2 Timoteo 1:1-18
1 Ni Pablo, maysa nga apostol ni Kristo Jesus babaen ti pagayatan ti Dios+ maitunos iti kari ti biag+ a naikaykaysa ken Kristo Jesus,+
2 agpaay ken Timoteo, maysa a dungdungnguen nga anak:+
Maadda koma ti di kaikarian a kinamanangngaasi, asi, talna manipud iti Dios nga Ama ken ni Kristo Jesus nga Apotayo.+
3 Agyamanak iti Dios, a pangipapaayak ti sagrado a panagserbi+ kas iti inaramid dagidi ammak+ ken buyogen ti nadalus a konsiensia,+ a saanak a pulos namingga a manglaglagip kenka kadagiti ararawko,+ rabii ken aldaw
4 nga il-iliwek a makitaka,+ bayat a malaglagipko dagiti luam, tapno mapnoak iti rag-o.
5 Ta malagipko ti adda kenka a pammati+ nga awan aniaman a panaginsisingpetna,+ ken immuna a nagtaeng ken ni apongmo a baket a Loida ken ni Eunice nga inam, ngem agtalekak nga adda met kenka.
6 Maigapu met laeng itoy ipalagipko kenka a parangrangem a kas apuy+ ti sagut+ ti Dios nga adda kenka babaen ti panangipatayko kenka kadagiti imak.+
7 Ta ti Dios inikkannatayo saan a ti espiritu ti kinatakrot,+ no di ket ti pannakabalin+ ken ti ayat ken ti kinasimbeng ti panunot.+
8 Gapuna dika ibain ti pangsaksi maipapan iti Apotayo,+ saannak met nga ibain kas maysa a balud maigapu kenkuana,+ no di ket makipasetka iti panagsagaba+ iti dakes maipaay iti naimbag a damag maitunos iti pannakabalin ti Dios.+
9 Insalakannatayo+ ken inayabannatayo iti nasantuan a panangayab,+ saan a gapu kadagiti aramidtayo,+ no di ket gapu iti bukodna a panggep ken di kaikarian a kinamanangngaasi. Naited daytoy kadatayo mainaig ken Kristo Jesus sakbay dagiti napaut a tiempo,+
10 ngem ita napagbalinen a silalawag a makita babaen ti pannakaiparangarang+ ti Manangisalakantayo, ni Kristo Jesus, a namagpatingga iti ipapatay+ ngem nangipaay ti lawag+ iti biag+ ken di panagrupsa+ babaen ti naimbag a damag,+
11 a nakadutokak kas manangaskasaba ken apostol ken mannursuro.+
12 Maigapu met laeng itoy sagsagabaek met+ dagitoy a banag, ngem saanak a mabain.+ Ta ammok daydiay pinatik, ket agtalekak a kabaelanna a saluadan+ ti intalekko kenkuana agingga iti dayta nga aldaw.+
13 Itultuloymo a salimetmetan ti pagtuladan iti makapasalun-at+ a sasao a nangngegmo kaniak agraman ti pammati ken ayat a mainaig ken Kristo Jesus.+
14 Daytoy nasayaat a naitalek+ saluadam babaen ti nasantuan nga espiritu nga agtataeng kadatayo.+
15 Ammom daytoy, nga amin a lallaki idiay distrito ti Asia+ timmallikudda kaniak.+ Mairaman kadakuada da Figelo ken Hermogenes.
16 Ti Apo ipaayna koma ti asi iti sangakabbalayan ni Onesiforo,+ agsipud ta masansan nga inyegannak iti pakabang-aran,+ ket saanna nga imbain dagiti kawarko.+
17 Iti kasupadina, idi isu adda idiay Roma, sigaganetget a sinapulnak ket nasarakannak.+
18 Ti Apo ipaayna koma kenkuana nga isu makasarak iti asi+ manipud ken Jehova iti dayta nga aldaw.+ Ket ammom la unay dagiti amin a panagserbi nga impaayna idiay Efeso.
