Tito 3:1-15
3 Itultuloymo a palagipan ida nga agpasakup+ ken agtulnogda kadagiti gobierno ken autoridad kas agtuturay,+ a sisasaganada iti tunggal naimbag nga aramid,+
2 a saanda nga agsao iti makadangran iti asinoman, saanda a mannakiringgor,+ nga agbalinda a nainkalintegan,+ nga ipakitada ti isuamin a kinaalumamay kadagiti amin a tattao.+
3 Ta uray datayo idi naminsan nakunengtayo, nasukir, mayaw-awan, paad-adipen iti nadumaduma a tarigagay ken ragragsak, agtultuloy iti kinadakes ken apal, makaparurod, aggiginnura iti maysa ken maysa.+
4 Nupay kasta, idi a ti kinamanangngaasi+ ken ti ayat iti tao iti biang ti Manangisalakantayo,+ ti Dios, naiparangarang,+
5 saan a maigapu iti ar-aramid+ iti kinalinteg nga inaramidtayo,+ no di ket maitunos iti asina+ insalakannatayo babaen ti panangbuggo+ a nangiturong kadatayo iti biag+ ken babaen ti panangpabaro kadatayo babaen ti nasantuan nga espiritu.+
6 Daytoy nga espiritu sibabaknang nga imparukpokna kadatayo babaen ken Jesu-Kristo a Manangisalakantayo,+
7 tapno, kalpasan a maideklaratayo a nalinteg+ babaen ti bileg ti di kaikarian a kinamanangngaasi dayta,+ agbalintayo koma nga agtawid+ maitunos iti namnama nga agnanayon a biag.+
8 Matalek ti pagsasao,+ ket maipapan kadagitoy a banag tarigagayak a mangaramidka a naynay kadagiti natibker a panangipapati, tapno dagidiay namati iti Dios maipamaysada ti pampanunotda iti panangtaginayon kadagiti nasayaat nga aramid.+ Dagitoy a banag nasayaat ken makagunggonada kadagiti tattao.
9 Ngem adaywam dagiti minamaag a panagus-usisa+ ken kapkapuonan+ ken ringgor+ ken panagaapa maipapan iti Linteg,+ ta saanda a makagunggona ken barengbarengda.
10 No maipapan iti tao a mangitandudo iti maysa a sekta,+ laksidem+ kalpasan ti umuna ken ti maikadua a panamagbaga;+
11 yantangay ammom a ti kasta a tao naisiasi iti dalan ken agbasbasol, ta isu konkondenarenna ti bagina.+
12 Inton ibaonko kenka ni Artemas wenno ni Tiquico,+ ikagumaanam ti umay kaniak idiay Nicopolis, ta sadiay ti naikeddengko a pangpalabasan iti kalam-ekna.+
13 Siaannad nga abastuam ni Zenas, a nalaing iti Linteg, ken ni Apolos maipaay iti panagdaliasatda, tapno saanda koma nga agkurang iti aniaman a banag.+
14 Ngem sursuruen met koma dagiti kakaduatayo ti mangtaginayon iti nasayaat nga ar-aramid tapno maipaayda dagiti nasken unay a kasapulanda,+ tapno saanda nga agbalin a di nabunga.+
15 Amin dagidiay naikuyog kaniak ipaw-itda dagiti kablaawda kenka.+ Idanonmo dagiti kablaawko kadagidiay addaan panagayat kadatayo iti pammati.
Ti di kaikarian a kinamanangngaasi maadda koma kadakayo amin.+
