“Ihi tji tja kutwa kumwe i Ndjambi, ape ha ningi omundu ngu me tji haṋa.”—Markus 10:9

Jehova u undjira ko kutja tu rire ovandu “ovaṱakame.” (Epsalme 18:25) Ouṱakame otjiṋa otjinahepero tjinene morukupo rwoye mena rokutja nokuhina ouṱakame kamaape kara ongamburiro. Tu hepa okukara nongamburiro kutja orusuvero rwetu ru kurire ko.

Kundino, ouṱakame morukupo otjiṋa tji tji ha munika rukwao. Kutja u tjevere orukupo rwoye, pe noviṋa vivari mbi mo sokutjita.

 1 ORUKUPO RWOYE NGARU RIRE OTJIṊA OTJINANḒENGU TJINENE MEHUPO ROYE

OMBEIBELA MAI TJA: ‘Mamu sokutoorora imbi mbi ri oviwaviwa.’ (Ovafilipi 1:10) Orukupo rwoye itjimwe tjoviṋa ovinanḓengu tjinene mehupo roye. Orwo ru hepa okutuwa poruveze orutenga.

Jehova u vanga kutja u yandje ombango komukweṋu ngu mwa kupasana nu mu ‘yorokere omuinyo’ pamwe. (Omuzuvarise 9:9) Jehova u kahurura nawa kutja ove kosokuimbirahi omukweṋu ngu mwa kupasana, nungwari mamu sokupaha omiano vyokupasana ondjoroka. (1 Ovakorinte 10:24) Tjita kutja omukweṋu ma mune kutja we mu suvera nokutja u mu hepa tjinene.

OVIṊA MBI MO YENENE OKUTJITA:

  • Kondja kutja u twapo oruveze rwokukara puna omukweṋu, nu u mu pe ombango yoye aihe

  • Moruveze rwokuripura ohunga na “ami” ripura ohunga na “eṱe”

 2 TJEVERA OMUTIMA WOYE

OMBEIBELA MAI TJA: “Auhe ngu ma tara komukazendu noruhuro eye wa tura ondjo yokukatuka orukupo na ye momutima we.” (Mateus 5:28) Indu omundu tja kara pokuripurira korukatuko, pa sana aayo eye ma katuka orukupo.

Jehova u tja ngatu ‘tjevere omitima vyetu.’ (Omiano 4:23; Jeremia 17:9) Kutja u tjite nao, ove mo sokutjevera oviṋa ku mo tara. (Mateus 5:29, 30) Horera komurumendu omuṱakame Job, ngwa tjita omakwizikiro wokutja a ha tara kovakazendu varwe noruhuro. (Job 31:1) Kondja kutja o ha roro okutara koviṋa vyakamuzu. Nu kondja kutja o ha utu oupanga worusuvero kuna omundu warwe ngu he ri ingwi ngu mwa kupasana.

OVIṊA MBI MO YENENE OKUTJITA:

  • Raisira varwe kutja tjiri oove omuṱakame komukweṋu ngu mwa kupasana

  • Ripurira koumune womukweṋu nu u hakahane okuyandisa oupanga ngamwa mbu mau hihamisa omukweṋu