Ti kadadayaan kadagiti dua nga intar ti bambantay a mangbukel iti kabambantayan ti Libano. Ti Kabambantayan ti Anti-Libano kaassibayna ti Kabambantayan ti Libano iti agarup 100 km (60 mi), nga aglayon manipud nangato a lantag ti Basan, iti daya ti Dan, agingga iti dakkel a Tanap ti Emesa, saan nga adayo manipud iti ayan ti Ribla. Iti nagbaetan dagitoy dua nga intar ti bambantay, adda maysa nga atiddog a ginget a naporma gapu iti Karayan Orontes ken Karayan Litani, maawagan dayta iti Coele-Siria (“Lungog a Siria”) wenno Beqaʽ.​—Jos 11:17.

 Iti amianan, ti tapawna ket akikid ken naballaballaetan iti agsasaruno a nangangato a pantok. Ti makintengnga a pasetna ket ak-akaba, nangatngato, ken natibtibbakol, idinto ta ti makin-abagatan a paset ket gessaten ti atitiddog a naapres a ginget a lumasat nga agpadaya ken agpaabagatan. Iti daya ti kangrunaan a tapawna, adda dagiti agsasaruno a nangato a lantag nga in-inut a bumaba agingga iti patas ti Tantanap ti Damasco. Karaman iti makin-abagatan a pasetna ti Bantay Hermon, a dumanon iti kangato a 2,814 m (9,232 pie). Ti langa dagitoy a bantay ket umasping iti Kabambantayan ti Libano, ket kaaduanna a buklen dagita ti apug a bato, nga addaan iti maris-dapo a rangrangkis ken nagbukel a maris-dapo a taptapaw.

 Ti Kabambantayan ti Anti-Libano ket nabatad a natukoy iti Hebreo babaen iti nagan nga “Amanah” iti Kanta ni Solomon 4:8, a nadakamat sadiay mainaig iti Bantay Hermon. Nupay ipapan ti dadduma a ti Amanah ket maysa nga espesipiko a pantok ti bantay, agparang a tumukoy dayta iti intero a Kabambantayan ti Anti-Libano wenno iti sumagmamano a pasetna. Agkadua a nadakamat dagiti kabambantayan ti “Libana” ken “Ammanana” kadagiti kitikit dagiti Asirio a monarka a da Tiglat-pileser III ken Senaquerib. Ti Karayan Abana (agdama a Barada) ket naawagan met iti “Amanah” iti 2 Ar-ari 5:12 iti Syriac a Peshitta ken kadagiti Aramaiko a Targum, ket daytoy a karayan, a kangrunaan a karayan ti Damasco, aggubuay iti makin-abagatan a paset ti bambantay ti Anti-Libano. Gapuna, daytoy a nagan ket mabalin a tumukoy iti dayta a paset ti kabambantayan wenno iti intero a kabambantayan.

 Yantangay saan a maabbungotan iti niebe ti kangrunaan a paset ti Kabambantayan ti Anti-Libano, manmano laeng sadiay ti karayan wenno waig. Manmano ti agtubo a mulmula, ngem iti nadumaduma a paset dagiti bakrasna adda dagiti makita a narasay a kabakiran a buklen ti babassit a roble ken kaykayo a parwa. Sumagmamano laengen a sedro ti nabati ita. Kadagiti nababbaba a bakras, adda pay laeng dagiti kaubasan, kaolibuan, ken minuyongan, kas met laeng idi tiempo ti Biblia.