Twende kovidio oini

Twende komurya

ORUPA 5

Mo yenene vi okuṱiza ohange pokati koye novazamumwe voye?

Mo yenene vi okuṱiza ohange pokati koye novazamumwe voye?

“Otji mamu sokukara . . . nounyaṋutima nomerisusuparisiro noupore nomuretima.”—Ovakolose 3:12.

Orukupo ombutiro yeṱunḓu epe. Nandarire kutja ove mo kayenda komurungu okusuvera nokutenga ovanene voye, omukweṋu ngu mwa kupasana nambano ongu ri omundu omunanḓengu tjinene kove kombanda yehi. Otjiṋa hi mape ya atji rire otjizeu kovazamumwe voye okuyakura. Nungwari omirari vyOmbeibela mavi yenene okukuvatera kutja u ṱize ohange pokati koye novazamumwe voye ngunda amo ungura oukukutu okutunga eṱunḓu roye epe.

1 KARA NOUMUNE OUWA OHUNGA NOVAZAMUMWE VOYE

OMBEIBELA MAI TJA: “Yozika iho na nyoko.” (Ovaefese 6:2) Kainatja kutja u nozombura ngapi, ove aruhe mo hepa okuyozika ovanene voye. Tjiwa kutja, omukweṋu ngu mwa kupasana otjomuatje ngu novanene, eye wina u hepa okuyandja ombango kovanene ve. “Orusuvero karu neruru,” okutja o munu ko ouzeu omukweṋu tje noupanga novazamumwe ve.—1 Ovakorinte 13:4; Ovagalate 5:26.

OVIṊA MBI MO YENENE OKUTJITA:

  • Nakaura okuhungira oviṋa tjimuna, “Ovazamumwe voye aruhe ve muna ouvi mu ami” poo “Hi notjiṋa tji mbi tjita tjitji tjata ku nyoko”

  • Kondja okutara koviṋa otja koumune womukweṋu ngu mwa kupasana

2 TOORA OMERIZIRIRA WORUKUPO RWOYE

OMBEIBELA MAI TJA: “Omurumendu opu ma zu okuisa ihe na ina na kakatere komukazendu we, nowo mave rire onyama imwe.” (Genesis 2:24) Ove tji wa kupu poo tji wa kupwa, ovanene voye mape ya ave ripura kutja ove ngunda oove omerizirira wawo nu otjiṋa hi mape ya atji tjiti kutja ve vange okukara norupa morukupo rweṋu.

Matji zu kove nomukweṋu ngu mwa kupasana okutya kutja omoviṋa viṋe ovanene veṋu mu mave yenene okukara norupa morukupo rweṋu na mu ve raere norusuvero. Mamu yenene okurira ovapaturuke na mu hungire oviṋa osemba nokuhina okuraisa ongaro ombi. (Omiano 15:1) Omerisusuparisiro, omutima omuwa nomuretima mavi mu vatere kutja mu tunge oupanga ouwa kuna ovazamumwe veṋu nokutja mu kayende komurungu ‘okuzarasana norusuvero.’—Ovaefese 4:2.

OVIṊA MBI MO YENENE OKUTJITA:

  • Indu tji mo munu kutja ovazamumwe veṋu ve hita moviṋa vyeṋu tjinene, hungira ku nomukweṋu kehi yongaro ombore

  • Zuvasaneye kutja oviṋa mbi mamu vi zengurura vi