Ti agagsep, nalagda, nalaka a mabennat a pannakabalabala ti bagi ti sumagmamano nga animal iti danum a naruay a masarakan iti dandanum ti makindaya a paset ti Baybay Mediteraneo ken iti dadduma pay a lugar. Iti napalabas a kas iti agdama, dagiti espongha nalabit maala dagiti bumabatok babaen ti panangaramatda kadagiti imada tapno ikkatenda dagita manipud batbato iti uneg ti danum. Kalpasan a matay ti sibibiag nga animal ken agrupsa iti iskeletonna, naan-anay a maugasan ti espongha agingga a ti iskeleton laengen ti mabati.

 Gapu iti pannakabael ti espongha nga agagsep kadagiti likido ken kalpasanna mapespes, nagbalin a napateg dayta iti komersio kadagidi nagkauna a tiempo. Bayat nga adda idi ni Jesu-Kristo iti kayo a pagtutuokan, naitukonan iti naalsem nga arak a naikabil iti espongha nga adda iti murdong ti maysa a runo.​—Mt 27:48; Mr 15:36; Jn 19:29.