket nagkamang idiay Egipto, a limmasatda iti Paran tapno malisianda ti pananggudas ni Joab iti amin a lallaki ti Edom. Idiay Egipto, siaasi a naawat ni Hadad ken dagidiay naikuyog kenkuana,  a sadiay inikkan ni Faraon iti balay kasta met iti taraon ken daga, ket idi agangay intedna pay ti mismo nga ipagna kas asawa. Babaen iti daytoy a babai, naaddaan ni Hadad iti anak nga agnagan Genubat, a nagnaed iti mismo a balay ni Faraon a kadua ti annak ni Faraon. Apaman a naammuanna a natayen ni Ari David ken ni Joab, nagsubli ni Hadad idiay Edom ket isu nagbalin a “manangsupiat” ken Solomon.​—1Ar 11:14-22, 25.

  5. Naibilang ni Hadad (Adad iti Akkadiano) kas kangrunaan a didiosen ti kadaanan a Siria ken gagangay a naikuna nga isu ni Rimmon. Agparang ti nagan a Hadad kas paset ti nagnagan ti sumagmamano nga ar-ari ti Siria, kas kada Ben-hadad (1Ar 15:18) ken Hadadezer (1Ar 11:23), ken agparang met iti nagan a Hadadrimmon.​—Zac 12:11; kitaenyo ti HADADRIMMON.