1 Pedro 5:1-14
5 Gapuna, kadagiti lallakay iti nagtetengngaanyo ipaayko daytoy a pammagbaga, ta maysaak met a lakay+ a mairaman kadakuada ken maysa a saksi+ kadagiti panagsagaba ti Kristo, maysa a makiraman uray pay iti dayag a maipanayag:+
2 Ipastoranyo+ ti arban ti Dios+ nga adda iti aywanyo, saan a mapilpilit, no di ket situtulok;+ saan met nga iti panagayat iti nakusit a gunggona,+ no di ket sigagagar;
3 saan met a kas agturay+ kadagidiay tawid ti Dios,+ no di ket agbalinkayo a pagulidanan ti arban.+
4 Ket inton ti panguluen a pastor+ naiparangarangen, awatenyonto ti di agkupas+ a korona ti kinadayag.+
5 Iti umasping a pamay-an, dakayo nga ub-ubing a lallaki, agpasakupkayo+ kadagiti lallakay. Ngem dakayo amin bariksanyo ti bagbagiyo iti kinapakumbaba iti panagpampanunot maipaay iti maysa ken maysa,+ agsipud ta ti Dios busorenna dagiti natangsit, ngem mangted iti di kaikarian a kinamanangngaasi kadagiti napakumbaba.+
6 Agpakumbabakayo, ngarud, iti sidong ti mannakabalin nga ima ti Dios, tapno itan-oknakayo iti naikeddeng a tiempo;+
7 bayat nga iyallatiwyo kenkuana ti isuamin a pakaringgoranyo,+ agsipud ta isu maseknan kadakayo.+
8 Agtalinaedkayo a sipupuot, managbantaykayo koma.+ Ti kabusoryo, ti Diablo, agsursursor a kasla leon a ngumerngernger, nga agsapsapul iti alun-onenna.+
9 Ngem agtakderkayo a bumusor kenkuana,+ natibker iti pammati, yantangay ammoyo a ti isu met laeng a bambanag a sagsagabaen maitungtungpalda iti intero a timpuyog ti kakabsatyo ditoy lubong.+
10 Ngem, kalpasan ti panagsagabayo iti apagbiit,+ ti Dios ti isuamin a di kaikarian a kinamanangngaasi, a nangayab kadakayo iti agnanayon a kinadayagna+ a maikaykaysa+ ken Kristo, turposennanto a mismo ti panagsanayyo, patibkerennakayto,+ papigsaennakayto.+
11 Maipaay koma kenkuana ti pannakabalin+ iti agnanayon. Amen.
12 Babaen ken Silvano,+ a kabsat a matalek, kas iti panangibilangko kenkuana, nagsuratak kadakayo iti sumagmamano a sasao,+ tapno mangipaayak iti pammaregta ken napasnek a panangsaksi nga isu daytoy ti pudno a di kaikarian a kinamanangngaasi ti Dios; nga iti dayta agtakderkayo a sititibker.+
13 Daydiay adda idiay Babilonia,+ napili a kas kadakayo, ipaw-itna dagiti kablaawna kadakayo, ken kasta met ni Marcos+ nga anakko.
14 Agkikinnablaawkayo iti agep ti ayat.+
Maadda koma ti talna kadakayo amin a naikaykaysa ken Kristo.+
