“Tya omeripuriro woye puna ovandu.”—Omiano 20:18.

Atuhe tu hepa ovimariva kutja tu hupise omaṱunḓu wetu. (Omiano 30:8) Nakombanda yanao, ‘ovimariva vi yandja ondjamo.’ (Omuzuvarise 7:12) Otjovakupasane mape ya a rire ouzeu okuhungirira kovimariva, posi yokutja amu yandjere kutja ovimariva vi ete omauzeu morukupo rweṋu. (Ovaefese 4:32) Ovakupasane ve sokukarasana nongamburiro nave ungura kumwe indu tji mave tye kutja ovimariva mavi sokuungurisiwa vi.

 1 RIRONGERISEYE NAWA

OMBEIBELA MAI TJA: “Owaṋi mokati keṋu tja vanga okutunga otjiretundu, rutenga ngu hi nakukara pehi okusasaneka kutja omatungiro maye ningire tjike, a mune kutja ovimariva vingapi mbi ma hepa okuyenenisa omatungiro ngo?” (Lukas 14:28) Ohepero tjinene okutya pamwe kutja ovimariva vyeṋu mamu vi ungurisa vi. (Amos 3:3) Tareye kutja mamu hepa okuranda tjike nokutja mu novimariva vingapi mbi mamu yenene okuungurisa. (Omiano 31:16) Nandarire kutja mu novimariva vyokuranda otjiṋa tjorive, kape nakuheya kutja mamu sokutjiranda. Kondjeye kutja amu ha kara nozondjo. Unguriseye ovimariva mbi mu na vyo uriri.—Omiano 21:5; 22:7.

OVIṊA MBI MO YENENE OKUTJITA:

  • Indu tji mwa hupu novimariva ovingi komaandero womueze, tyeye pamwe kutja mamu vi ungurisa vi

  • Ovimariva vyeṋu tji vi hi nokuyenena koviṋa mbi mwa tye, kondjeye okuhendurura oviṋa mbi mu suta poo mbi mu randa momueze. Okutara kotjihorera, moruveze rwokukarya kozonganda zomariro, zikeye ovikurya vyeṋu oveni ponganda

 2 KARA NOUATJIRI NU KARA NOUMUNE OUWA OHUNGA NOVIMARIVA

OMBEIBELA MAI TJA: “Ondandero yetu okwo ngwi okutjita pu pe ri osemba, nu kakomurungu waMuhona porwe, nungwari wina komurungu wovandu.” (2 Ovakorinte 8:21) Raera omukweṋu ouatjiri kutja u sutwa ovimariva vingapi nokutja ovimariva vingapi mbi u ungurisa.

Aruhe hungira ku nomukweṋu tji mo toora ozondando ozonene ohunga novimariva vyeṋu. (Omiano 13:10) Okuhungirira kovimariva maku mu vatere kutja mu kare nohange morukupo rweṋu. Vara ovimariva mbi u sutwa otjovimariva vyeṱunḓu nungwari katjovimariva vyoye erike.—1 Timoteus 5:8.

OVIṊA MBI MO YENENE OKUTJITA:

  • Zuvasaneye kutja ovimariva vingapi omundu auhe mbi ma yenene okuungurisa nokuhina okuraera omukwao

  • Amu undju ngandu tji pa kara ouzeu amaamu kahungirira kovimariva