Siudad nga imbangon ni Nimrod idiay Asiria ken sigud a paset “ti naindaklan a siudad” a buklen ti Nineve, Cala, Resen, ken Rehobot-Ir, a ti naud-udi a tallo a lugar ket nalabit kabangibang ti Nineve. (Ge 10:9-12) Ti Cala agparang kas Kalhu kadagiti Asirio a cuneiform a teksto, ket bayat ti panawen ti Imperio ti Asiria, nagbalin dayta kas maysa kadagiti tallo a kangrunaan a siudad iti pagarian, a pakairamanan ti Nineve ken Assur. Adda ti Cala iti makin-amianan a daya a suli ti lugar a pagsabtan ti Dakkel a Karayan Zab ken ti Tigris, agarup 35 km (22 mi) iti abagatan nga abagatan-a-daya ti Nineve. Ti moderno a nagan ti disso ket Nimrud, iti kasta nataginayon ti nagan ti nagkauna a nangbuangay iti dayta a siudad.

 Idi maikasiam a siglo K.K.P., kinuna ni Ashurnasirpal II a napasublina ti siudad manipud nagrakaya a kasasaadna ket pinagbalinna a kabeserana, a nangibangon iti nagdadakkel a pader a nasarikedkedan iti adu a torre, maysa a naarian a palasio, ken temtemplo; karaman kadagitoy ti maysa a ziggurat a torre nga agarup 38 m (125 pie) ti katayagna. Ipakita ti panagsirarak a ti siudad saklawenna ti 358 ek (885 acre) ken saan laeng nga addaan kadagiti palasio, templo, ken balbalay no di ket addaan pay kadagiti hardin ken minuyongan, nga agtaud ti danumna iti maysa a nakali a kanal manipud Karayan Zab. Iti bangkete nga inangay ni Ashurnasirpal idi nairingpas ti baro a kabeserana, naikuna a nairaman ti amin nga agnanaed iti siudad kasta met dagiti sangaili a dignitario, a nagdagup iti 69,574 a tattao.

 Idi nakabakab dagiti rebba ti Cala, natakuatan ti sumagmamano a kasayaatan nga ebidensia ti Asirio nga arte, a pakairamanan dagiti nagdadakkel a nagpayak a leon a tao ti uloda ken dagiti nagpayak a toro, adu a nagdadakkel a timmambukor a kitikit a nayintar kadagiti diding ti palasio, ken kasta met ti nakaad-adu a marfil a banag a nakapimpintas ti pannakakitikitda. Nasarakan ti maysa a nakasaysayaat ti pannakataginayonna nga estatua ni Ashurnasirpal, kasta met ti bato a natukoy kas Nangisit nga Obelisko ni Salmaneser III, a mangdakdakamat ken Ari Jehu ti Israel kas agbaybayad iti impuesto iti Asiria.​—Kitaenyo ti SALMANESER Num. 1.

 Kamaudiananna, napaglangalang ti Cala agraman ti sabsabali pay a naarian a siudad iti pagarian idi natnag ti Imperio ti Asiria.