[nagtaud iti sao a kaipapananna ti “nalabaga”; mabalin a Nalabaga a Batbato].

 Ti sasang-atan ti Adummim ket maysa a nasagpat a bessang nga agarup 12 km (7.5 mi) iti daya nga amianan-a-daya ti Jerusalem ken adda iti tengnga ti nagbaetan dagiti siudad ti Jerico ken Jerusalem. Sumang-at dayta manipud iti nababa a Ginget Jordan agingga iti kabambantayan a rehion ti Juda. Manipud idi un-unana agingga ita, ti dalan iti nagbaetan dagitoy dua a siudad ket lumasat iti daytoy a bessang. Nupay kasta, iti rekord ti Biblia nadakamat laeng dayta kas beddeng iti nagbaetan dagiti teritoria ti Juda ken Benjamin.​—Jos 15:7; 18:17.

 Iti Arabiko, ti bessang maawagan Talʽat ed-Damm (kaipapananna ti “Sasang-atan ti Dara”) ket iti Hebreo Maʽale Adummim (kaipapananna ti “Sasang-atan ti Adummim”). Nupay ibilang ti sumagmamano a nagkauna a mannurat a namunganay ti nagan gapu iti pannakaibukbok ti dara a gapuanan dagiti mannanakaw ken tulisan, ti ad-adda a posible a pannakailawlawagna isu ti lumabaga a maris ti daga gapu kadagiti naparang a naipattopattok nga ocher. Kanayon a napeggad daytoy a ruta gapu ta  langalang ti rehion ken agraraira idi ti panagtakaw, ket manipud idi nagkauna a tiempo napagtalinaed sadiay ti maysa a sarikedked tapno masalakniban dagiti agdaldaliasat. Gapu itoy, naisingasing a ti disso isu ti nakadangranan ti managdaliasat ‘iti dalanna a sumalog nga agturong iti Jerico,’ kas nadakamat iti pangngarig ni Jesus maipapan iti manangsaranay a Samaritano.​—Lu 10:30-37.

 Yantangay ti sasang-atan ti Adummim ket adda iti abagatan, “ti naapres a ginget” a nadakamat iti Josue 15:7 nabatad nga isu ti Wadi el Qilt, nga umassibay iti dalan ken lumasat iti mismo nga abagatan ti Jerico iti panagturongna iti Karayan Jordan.