Ove nomukweṋu ngu mwa kupasana tji mwa utu ehupo reṋu pamwe, mape kara omauzeu pekepeke. Owo mape ya aye etwa i omuano mbu mu ripura, oumune weṋu mbwa haṋika nomuano mbu mu ungura oviṋa mena romuano mbu mwe kurisiwa. Poo mape ya aye etwa i ovandu varwe poo ovitjitwa mbi mu hiya undjira ko.

Povikando tjiva mape ya atu ha vanga okutara koviṋa otja tji vi ri, posi yokutja Ombeibela i tu rakiza kutja ngatu zengurure omauzeu wetu. (Mateus 5:23, 24) Indu tji wa ṱakamisa omirari vyOmbeibela, ove mo munu omazengururiro omasemba komauzeu woye.

OMBEIBELA MAI TJA: ‘Oviṋa avihe mbi tjitwa mouye vi tjitwa moruveze Ndjambi ndwa twa po. Eye wa twa po . . . oruveze rwokuhungira.’ (Omuzuvarise 3:1, 7) Kondjeye okutwa po oruveze rwokuhungirira kouzeu weṋu. Raera omukweṋu oumune mbu na wo ohunga nepu ku mamu hungirire. Aruhe ‘hungira ouatjiri’ ku nomukweṋu ngu mwa kupasana. (Ovaefese 4:25) Nandarire kutja wa pindike, kondja kutja amu ha pose. Eziriro epore mari mu vatere kutja otjihungiriro tjeṋu atji ha rire otjiposa otjinene.—Omiano 15:4; 26:20.

Nandarire kutja konakukupasana nepu romukweṋu, omambo woye ngaye rire omananyuṋe nomatjate, nu raisa orusuvero nondengero komukweṋu. (Ovakolose 4:6) Kondjeye kutja mu zengurure ouzeu weṋu tjimanga nu amu isa okuhungira kumwe.—Ovaefese 4:26.

OVIṊA MBI MO YENENE OKUTJITA:

• Twapo oruveze orusemba kutja mu hungire ohunga nouzeu weṋu

• Tje ri ove ngu mo sokupuratena, kondja kutja o ha wire omukweṋu momambo. Oruveze rwoye rwokuhungira maru ya

OMBEIBELA MAI TJA: “Suverasaneye nomutima watjiri otja ovakriste, nu mu ramange okuyozikasana.” (Ovaroma 12:10) Omuano mbu mo puratene komukweṋu omunanḓengu tjinene. Kondja okuzuva oumune womukweṋu nawa ‘nokuṱirasana ondjenda . . . nu auhe nge riwise kehi yomukwao.’ (1 Petrus 3:8; Jakobus 1:19) O tjiti aayo mo puratene ngunda au hina okupuratena. Tji mo yenene, isa oviṋa mbi mo ungura nu u yandje ombango yoye aihe komukweṋu, poo mu ningira kutja mu hungire kombunda. Indu tji we ripurire komukweṋu ngu mwa kupasana otjomundu ngu mu ri munda umwe, ove kamoo “hakahana okupindika.”—Omuzuvarise 7:9.

OVIṊA MBI MO YENENE OKUTJITA:

• Puratena nombango aihe, nandarire kutja oviṋa mbi mo zuu kavi nakukutjatera

• Puratena kutja omukweṋu ma vanga okutja vi. Tara komuano mbu ma hungire nombosiro yeraka re

OMBEIBELA MAI TJA: “Ungura, nu mo munu omahupiro; tji mo haama amo kara pokuhungira mo syonapara.” (Omiano 14:23) Okuzuvasana ohunga nomuano wokuzengurura ouzeu kaku ya yenena, nungwari mamu sokutjita oviṋa mbi mwa zuvasana kutja mamu tjiti. Okutjita nao mape ya aku kamburire mo oviungura ovizeu nozongondjero ozengi, posi yokutja maku mu vatere. (Omiano 10:4) Indu tji mamu ungura kumwe nawa, mamu kara “nondjambi ombwa” moviungura vyeṋu ovizeu.—Omuzuvarise 4:9.

OVIṊA MBI MO YENENE OKUTJITA:

• Tyeye kutja ovikeṋa amuyevari mbi mamu sokutjita kutja mu zengurure ouzeu weṋu

• Otja oruveze tji maru kayenda tareye kutja mamu yenenisa vi oviṋa mbi mwa zuvasana