1 Juan 2:1-29
2 Babassit nga annakko, isursuratko kadakayo dagitoy a banag tapno saankayo a makaaramid iti basol.+ Ket kaskasdi, no ti asinoman makaaramid iti basol, addaantayo iti katulongan+ iti Ama, ni Jesu-Kristo, daydiay nalinteg.+
2 Ken isu ket pangikappia+ a sakripisio+ maipaay kadagiti basoltayo,+ ngem saan a maipaay kadatayo+ laeng no di ket maipaay met iti intero a lubong.+
3 Ket babaen itoy addaantay ti pannakaammo nga isu naam-ammotayo, a dayta ket, no itultuloytay a tungpalen dagiti bilinna.+
4 Ti agkuna: “Isu naam-ammok,”+ ket kaskasdi a saanna a tungtungpalen dagiti bilinna,+ naulbod, ket ti kinapudno awan iti daytoy a tao.+
5 Ngem siasinoman a mangtungpal iti saona,+ pudno unay nga iti daytoy a tao nagbalin a naan-anay ti ayat ti Dios.+ Babaen itoy addaantay iti pannakaammo a naikaykaysatayo kenkuana.+
6 Ti agkuna nga isu agtalinaed a naikaykaysa+ kenkuana pagrebbenganna met a mismo ti agtultuloy a magna kas iti pannagna dayta.+
7 Dungdungnguen, isursuratko kadakayo, saan a ti maysa a baro a bilin, no di ket ti maysa a daan a bilin+ nga adda kadakayon nanipud idi damo.+ Daytoy daan a bilin isu ti sao a nangngegyo.
8 Manen, isursuratko kadakayo ti maysa a baro a bilin, maysa a kinapudno a napaypayso iti kasasaadna ken kadakayo, agsipud ta ti kinasipnget+ aglabas ket ti pudno a lawag+ agsilsilnagen.
9 Ti agkuna nga isu adda iti lawag ket kaskasdi a guraenna+ ni kabsatna adda iti kinasipnget agingga iti agdama.+
10 Ti agayat iti kabsatna agtalinaed iti lawag,+ ket awan ti pakaigapuan ti pannakaitibkol iti kasasaadna.+
11 Ngem ti manggura iti kabsatna adda iti kinasipnget ken magmagna iti sipnget,+ ket saanna nga ammo no sadino ti papananna,+ agsipud ta ti sipnget kinullaapanna dagiti matana.
12 Agsursuratak kadakayo, babassit nga annak, agsipud ta dagiti basolyo napakawandan kadakayo maipagapu iti naganna.+
13 Agsursuratak kadakayo, amma, agsipud ta naam-ammoyo daydiay adda nanipud idi punganay.+ Agsursuratak kadakayo, agtutubo a lallaki,+ agsipud ta naparmekyo daydiay nadangkes.+ Agsuratak kadakayo, ubbing,+ agsipud ta naam-ammoyo ti Ama.+
14 Agsuratak kadakayo, amma,+ agsipud ta naam-ammoyo daydiay adda nanipud idi punganay.+ Agsuratak kadakayo, agtutubo a lallaki, agsipud ta napigsakayo+ ket ti sao ti Dios agtalinaed kadakayo+ ken naparmekyo daydiay nadangkes.+
15 Dikay ayaten ti lubong wenno uray ti bambanag nga adda iti lubong.+ No ti asinoman ayatenna ti lubong, ti ayat ti Ama awan kenkuana;+
16 agsipud ta amin a banag iti lubong+—ti derrep ti lasag+ ken ti derrep dagiti mata+ ken ti panangiparammag iti sanikua a pagbiag ti maysa+—saan nga agtaud iti Ama, no di ket agtaud iti lubong.+
17 Kanayonanna pay, ti lubong aglabas ken kasta met ti tarigagayna,+ ngem ti agaramid iti pagayatan+ ti Dios agtalinaed iti agnanayon.+
18 Ubbing, daytoy ti kamaudianan nga oras,+ ket, kas iti nangngegyo nga umay ti antikristo,+ uray pay ita timpuaren ti adu nga antikristo;+ manipud itoy a kinapudno magun-odantayo ti pannakaammo a daytoy ti kamaudianan nga oras.
19 Rimmuarda manipud kadatayo, ngem saanda a kas kadatayo;+ ta no isuda ket kas kadatayo, nagtalinaedda koma a kaduatayo.+ Ngem rimmuarda tapno maipakita a saan nga amin ket kas kadatayo.+
20 Ket addaankayo iti pannakapulot manipud iti daydiay nasantuan;+ addaankayo amin iti pannakaammo.+
21 Agsuratak kadakayo, saan a gapu ta saanyo nga ammo ti kinapudno,+ no di ket gapu ta ammoyo dayta,+ ken gapu ta awan ti ulbod nga agtaud iti kinapudno.+
22 Siasino ti naulbod no di daydiay mangilibak a ni Jesus isu ti Kristo?+ Isu daytoy ti antikristo,+ daydiay mangilibak iti Ama ken iti Anak.+
23 Tunggal maysa a mangilibak iti Anak awan met kenkuana ti Ama.+ Ti mangipudno+ iti Anak adda met kenkuana ti Ama.+
24 No maipapan kadakayo, agtalinaed koma kadakayo dayta a nangngegyo nanipud idi damo.+ No dayta a nangngegyo nanipud idi damo agtalinaed kadakayo, mataginayonkayto met a naikaykaysa+ iti Anak ken naikaykaysa iti Ama.+
25 Kanayonanna pay, daytoy ti naikari a banag nga inkarina kadatayo, ti biag nga agnanayon.+
26 Dagitoy a banag isuratko kadakayo maipapan kadagidiay mangpadpadas a mangyaw-awan kadakayo.+
27 Ket no maipapan kadakayo, ti pannakapulot+ nga inawatyo kenkuana agtalinaed kadakayo, ket saanyo a kasapulan ti asinoman a mangisuro kadakayo;+ ngem, no kasano a ti pannakapulotyo manipud kenkuana isursuronakayo maipapan iti amin a bambanag,+ ket pudno+ ken saan nga ulbod, ket kas iti insurona kadakayo, agtalinaedkayo a naikaykaysa+ kenkuana.
28 Gapuna ita, babassit nga annak,+ agtalinaedkayo a naikaykaysa+ kenkuana, tapno inton isu maiparangarang+ maaddaantayto iti wayawaya nga agsao+ ket saantayo a mabainan kenkuana inton kaaddana.+
29 No ammoyo nga isu nalinteg,+ magun-odanyo ti pannakaammo a ti tunggal maysa a mangannurot iti kinalinteg ket nayanak manipud kenkuana.+
