Joel 3:1-21
3 “Ta, adtoy! kadagidiay nga aldaw ken iti dayta a tiempo,+ inton isublik dagidiay kautibo iti Juda ken Jerusalem,+
2 ummongekto met a sangsangkamaysa dagiti amin a nasion+ ken isalogko ida iti nababa a tanap ni Jehosafat;+ ket isaadkonto ti bagik a mangukom kadakuada sadiay maigapu iti ilik ken iti tawidko nga Israel,+ nga inwarawarada kadagiti nasion; ket biningaybingayda ti bukodko a daga.+
3 Ket ti ilik nagtultuloy a nagbibinnunotanda;+ ket itedda ti ubing a lalaki a maisukat iti balangkantis,+ ket ti ubing a babai inlakoda a maisukat iti arak, tapno makainumda.
4 “Ket, kasta met, ania ti pakaibianganyo kaniak, O Tiro ken Sidon+ ken dakayo amin a rehion ti Filistia?+ Isu kadi dayta ti panangtrato nga ipapaayyo kaniak kas gunggona? Ket no ipaayandak iti kasta a panangtrato, sisisiglat, sipapardas a supapakakto ti panangtratoyo iti rabaw dagiti uloyo.+
5 Agsipud ta innalayo ti bukodko a pirak ken ti bukodko a balitok,+ ket impanyo kadagiti temployo ti bukodko a makaay-ayo a naimbag a bambanag;+
6 ket ti annak ti Juda ken ti annak ti Jerusalem inlakoyo+ iti annak dagiti Griego,+ iti panggep nga iyadayoyo ida iti bukodda a teritoria;+
7 adtoy gutugotek ida nga umay manipud iti disso a nangilakuanyo kadakuada,+ ket supapakakto ti panangtratoyo iti rabaw dagiti bukodyo nga ulo.+
8 Ket ilakokto ti annakyo a lallaki ken ti annakyo a babbai iti ima ti annak ti Juda,+ ket ilakodanto ida kadagiti lallaki ti Sheba,+ iti maysa a nasion nga adayo;+ ta ni met laeng Jehova sinaona dayta.
9 “Iwaragawagyo daytoy iti tengnga dagiti nasion,+ ‘Mangsantipikarkayo iti gubat! Gutugotenyo dagiti mannakabalin a lallaki!+ Umasidegda koma! Sumang-atda koma, amin dagiti lallaki ti gubat!+
10 Pitpitenyo dagiti subsob ti aradoyo a pagbalinen a kamkampilan ken dagiti pangarbas a gettengyo+ a pagbalinen a gaygayang. No maipapan iti daydiay nakapuy, kunaenna koma: “Mannakabalinak a lalaki.”+
11 Bumadangkayo ket umaykayo, dakayo amin a nasion iti aglikmut,+ ket aguummongkayo a sangsangkamaysa.’”+
Iti dayta a disso, O Jehova, paulogem dagidiay mannakabalinmo.+
12 “Magutugot koma dagiti nasion ket sumang-atda iti nababa a tanap ni Jehosafat;+ ta sadiay agtugawakto tapno ukomek dagiti amin a nasion iti aglikmut.+
13 “Mangiparaspaskayo iti kumpay,+ ta ti anien naluomen.+ Umaykayo, sumalogkayo, ta napnon ti pagpespesan iti ubas.+ Dagiti tangke a pagpespesan pudno nga aglippiasda; ta ti kinadakesda immadu.+
14 Rineprep, rineprep ti adda iti nababa a tanap ti pangngeddeng,+ ta ti aldaw ni Jehova asideg iti nababa a tanap ti pangngeddeng.+
15 Ti met laeng init ken bulan sigurado nga agsipngetdanto, ket dagiti mismo a bituen pudno nga ipaidamdanto ti kinaraniagda.+
16 Ket manipud iti Sion agungorto a mismo ni Jehova, ket manipud iti Jerusalem iyesngawnanto ti timekna.+ Ket sigurado nga agyugayogto ti langit ken daga;+ ngem ni Jehova isunto ti pagkamangan maipaay iti ilina,+ ken sarikedked maipaay iti annak ti Israel.+
17 Ket kasapulanto a maammuanyo a siak ni Jehova a Diosyo,+ nga agtataeng iti Sion a nasantuan a bantayko.+ Ket ti Jerusalem agbalinto a nasantuan a disso;+ ket no maipapan kadagiti ganggannaet, saandanton a lumasat kenkuana.+
18 “Ket mapasamakto iti dayta nga aldaw a dagiti bantay mangitaredteddanto iti nasam-it nga arak,+ ket dagiti mismo a turod pagayusanto ti gatas, ket dagiti mismo a pagayusan ti waig ti Juda pagayusanto amin ti danum. Ket manipud iti balay ni Jehova addanto rummuar nga ubbog,+ ket padanumannanto ti naapres a ginget ti Kaykayo nga Akasia.+
19 No maipapan iti Egipto, agbalinto a langalang a rebbek;+ ket no maipapan iti Edom, agbalinto a let-ang ti langalang a rebbek,+ gapu iti kinaranggas iti annak ti Juda, nga iti dagada nagibukbokda iti awanan basol a dara.+
20 Ngem no maipapan iti Juda, mapagnaedanto agingga iti tiempo a di nakedngan,+ ken ti Jerusalem agingga iti kinapkaputotan.+
21 Ket ibilangkonto nga awanan basol ti darada a saanko idi nga imbilang nga awanan basol;+ ket ni Jehova agtaengto iti Sion.”+
